ნინი შერმადინი: "ვინმემ ლოგინის შემოთავაზება რომ მკადროს, საკუთარ თავზე პასუხს არ ვაგებ!"

მომღერალი ნინი შერმადინი შემოქმედებით წვაშია – სოლო ალბომზე მუშაობს მისთვის სრულიად ახალ ჟანრში, სოლო კონცერტსაც გეგმავს, ამერიკიდან კი მოწვევა აქვს, მიუზიკლის კასტინგში უნდა მიიღოს მონაწილეობა. აი, პირად ცხოვრებაში კი უძრაობაა. უიღბლო ქორწინების შემდეგ ცვლილებების ეშინია, მამაკაცებთან ურთიერთობაში სიფრთხილეს იჩენს. განქორწინებიდან ორი წლის შემდეგაც ძალიან ნანობს, რომ პატარა მარიამი დედასთან და მამასთან ერთად ვერ იზრდება. მომღერალმა "სარკესთან" თავის ამჟამინდელ ცხოვრებაზე ისაუბრა.
– ნინი, ზაფხული მიიწურა, სად იყავით, როგორ გაატარეთ განვლილი სეზონი?
– მე და ჩემმა შვილმა ზაფხული ცალ–ცალკე გავატარეთ. დედაჩემმა მარიამი ურეკში წაიყვანა, შემდეგ დუშეთში წავიდნენ, მე კი ყვარელში ვიყავი. მინდოდა, ჩემს შვილს მთის და ზღვის კურორტები მოევლო და, მადლობა ღმერთს, მოვახერხე. აქტიურად ვმუშაობ, ბევრი შემოთავაზება მაქვს. სოლო ალბომსაც მალე ჩავწერ. ერთ–ერთ ხმის ჩამწერ სტუდიაში მუსიკოსი, კომპოზიტორი პაატა სილაგაძე აღმოვაჩინე. მსგავსი ნიჭის პატრონი არავინ მინახავს. როცა მის მუსიკას მოისმენთ, ამაში თქვენც დამეთანხმებით. სრულიად განსხვავებულ ჟანრში ვცდი ბედს, ეს არის ელექტრონული როკი კლასიკური ელემენტებით. ამ პროგრამით, ბენდის და დიჯეის თანხლებით, სოლო კონცერტსაც ვგეგმავ.
ამერიკიდან, ძალიან სერიოზული მიუზიკლიდან, მოწვევა მაქვს. 10 ნოემბერს ნიუ იორკში მივფრინავ, კასტინგი უნდა გავიარო. ვნახოთ, რა მოხდება. ამ თემაზე მეტს ვერ დაგელაპარაკებით. შეიძლება ითქვას, რომ აღმავლობის ხანა დამიდგა. ყოველთვის რაღაც საფეხურზე ავდიოდი ხოლმე, მაგრამ მერე დაღმასვლაც მქონდა.
– აღმავლობის შემდეგ დაღმასვლა, ვარდნა ძალიან მტკივნეულია, არა?
– მივეჩვიე, რადგან კანონზომიერია, ეს არის უფლის ნება. ადამიანს რაღაცეები თავში არ უნდა აგივარდეს და არ უნდა გეგონოს, რომ მხოლოდ შენი დამსახურებით მიაღწიე ყველაფერს. აფრენას დაცემა უნდა მოჰყვეს, რომ ადამიანობა არ დაკარგო. არ უნდა დაგავიწყდეს, ვინ იყავი.
– ვინ იყავით მუსიკალური კარიერის დასაწყისში?
