ნუკა კვალიაშვილი: "გათხოვების მერე თვითონაც გამიკვირდა, ისე შევიცვალე"

ახალგაზრდა წყვილი, 21 წლის მომღერალი ნუკა კვალიაშვილი და მისი 23 წლის ქმარი, ნიკა კობახიძე, 6 თვის წინ ბიჭუნა ლუკას მშობლები გახდნენ. ახალბედა დედამ ძიძაზე თავიდანვე უარი თქვა და შვილს დამოუკიდებლად ზრდის. დიასახლისის ამპლუაც კარგად მოირგო, მაგრამ ეს იმას არ ნიშნავს, რომ მუსიკალური კარიერა გვერდზე გადადო. სექტემბრიდან აპირებს შემოქმედებითი იდეების განხორციელებას, რომლებიც უხვად დაუგროვდა. მანამდე კი მთელ დროს ქმარ–შვილს უთმობს.
– ნუკა, პირველ რიგში, დედაზე, მომღერალ ეკა კვალიაშვილზე გკითხავთ. თავს როგორ გრძნობს?
ნუკა: კუჭ–ნაწლავის აწევის ოპერაცია სჭირდება და ამისთვის ვემზადებით.
– თანხის გადარიცხვასთან დაკავშირებითაც ჰქონდა პრობლემა. ბოლოს "სარკესთან" ინტერვიუში აღნიშნა, რომ ბრიფინგს მოაწყობდა და არსებულ პრობლემებზე კონკრეტულ ფაქტებს გამოამზეურებდა. ბოლოს და ბოლოს ჩაურიცხეს საქველმოქმედო მარათონის დროს შემოსული თანხა?
ნუკა: ზუსტად არ ვიცი, რა როგორ არის. რაც ვიცი, იმას ჯერ არ ვიტყვი, რადგან ამის დრო არ არის. ეკა თავად იტყვის ყველაფერს, ფაქტებით დაადასტურებს და ეს მალე მოხდება.

– თქვენ მთელი ზაფხული თბილისში ხართ?
ნიკა: ჯერჯერობით თბილისში ვართ, უახლოეს დღეებში ვაპირებთ, სადმე დავისვენოთ ბავშვთან ერთად.
ნუკა: ახლა სხვანაირად მოგვიწევს დასვენება, ოჯახურად, გართობის გარეშე. ბავშვს კარგი პედიატრი ჰყავს და მან გვითხრა, რომ პრობლემა არ იქნება, თუ 6 თვისას დასასვენებლად წავიყვანთ.
– კიდევ რაზე მოგიწიათ უარის თქმა ახალგაზრდა ცოლ–ქმარს შვილის შეძენის შემდეგ, რა ჩვევები დაივიწყეთ?
ნუკა: ერთი რამ შეიცვალა მხოლოდ: ადრე თუ ჩვენთან მეგობრები გვიანობამდე რჩებოდნენ და ხმაურობდნენ, ახლა ასე აღარ ხდება. თუ მჭირდება, ვიმღერო და ხმა გავავარჯიშო, ეს ბავშვს არ უქმნის პრობლემას, რადგან ისეთ სიმღერებს არ ვასრულებ, რომ შეეშინდეს. პირიქით, რამდენჯერმე მაშინ ჩაეძინა, როცა სიმღერა დავიწყე.
ნიკა: მინდა, ლუკას ნუკასავით სიმღერა შეეძლოს, ხოლო ჩემგან მათემატიკური ნიჭი გამოჰყვეს.
– თქვენი მშობლების გამოცდილებიდან რას გამოიყენებთ შვილის აღზრდისას?
ნუკა: როგორც დედაჩემი მიხსნიდა, რას რატომ მიკრძალავდა და რა რატომ არ შეიძლებოდა, მეც ამ მეთოდს გამოვიყენებ, ანუ "არას" დაუსაბუთებლად არაფერზე ვეტყვი. მინდა, რომ ჩემი შვილისთვის, პირველ რიგში, მეგობარი ვიყო.
ნიკა: დედამ ჯანსაღი ცხოვრების წესით გამზარდა, ჯანმრთელობაზე განსაკუთრებულ აქცენტს აკეთებდა. ლუკას ჯანსაღ რეჟიმს მეც მივაჩვევ. არ მომწონს, როცა ბავშვს ზედმეტი სიფრთხილით ზრდიან. უფრო კარგია, როცა მცირე ასაკიდანვე კაჟდება.
