იჩხუბეს თუ არა რატი დურგლიშვილმა და მაკა ზამბახიძემ

ქართველებს იურმალის კონკურსზე მომღერალ სოსო პავლიაშვილის შემდეგ პირველი გამარჯვება 2008 წელს დუეტმა "ჯორჯიამ" მოუტანა, მაგრამ რატი დურგლიშვილისა და მაკა ზამბახიძის წყვილმა წარმატების შედეგად მოპოვებული პრივილეგიები ჯეროვნად ვერ შეირგო. გამარჯვებიდან ერთ თვეში რუსეთის მიერ საქართველოზე განხორციელებულმა აგრესიამ მათი წარმატებაც შთანთქა და ყველანაირმა საერთაშორისო პერსპექტივამ დუეტს გვერდით ჩაუარა. ქართულ ასპარეზზე კი დიდი სიყვარული დახვდათ, მაგრამ ნაციონალების პოლიტიკამ მათ აქაც არ მისცა გასაქანი.
გამარჯვების შემდეგ "ჯორჯიამ" რთული გზა განვლო და ახლა, როდესაც 6 წლის შემდეგ იურმალაში პირველობა ისევ საქართველომ მოიპოვა, დუეტი "ჯორჯია" თითქმის აღარ არსებობს, რეალურად დაშლილია, თუმცა თავად მომღერლებს ერთად გამოვლილი წლები, საერთო შემოქმედება არ ეთმობათ და საკუთარ თავსა და მაყურებელს არწმუნებენ, რომ ეს მდგომარეობა მხოლოდ და მხოლოდ პაუზაა. პარალელურად ორივე ფიქრობს სოლო კარიერაზე და ორივე მუშაობს სოლო ალბომზე. რეალურად ჩანს, რომ დუეტმა თავისი რესურსი ამოწურა და მომღერლებს ერთმანეთისგან დამოუკიდებელი მომავალი ელით.
ამავე დროს ვრცელდება ხმები, რომ მაკასა და რატის შორის ურთიერთობაც დაიძაბა. ისინი ერთ წრეში თითქმის აღარ ჩნდებიან მაშინ, როცა ახლო წარსულში განუყრელი მეგობრები იყვნენ. ინტერვიუზეც ვერ მოახერხეს ერთად მოსვლა, მათი თქმით, დატვირთული სამუშაო გრაფიკის გამო. რატი საზღვარგარეთ აპირებს წასვლას, ხმის ჩამწერი სტუდიიდან თითქმის არ გამოდის და სწორედ ეს მიზეზი დაგვისახელეს ჩვენც. მათთან ინტერვიუ ცალ–ცალკე ჩავწერეთ, თუმცა ორივეს ერთსა და იმავე კითხვებზე მოუწიათ პასუხის გაცემა.
– იურმალაში დუეტ "ჯორჯიას" გამარჯვებიდან 6 წლის შემდეგ კონკურს "ახალ ტალღაზე" ისევ ქართველმა კონკურსანტმა გაიმარჯვა – ნუცა ბუზალაძემ. რა ემოცია დაგეუფლათ, როცა კონკურსს უყურებდით?
მაკა: დროშების ფრიალი, იურმალის ჰიმნი, გამარჯვება... ასე მეგონა, ჩვენც ვიდექით სცენაზე. ზღვა ემოცია მეუფლება ამ კონკურსის ყურებისას. 16 კონკურსანტში ლიდერობა რთულია. ეს ყველაფერი ნუცა ბუზალაძემ შეძლო. გაოცებული ვუყურებდი, 17 წლის გოგო როგორ თამამად იდგა სცენაზე. ის სცენისთვისაა დაბადებული. ვუსურვებ საინტერესო კონკურსებს, კონცერტებს, ალბომებს და წარმატებულ კარიერას.