– ერთი ჩვეულებრივი გოგო ვიყავი ჩვეულებრივი ოჯახიდან. არც ფულიანი მამიკოს დახმარებით მიმიღწევია რამისთვის და არც მეგობარი მამაკაცების დახმარებით ამიწყვია კარიერა. ერთი პატარა გოგო ვიყავი, რომელიც მომღერლობაზე ოცნებობდა და ეს ოცნება ამიხდა. მაშინ ავტოგრაფებს ვართმევდი ლელა წურწუმიას, ნანი ბრეგვაძეს, მერაბ სეფაშვილს, ნუცა ჯანელიძეს, "ფორტეს", "სახის" წევრებს. ისინი დღეს ჩემი მეგობრები არიან, მათთან ერთად ვმღერი. ამ ადამიანებისგან ბევრი რამ ვისწავლე. ახლა მე და მერაბი ისრაელში ერთად მივდივართ. მას სოლო კონცერტი აქვს და ვეხმარები. ყოველთვის მინდოდა, რომ ამ ადამიანების გარემოცვაში ვყოფილიყავი. "ჯეოსტარის" და "ნუცას სკოლის" პერიოდში ეს ოცნება ამიხდა. "იურმალას" კონკურსზე კი ისეთ ადამიანებს შევხვდი, ვისთან შეხვედრაზეც ვერც კი ვიოცნებებდი. ვერასოდეს წარმოვიდგენდი, ლაიმა ვაიკულეს სიმპათია გავხდებოდი. არ მეგონა, რუსულ ბომონდს ასე ახლოს თუ გავიცნობდი. "იურმალიდან" რომ ჩამოვედი, უკვე ცნობილი გოგო ვიყავი.
– მერე ამან თქვენში შეცვალა რამე?
– პიროვნულად არ შემცვალა. ჩემი ოჯახის წევრები ყოველთვის მეუბნებოდნენ, არ დაგავიწყდეს, რომ ჩვეულებრივი ადამიანი ხარ და არავისგან განსხვავდებიო. ჩემი მოძღვარიც იმავეს მიმეორებდა. არასოდეს მიფიქრია, რომ სხვაზე განსხვავებული ან მეტი ვარ. მე კარგად ვმღერი, სხვა კარგი ადვოკატია და ა.შ.
– რატომ გადაწყვიტეთ, სხვა ჟანრში მოგესინჯათ თავი?
– აქამდე ისეთ მუსიკას ვწერდი, რომელიც კომერციაზე იქნებოდა გათვლილი. მსმენელისთვის უფრო ადვილი დასამახსოვრებელი რომ ყოფილიყო, პაპსას ელემენტებს ვურევდი. ახლა მინდა, გაიგოს ხალხმა, რა გემოვნებაც მაქვს, რა არის ჩემი სტილი, რისი გაკეთება შემიძლია. დარწმუნებული ვარ, მსმენელი ჩემს ახალ სიმღერებს კარგად მიიღებს. პოპულარული გახდა ჩემი დუეტები ნოდიკო ტატიშვილთან, გიორგი ჩიქოვანთან, მარკუს მეტრეველთან, კატო სალუქვაძესთან, დიტო ქისიშვილთან, დანიელასთან (პატარა გოგოა, მაიკო კაჭკაჭიშვილის სიმღერა ვიმღერეთ ერთად). დუეტების ალბომის გამოშვებასაც ვაპირებ. ვცდილობ, ის გავაკეთო, რაც ჩემს სათაყვანებელ მომღერლებს ჩემთვის არ გაუკეთებიათ, რომ კარიერის დასაწყისში მათთან დუეტში მემღერა. დამწყებ, პატარა მომღერლებს, ვისაც ნინის შემოქმედება უყვართ, გვერდში დავუდგები და მათთან დუეტებს ჩავწერ.
– პოპულარულმა მომღერლებმა თავის დროზე უარი გითხრეს დუეტის ჩაწერაზე?
– პრინციპში, არც ერთისთვის მითხოვია.
– ისევ ახალ ალბომზე გკითხავთ, ქართულ სიმღერებს ჩაწერთ თუ ინგლისურს?
– როკ ალბომი ინგლისურენოვანი იქნება და მასში 12 სიმღერა შევა. გაყიდვაში ოქტომბრისთვის გამოვა. ქართული ენა მხოლოდ ქართულ სიმღერას უხდება. როკს, სოულს, პოპს ქართული ტექსტი ძალიან აუფასურებს. ქართული ენაზე ხალხური, კლასიკური სიმღერები უნდა ვიმღეროთ. ინგლისური სიმღერები რომ მექნება, თავის წარმოჩენას ნებისმიერ ქვეყანაში შევძლებ, ეს ალბომი ამის საშუალებას ნამდვილად მომცემს.

– კრიტიკისთვის მზად ხართ?
– იმდენჯერ გამაკრიტიკეს, რომ აღარაფერი მიკვირს. "ნუცას სკოლიდან" მოყოლებული დღემდე მაკრიტიკებენ. ჩემზე ხშირად ამბობენ, რომ ამბიციური და ამაყი ვარ. ერთი პერიოდი ამას ძალიან მტკივნეულად განვიცდიდი, რადგან უსამართლო შეფასება იყო. ყოველთვის გახსნილი ვიყავი ურთიერთობებში, ნიღაბი არასოდეს მეკეთა.
