რას მიიჩნევს ვანო ჯავახიშვილი ნამდვილ დასვენებად

სექტემბერი დადგა და უკვე წარსულში დარჩა ზაფხულის ცხელი დღეები, როდესაც ყველა თავისებურად ცდილობდა გაგრილებას. გადავწყვიტეთ გაგვერკვია, ყველასთვის ცნობილმა და პოპულარულმა ადამიანებმა როგორ დააღწიეს თბილისის სიცხეებს თავი.

ლევან ყოჩიაშვილი (მსახიობი):

- კახეთში მშობლებთან ყოფნა მიყვარს, ზაფხულში ზღვაზე ან სხვა ქვეყანაში თუ არ წავედით, ძირითადად დედოფლისწყაროში ვისვენებ ოჯახთან ერთად.
- კახეთში გართობას ახერხებთ?
- სახლთან ახლოს პატარა ტბა გვაქვს, სადაც დილაობით მივდივართ. ძალიან მაგარი ძაღლი გვყავს, მალე ნადირობის სეზონი დაიწყება და მწყერზე ვაპირებთ სანადიროდ წასვლას.
- სამწუხაროა, რომ ''ჩემი ცოლის დაქალებში'' თქვენი გმირის მსგავსად პარიზში დასვენება ვერ მოახერხეთ...
- ასე გამოვიდა (იცინის). კინოს ამბები ცხოვრებაში არ გრძელდება ხოლმე.


- როდის აპირებთ დაუბრუნდეთ მუშაობას?
- 10 სექტემბრიდან შევიკრიბებით და ძველი სერიების გამეორება რომ დამთავრდება, მალევე დავიწყებთ ახალ სეზონს. სიმართლე გითხრათ, მსახიობები და სერიალზე მომუშავე ჯგუფი ძალიან მომენატრნენ. ბოლო სამი წელია, ეს სერიალი ჩემი მეორე ოჯახივითაა და ძალიან შევეჩვიე.

დასვენების ამბები ვკითხეთ ჟურნალისტ ნინო თოლორდავას.

- ნინო, სად დაისვენე?
- საბერძნეთიდან დავბრუნდი რამდენიმე დღის წინ. როდოსზე ვისვენებდი ოჯახთან ერთად. საბერძნეთიდან ჩამოსვლის მეორე დღესვე სამსახურში გავედი.
- საბერძნეთში პირველად იყავი?
- პირველად ვიყავი და ძალიან მომეწონა, მზე, ზღვა, აუზი, მეუღლე და ბავშვი. ახლო მდებარე სასტუმროში ჩემი მეგობრები ისვენებდნენ. ყველაფერი მქონდა იმისთვის, რომ კარგად დამესვენა.
- ახალი სეზონიდან რა სიახლეს გვპირდები?
- ''მაესტროზე'' ბევრ სიახლეს ნახავთ, მე კი ისევ ჩემს საყვარელ საინფორმაციოს წავიყვან.

ვანო ჯავახიშვილი (ტელეწამყვანი):

- ვანო, ცხელ ზაფხულს თავი როგორ დააღწიეთ?
- ასეთ სიცხეში თბილისში ვარ.
- მთელი ზაფხული თბილისში გაატარეთ?
- საირმეში ვიყავი ცოლსა და შვილთან ერთად რამდენიმე დღით. მანამდე ოჯახთან ერთად საფრანგეთში წავედი, მეტი არსად დამისვენია.
- ორივე მშვენიერი ადგილია დასასვენებლად, თქვენ კი ისე საუბრობთ, მგონი, უკმაყოფილო ხართ დასვენებით.
- რეალურად არ დამისვენია, ეს დასვენება არ იყო. ყველაფრის ნახვა გვინდოდა, ბევრს დავდიოდით, რაც ჩემთვის ცოტა ძნელია, მაგრამ, რასაკვირველია, კარგი იყო.
- საფრანგეთში რა მოინახულეთ?
- მხოლოდ პარიზში ვიყავით რვა დღით.
- რადგან ასეთი დასვენება მაინცდამაინც არ გხიბლავთ, როგორ დასვენებაზე ოცნებობთ?
- ვგიჟდები, როცა სახლში ვარ, როცა მინდა, მაშინ რომ ვიძინებ და როცა მინდა, მაშინ რომ ვიღვიძებ, ესაა ჩემი დასვენება.

