რატომ ვერ მოირგო ვერიკო ტურაშვილმა სექსუალური იმიჯი

ვერიკო ტურაშვილი ზუსტად 14 წელია, პოპულარულია. აჩიკო მეფარიძის კონცერტზე გამოვიდა, მასთან დუეტი შეასრულა და მეორე დღეს უკვე ცნობილმა გაიღვიძა. დღეს ფიქრობს, რომ სხვას მაინც ვერაფერს გააკეთებდა და იმავე გზას აირჩევდა, თუმცა ახალგაზრდა მომღერლებისთვის გამოსავალს მაინც საზღვარგარეთ გამგზავრებაში ხედავს, ვინაიდან აქ მომღერლობით თავის შენახვა, მისი აზრით, შეუძლებელია. არის პერიოდები, როდესაც ჯიბეში ფული არ აქვს, ასეთ დროს თავს არიდებს გარეთ გასვლას და შემოსავალს ელოდება...

- აჩიკო მეფარიძესთან კონცერტზე გამოსვლის შემდეგ გაგიცნო ფართო საზოგადოებამ...
- ასე იყო და ეს მოხდა 2000 წელს. ამ კონცერტის შემდეგ ჩემი ცხოვრება ეგრევე შეიცვალა. მით უმეტეს, მაშინ მსმენელს სულ სხვანაირი დამოკიდებულება ჰქონდა სამამულო შოუბიზნესის მიმართ (იღიმის), ჩვენც სხვანაირები ვიყავით. ახლა ისეთი გარემო აღარ არის. მაშინ სტუდენტი გახლდით, 17 წლის. უცებ რადიკალურად სხვა ცხოვრება დაიწყო, რაც ყოველდღიურობაში ძალიან იგრძნობოდა. ეს ეხება უფრო მეტად ხალხის განწყობას ჩემ მიმართ. ცნობილი მომღერლები ასე ადვილად ქუჩაში ვერ დადიოდნენ. იყო მეტი ყურადღება, ხშირად გაჩერებდნენ, ახლა ჩვეულებრივი ამბავი გახდა. შინ უამრავი წერილი მომდიოდა. მწერდნენ თაყვანისმცემლები, უფრო პოზიტიური გამოხმაურებები იყო, ცუდი ნათქვამი ჩემ მიმართ არ მახსოვს. ძირითადად, თინეიჯერები, ბავშვები მწერდნენ.
- პოპულარობაზე თუ ფიქრობდი, როცა სიმღერა დაიწყე?
- ამაზე მართლა არ მიფიქრია. ყოველთვის, ადრეული ბავშვობიდან, გადაწყვეტილი მქონდა, რას გავაკეთებდი. აჩიკო მეფარიძე და კიდევ ორი-სამი მომღერალი იყო პოპულარობის ზენიტში და უცბად ჩავწერეთ დუეტი. არ მიფიქრია, რომ ცხოვრება შეიცვლებოდა. რასაკვირველია, ხალხის სიყვარული რომ ვიგრძენი იმ ერთი სიმღერის შემდეგ, ძალიან სასიამოვნო იყო. სხვათა შორის, ის სიმღერა დღემდე ყველას ახსოვს და მახსენებენ. ეს, ალბათ, განსაკუთრებული დებიუტი იყო. პოპულარობას იმ პერიოდში ნამდვილად არ შევუწუხებივარ.
- ოდესმე თუ შეუწუხებიხარ?
- არ მახსოვს ასეთი პერიოდი. ზოგადად, ჩემი ცხოვრებიდან გამომდინარე, მკვეთრი ნაბიჯები არ გადამიდგამს, რომ მერე სალაპარაკო გამხდარიყო. იყო მომენტები, როდესაც ჩემი პირადი ცხოვრების დეტალები უფრო გამხმაურდა, ვიდრე მე მსურდა, მაგრამ გამორჩეულად არ შევწუხებულვარ და არ მინანია. პერიოდულად სულ ვრცელდება ჩემი პირადულიდან სიახლეები, არ მინდა მათი გახმაურება, რადგან ძალიან ჩემია, მაგრამ მაინც ვისმენ ათასგვარ ინტერპრეტაციას, ზოგჯერ კუდებიც ებმება, მაგრამ არასდროს მიუღია ისეთი სახე, რომ ამის გამო უბედური ვყოფილიყავი.
