რა მესიჯს უგზავნის ნუცა ბუზალაძე თაყვანისმცემელ ბიჭებს

იურმალის კონკურსი "ახალი ტალღა" საქართველოს გამარჯვებით დასრულდა. პირველი ადგილი ქართველმა კონკურსანტმა, 17 წლის ნუცა ბუზალაძემ მოიპოვა. ის სამივე ტურის აბსოლუტური ლიდერი იყო. ქართველი მომღერლისთვის ამ კონკურსზე ბევრი გამონაკლისი დაუშვეს, მათ შორის – სცენაზე შავი კაბით გამოსვლა. არადა შავი ფერი "ძინტარის" სცენაზე კონკურსანტებისათვის ოფიციალურად აკრძალულია.
ნუცასათვის იურმალა პირველი საერთაშორისო კონკურსი და შესაბამისად პირველი საერთაშორისო აღიარება იყო. მანამდე ის სატელევიზიო პროექტ "ერთი ერთში" გამოჩნდა, სადაც სრულიად უცნობმა გოგონამ თავისი ნიჭით ბევრი პროფესიონალი დაჩრდილა. ნუცაზე ხშირად ამბობდნენ, რომ ის ბერა ივანიშვილის მფარველობის ქვეშ იყო, თუმცა იურმალაში ეს ნაკლებად ჩანდა. ვარსკვლავობისაკენ გზა ნუცას პროდიუსერმა კახა მამულაშვილმა, იგივე მამულიჩამ და მომღერალმა ლელა წურწუმიამ გაუკვალეს.
ნუცას წინაშე ახლა 50 ათასი ევრო და ბევრი პერსპექტივაა. მას უკვე ამზადებენ ევროვიზიისთვის. რუსული შოუბიზნესის პროდიუსერებიც ცდილობენ, ქართველ კონკურსანტს მომგებიანი წინადადებები შესთავაზონ. ლელა და მამულიჩა ნუცას გვერდში კიდევ დიდხანს ეყოლებიან. ერთადერთი, რაც ნუცას გეგმებში არ შედის, ეს სიყვარულია. მისი პროდიუსერი, მამულიჩა, ყველა ბიჭს აფრთხილებს, რომ ნუცას ახლოსაც არ გაეკარონ. "სარკე" "ახალი ტალღის" ფავორიტს და მის პროდიუსერს კონკურსის დამთავრებიდან მეორე დღეს ესაუბრა.
– კახა, პირველ რიგში, გილოცავთ წარმატებას! კონკურსის რა ეტაპზე დარწმუნდით, რომ პირველობა ნუცას ეკუთვნოდა?
კახა: გმადლობთ! ამის მოლოდინი იყო, მაგრამ ფსიქოლოგიურად ყველაფრისთვის ვიყავით მზად, მათ შორის – ყველაზე ცუდისთვისაც. დასაკარგი არაფერი გვქონდა, რაც იქნებოდა, იქნებოდა. მთავარი იყო, ნუცას კარგად ემღერა და ასეც მოხდა. სცენაზე გავიდა და ყველაფერს საუკეთესოდ გაართვა თავი.
ჩვენ მაქსიმალისტები ვართ. ლელა დარწმუნებით ამბობდა, რომ მოვიგებდით. ასე ამბობდა დუეტ "ჯორჯიას" დროსაც და მაშინ მისი პროგნოზის ბევრს არ სჯეროდა. ახლა ლელას ვეუბნებოდი, ნუ ამბობ, რომ მოვიგებთ, თორემ შენი ნათქვამი თუ არ გამართლდება, მერე წამოგვაძახებენ–მეთქი. ლელა კი დარწმუნებით მეუბნებოდა, ვიცი ნუცას შესაძლებლობები და დარწმუნებული ვარ, მოიგებსო.
