როგორ მოვირჩინოთ ანგინა ზაფხულში

სიტყვა "ანგინა" ზამთარსა და შემოდგომასთან ასოცირდება, სწორედ წლის ამ დროს აღწევს პიკს, მაგრამ ზაფხულშიც ეს ცბიერი, გაციებით გამოწვეული დაავადება სულ უფრო ჯიუტად უტევს ბავშვებსა და მოზრდილებს. როგორ დავიცვათ თავი?
ანგინა ყოველთვის ტემპერატურის მკვეთრი მომატებით იწყება, რომელმაც შეიძლება 39–40 გრადუსსაც მიაღწიოს. ამ დროს აღინიშნება უსიამოვნო სიმპტომები ყელში. დასაწყისში სიმშრალე და ფხაჭნა ვლინდება, შემდეგ კი ძლიერი ტკივილი გაძნელებული ყლაპვის დროს. შესაძლებელია სხეულში მტვრევა, თავის ტკივილი, ყბისქვეშა ლიმფური ჯირკვლების გადიდება. მოგვიანებით ხველა, ნუშურა ჯირკვლებზე რუხი ნადები ჩნდება. ანგინის დროს სურდო არ არის.
ზაფხულში ანგინის აღმოცენებას ხელს უწყობს ყინულივით ცივი სასმელები, ნაყინი, კონდიციონერის ცივი ტალღა, ორპირი, მზეზე გადახურებული სხეულით ცივ წყალში ხანგრძლივი ბანაობა. მეორე მხრივ, ანგინის მიზეზი ყოველთვის გადაციება არ არის. ანგინა ნუშისებური ჯირკვლების ინფექციური დაავადებაა და მისი გამომწვევია სტაფილოკოკები. ინფექციის წყარო შეიძლება გახდეს ცხვირსა და დანამატ ღრუებში ჩირქოვანი შეგუბებული პროცესები, ასევე კარიესი.
მკურნალობა და პროფილაქტიკა
არავითარ შემთხვევაში არ შეუდგეთ თვითმკურნალობას. პრეპარატების შერჩევა და დოზის გათვლა მხოლოდ სპეციალისტს შეუძლია. მხოლოდ ხალხური საშუალებებით დაავადებას ვერ განკურნავთ. ინიშნება ანტიბიოტიკური თერაპია, ყელის შეშუპების მოსახსნელად ანტიალერგიული პრეპარატები. კარგ ეფექტს იძლევა ფიზიოთერაპია. სადღეისოდ შემუშავებულია მკურნალობის სხვადასხვა სქემები, რომლებიც ანგინის გამომწვევი ბაქტერიების ძირითად ჯგუფზე მოქმედებს.
არავითარ შემთხვევაში არ შეიძლება მარილიანი ან სოდიანი ხსნარის ყელში გამოვლება – ლორწოვან გარსს ინფექციების მიმართ კიდევ უფრო ამთვისებელს ხდიან. ყელი მუდამ თბილად უნდა გქონდეთ (შალის შარფი მოიხვიეთ). კვების რეჟიმი უნდა იყოს ნოყიერი, მაგრამ მსუბუქი და არა – ცხარე. პრიორიტეტი ენიჭება ფაფებს, პიურეს, ბულიონს (გლანდებზე დატვირთვას ხსნის) და სითხეებს (ორგანიზმიდან ტოქსინები გამოაქვს). საუკეთესო არჩევანია ასკილის ნახარში, შტოშის ან წითელი მოცვის მუსი და არა ხილ–კენკრის წვენები. სასმელი უნდა იყოს თბილი. მკურნალობის მინიმალური კურსი 10 დღეა. ანგინის დროს მოწევა კატეგორიულად იკრძალება.
დასნებოვნების წყარო შეიძლება გახდეს ჭურჭელი, პირსახოცი, ცხვირსახოცი. ავადმყოფი ცალკე ოთახში მოათავსეთ, ინდივიდუალური ჭურჭელი უნდა ჰქონდეს და მასთან კონტაქტის დროს პირბადე გაიკეთეთ. შენობა რეგულარულად გაანიავეთ და სველი წესით დაალაგეთ.
პროფილაქტიკური ღონისძიებები: ცივი სასმელი მცირე ყლუპებით დალიეთ – პირში გათბობას მოასწრებს; ნაყინი ცოტა მოკბიჩეთ; კონდიციონერი არაუმეტეს 20 გრადუსისა რეჟიმზე ჩართეთ და მისგან 3 მეტრის დაშორებით იყავით; სიცხიდან დაბრუნებული მაშინვე გრილ შხაპს ნუ მიიღებთ. უმკურნალეთ კბილებს და პირის ღრუს დაავადებებს (გინგივიტი, პაროდონტიტი).
ხალხური მედიცინის რეცეპტები
სალბის ფოთლები – 3 წილი, კრაზანის ბალახი – 2 წილი, პიტნა – 1 წილი აურიეთ. 1 სუფრის კოვზ ნარევს 1 ჭიქა მდუღარე დაასხით და თერმოსში 1 საათი დატოვეთ. შემდეგ გაწურეთ და თბილი სახით დღეში რამდენჯერმე გამოივლეთ. კურსი 10–12 დღე.
სანახევროდ წყალში გაზავებული ლიმონის ან გრეიპფრუტის ნარევი ყელში დღის განმავლობაში 10–12–ჯერ გამოივლეთ.
მეტად ეფექტურია თაფლთან და რძესთან არეული სტაფილოს წვენის დალევა.