- მოდი, მე გაგახსენებ ერთ ფოტოსესიას, რომელიც ''არტ-იმედში'' ყოფნისას გაგიკეთეს. ფოტოზე გამჭვირვალე ბლუზა გეცვა და მკერდი გიჩანდა...
- პატარა ბავშვს რა მიქნა აჩიკომ (იცინის). როგორ გახსოვს ეს ყველაფერი?!. დაუფიქრებლად გავაკეთე, მიმაჩნია, რომ ასეთი იმიჯი ჩემი ნიშა არ ყოფილა, ძალიან სექსუალურ იმიჯს ვგულისხმობ. კოსტიუმები მაკა ასათიანის სალონში შემიკერეს ''აზიის ხმებისთვის'', კონკურსისთვის, სადაც მივემგზავრებოდი. ფოტოსესიაც გაკეთდა და არ ვიცი, ისე გამოვიდა, რომ მკერდი გამომიჩნდა. სამწუხაროდ, ეს მასალები აღარ არსებობს, დაკარგულია. ყველაფერი, რასაც იმ პერიოდში ვაკეთებდით, ''არტ-იმედში'' იყრიდა თავს. ამ ორგანიზაციის დახურვის შემდეგ ბევრი რამ დაიკარგა და გაიფანტა.
- მას მერე გახსოვს შენი ასეთი თამამი იმიჯი?
- არა, მაგრამ მახსოვს ჩემი და აჩიკო მეფარიძის ფოტოსესია ჟურნალებისთვის. აჩიკოს ძალიან უყვარდა ახალ-ახალი იმიჯი და ჩემზეც ატარებდა ექსპერიმენტებს, მამასავით ზრუნავდა ჩემზე. მაღაზია ჰქონდა, იქ არჩევდა სამოსს და მერე ვიღებდით ხოლმე. ერთი ფოტო გადავიღეთ, სადაც აჩიკოს თავზე ვკოცნიდი. ამ ფოტომ დიდი მითქმა-მოთქმა გამოიწვია, რა წესია თავზე კოცნაო. შემდეგ ლაპარაკობდნენ, ალბათ მათ შორის რაღაც ხდება, აბა, ამდენ რამეს რატომ გაუკეთებდაო. ეს ფოტოსესიაც ამის დადასტურებად მიიჩნიეს (იცინის). ბევრისთვის გაუგებარი გახლდათ, რატომ იმეტებდა ჩემთვის ბევრ კარგ რაღაცას, თუკი არც მამაჩემი იყო, არც ბიძა და არც შეყვარებული. არადა, ჩვენ ძალიან კარგი მეგობრები ვიყავით (იღიმის).
- ვერიკო, პოპულარობის შესანარჩუნებლად მომღერალმა რა უნდა გააკეთოს? 14 წელი როგორ არ დაკარგე აქტუალობა, მიუხედავად იმისა, რომ მხოლოდ ერთი ალბომი გაქვს.
- მეორე-მესამე ალბომის მასალა დიდი ხანია, მაქვს. არ ვიცი, როგორ შევინარჩუნე პოპულარობა. ალბათ პერიოდულად რომ რაღაცებს ვაკეთებდი, ხალხს მოსწონდა. დღემდე არ დამივიწყეს და სულ ელოდებიან ჩემგან სიახლეებს.
- ჭორები და გავრცელებული ხმები - ძირითადად პირადულს ეხება, მაგრამ არის ხოლმე ჭორები გარეგნობაზე, შემოქმედებაზე. შენს ცხოვრებაშიც ალბათ ყოფილა მსგავსი რამ.