დუეტ "ჯორჯიას" დროს რომელი შემოქმედებითი ჯგუფიც ვიყავით იურმალაზე, ვეცადეთ, ახლაც იმავე შემადგენლობა ვყოფილიყავით – მაია ყიფიანი, სოფო ხალვაში, მიშა ძოძუაშვილი. ერთ–ერთი სალონიდან სპეციალურად ჩვენი ქალებისთვის ჩამოვიდა სტილისტი გიორგი, რომელიც მათ უვლიდა. ჩვენ გვერდით იყო ნუცას დედა, ძალიან კეთილი და ალალი ქალი. მე მგონი, იურმალაში ნუცას დედა უფრო უყვართ, ვიდრე ნუცა. ისეთი დადებითი პიროვნებაა, ყველას ეფერებოდა და ამხნევებდა.
– როცა ნუცასთან თანამშრომლობა დაიწყეთ, ყველაზე მეტი მუშაობა რაზე დაგჭირდათ – იმიჯზე, ვოკალზე, პლასტიკაზე, რეპერტუარზე?
– 3 თვე შეუსვენებლივ ვშრომობდით. გვინდოდა, ყველაფერი საუკეთესოდ ყოფილიყო. მეტი აქცენტი სიმღერაზე გვქონდა გადატანილი, დანარჩენი მეორეხარისხოვანი იყო. ჩვენი მთავარი მიზანი გახლდათ, რომ ნუცას პრობლემებზე არ ეფიქრა. ასეც მოხდა, ისეთი პირობები შევუქმენით, რომ იურმალაში მომზადებული წამოვიდა. აქაც დილიდან საღამომდე თავდაუზოგავად შრომობდა.
– როგორი იყო თქვენი ემოციები, როცა მას გრან პრი გადასცეს?
– ემოცია რა არის, აღარ ვიცი, სრულიად დაცლილი ვარ!
– ტელეკადრებში ჩანდა, რომ კონკურსის განმავლობაში ძალიან ნერვიულობდით.
– არ ვიცი, რატომ მაჩვენებდნენ ეკრანზე ასე აქტიურად. თავიდანვე ძალიან დაძაბული ვიყავი, რადგან არ მომწონდა, ჟიურის წევრი ფილიპ კირკოროვი უკრაინელი კონკურსანტის პროდიუსერიც რომ იყო. ნუცას დედასაც ვუთხარი, თუ ქულები დაგვაკლეს, მისი დამსახურება იქნება–მეთქი. გული მიგრძნობდა, რომ მესამე ტურში ნუცა თუ მაგრად იმღერებდა, შანსი არ იყო, ფილიპს 11 ქულა არ აეწია. ასეც მოხდა, ნუცამ კირკოროვიც აიძულა, მაღალი ქულა აეწია.
– სამომავლოდ გაგრძელდება თქვენი და ნუცას ტანდემი?
– რასაკვირველია, ჩვენი თანამშრომლობა არ არის ერთჯერადი. რუს პროდიუსერებთან მოლაპარაკებებს ვაწარმოებთ, საქართველოში რომ დავბრუნდებით, მერე ჩამოვყალიბდებით ყველაფერზე. წინ დიდი გეგმები გვაქვს, მაგრამ ამაზე წინასწარ ვერ ვილაპარაკებ.

– შესაძლოა, რომ მომდევნო კონკურსი ევროვიზია იყოს?
– რუს პროდიუსერებთან მოლაპარაკებებს რომ დავამთავრებთ, მე და ნუცა დავსხდებით და ყველაფერს გადავწყვეტთ. რა თქმა უნდა, მიფიქრია ამ საკითხზეც. ევროვიზია პოლიტიკური კონკურსია და უნდა მოვიფიქროთ, რამდენად გვჭირდება იქ გასვლა. თანაც ევროვიზიაში მონაწილეობა მარტო ჩემსა და ნუცაზე არ არის დამოკიდებული, ამას საზოგადოებრივი მაუწყებელი წყვეტს და კონკურსანტს ის არჩევს. ვნახოთ. ჯერ უნდა დავისვენოთ.
