კენან იმირზალი ოღლუ: "ეზელმა" კინოვარსკვლავად მაქცია"

თურქი მსახიობი და მოდელი კენან იმირზალი ოღლუ ქართველმა მაყურებელმა გაიცნო მაღალრეიტინგული და მაღალბიუჯეტიანი თურქული სერიალით "ეზელი". ამ სურათში ომერის როლის შემსრულებელ კენანს თავის ქვეყანაში ვარსკვლავად დაბადებულს უწოდებენ. ის თურქების საყვარელი მსახიობია, თუმცა აღიარებამდე დიდი გზის გავლა და ბევრი შრომა დასჭირდა.
კენან იმირზალი ოღლუ 1974 წლის 18 ივნისს ანკარის პროვინციის სოფელ უცემში დაიბადა. ოჯახში 3 შვილიდან უმცროსი იყო. სკოლის შემდეგ სწავლა ილდიზის ტექნიკურ უნივერსიტეტში ფიზიკა–მათემატიკის ფაკულტეტზე გააგრძელა. სტუდენტი კენანი არაჩვეულებრივი გარეგნობის წყალობით უამრავ რეკლამაში გადაიღეს და საუკეთესო მოდელის სტატუსით თურქეთის საზღვრებსაც მალე გასცდა. მისი გარეგნობა შეუმჩნეველი არ დარჩენია რეჟისორ ოსმან სინავს და 1999 წელს მიიწვია სერიალში "ველური გული". შემდეგ კიდევ რამდენიმე სერიალსა და ფილმში მიიღო მონაწილეობა, 2007 წელს კი "ეზელის" გადასაღებ მოედანზე აღმოჩნდა. შეიძლება ითქვას, ომერის როლმა ის ნამდვილ კინოვარსკვლავად აქცია. ეს სერიალი თურქეთის კინოფესტივალებზე საუკეთესოდ აღიარეს და მრავალი ჯილდოც გადასცეს, კენანი კი წლის მსახიობ მამაკაცად დაასახელეს.
პირად ცხოვრებას მსახიობი საგულდაგულოდ მალავს, თუმცა ცნობილი გახდა, რომ ამჟამად 25 წლის თურქ მოდელ კუბრა კუჩუკს ხვდება. პაპარაცებმა წყვილი ერთი თვის წინ ბოდრუმში იახტაზე ერთად დააფიქსირეს.
გთავაზობთ მსახიობის ინტერვიუს.
– სერიალ "ეზელის" წყალობით მსოფლიომ გაგიცნოთ, რას გვეტყვით თქვენი გმირის, ომერის შესახებ?
– "ეზელი" ის ფილმია, სადაც კარგად არის წარმოჩენილი თანამედროვე და ძველი თურქული ტრადიციები. სერიალის წარმატება მისი შემოქმედებითი ჯგუფის დამსახურებაა. ჩემს გმირს რაც შეეხება, უახლოესი ადამიანებისგან მიყენებული ტკივილის მოსაშუშებლად და შურის საძიებლად იბრძვის.
– "ეზელის" ტელეეკრანებზე გასვლის შემდეგ თურქეთში წლის მსახიობ მამაკაცად გაღიარეს.
– დიახ და ეს ჩემთვის კიდევ ერთი დიდი წარმატება იყო, "ეზელმა" კინოვარსკვლავად მაქცია. ამ ტიტულის მიღების შემდეგ რეჟისორმა ულუჩ ბაირახტარმა მთავარ როლზე მიმიწვია სერიალ "კარადაისში". იმედი მაქვს, ეს სერიალიც ისეთივე პოპულარული გახდება, როგორც "ეზელი".
– როგორ ფიქრობთ, რა ასაკიდან არის ქალი ყველაზე სექსუალური?
– 35 წლის ზევით.
– როგორია თქვენთვის იდეალური ქალი?
– ჩემთვის იდეალურია უბრალო და მიმზიდველი ქალი, მაგრამ ამავდროულად თავმდაბალი და მოკრძალებული. მომწონს გამხდარი და ელეგანტური ქალები, ისეთები, რომლებიც საკუთარ გარეგნობას ხაზს არასოდეს უსვამენ.
– როგორ ფიქრობთ, რა არის თქვენს გარეგნობაში ყველაზე მიმზიდველი?
– თვალები!
– ჩაცმის განსაკუთრებული სტილი გაქვთ?
– არა, ჩაცმის პერსონალური სტილი ნამდვილად არ მაქვს. ჩემი სტილი უბრალო და ცოტა კონსერვატულია. ყოველთვის ვითვალისწინებ იმ მაღაზიებში მომუშავე პროფესიონალების აზრს, სადაც სამოსს ვყიდულობ. ძალიან მიყვარს იტალიური ფეხსაცმელი.
– ადამიანური ღირებულებებიდან რომელია თქვენთვის ყველაზე ფასეული?
– მორალი და სამართლიანობა. მორალი დედამ მასწავლა. როცა რაღაცას არასწორად ვაკეთებ, თავს დამნაშავედ ვგრძნობ და ვერ ვმშვიდდები, სანამ შეცდომას არ გამოვასწორებ. არასოდეს ვყოფილვარ ამპარტავანი, არასოდეს ვუყურებ ადამიანებს ზევიდან. ესეც დედისგან ვისწავლე და ჩემი ადამიანური ღირებულებებისთვის არასოდეს მიღალატია.
– კენან, წლებია, რაც მარტო ცხოვრობთ, რატომ?
– მარტოობა ჩემთვის ცხოვრების ფილოსოფიაა, ძალიან მომწონს, მაგრამ ეს იმას არ ნიშნავს, რომ სულ ასე ვიქნები. მინდა, გამოჩნდეს ადამიანი, რომელთან ერთადაც ერთ სახლში დავბერდები.
– რა არის თქვენი ყველაზე დიდი სისუსტე?
– ჩემი ოჯახი, რომელიც ძალიან მიყვარს!
– თავისუფალ დროს რითი ხართ დაკავებული?
– როდესაც სახლში ვარ, მუსიკას ვუსმენ და ყვავილების ცქერით ვტკბები. ეზოში ყვავილების ბაღი მაქვს და საკუთარი ხელით ვუვლი.
– არის რეჟისორი, რომლის შემოთავაზებაზე უარს არასოდეს იტყვით, მაშინაც კი, თუ როლი არ მოგეწონებათ?
– მარტინ სკორსეზეს და დევიდ ლინჩს უარს ვერასოდეს ვეტყვი.
– ყველაზე მეტად რას ნანობთ ცხოვრებაში?
– იმას, რომ სიგარეტის მოწევა დავიწყე!
მოამზადა თათია ბოჭორიძემ, ჟურნალი სარკე