– სოლო კონცერტის გაკეთება არ გაშინებთ? გაავსებთ ფილარმონიის დარბაზს?
– მინდა, ჩემი კონცერტი ღია ცისქვეშ ჩატარდეს. თუ სპონსორი მოვძებნე, მინდა, რომ ჩემს კონცერტზე დასწრება უფასო იყოს. ზუსტად ვიცი, რომ ძალიან ბევრი ადამიანი მოვა. ეს იქნება ცოცხალი შესრულება ბენდის თანხლებით.
– ბენდთან სიმღერა მოდური გახდა...
– ამ მხრივ ძალიან დიდი პროგრესია. მე ყოველთვის ამის მომხრე ვიყავი.

– მერე მაშინაც გემღერათ ცოცხლად.
– როცა მიკორფონი არ ვარგა, ფონოგრამა არ ისმის, ჯობია, პირი გააღო, ვიდრე ისე იმღერო, რომ ვიღაცამ ვერ გაიგოს და გაგლანძღოს. დღეს ბევრი ბენდი გვყავს და ამის პრობლემა არ არის. კლუბებში სიმღერა მოდური გახდა და ბევრი ჩემი კოლეგა იქ მღერის, ადრე კი ეს ცუდ ტონად, სირცხვილად ითვლებოდა. მეც მიმღერია პლუს ფონოგრამაზე. ერთი–ორჯერ ტელევიზიაშიც ვიმღერე პლუსზე, რადგან გახმოვანება უჭირდათ, მაგრამ ყოველთვის თხასავით გავიყიდე, იმიტომ, რომ ჩემს ნამღერს პირს ვერასოდეს ვამთხვევ.
– თქვენთვის შემოსავლის ერთადერთი წყარო სიმღერაა?
– დიახ, ეს ჩემი შემოსავლის ერთადერთი წყაროა. თქვენ ყოველთვის აღნიშნავდით, რომ ძალიან გულახდილი რესპონდენტი ვიყავი, რომ იმას ვლაპარაკობ, რაც სიმართლეა. ხალხისთვის თვალის ახვევა საჭირო არ არის, ამ სტატიებს კითხულობენ და მათი აზრი ჩემთვის ძალიან მნიშვნელოვანია. ამიტომაც არ ვმალავ, რომ ამით ვირჩენ თავს. სამწუხაროდ, ჩემს ოჯახში არავინ მუშაობს, არც დედა და არც მამა. ღვთის მადლით, ყოველთვის მაშინ ჩნდება კონცერტი, როცა ვფიქრობ, ახლა რა უნდა ვქნა–მეთქი. უფალი ყოველთვის მეხმარება. სხვა პროფესია არ მაქვს, არსად ვმუშაობ. ოჯახის ფინანსისტები ჩემი მშობლები არიან, ისინი ანაწილებენ თანხას ყველაფრისთვის. ცოტას ჩემთვისაც ვიტოვებ, რომ თავის მოვლისთვის მეყოს.

– ყოფილი მეუღლე, ვაჟა ციცაგი, არ გეხმარებათ ბავშვის აღზრდაში?
– როგორც შეუძლია, მეხმარება, ბავშვს ყურადღებას აქცევს. ვცდილობთ, კარგი ურთიერთობა გვქონდეს.
– ალიმენტი არ დააკისრეთ?
– არა, რას ამბობთ! არანაირი ალიმენტი არ დამიკისრებია. არც სასამართლოში წავსულვარ და მსგავსი არაფერი გამიკეთებია. იცით რა, ვაჟა არის ძალიან კარგი მამა. არ მინდა, რომ მამა–შვილს ერთმანეთთან ოფიციალური ურთიერთობა ჰქონდეთ. ლამაზი არ იქნება, გროშებზე რომ ვილაპარაკოთ. სისულელეა, ღმერთმა დაგვიფაროს ამისგან! შვილის ნახვა როცა მოუნდება, მაშინ მოვა და წაიყვანს. რომც არ მქონდეს შემოსავალი, ვაჟას არაფერში დავავალდებულებ.