– ნუცას ვარდისფერი კაბა, რომელიც მეორე ტურში ეცვა, თბილისში ძალიან გააკრიტიკეს. ვინ შეურჩია ეს სამოსი?
– ამ შემთხვევაში, მინდა გითხრათ, რომ ლელა არაფერ შუაში იყო, სხვა არჩევანი არ ჰქონია, ვერც სხვა კაბის ყიდვა მოვასწარით. მესამე ტურში ნუცას შავი კაბა რომ სცმოდა, ლელამ ამის გამო იომა, რადგან შავი სამოსის ჩაცმა იქ აკრძალულია.
– როგორი იყო რუსული ესტრადის ქართველი მომღერლების – თამარ გვერდწითელის, სოსო პავლიაშვილის, ქეთა თოფურიას, ძმები მელაძეების შეფასებები?
– ნუცა ყველა მათგანს ძალიან მოეწონა. ამბობდნენ, ემოციებით სავსე გოგოაო. მთლიანად რუსულმა ესტრადამ დიდი სიმპათიები გამოხატა ნუცას მიმართ. განსაკუთრებით მიულოცეს სოსო პავლიაშვილმა, ძმებმა მელაძეებმა. ბანკეტზე მოვიდა აგუტინი და მიულოცა. კრუტოიმ ბევრი თბილი სიტყვა გვითხრა. ლუბა უსპენსკაია ჩაეხუტა და მანაც ბევრი საქებარი რამ უთხრა. ყველა ეუბნებოდა, პირველივე ტურიდან მივხვდით, რომ კარგი მომღერალი იყავიო.
– ნუცამ ბევრი თაყვანისმცემელი შეიძინა. სიყვარულში ხომ არ გამოუტყდა ვინმე?
– ქუჩაში რომ გადის, დიდი პოპულარობით სარგებლობს, მასთან ერთად სურათებს იღებენ, ავტოგრაფებს სთხოვენ. არ დამანახოთ კაცი თაყვანისმცემლები! თბილისში ვთხოვ ყველას, რომ თავი დაანებონ ბავშვს!
– კულუარებში რას ამბობდნენ, რას უწინასწარმეტყველებდნენ ნუცას?
– პირველივე ტურში ლიდერობდა, ჟიურის ფავორიტი გახდა, თუმცა დაძაბულობა ბოლომდე იგრძნობოდა.
– საქართველოს მთავრობის წარმომადგენლებმა თუ მიულოცეს ნუცას გამარჯვება?
– არა. საქართველოს საელჩოს წარმომადგენლები იყვნენ ოჯახებით მოსული და მათ მიულოცეს.
...
ნუცა ბუზალაძისთვის იურმალა უკვე ტკბილი მოგონებაა. კონკურსზე გადაღებულ ფოტოებს ათვალიერებს და იმ ბედნიერ წუთებს იხსენებს, როცა ნაბიჯ–ნაბიჯ უახლოვდებოდა წარმატებას.
– ნუცა, გილოცავთ გამარჯვებას! ამ წარმატებამდე ალბათ მოგიხდათ შიშის დაძლევა, საკუთარ თავში რაღაცეების გადალახვა.
– რასაკვირველია, იყო შიში, რადგან არ ვიცოდი, კონკურსი რა შედეგებით დასრულდებოდა. პირველ და მეორე ტურში ისე არ მინერვიულია, როგორც მესამეში. თავიდან ქულებით არც დავინტერესებულვარ, ჩემი მთავარი მიზანი იყო, რომ კარგად მემღერა. მესამე ტურში კი ყველაზე დიდი ღელვა ქულებს უკავშირდებოდა. სიმღერა რომ დავასრულე და ყველამ 11 ქულა მომცა, ვერ გეტყვით, რა გრძნობა დამეუფლა. ეს ემოცია შეუდარებელია, სიტყვით ვერ გადმოგცემთ! ჩემს ცხოვრებაში ეს იყო განუმეორებელი, ემოციებით სავსე დღე. ვერ ვიჯერებ, რომ ასეთ პატარა ასაკში მთელმა ევროპამ გამიცნო და, რაც მთავარია, ხალხმა შემიყვარა, ჩემთვის ეს ყველაზე დიდი საჩუქარია.