რატი: გაგიჟებული ვარ ნუციკოზე. წლებია ვიცნობ მას, მის ოჯახს, მაგრამ ასე თუ დაიხვეწებოდა, არ მეგონა. თავისუფალი და თავდაჯერებულია. ვფიქრობ, მას ბევრი წარმატება ელის წინ. ფინალის დღეს დაბადების დღეზე ვიყავი და ვერ შევძელი დაჯილდოებისთვის პირდაპირ ეთერში მეყურებინა. ლელასგან მივიღე ესემესი, გავიმარჯვეთო და სიხარულისგან ყვირილი ავტეხე.
ჩემთვის, როგორც შემოქმედისთვის, მნიშვნელოვანი გახლდათ არა საპრიზო ადგილი, არამედ ის, რომ ნუცას ყოველი გამოსვლა ერთიმეორეზე უკეთესი იყო. ახლა მთავარია, თავისი რეპერტუარი შექმნას და თავისი გზა განაგრძოს. მას აქვს ქარიზმა, ძლიერი პიროვნებაა.
– ისე მოხდა, რომ თქვენ სრულად ვერ შეიგრძენით გამარჯვება, კონკურსიდან რომ დაბრუნდით, ორი კვირის შემდეგ რუსეთ–საქართველოს ომი დაიწყო და თქვენი კარიერაც ისე ვერ წარიმართა, როგორც გეგმავდით.
მაკა: ამ ომმა ჩვენს ცხოვრებას და კარიერას ფაქტობრივად დაღი დაასვა.
რატი: ომის დროს კარიერაზე აღარ მიფიქრია, ეს ზედმეტი იქნებოდა. ალბათ ღმერთს ასე სურდა – ერთ წარმატებას მეორე წარმატება მოჰყვება ან პირიქით... ჩვენთვის მთავარი იყო, კარგად წარმოგვეჩინა თავი და ეს შევძელით. გამარჯვების სიხარული ხალხის სიყვარულმა გაგვიმძაფრა. დღემდე მეფერებიან, როცა ქუჩაში მხვდებიან და სასიამოვნო სიტყვებს მეუბნებიან. ამით გრძნობ, რომ მათ გულში შეხვედი და ეს არის მთავარი.
მაკა: ვერ მივიღეთ ის, რისი მოლოდინიც გვქონდა, შემოთავაზებები ვერ გამოვიყენეთ, სამაგიეროდ ჩვენს ქვეყანაში ხალხის საყვარელ მომღერლებად ვიქეცით და ამან გადაგვატანინა ის ყველაფერი. ამ კონკურსამდე ჩვენ ვიყავით რიგითი მომღერლები, იურმალამ კი ჩვენი ცხოვრება რადიკალურად შეცვალა. დიახ, ჩვენი ცხოვრება ამ კონკურსმა ამოატრიალა.
რატი: რომ არა იურმალა, არ ვიცი, ჩემი ცხოვრება როგორ წარიმართებოდა. შეიძლება უფრო წარმატებული ვყოფილიყავი ან პირიქით.

– შემდეგ ნაციონალების პოლიტიკამაც დააზარალა დუეტი "ჯორჯია", როცა რუსეთში წასვლა ფაქტობრივად აგიკრძალეს.
მაკა: გარკვეულწილად მართლაც დავზარალდით. ცუდი რაღაც მოხდა და ეს ყველაფერი ჩვენს კარიერას შეეხო. თუმცა იმას ვერ ვიტყვით, რომ დავიბლოკეთ, არა. იურმალაში ყოველ წელს მოთხოვნადები ვიყავით, ყოველ წელს გვეძახდნენ, ვარსკვლავი გაგვიხსნეს. შარშან აგუტინის კონცერტზე ვიმღერეთ...

რატი: პოლიტიკურმა ფონმა მარტო დუეტი "ჯორჯია" არ დააზარალა, ბევრი ქართველი დაზარალდა. რაც იყო, იყო, ვერაფერს შევცვლით. ახლა მომავლის ძიებაში ვარ.