– რატომ არ მოისურვეთ, ძიძა გყოლოდათ?
ნიკა: ადამიანს უნდა ენდობოდე, ბავშვი რომ დაუტოვო. სამწუხაროდ, ინტერნეტში ბევრი ინფორმაცია არსებობს, თუ როგორ ცუდად იქცევიან ძიძები... მეორე მხრივ, ნუკამ ისე დამაჯერებლად აიღო ბავშვის მოვლა საკუთარ თავზე, რომ ამის საჭიროება არც გაჩენილა.
ნუკა: ვინც იგებს, რომ შვილს მარტო ვზრდი, ვერ იჯერებს. სამშობიაროდან გამოყვანის დღიდან მარტომ დავიწყე ლუკას მოვლა. პასუხისმგებლობის დიდი გრძნობა მაქვს. მინდა, თვითონ გავზარდო შვილი. რა თქმა უნდა, დედა მეხმარება რჩევებით. საბედნიეროდ, თავის წესებს არ მთავაზობს ლუკას გაზრდასთან დაკავშირებით, მაცდის, თავად აღვზარდო შვილი. სახლსაც კარგად ვუვლი, ვახერხებ ყველაფრის მოსწრებას.
– ნუკა, ორსულობის შემდეგ ჩვეული წონა მალე დაიბრუნეთ. ეს დიეტით შეძელით თუ თავისით დაიკელით?
ნუკა: ეს თავისთავად მოხდა, მაგრამ, რა თქმა უნდა, მცირე დოზით მეც შევიტანე ამაში წვლილი, ვარჯიში დავიწყე და ზომიერად ვიკვებები.
ნიკა: როცა ერთმანეთი გავიცანით, მაშინ ნუკა ცოტა პუტკუნაც კი იყო. ძალიან გამხდარი არც მომწონდა.
– ცოლ–ქმარს, მით უმეტეს ახალდაქორწინებულთ, ყოველდღე უწევს რაღაცასთან შეგუება, რაღაცის დათმობა... ალბათ თქვენ შემთხვევაშიც ასეა.
ნიკა: ჩვენც გვიწევს ყოველდღიურად ბრძოლა და მერე რაღაცასთან შეგუება, ეს კი თანაცხოვრებას საინტერესოს ხდის. ნუკა მრავალმხრივი ადამიანია.
ნუკა: მე პედანტურად მოწესრიგებული ვარ, ნიკა – არა.
ნიკა: მე სიჩუმე მიყვარს, ნუკას – ხმაური.
– ნუკა, ქმარს თქვენთვის რაიმე აუკრძალავს?
ნუკა: წარბზე პირსინგი ჩუმად გავიკეთე, რადგან ვიცოდი, ნიკასთვის რომ მეკითხა, უარს მეტყოდა. ტატუც ჩუმად გავიკეთე. არ მესმის, თვითონ იხატავს ტატუებს და მე არ მინდა? ამ ყველაფერს იმიტომ ვაკეთებ, რომ ისევ ნიკასთვის ვიყო საინტერესო.
– ეს აკრძალვები ჩაცმულობასაც ეხება?
ნუკა: ხანდახან უთქვამს ნიკას რაღაცაზე, არ ჩაიცვაო. თვითონაც არ მიყვარს გამომწვევი სამოსით სიარული.
ნიკა: თუ ჩემ გვერდით არის, რაც უნდა, ის ჩაიცვას.
– თქვენს ოჯახში გენდერული ბალანსი დაცულია?
ნუკა: კი, თანასწორები ვართ.
ნიკა: თანასწორები ვართ მაშინ, როცა ნუკას უნდა, მაგრამ როცა აწყობს, ქალია და თურმე კაცის საქმე მე უნდა გავაკეთო.
ნუკა: კაცმა ქალის პატივისცემა უნდა იცოდეს. მეტი მოთმინების უნარი უნდა ჰქონდეს, რადგან ქალი პრეტენზიული და ემოციურია. კაცს თავშეკავება მართებს.
– ნიკა, ქალს რა მართებს?
ნიკა: ქალი მზრუნველი უნდა იყოს, მამაკაცის გვერდით უნდა იდგეს. ჩვენი ურთიერთობა იდეალური იმიტომაა, რომ თუ რამე მინუსი გაგვაჩნია, ვცდილობთ, დავაბალანსოთ.
ნუკა: რაც უნდა ხდებოდეს, ნიკას რამე თუ დასჭირდება, გავუკეთებ. მიმაჩნია, რომ ეს ჩემი მოვალეობაა.