გული იმაზე მწყდება, რომ ყველაფერი ასე მალე დამთავრდა. სურათებს რომ ვუყურებ, მეტირება. ამ გამარჯვებამ კიდევ უფრო ემოციური გამხადა.
– ელოდით გრან პრის?
– საქართველოდან რომ მივდიოდი, ნამდვილად არ მეგონა, გრან პრის მფლობელი თუ გავხდებოდი, თუმცა დარწმუნებული ვიყავი, წარმატებას მივაღწევდი. ზოგადად კი, ჩემი ოჯახის და პროდიუსერების გარდა, არავის სჯეროდა, რამეს თუ მივაღწევდი. ახლა ბედნიერი ვარ, რომ საქართველოში ყველამ შემიყვარა და ჩემი ბედნიერება გაიზიარა. ქართველი ხალხის სიყვარული ყველაზე მნიშვნელოვანია ჩემთვის.
– როგორ გამოიყენებთ მოგებულ 50 000 ევროს, უკვე მოფიქრებული გაქვთ?
– არ ვიცი, კონკრეტულად რაში დავხარჯავ, ალბათ ისევ მუსიკალური კარიერისთვის გამოვიყენებ.

– 17 წლის ასაკში როგორია თქვენი პირადი ცხოვრება, გყავთ შეყვარებული?
– თაყვანისმცემლებს შეუძლიათ არ იაქტიურონ, არავის შეყვარებას ვაპირებ, სიყვარულის მოთხოვნილება ჯერ არ მაქვს. არასოდეს ვყოფილვარ შეყვარებული. 17 წლის ვარ და სერიოზული ურთიერთობები ჩემთვის ადრეა. პრიორიტეტულია სწავლა და კარიერა. სიყვარული კარიერაში ხელს შემიშლის. ისეთი თავისუფალი ადამიანი ვარ, რომ ვერ ავიტან შეზღუდვას, ვერ ავიტან ფრაზას: "იქ უჩემოდ არ წახვიდე"... ასე რომ, ჯერჯერობით არ მინდა, ჩემს ცხოვრებაში ვინმე შემოვიდეს შეყვარებულის სახით.
– როგორც ვიცი, კონკურსანტ ბიჭებთან დამეგობრდით. რომელიმემ თქვენ მიმართ სიმპათიები ხომ არ გამოხატა?

– არა, რადგან მათ იციან, რომ 17 წლის ვარ. ყველასთან დაძმური ურთიერთობა მქონდა. ერთმანეთი ძალიან შეგვიყვარდა, ერთიმეორეს ვკოცნიდით, ვეფერებოდით, ვგულშემატკივრობდით. თქვენ არ იცით, სხვა კონკურსანტები მესამე საკონკურსო დღეს როგორ მქომაგობდნენ, ყველას უნდოდა, რომ გამემარჯვა. იურმალამ არამარტო გამარჯვება მომიტანა, ახალი მეგობრებიც შემძინა. დარწმუნებული ვარ, ჩვენი ურთიერთობა მომავალშიც გაგრძელდება.
– უცხოელი პროდიუსერები თქვენით დაინტერესდნენ. თავად რა გეგმები გაქვთ?
