რატომ წერს ლაშა მილორავა საშინელებათა ჟანრის ნაწარმოებებს

ქართველი მკითხველები საშინელებათა ჟანრის ნაწარმოებებით განებივრებულნი არ ვართ. ლაშა მილორავას რომანი თანამედროვე ახალგაზრდობაზე, ''ბაბუა ბუკოვსკი'', მისი დებიუტი იყო ''დიდ მწერლობაში'', რომლის შემდეგაც გამოსცა ''დეგენერატების ქალაქი'', რომელიც პირველ ქართულ ''ზომბი-სთორიდ'' ითვლება. თუ რატომ გადაწყვიტა ლაშამ ამ ჟანრში წერა და რას უმზადებს თავის მკითხველს სამომავლოდ, ამას ჩვენი ''ანკეტიდან'' შეიტყობთ...

სახელი გვარი, დაბადების თარიღი, პროფესია...

ლაშა მილორავა, ბნელი 1995 წლის ცხელი 11 აგვისტო.

ადგილი და ოჯახი, სადაც დავიბადე და გავიზარდე...

დავიბადე და გავიზარდე რუსთავში, ერთ ჩვეულებრივ და სხვებისგან არაფრით გამორჩეულ ოჯახში.

წერა დავიწყე, როცა...

წერა დავიწყე, როცა თოთხმეტი წლის გახლდით. ეს იყო ''ჰარი პოტერის'' სერიების იმიტაცია, შემდეგ კი დამოუკიდებელ და ავტონომიურ მოთხრობებზე გადავედი. მოგვიანებით წამოვიდა რომანები და რეცენზიები. ლექსი არასდროს დამიწერია.

საშინელებათა ჟანრი...

საშინელებათა ჟანრი ჩემი საყვარელი, მსოფლიოში კი ერთ-ერთი ყველაზე პოპულარული და პროგრესული ჟანრია, თუმცა, რა თქმა უნდა, ამ მსოფლიო ლიტერატურულ პროცესს საქართველო ამაყად ემიჯნება. ის, რაც მინიმუმ ოცი წლის წინ უნდა დაწყებულიყო, სათავეს ახლა იღებს. რა თქმა უნდა, ჩვენთანაც არის ხალხის გარკვეული ნაწილი, რომელიც ასე თუ ისე იცნობს ამ ჟანრის წარმომადგენლებს და მათ აქტიურად კითხულობს, ბოლო წლებში ასევე წამოვიდა ჟანრული პროზის თარგმანებიც, რაც, თავისთავად, ამ ტიპის ლიტერატურის პოპულარიზაციას ემსახურება, მაგრამ რაც ყველაზე ცუდია - ქართველი ავტორები არ სთავაზობენ მკითხველს მსგავს ტექსტებს, ალბათ არასაკმარისად ''სერიოზულად'' მიაჩნიათ. რატომ უნდა დაწერო ზომბებზე, როცა შენი უბნელი ვასკა ''პერედოზით'' კვდება. იმდენი ხანია ერთ ადგილს ვტკეპნით, მიწაში უკვე ისე ღრმად ვართ ჩასულები, ფიზიკურად ვეღარ ვხედავთ, ორმოს იქით მსოფლიოში რა ხდება.

რომანები ''ბაბუა ბუკოვსკი'' და ''დეგენერატების ქალაქი''...

''ბაბუა ბუკოვსკი'' ერთ კვირაში თუ ხუთ დღეში დავწერე და შევეცადე, მკითხველისთვის ახლანდელი ახალგაზრდების ყოველდღიური ცხოვრება სატირულად დამენახვებინა, ანუ, თითქმის ორასი პროცენტით ვარ დარწმუნებული, რომ ის, რაც ჩემს რომანში ხდება, სინამდვილეში ვერ მოხდებოდა, ალბათ ისევ და ისევ სიზარმაცისა და ინდიფერენტულობის გამო. რაც შეეხება სათაურს, ალბათ სწორედ ამან განსაზღვრა გაყიდული ეგზემპლარების რაოდენობა, თუმცა, რეალურად, როცა ვწერდი, არ მიფიქრია კომერციულობაზე და ეს სახელიც იმიტომ შევარჩიე, რომ ბაბუაჩემი ძალიან ჰგავდა ბუკოვსკის.
''დეგენერატების ქალაქზე'' მუშაობამ უფრო მეტი დრო წაიღო. ''ბაბუა ბუკოვსკის'' გამოსვლი-დან რამდენიმე კვირაში დავიწყე წერა, ერთ თვეში დავასრულე, შემდეგ კი კიდევ ერთი თვე რაღაც-რაღაცების ჩამატება-ამოღებამ წაიღო. საბოლოოდ ამ წიგნით ძალიან კმაყოფილი ვარ. გარდა იმისა, რომ ''დეგენერატების ქალაქი'' პირველი ქართული ზომბი-ფიქშენია, იგი ასევე სოციალურ სატირასაც წარმოადგენს და მგონი, ამ ორი ჟანრის სინთეზი ბუნებრივი გამოვიდა. სათაურის იდეა რუსთავიდან წამოვიდა, ქალაქიდან, სადაც დავიბადე და გავიზარდე და რომელიც ალბათ ერთ-ერთი ყველაზე უცნაური ადგილია საქართველოში, განსაკუთრებით საღამოს საათებში, როცა ქუჩები ჯერ ხალხითაა სავსე, შემდეგ კი უეცრად ცარიელდება.

რა მომწონს და რა არ მომწონს ჩემს თაობაში...

მომწონს - ინფორმირებულობა.

არ მომწონს - ამ ინფორმაციის სრული იგნორირება.

საკუთარ თავში ვებრძვი...

საკუთარ თავში ვებრძვი დილით დიდხანს ძილის სურვილს, ღამით - ჭამის, თორემ ასუქებს (იღიმის).

მჯერა...

მჯერა, რომ იბერია ვერ გაბრწყინდება.

არ მჯერა...

არ მჯერა, რომ სამყაროში სიცოცხლე მხოლოდ ჩვენს პლანეტაზეა.

ყველაზე ხშირად მავიწყდება...

ყველაზე ხშირად მავიწყდება, რომ ჩემ გარდა სხვასაც შეიძლება ჰქონდეს წაკითხული ოგიუსტ კონტი (იღიმის).

არასოდეს მავიწყდება...

არასოდეს მავიწყდება, რომ თუ რამე წარმატებას მივაღწევ, აუცილებლად ჩემს თავს უნდა ვუმადლოდე.

ყველაზე მეტად მეშინია...

ყველაზე მეტად მეშინია, რომ ერთ დღეს გავიღვიძებ და ლაპარაკს ვეღარ შევძლებ.

დღეს ვწერ...

ამჟამად საშინელებათა ჟანრის მოთხრობების კრებულზე ვმუშაობ, პარალელურად, უკვე რვა თვეა ვწერ რომანს. თუ ყველაფერი კარგად წავიდა, კრებული შემოდგომაზე გამოვა, რომანი კი, ალბათ, მომავალ წელს.

ის, რაც აქამდე არასდროს მითქვამს...

ზოგადად ბევრს ვლაპარაკობ და არ მახსოვს, თუ არის ისეთი რამ, რაც, თუ გამიზნულად არ მითქვამს, არ წამომცდენია მაინც.

ანა კალანდაძე
ჟურნალი ''რეიტინგი''