– ოჯახის ბიუჯეტს ვინ განაგებს?
ნიკა: ფინანსებს მე განვაგებ, თუმცა არ ვიცი, რამდენად სწორად გამომდის. გადასახადებსა თუ პროდუქტზე მე ვზრუნავ. მშობლებიც გვეხმარებიან.
ნუკა: მაგრამ ეს იმას არ ნიშნავს, რომ განსაზღვრულია, ფული ვინ უნდა დახარჯოს. რომელსაც გვჭირდება, ის ვიღებთ.
ნიკა: ორივენი ეკონომიურებიც ვართ და მფლანგველებიც. არასტაბილური მხარჯველები ვართ.
ნუკა: მომთხოვნი არასდროს ვყოფილვარ. "ეს მიყიდე, ის მინდა" – არ მახასიათებს. ნივთებს დიდ მნიშვნელობას არ ვანიჭებ.
– ნიკა, პოპულარული ცოლის გვერდით ცხოვრებას რა თავისებურებები აქვს?
ნიკა: ცნობილი ადამიანის მეუღლეობა ძალიან რთულია, მაგრამ გააჩნია, ამას როგორ შეხედავ. მივიღე ის ფაქტი, რომ ნუკა უნდა იყოს მომღერალი. ერთმანეთის "ფეისბუქის" პაროლები ვიცით. ნუკას "ფეისბუქზე" ხანდახან შევდივარ, მაინტერესებს, რა ხდება. კარგთან ერთად ცუდი შეფასებებიც გამოერევა ხოლმე. თავიდან ამაზე ვნერვიულობდი, მაგრამ მერე მივხვდი, რომ მუდამ ასე იქნება.
– ნიკა, ხომ არ ეჭვიანობთ?
ნიკა: თავიდან უფრო ვეჭვიანობდი, რადგან არ ვიყავი მიჩვეული, ჩემი საყვარელი ადამიანის მიმართ ამხელა ყურადღებას რომ იჩენდნენ. შემდეგ უკვე გავაანალიზე და მივხვდი, რომ ეჭვიანობა არ ღირს. და მაინც, სასიამოვნო არ არის, რა თქმა უნდა.
ნუკა: იმ ადამიანების მიმართ, რომლებიც ჩემი ოჯახური სტატუსის მიუხედავად მაინც ცდილობენ ფლირტის დაწყებას, დიდი აგრესია მიჩნდება, რადგან მიმაჩნია, რომ ან ინტელექტის დაბალი დონე აქვთ და ვერ ხვდებიან, რომ ეს მიუღებელია, ან არაფერი აინტერესებთ.
ისე, მე საშინლად ეჭვიანი ვარ! ხანდახან რაღაცას წარმოვიდგენ, დავიჯერებ და მერე ნიკას ვეჩხუბები. ალბათ იმიტომ, რომ, ნიკასგან განსხვავებით, ბოლო დროს სულ სახლში ვარ.
ნიკა: ნუკა მართლა ძალიან ეჭვიანია, მაგრამ როცა პროექტ "საქართველოს ვარსკვლავში" მონაწილეობდა, მე უფრო ვამჟღავნებდი ამ თვისებას.
– ნუკა, როდის დაუბრუნდებით სიმღერას?
ნუკა: ძალიან დიდი გეგმები მაქვს და სექტემბრიდან დავიწყებ მათ განხორციელებას. ნიკა ჩემი ყველაზე დიდი მხარდამჭერია.
– როგორ ფიქრობთ, კონკრეტულად თქვენი და ზოგადად მყარი ოჯახის საფუძველს რა ქმნის?
ნუკა: მე და ნიკა ბავშვობიდან ვიცნობთ ერთმანეთს, შეყვარებულები 8 წელი ვიყავით. ვრჩებოდით ერთმანეთთან, შესაბამისად, ბოლომდე გავიცანით ერთიმეორე. ასევე მნიშვნელოვანია, წყვილმა ბევრ რამეში დაუთმოს ერთმანეთს.
ნიკა: უცნობმა ადამიანებმა ოჯახი იმ იმედით არ უნდა შექმნან, ერთმანეთს მერე გავიცნობთო. ყველა თვისების გამომჟღავნების შემდეგ თუ ურთიერთობა შენარჩუნდა, მერე უნდა იქორწინონ.
მანანა ნოდია, ჟურნალი სარკე