– იურმალიდან რომ დაბრუნდით, საქართველოს მაშინდელმა პრეზიდენტმა მიხეილ სააკაშვილმა კი დაგაჯილდოვათ, მაგრამ შემდეგ, 2011 წელს, იურმალაში დუეტ "ჯორჯიას"ვარსკვლავის გახსნაზე არ გაგიშვათ.
მაკა: სამწუხაროდ, მართლაც ასე მოხდა და ამის გამო დიდი პროტესტი გაგვიჩნდა. ერთმანეთს ისე მიჰყვა წინააღმდეგობები, რომ აღარ წავედით. ბევრს ვლაპარაკობდით, რა გვექნა, არ ვიცოდით, წავსულიყავით თუ არა, მაგრამ საბოლოოდ დავრჩით. სიმართლე გითხრათ, ვნანობ, რომ ასეთი გადაწყვეტილება მივიღეთ. ეს არაფერს შეცვლიდა ჩვენი ქვეყნისთვის, პირიქით, შეგვემატებოდა ძალიან კარგი კადრები, როცა ჩვენი დუეტი იდგებოდა ჩვენს ვარსკვლავთან და არა – სხვა ქვეყნის წარმომადგენლები. დიდი შეცდომა იყო, რომ იქ არ წავედით. ჩვენი იქ წასვლა არ იქნებოდა პოლიტიკური დანაშაული. უბრალოდ ისე მოხდა, რომ იმ წუთში საკუთარ თავს მობილიზება ვერ გავუწიეთ. ვიმეორებ, დღეს ამ ყველაფერს ვნანობ!
რატი: ვთვლი, რომ ის, რაც ჩემს ცხოვრებაში მოხდა, უნდა მომხდარიყო, ასე იყო საჭირო და არაფერს ვნანობ. წლების მატებასთან ერთად სხვა რაღაცეები ხდება პრიორიტეტული და საინტერესო. მადლობელი ვარ იმის, რაც ჩემს ცხოვრებაში იყო და მადლობელი ვიქნები იმით, რაც მომავალში მოხდება.
– მაკა, კონკრეტულად ვინმემ გითხრათ, რომ თქვენი ვარსკვლავის გახსნაზე არ უნდა წასულიყავით თუ ეს მხოლოდ გაგრძნობინეს?
მაკა: მთავრობის გადაწყვეტილება იყო, რომ ჩვენ არ უნდა წავსულიყავით, კონკრეტულ სახელებსა და გვარებს კი აღარ ჩავეძიეთ. ეს იყო პოლიტიკური მიწვევა და მათ არ ისურვეს ჩვენი იქ გამგზავრება.
– შემოქმედებასთან ერთად თქვენ მეგობრობა გაკავშირებთ, ბევრი წელია ერთმანეთს იცნობთ. ამ ხნის განმავლობაში თქვენ შორის ყოფილა პირადი წყენა, კონფლიქტი, გაუგებრობა?
მაკა: როცა იურმალის კონკურსისთვის მაია ყიფიანმა დაგვაწყვილა და დუეტად გვაქცია, იმ დროისთვის მე და რატი უკვე მეგობრები ვიყავით. მეათე კლასიდან ვიცნობთ ერთმანეთს, ერთ ენაზე ვლაპარაკობთ, ერთნაირად ვფიქრობთ, ერთნაირი შეხედულებები გვაქვს, თუმცა კონკრეტული საკითხების მიმართ არის აზრთა სხვადასხვაობაც. მეგობრობა დაგვეხმარა იმაში, რომ ჩვენი დუეტი შედგა.
რატი: მეც და მაკასაც ძალიან გვიყვარს ჩვენი საქმე – სიმღერა. ამიტომ არამხოლოდ მეგობრობის დამსახურებაა, რომ ჩვენი დუეტი შედგა.