- თქვენი შოუს ახალი სეზონის დაწყებას როდის გეგმავთ?
- ეთერში 12 სექტემბერს გავდივართ, მაგრამ 1-ელ სექტემბერს უკვე სამსახურში ვართ ხოლმე ყველა.
- საფრანგეთში პირველად იყავით?
- ამ ქვეყანაში ეს ჩვენი პირველი მოგზაურობა იყო.
- რამ მოახდინა თქვენზე ყველაზე დიდი შთაბეჭდილება?
- ბევრი რამ მომეწონა, ყველაფერი საინტერესო იყო. ბავშვს მოეწონა ''დისნეილ ლენდი''. შეიძლება, პარიზში მოგზაურობისას ვინმემ თქვას, რომ ეიფელის კოშკი მოეწონა ყველაზე მეტად, მაგრამ მე ძალიან მომეწონა ვერსალის სასახლე. რომელიც ლუი XVI-ის აშენებულია, არაჩვეულებრივი და ფანტასტიკური შენობაა. ვერაფერზე ვიტყვი, არ მომეწონა-მეთქი. პარიზი არის აბსოლუტურად სხვა სტილის ქალაქი და არც ერთ ქალაქს არ ჰგავს.
- პარიზში ცხოვრების სურვილი ხომ არ გაგჩენიათ?
- როდესაც სადმე დასასვენებლად მივდივარ, სულ ვნატრობ და ერთი სული მაქვს, თბილისში როდის დავბრუნდები. შესაბამისად, არც პარიზში ცხოვრებას ვისურვებდი. ჩემი თბილისი ყველაფერს მირჩევნია.

''მაესტროს'' დირექტორმა მამუკა ღლონტმა სოციალური ქსელში დაწერა, რომ მოტოციკლით უამრავი ქალაქი მოიარა. გადავწყვიტეთ, თავად მამუკასგან გაგვეგო, რა ხიბლი აქვს მოტოთი მოგზაურობას.