- რა ვიცი, არ მახსოვს... გარეგნობასთან დაკავშირებით არაფერი დამიმალავს. მაქვს ცხვირის პლასტიკური ოპერაცია გაკეთებული. თავადვე ვთქვი. შემდეგ ''პროფილში'' ბოტოქსი გავიკეთე, რაც ყველას თვალწინ მოხდა, ამიტომაც ჭორებისთვის საფუძველი არ მიმიცია. თუ რაიმე მომხდარა ჩემს ცხოვრებაში, არ დამიმალავს, მათ შორის, არც პირად ცხოვრებაზე. ცუდი იქნება თუ კარგი, აუცილებლად ვიტყვი. როცა მივიჩნევ საჭიროდ, რომ ამაზე ღირს ლაპარაკი, ვამბობ. თუკი არაფერი სერიოზული არ ხდება, ასე ყველაფერზე ხომ ვერ ილაპარაკებ?!.
- თუ შეგშლია ხელი პირადულში იმის გამო, რომ პოპულარული ხარ? გაგპრანჭვია მამაკაცი იმის გამო, რომ ცნობილი ხარ?
- შესაძლოა, როცა სიმპათიას გამოხატავენ, ვერ იგრძნო. კარგად გაცნობის შემდეგ, შესაძლოა, მიხვდე, რომ აინტერესებდა შენი სახელი და არა თავად ვერიკო. ასეთი შემთხვევაც არ ყოფილა ჩემს ცხოვრებაში ხშირად, დიდი ისტორიებითა და თავგადასავლებით არ ვყოფილვარ ცნობილი. გაპრანჭვაზე მეტად სხვა რამ გამკვირვებია. ერთი კვირის გაცნობილ ადამიანს ხშირად უთხოვია, ბავშვი მომინათლე, ან ჩემი მეჯვარე იყავიო. ნათლობაზე უარის თქმა არ შეიძლება, მაგრამ ერთი-ორჯერ მითქვამს. ალბათ, რადგან ცნობილი ადამიანი ხარ, ამიტომაც უნდათ შენთან დაახლოება. აბსოლუტურად უცხო ადამიანი როცა გთხოვს, ამაზე ვერ დავთანხმდები. ცოტა უცნაურია...
- პოპულარობას ფინანსური მდგომარეობის გაუმჯობესება თუ მოსდევს?
- ადრე უფრო გვქონდა შემოსავალი, ვიდრე დღეს. პოპულარობას მომღერლისთვის ფული არ მოაქვს. ეს შეიძლება, ცნობილი სახისთვის უფრო მტკივნეული იყოს. როცა ყველა გცნობს, შესაძლოა, თავი აარიდო საზოგადოებრივი ტრანსპორტით მგზავრობას. მე, მაგალითად, მერიდება. მიუხედავად იმისა, რომ მაქვს სამსახური, სხვადასხვა კლუბში ვმუშაობ ბენდთან ერთად, სხვა საქმეა, მყოფნის თუ არა, მაგრამ მაქვს რაღაც შემოსავალი, არის პერიოდები, როცა ფული საერთოდ არ მაქვს. ასეთ დროს მირჩევნია, სახლში ვიჯდე და ბევრი არ ვიარო (იღიმის), პასიურ მდგომარეობაში ვარ ხოლმე. ბოლო წლებია, ამ მხრივ ცუდი მდგომარეობაა, მაგრამ ეს არა მხოლოდ შოუბიზნესს ეხება. მე ჩემს სფეროზე ვლაპარაკობ, მაგრამ ალბათ სხვა სფეროებშიც იგივე სიტუაციაა.
- ფასს არ გიკლებენ სამოსის, პროდუქტების მაღაზიაში?