მაკა: როცა ვმუშაობდით და ახალ სიმღერებს ვწერდით, მე და რატი სულ ვკამათობდით. ჩვენი კამათი კი დაკავშირებული იყო საქმესთან. შემოქმედებით კამათს ყოველთვის კარგი ნამუშევარი მოსდევდა. ხომ გაგიგიათ, კამათში იბადება ჭეშმარიტებაო და ჩვენს შემთხვევაშიც ასე იყო. საქმის მიღმა მე და რატის არასოდეს გვიკამათია, ერთმანეთის მიმართ პირადი წყენა არასოდეს გვქონია, ყოველ შემთხვევაში, მე არ მახსოვს. ხშირად ოჯახის წევრებს სწყინთ ერთმანეთისგან, ხოცავენ ერთიმეორეს და დიდი ამბავი, თუ ჩვენც ვიკამათებდით რამეზე. მთავარი ის იყო, რომ ყოველი მორიგი კამათი მუდამ კარგად მთავრდებოდა.
– ამბობენ, რომ "ჯორჯია" საბოლოოდ დაიშალა. რეალურად რა ხდება დუეტის ცხოვრებაში?
მაკა: ახალ წლამდე ჩავწერეთ ახალი სიმღერა, მაგრამ სატელევიზიო პრემიერის გაკეთება ვერ შევძელით, მხოლოდ რადიოში მივიტანეთ.
რატის წლებია საზღვარგარეთ წასვლა უნდა. იანვრიდან მოყოლებული ხშირად გადიოდა ქვეყნიდან და ჩვენი დუეტის შემოქმედებითი პაუზა ამან გამოიწვია. მას გაუჩნდა შემოთავაზებები, სოლო ალბომზე მუშაობს და მის საზღვარგარეთ გატანას აპირებს.
მეც ვმუშაობ რამდენიმე სოლო სიმღერაზე. ჩემს შვილთან ერთად ჩავწერე დუეტი, გადავიღეთ კლიპი. ამ ვიდეორგოლში ახალი იმიჯით წარვდექი მაყურებლის წინაშე. კლიპში საერთოდ არ ვგავარ ჩემს თავს – არც ჩაცმულობით და არც სიმღერით, აბსოლუტურად სხვა ჟანრში ვმღერი. თუ რატი საზღვარგარეთ წავა საცხოვრებლად, მაშინ კი მოგვიწევს ხანგრძლივი პაუზის აღება.
რატი: რა არის საგანგაშო იმაში, რომ მე და მაკამ სოლო სიმღერებიც ჩავწეროთ? ვალდებულები არ ვართ, მთელი ცხოვრება ერთად ვიმღეროთ. ერთმანეთს უნდა მივცეთ გზა, რომ მარტოც ვიმღეროთ, ერთადაც და ვფიქრობ, ეს ძალიან ბუნებრივია. ერთ ადგილას ყოფნა გაგყინავს, შემოქმედებითად წინ ვერ წახვალ.
ახალ ამპლუაში ვარ – ავტორ–შემსრულებლის. ხმის ჩამწერ სტუდიაში ვარ შეკეტილი და საკუთარ სიმღერებს ვწერ. წლების განმავლობაში თავიდან ბოლომდე დუეტ "ჯორჯიაზე" ვიყავი გადართული, მაგრამ ადამიანი მხოლოდ ერთი საქმის კეთებით არ უნდა შემოიფარგლო.
– რატი, საზღვარგარეთ რა კონტაქტები გაქვთ, ვინ გშუამდგომლობთ პროდიუსერებთან?
რატი: არ შემიძლია წინასწარ ამაზე ლაპარაკი. მყავს აგენტი, რომელიც სტუდიებთან და პროდიუსერებთან მაკავშირებს.
– რა ბედი ეწევა თქვენს მუსიკალურ საბავშვო სტუდიას, რომელიც ერთად გააკეთეთ?
მაკა: სექტემბრიდან საკუთარ სტუდიას გავხსნი, რადგან რატის საზღვარგარეთ წასვლის შემთხვევაში, ბუნებრივია, ჩვენს სტუდიაში ერთად მუშაობას ვეღარ შევძლებთ.