- ბატონო მამუკა, რატომ გადაწყვიტეთ მოტოციკლით მოგზაურობა?
- ბოლო ხუთი წელია, ჩემი სატრანსპორტო საშუალება არის მხოლოდ მოტო. მანქანაში მხოლოდ იმ შემთხვევაში ვჯდები, თუ ძალიან ცუდი ამინდია და მოტოთი გადაადგილება შეუძლებელია. ჩემმა სიყვარულმა ამ ტრანსპორტის მიმართ განაპირობა ის, რომ ასეთი მოგზაურობა გამებედა. სამოგზაუროდ მე და ჩემი მეუღლე წავედით.
- რომელი ქალაქები მოინახულეთ?
- გეტყვით ჩვენს მარშრუტს. შეკვეთილიდან პირველი გაჩერება გვქონდა თურქეთის ქალაქ ორდუში, მეორედ ანკარაში გავჩერდით, მერე წავედით იზმირში, ვიყავით კუშადასში, საიდანაც გადავედით ბოდრუმში. ბოდრუმიდან წავედით ბერძნულ კუნძულ კოშზე, დავბრუნდით ისევ ბოდრუმში, გადავედით მარმარისში, საიდანაც გავემგზავრეთ ბერძნულ კუნძულ როდოსზე, დავბრუნდით ისევ მარმარისზე და გადავედით ანკარაში, საიდანაც დავბრუნდით შეკვეთილში.
- არ გაგიჭირდათ მოტოთი მოგზაურობა?
- მოტოთი სიარული სწორედ იმას გულისხმობს, რომ შეიძლება გაგიჭირდეს, აღმოჩნდე ექსტრემალურ სიტუაციაში და ასეც მოხდა. ტრაბზონში ისეთი წვიმა იყო, რომ მოტო თუ დაიქოქებოდა, აღარ მეგონა. იზმირში რომ გადავდიოდით, რიკოთის მსგავსი უღელტეხილი გავიარეთ. საშინელი ქარიშხალი იყო და მეხიც ჩამოვარდა. ერთხელ ჯიპიესმა გაგვიჭედა და ტყეში შევედით ბოდრუმის მაგივრად... ახლა ეს ყველაფერი კარგად მახსენდება.
- ამ ქალაქების მოსანახულებლად რამდენი დღე დაგჭირდათ?
- შეკვეთილიდან გავედით 4 აგვისტოს და 17-ში ჩამოვედით. სულ რაღაც 12 დღე დაგვჭირდა იმისთვის, რომ ეს ყველაფერი მოგვენახულებინდა. ბოლოს 1020 კილომეტრი ერთ დღეში გამოვიარეთ, რაც ვთვლი, რომ მინიმუმ საქართველოს რეკორდია.
- რადგან მოტოთი მოგზაურობდით, ალბათ ამ ქალაქების დათვალიერება ვერ მოახერხეთ...
- პირიქით, ბევრი რამ ვნახეთ. რასაც მანქანით და ფეხით მოგზაურობისას დიდ დროს ანდომებ, მოტოთი უცბად აკეთებ. ბერძნულ კუნძულებზე ერთი დღე გავჩერდით, დანარჩენ ქალაქებში საშუალოდ ორი-სამი დღე ვჩერდებოდით. ეს დრო სავსებით საკმარისია თურქული ქალაქების დასათვალიერებლად.
- ვისაც გაუჩნდება სურვილი, ასეთ მოკლე დროში მოტოთი შემოიარონ ამდენი ქალაქი, მათ რას ურჩევდით?
- პირველ რიგში, ვეტყოდი, რომ ბაიკერობა არ არის ის, რომ თვეში მხოლოდ ერთხელ დაჯდე მოტოზე, საავარიო სიტუაცია შექმნა და საავადმყოფოში დაბრუნდე. ბაიკერობა ნიშნავს, რომ მოტო იყოს სტაბილურად შენი სატრანსპორტო საშუალება. იარო წესების დაცვით და გიყვარდეს შენი მოტო. არავითარ შემთხვევაში არაა საჭირო ფინტების გაკეთება, რასაც ბაიკერები ხშირად აკეთებენ. ასე, როგორც წესი, გამოუცდელი ბაიკერები და ახალგაზრდები იქცევიან. უნდა ახსოვდეთ, რომ მანქანის მართვისას დაშვებული შეცდომა მთავრდება იმით, რომ მანქანას გააკეთებ, მაგრამ შეცდომა მოტოზე მთავრდება იმით, რომ თვითონ ხარ გასაკეთებელი, თუ გადარჩი. ყველა ბაიკერს ვეტყვი, რომ მოტოთი მოგზაურობა არის ყველაზე კარგი დასვენება. მაგალითისთვის გეტყვით, რომ ერთ ადამიანს ათასი კილომეტრის დაფარვა გვიჯდებოდა 40 დოლარი. ხომ წარმოგიდგენიათ, რა იაფია. როდესაც ბაიკი გყავს, აუცილებელი არაა გაჩერდე პლაჟთან ახლოს, მოტოთი გადაადგილდები ძალიან სწრაფად, მათ შორის საფეხმავლო ტრასაზეც დადიხარ. შესაბამისად, ესეც თანხების ეკონომიაა და რაც მთავარია, თავგადასავლები ბევრია გზაში. სადაც უნდა მიხვიდე, ბენზინგასამართი სადგური იქნება ეს თუ სასტუმრო, როცა ხედავენ, რომ მოტოთი მოგზაურობ, ყველა განსაკუთრებულად გექცევა და პატივს გცემს. ეს სატრანსპორტო საშუალება აუცილებლად უნდა განვითარდეს საქართველოში, რადგან, პირველ რიგში, გამოიწვევს გზების განტვირთვას და მეორეც, ეკონომიურია. ყველას ვურჩევ მოტოთი მოგზაურობას. მომავალ წელს მე და ჩემი მეუღლე პორტუგალიაში ვაპირებთ მოგზაურობას. პორტუგალიამდე რომ ჩავიდეთ, 5000 კილომეტრი უნდა გავიაროთ.
- მეუღლეს არ გაუჭირდა მოტოთი მოგზაურობა?
- მართალი გითხრათ, მეუღლემ ამტეხა მოტოთი წასვლაზე. მგონი, მას უფრო მოსწონს ასეთი მოგზაურობა. მოტოს თავადაც კარგად მართავს. მოგზაურობიდან რომ დავბრუნდი, ყველა მეკითხება, არ დაიღალეო? ფეხბურთს რომ თამაშობენ, ხომ იღლებიან, მაგრამ როდესაც იღლები იმ საქმით, რაც მოგწონს, დაღლაც სასიამოვნოა.
- სოციალურ ქსელში სულ აქტიურობთ, ხშირად აქვეყნებთ თქვენი შვილიშვილის ფოტოებს.
- სესილი ჩემი ჯერჯერობით პირველი და ერთადერთი შვილიშვილია, რომელიც უკვე შვიდი თვისაა, მაგრამ ერთი წლის ბავშვს ჰგავს. მან გადამიყვანა ჭკუიდან და ყოველდღე აგრძელებს ჩემი ჭკუიდან გადაყვანას. მოგზაურობაში რომ ვიყავით, ძალიან გვენატრებოდა მეც და ჩემს მეუღლესაც და ბოლო ათასი კილომეტრი ასე ჩქარა სესილიმ გამოგვატარა.


- ალბათ სესილის ბრალია, რომ ბოლო თვეებს სულ გურიაში ატარებთ და ჟურნალისტურ საქმიანობას საერთოდ ჩამოშორდით.
- მთლიანად არ ჩამოვშორებივარ. როგორც ჩანს, აქტივში არავინ მითვლის, მაგრამ გავაკეთე ორი ძალიან მაგარი რადიო, რადიო ''მაესტრო'' და რადიო ''ვინილი'', ასე რომ, ჟურნალისტურ სფეროში ვარ. რაც შეეხება ტელევიზიას, მე და ჩემი მეგობარი ვწერთ სერიალის სცენარს, იმედი გვაქვს, მომავალ წელს გადაღებებს დავიწყებთ და სერიალს ''მაესტროს'' ეთერში გავუშვებთ.
- რა ჟანრის სერიალი იქნება?
- ეს იქნება ცხოვრებისეული დრამა, სადაც არის კრიმინალიც, დეტექტივიც, სიყვარულიც და მეგობრობაც.

მერი კობიაშვილი
ჟურნალი ''რეიტინგი''