- ყოფილა ასეთი შემთხვევებიც, მაგრამ უფრო ხშირად, ფასდაკლებები არ მაქვს. მერიდება კიდეც, რომ ვისარგებლო ჩემი პოპულარობით. ზოგისთვის მოსულა შევაჭრება, მე არ შემიძლია.
- შენთვის დადებითი უფრო მეტია პოპულარობაში თუ უარყოფითი?
- ხშირად მიფიქრია, სხვა პროფესიას რომ გავყოლოდი, მაგრამ ვერ წარმოვიდგინე. უარყოფითი პოპულარობას ნამდვილად არაფერი მოუტანია. დადებითი, რა თქმა უნდა, უფრო მეტი. ჯერ მხოლოდ ადამიანების სიყვარულია მაგარი.
- სხვა შენს კოლეგებს რომ უყურებ, ჭორების საფარველში გახვეულებს, ხომ არ გეშინია, შენც რომ აღმოჩნდე იმავე მდგომარეობაში?
- არაფერია გამორიცხული (იღიმის). ხან ასეა, ხან ისე, ყველას თავისი ცხოვრება აქვს. ისე არ ვცხოვრობ, რომ არავის არაფერი ჰქონდეს სათქმელი - ბევრჯერაც შემშლია, დამიშავებია კიდეც, არასწორადაც მოვქცეულვარ, რასაც შესაძლოა, დღეს ვნანობ, მაგრამ აქამდე სალაპარაკო არაფერი გამხდარა. მთავარია, თუკი ვინმე ილაპარაკებს, ეს ყველაფერი სწორად გაიგონ ჩემმა შვილმა, ოჯახის წევრებმა. ხომ არსებობენ ადამიანები, რომელთაც, მაპატიეთ და, ფეხებზე ჰკიდიათ, ვინ რას ილაპა-რაკებს, მე მათ კატეგორიაში არ შევდივარ. ჩემთვის აქვს მნიშვნელობა საზოგადოების აზრს. არ მინდა, სალაპარაკო და გასაკიცხი ვიყო. შესაძლოა, ისე წავკრა სადღაც ფეხი, რომ ხალხს წლები არ დაავიწყდეს, მაგრამ იმედია, ეს არ მოხდება.
- თავს ხომ არ იკავებ რაიმესგან, რადგან ცნობილი სახე ხარ, ვთქვათ, გართობისგან.
- კლუბშიც წავსულვარ მეგობრებთან ერთად, დამილევია კიდეც, მაგრამ ოთხით არსაიდან გამოვსულვარ. ამაზე მეტის გაკეთება, ალბათ, არ მნდომებია. მაქვს ჩემი შინაგანი ''სტოპები''. არ მომწონს, როცა ჩემს თავს ვერ ვაკონტროლებ, მაგრამ არც განსაკუთრებულად ვიკავებ თავს.
- საქართველოში ადვილია პოპულარობის მოპოვება?
- დღეს არის ბევრი შოუ, ნიჭიერი თაობა მონაწილეობს, ხდებიან პოპულარულები, მაგრამ ამას გაგრძელება არ მოჰყვება. სამი თვე პოპულარობის ზენიტში არიან, თაყვანისმცემლებს იძენენ, იბრძვიან, რომ ვიღაცამ გაიმარჯვოს და შემდეგ არაფერი ხდება. პოპულარობის მოპოვება ადვილია, მერე გაგრძელებაა ძნელი. ვისაც ასაკი აქვს შესაბამისი, რომ საზღვარგარეთ გაემგზავროს, ასეც უნდა მოიქცეს და მერე მყარად დაუბრუნდეს თავის ქვეყანას.
- პოპულარობის გარეშე გაგიჭირდებოდა?
- არა, ეს ჩემთვის ფუფუნების მომტანი არ არის, ჩემს ცხოვრებას ალბათ ჩვეულებრივ გავაგრძელებდი.

ნინო მურღულია
ჟურნალი ''რეიტნგი''