– როგორ წარმოგიდგენიათ თქვენი სოლო კარიერა?
მაკა: ცხოვრებაში ყველაფერი შესაძლებელია, მესმის, რომ მაყურებლისთვის თავიდან ცოტა რთული იქნება ჩვენი ცალ–ცალკე ხილვა, მაგრამ მრავალფეროვნებისთვის ეს საჭიროცაა და კარგიც.
რატი: არიან ადამიანები, რომლებსაც ვუყვარვარ და მომისმენენ. თუ კარგ პროდუქტს შევთავაზებ, რატომაც არ მიმიღებენ და მომისმენენ? ვერ გეტყვით, რომ ყველა ჩემი სიმღერა გაჰიტდება, მაგრამ 100 კაციდან 5 ხომ მოუსმენს და ისიამოვნებს.
– ეს შედეგი დაგაკმაყოფილებთ?
რატი: რასაც ვგრძნობ, მინდა, სხვას გადავცე და, თუ ამ ყოველივეს ადამიანები გაიგებენ, ისინი იქნებიან ნამდვილი მსმენელები. იურმალაში გამარჯვების შემდეგაც მინდოდა ლონდონში სასწავლებლად წასვლა, მომწონს იქაური ცხოვრება და გასაკვირი არ არის, რომ უცხოეთში ახლაც მინდა წასვლა. სოლო ალბომზე მუშაობას რომ დავამთავრებ, მერე მოვიფიქრებ, რას გავაკეთებ. არსად გავრბივარ, ჩემს ქვეყანაში ვცხოვრობ და ვმუშაობ.
– ასეა თუ ისე, ფაქტობრივად დაშლის პირასაა თქვენი დუეტი.
მაკა: ამას დაშლას ვერ დავარქმევ, არ შეიძლება ჩვენი დუეტი დაიშალოს. ეს არის შემოქმედებითი პაუზა, რომელიც ყველა მომღერლის ცხოვრებაში დგება.
რატი: დუეტი არ დაშლილა. როცა მოგვინდება, ერთად ვიმღერებთ, როცა მოგვინდება – ცალ–ცალკე.
– ამბობენ, რომ ურთიერთობა გაგიფუჭდათ...
მაკა: მოგიყვებით. მე და რატი ერთ–ერთ კაფეში ვიყავით, სადაც, ჩვეულებისამებრ, ვიკამათეთ და ამ ამბის შემდეგ მთელ საქართველოს მოედო ჭორი, დუეტმა "ჯორჯიამ" ისე იჩხუბა, რომ დაიშალა, მაკა და რატი ერთმანეთს დაშორდნენო. ასეთი ჭორები ყოველთვის თან სდევს ცნობილ ადამიანს. მიუხედავად იმისა, რომ ხალხს ვუყვარვართ, მტრები ჩვენც გვყავს.
– მაკა, რატის წასვლის შემთხვევაში, ხომ არ იფიქრებთ, ის სხვა მომღერლით ჩაანაცვლოთ?
მაკა: არა, არა, არა!.. ამ საკითხზე ბევრი აზრი მოვისმინე, ბევრი მეუბნება, თუ რატი წავიდა, იქნებ სხვა მომღერალთან ერთად განაგრძო კარიერაო, მაგრამ ეს იქნება მცდარი სვლა. რატის დუეტ "ჯორჯიაში" ვერავინ შეცვლის. ჩვენი დუეტი შეიქმნა "ახალი ტალღისთვის", ამ კონკურსში გაიმარჯვეს რატიმ და მაკამ, მაგრამ ეს არ იყო კომერციულად შეკრული დუეტი, სადაც შეიძლება ერთი წავიდეს და მეორე მოვიდეს. დუეტი "ჯორჯია" დარჩება დუეტ "ჯორჯიად" – რატით და მაკათი.
ლანა კიკნაძე, ჟურნალი სარკე