რამაზო რომა: ნინი ბადურაშვილს ბიონსესავით ჩავაცმევდი

დიზაინერი რამაზო რომა დიდი ხანია თურქეთში მოღვაწეობს. მეზობელ ქვეყანაში ბედის საძიებლად 17 წლის ასაკში წავიდა. საქართველოს ხშირად, მაგრამ ცოტა ხნით სტუმრობს ხოლმე. წელს ვიზიტი სახლში რემონტის გამო გაუგრძელდა. ამასობაში არაერთ პროექტში მიიწვიეს და შესაბამისად, აქაურ შოუბიზნესშიც აქტიურად ჩაერთო.

- რამაზო, დიდი ხანია აქ ხარ, აქაურ ცნობილ სახეებთან ურთიერთობის საშუალება მოგეცა. ვის გამოარჩევ გემოვნების თვალსაზრისით, ვინ უწყობს ფეხს მოდის ტენდენციებს?
- სიმართლე გითხრათ, მომწონს აქაური სტილი, მოდა. ქართველი ქალები გემოვნებით იცვამენ. აცვიათ ალექსანდრო პაულინის, გალიანოს, რიკო ვენსისა და ისეთი ფირმების სამოსი, რომელსაც მსოფლიოში მასა არ იცვამს. თუმცა არ ვფიქრობ, რომ ეს კონცეპტუალური ტანსაცმელი უნდა ჩაიცვას ესტრადის მომღერალმა. ქართველ მომღერლებს აკლიათ სექსუალურობა. ყველა მომღერალს თავისი იმიჯმეიკერი უნდა ჰყავდეს, რომელიც მას სცენისთვის შემოსავს. სცენა არ არის ქუჩა, კაფე, რესტორანი. სცენაზე რომ დგახარ, უნდა განსხვავდებოდე მაყურებლისგან, შენ და დარბაზში მსხდომ მაყურებელს ერთნაირად არ უნდა გეცვათ.
- შენ ვისი იმიჯმეიკერი იქნებოდი სიამოვნებით?
- სთაილინგს გავუკეთებდი ლელა წურწუმიას, სოფო ნიჟარაძეს, თუმცა სოფოს ჩაცმის სტილი მომწონს, რასაც მღერის, იმის შესაბამისად იცვამს. დოლჩე გაბანა, ვალენტინო აცვია, თუმცა მაინც შევცვლიდი რაღაცას.
- გინდა თქვა, რომ ლელას რეპერტუართან შეუსაბამოდ აცვია?
- ლელა მომწონდა 2000 წელს. ახლა დაქალდა.
- გაიზარდა...
- მადონა 52 წლის არის, მაგრამ საცურაო კოსტიუმში გამოდის სცენაზე. არტისტისთვის ასაკი ხელისშემშლელი არ უნდა იყოს სცენაზე.
- როდის მოგწონდა ლელა, ბიუსტჰალტერზე პიჯაკი რომ ეცვა?
- თუნდაც, რატომაც არა? ძალიან უხდებოდა და გაცილებით პოპულარულიც იყო მაშინ.
- ახლაც ძალიან პოპულარულია.
- როგორც არტისტი, მომღერალი, ახლაც მომწონს, მაგრამ ჩაცმის სტილს აუცილებლად შევუცვლიდი. საღამოს კაბებს ჩავაცმევდი, ოღონდ ''პრარეზს'' ფეხის დასაწყისიდან გავუკეთებდი. ლელას მოუხდება დეკოლტეც. ოღონდ ეს ყველაფერი იქნებოდა ლამაზი, სექსუალური და არა ვულგარული. ბიონსეც გამოდის ტრუსებში, მაგრამ არ არის ვულგარული. მთავარია სტანდარტები დაიცვა.

Rating

- მადონა და ბიონსე ახსენე. საქართველოში ვის ჩააცმევდი მათსავით?
- ნინი ბადურაშვილს. საქართველოში ცოტაა მომღერალი, რომელსაც აქვს კარგი გარეგნობაც და არის კარგი მომღერალიც.
- როგორ გგონია, ნინი ამას დათანხმდება?
- რატომაც არა.
- ჩვენ ხომ საქართველოში ვცხოვრობთ...
- და რა მერე, რადგან საქართველოში ვცხოვრობთ, მომღერალმა საცურაო კოსტიუმი არ უნდა ჩაიცვას სცენაზე? ჩვენ ევროპელი ერი ვართ, ვიბრძვით ევროპული ღირებულებებისთვის და რატომ არ უნდა ჩავიცვათ ისე, როგორც აცვიათ ევროპაში?
- მამაკაც მომღერლებზე რას გვეტყვი?
- მომწონს სტეფანე მღებრიშვილის, აჩიკო მეფარიძის ჩაცმის სტილი.
- ვისი არ მოგწონს?
- ვინც არ მომწონს, იმას არ ვუყურებ და არ ვიცნობ.
- ნოდიკო ტატიშვილზე რას გვეტყვი?
- კარგი გარეგნობის ბიჭია, ''ფეშენ ვიკის'' ფართიზე ვუთხარი კიდეც, რატომ არ ვიცნობდი ამდენი ხანს ასეთ ''კრასავჩიკს''-მეთქი (იცინის). როგორი ტკბილი ხარ-მეთქი, ვუთხარი.
- რა გიპასუხა?
- რა უნდა ეთქვა, გაუხარდა და გაიცინა. კულტურული ბიჭია და ძალიან კარგი ვიზუალი აქვს. თუმცა ვარსკვლავურად არ იცვამს. შევუცვლიდი იმიჯს. შეიძლება ეს მენტალიტეტის ბრალიცაა. ბევრ რამეს ითვალისწინებენ ამ მხრივ ქართველი მომღერლები, რასაც მე არ გავითვალისწინებდი.