– როგორც ლელამ და მამულიჩამ მითხრეს, ყველა უცხოელი პროდიუსერი დაინტერესდა ჩემით, მოლაპარაკებებს აწარმოებენ. ვნახოთ, რა გამოვა. რუსულმა შოუბიზნესმა გამიცნო, ყველა რუს ვარსკვლავთან ერთად გადავიღე სურათი, ყველამ მომილოცა გამარჯვება. ჩემი კარიერის ამ ეტაპზე ბევრი მნიშვნელოვანი ადამიანის მოწონება დავიმსახურე. განსაკუთრებით ვალერი მელაძე და სოსო პავლიაშვილი მგულშემატკივრობდნენ. სოსო საგრიმიოროში შემოვიდა და მითხრა, მადლობა შენს მშობლებს, რომ ასეთი გაგზარდესო. ამ სიტყვებმა ამატირა. ჟიურის წევრებმა მითხრეს, პირველივე ტურიდან გვინდოდა, რომ შენ გაგემარჯვაო. მათი თბილი სიტყვები და შეფასებები მთელი ცხოვრება გამყვება.
დედაჩემი (ნინო კანკავა) მახლდა თან, ყველა ჩემი სიმღერის დროს აფიქსირებდნენ მის სახეს, ყველაზე მეტად მას უნდოდა, რომ გამემარჯვა. დედა ჩემი ცხოვრების მაგალითია, აქ ვინც გაიცნო, ყველა მეუბნებოდა, არაჩვეულებრივი დედა გყავსო. ამიტომაც მადლობა მას!
ლელა, მამულიჩა, მაია ყიფიანი, დედაჩემი, სოფო ხალვაში და მისი მეუღლე – ჩვენ ერთად მოვიპოვეთ იურმალაში გამარჯვება. ეს იყო ერთი დიდი გუნდი, რომელმაც დიდი წარმატება მომიტანა, მომცა სტიმული და მადლობა თითოეულ მათგანს! ჩემი სოფო ძალიან შემიყვარდა, უფროს დასავით არის. ჩემთვის დიდი ძალა იყო. მე, მამულიჩა და ლელა, რა თქმა უნდა, გავაგრძელებთ თანამშრომლობას. ჩვენ ვიპოვეთ ერთმანეთი, ამიტომაც სულ ერთად უნდა ვიმუშაოთ და მსოფლიოში გავითქვათ სახელი.
– როგორც თქვენმა პროდიუსერმა კახამ მითხრა, ევროვიზია გაქვთ გეგმაში. იქაც ასეთი თავდაჯერებული იქნებით?
– რა თქმა უნდა! რა თქმა უნდა!
– და მაინც, ამ გამარჯვების მთავარი საიდუმლო რა იყო?
– შრომა, თავდაუზოგავი შრომა! წარმატებისთვის შრომა უმთავრესია. ძალიან რთული, სტრესებით სავსე დღეები გავიარე, მაგრამ კონკურსზე მყარად ვიდექი. სანამ იურმალაში გავემგზავრებოდი, საქართველოს პატრიარქმა დამლოცა. ყოველ ტურში სცენაზე გასვლის წინ ვლოცულობდი. ლოცვა კი ყოველთვის დიდ ძალას მაძლევს, სადაც უნდა მივდიოდე, ყველგან ვლოცულობ. ლოცვა თავდაჯერებასაც მმატებს. ჩემს ასაკში რომ ასეთი წარმატება მოვიპოვე, ეს უფლის დიდი საჩუქარია.
– მეორე ტურში ვარდისფერი კაბა გეცვათ, ეს ერთადერთი იყო, რის გამოც ქართველმა მაყურებელმა გაგაკრიტიკათ. თქვენ თავად მოგეწონათ ეს კაბა?
– კრიტიკა არ მაინტერესებს. მთავარია, მე მომწონდეს და თუ სხვას არ მოეწონება, ეს მე არ მაინტერესებს. ვარდისფერ კაბაში თავს ბედნიერად ვგრძნობდი და რომ არ მომწონებოდა, არ ჩავიცვამდი. ვფიქრობ, რომ ეს კაბა ძალიან მიხდებოდა და არ მაინტერესებს, თუ ვინმეს არ მოეწონა. მეორე ტურში მე ისევ ლიდერი ვიყავი და საბოლოოდ გავიმარჯვე! ამიტომ კაბა, მგონი, სალაპარაკო არ უნდა იყოს.
ლანა კიკნაძე, ჟურნალი სარკე