– ამბობენ, რომ თქვენს ცხოვრებაში მამაკაცი გამოჩნდა...
– ჩემზე ჭორაობას საზღვარი არ აქვს. ახლახან ერთ–ერთმა გაზეთმა დაწერა, რომ ვითომ მე და გიორგი ჩიქოვანი შეყვარებულები ვართ, არადა გიორგის "ნუცას სკოლიდან" მოყოლებული ვიცნობ, ოჯახებით ვმეგობრობთ, დუეტიც კი გვაქვს ჩაწერილი, ერთი ბენდი გვყავს. ალბათ ამის გამო გადაწყვიტეს, რომ მასთან მორიგი რომანი მქონდა. ეს "მორიგი რომანები" მაგიჟებს! რა წესია! რატომ ვიმართლო თავი?! ჩვენ შორის არაფერი ხდება. როცა ჩემს ცხოვრებაში სიყვარული მოვა, არ დაგიმალავთ. ვაჟასთან რომ ჩემი რომანი დაიწყო, ამის შესახებ პირველად თქვენ გიამბეთ. ასე რომ, თუ რამე მოხდება, აუცილებლად გაგაგებინებთ. სიყვარული რატომ უნდა დამალო? ეს გრძნობა ყველა ადამიანს უნდა ეწვიოს.
– თქვენი ყოფილი მეუღლის პირად ცხოვრებაში თუ არის სიახლე?
– არ ვიცი, ძალიან მინდა, ბედნიერი იყოს.
– ალბათ ეს ინტერვიუ თქვენს თაყვანისმცემლებს ძალიან გაახარებთ, გაიგებენ, რომ თქვენი გული თავისუფალია.
– ამაზეც გულახდილად გიპასუხებთ. ბევრი თაყვანისმცემელი მყავს, მაგრამ ვიცი, მამაკაცები განათხოვარ გოგოს როგორ აღიქვამენ საქართველოში... ცოტა ნდობა მაქვს დაკარგული.
– რატომ ამბობთ ამას? მათგან რაიმე მიუღებელი იგრძენით?
– "ფეისბუქზე" საოცრებებს წერდნენ. არ ვიცი, ეს ხალხი რამ გააბოროტა. თუმცა პირდაპირ არასოდეს შემოუთავაზებიათ ინტიმური კავშირი, ლოგინი, ასეთ რამეებს არავინ მაკადრებს, რადგან ამის საბაბს არავის ვაძლევ, არც გამომწვევი ვარ. ამ ტიპის შემოთავაზება არც აქ მქონია და არც – საბერძნეთში. უფლის დიდი მადლია, რომ ჩემზე ამ განსაცდელს არ უშვებს. ვინმემ რომ ეს მკადროს, საკუთარ თავზე ალბათ პასუხს ვერ ვაგებ, არაადეკვატური გავხდები. მე შვილი მყავს და თუ ჩემთან ვინმეს სერიოზული ურთიერთობის დაჭერა მოუნდება, ჯერ ჩემი შვილი უნდა შეიყვაროს და მერე – მე.
– ორი წელია, რაც განქორწინებული ხართ. ეს ნაბიჯი არასოდეს გინანიათ?
– ყველა ქალი ნანობს, როცა ოჯახი ენგრევა. ვის უხარია გაშორება? ყველა ქალი, ვისაც ოჯახი სიყვარულით აქვს შექმნილი, ვინც შვილის წინაშე პასუხისმგებლობას გრძნობს, ასეთ დროს სინანულს განიცდის. შვილს ორივე მშობელი ერთად უნდა ზრდიდეს. ოჯახურ იდილიაზე ძვირფასი არაფერია.
– კარიერაში აღმასვლის პერიოდი გაქვთ, პირად ცხოვრებაში როდის დადგება ეს დრო?
– კარიერაში თუ წარმატებას მიაღწევ, პირად ცხოვრებაში წარუმატებელი იქნები და პირიქით. ეს არის კანონზომიერი, რადგან სრულყოფილი ბედნიერება არ არსებობს. არ მაღელვებს, რომ პირად ცხოვრებაში კრიზისი მაქვს. უკვე 24 წლის ვარ და ვფიქრობ, ჩემს შვილს მომავალი ავუწყო, ამისთვის კი ბევრი უნდა ვიმუშაო.

წყარო: ჟურნალი..