Rating

- მაგალითად?
- მე რომ ვიყო მომღერალი, არ მექნებოდა იმის კომპლექსი, რომ ძალიან მოკლე შორტებით დავმდგარიყავი სცენაზე.
- ასეთი მომღერალი გვყავს, მოკლე შორტებით მარკუს მეტრეველი მღერის.
- ეგ ვინ არის (იღიმება)?
- მომღერალია.
- აა, კარგი ბიჭია მარკუსი, კარგად მღერის, გემოვნებაც კარგი აქვს და ლამაზი ბიჭია.
- კიდევ ერთი ლამაზი მომღერალი ბიჭი გვყავს, გია სურამელაშვილი...
- ეგ ბიჭია? მგონი, გოგოა.
- რატომ, ლამაზი რომ არის?
- არა, სურამელაშვილზე ლამაზიაო, ვერ ვიტყვი. ლამაზი იყო ბავშვობაში. ახლა დაბერდა. ''ბალეტიც'' აღარ შველის (იცინის).
- რას გულისხმობ?
- ტონალური კრემი იყო მაშინ, 1995 წელს, ''ბალეტი'', მაგას ხმარობდნენ (იცინის).
- რას შეცვლიდი გიას იმიჯში?
- არა, გია არ შეიცვლება, არ გამოვა, ეგ არაფერში ჯდება, სულ სხვა სამყაროა. მილიონზეც არ ვიშრომებდი მის იმიჯზე... მომწონს ანრი ჯოხაძე. რომ გახდეს, უკეთესი იქნება.
- მოდის ტენდენციებზეც ვისაუბროთ, როგორ ჩავიცვათ შემოდგომაზე, როგორი სტილი და ფერებია აქტუალური?
- შავი, მუქი ნაცრისფერი, ყავისფერი, მუქი შინდისფერი. სტილს რაც შეეხება, მომწონს, როცა ყოველდღიურად ქალი იმოსება სპორტულად, თავისუფლად, კომფორტულად უნდა გრძნობდეს თავს. წლებია სტამბოლში ვცხოვრობ და იქ გემოვნებიან მდიდარ ქალებს დღის განმავლობაში ვერ ნახავთ ქუსლიანი ფეხსაცმლით და საღამოს კაბით. წელს აქტუალურია მუხლის ქვევით სიგრძის კაბები, ტანზე მომდგარი და წელში გამოყვანილი. თავისუფალი, ასიმეტრიული, აჩაჩული პიჯაკები. მე ასეთი პიჯაკები მომწონს. ნებისმიერი ადამიანი ინდივიდუალურია, რაც გიხდება, ის არის მოდაში.
- როგორი სტილის შარვლებია წელს მოდური?
- სათავე წელზე უნდა იყოს და კოჭი უნდა ჩანდეს. ასეთი შარვლები, მათ შორის ჯინსებიც, ძალიან უხდება მაღალქუსლიან ფეხსაცმელს.
- შენს ''ფეისბუქის '' გვერდზე ერთი ფოტო აღმოვაჩინე, რომელზეც კომენტარებში ნაომი კემპბელს გამსგავსებენ.
- ჰო, ეს ფოტო მეც ძალიან მომწონს, ჯეკსონსაც მამსგავსებენ (იღიმება).
- რამდენი წლის ხარ?
- ასაკს არ ვამბობ.
- მაშინ ის მითხარი, რამდენი პლასტიკური ოპერაცია გაქვს გაკეთებული.
- არ მახსოვს (იცინის).
- თითები არ გყოფნის ხომ?
- თითები კი არა, მგონი თმაც არ მეყოფა (იცინის).
- არ გეშინია ამდენი ოპერაციების?
- არა, ძალიან მაგარი პლასტიკური ქირურგი მყავს, რომელიც ყოველთვის იმას აკეთებს, რაც მე მინდა.
- რა გაქვს გაკეთებული?
- ბევრი არაფერი, შესწორებები მაქვს გაკეთებული, სახის გადაჭიმვა ჯერ არ დამჭირვებია. თუ დამჭირდება, არც ეს არის პრობლემა. სილამაზისთვის ქირურგიული ჩარევა მისაღებია ჩემთვის. ამაში ცუდი არაფერია. მთავარია კარგად გაკეთდეს. საქართველოში ტუჩებს საშინლად იკეთებენ. მე აქ არასდროს გამიკეთებია, ისედაც უმნიშვნელოდ მაქვს გაკეთებული, ყოველთვის დიდი ტუჩები მქონდა, შემიძლია ჩემი ბავშვობის ფოტოები განახოთ.
- შენს პირად ცხოვრებაში რა ხდება?
- ხან ცხელა, ხან ცივა. მე სიყვარულს არ ვაღიარებ, არასდროს არავის გამო არ ვიდარდებ. ასე უკეთ ვგრძნობ თავს. საკუთარი თავი ყველაზე მეტად მიყვარს.

ნინო მჭედლიშვილი
ჟურნალი ''რეიტინგი''