თიკა მახალდიანს ჯულია რობერტსი თავისი დეიდა ჰგონია

სახელი, გვარი: თიკა მახალდიანი

ასაკი: 1989 წლის 14 თებერვალი

პროფესია და საქმიანობა: ტელე-რადიოჟურნალისტი ვარ, მაგრამ ჩემი პროფესიით ჯერ არასდროს მიმუშავია. ამ ეტაპზე სურვილიც არ მაქვს, სიმღერა მირჩევნია.

რომ არა მომღერალი, ვინ იქნებოდი?

ამაზე არ მიფიქრია, მაგრამ ალბათ მსახიობი გამოვიდოდი, რადგან ბავშვობიდან ორივე საქმიანობა - მომღერლობა და მსახიობობაც მინდოდა.

ქვეყანა, რომელიც ადამიანმა აუცილებლად უნდა ნახოს:

ასეთი ბევრია, მაგრამ მე იტალია მიყვარს ძალიან და ვფიქრობ, ადამიანმა ამ ქვეყანაში ერთხელ მაინც უნდა იმოგზაუროს.

რა გიფუჭებს ხასიათს?

სიცხეში ცუდ ხასიათზე ვდგები, არც ძალიან სიცივე მიყვარს და შეიძლება, ამან ჩემს განწყობაზე იმოქმედოს, შუალედური სეზონები მომწონს ძალიან.

რამ შეიძლება გამოგიყვანოს წყობიდან?

თუ წყობიდან გამოვედი, ძალიან ცუდი ვარ, ფეთქებადი ვარ, პირდაპირ ცხელ გულზე ვამბობ ყველაფერს, მაგრამ მალევე ვცხრები. ძირითადად, ამ მდგომარეობამდე უსამართლობას მივყავარ.

ბოლოს რის გამო იტირე?

ძირითადად, ფილმებზე ვტირი ხოლმე, ამას წინათ ალბათ მეასედ ვუყურე ''ლამაზმანს'' და ვიტირე, არადა, სულ არაა სატირალი.

ხასიათის თვისება, რომელიც გინდა, რომ შეცვალო...

ცხელ გულზე მოქმედება ვიცი, მართალია, ბოლო დროს ცოტა გამოვსწორდი და ვისწავლე თავის შეკავება, მაგრამ მაინც უფრო მეტად ვისწავლიდი თავის ხელში აყვანას.

რისი გრცხვენია?

ძალიან თეთრი ვარ, ადრე მრცხვენოდა და არ მომწონდა ეს ჩემი სითეთრე, ამიტომ სულ სოლარიუმში დავდიოდი და გარუჯული ვიყავი. ახლა ასე აღარ ვარ, არ მაწუხებს ჩემი კანის ფერი, წელს ნამზეურიც არ მქონია, იმდენად შემაწუხა მზემ, რომ არ მინდა და არც მრცხვენია ამის გამო.

სირთულე, რომლიც ბოლოს გადალახე:

ცოტა ნევროზული პერიოდი მქონდა, ოღონდ რამე კონკრეტული მიზეზის გამო არა და საკუთარ თავთან მუშაობით გადავლახე.

რისი გეშინია?

კატების, ჩაკეტილი სივრცისა და მიწისძვრის.

საყვარელი ფილმი და მსახიობი:

ისევ და ისევ ''ლამაზმანი'' უნდა დავასახელო, მსახიობი ქალებიდან - ჯულია რობერტსი, რო-მელიც უკვე ჩემი დეიდა მგონია, მართლა ძალიან მიყვარს. კაცებიდან კი - ლეონარდო დიკაპრიო.

სიმღერა, რომელსაც ცუდ განწყობაზე უსმენ:

ევა ქესიდის - Autumn Leaves.

წიგნი, რომელიც ბოლოს წაიკითხე:

ახლა ვკითხულობ დათო ტურაშვილის ''ამერიკულ ზღაპრებს''. ამის წინ კი წავიკითხე ''ოსკარი და ვარდისფერი ქალბატონი'', სხვათა შორის, ამაზეც ვიტირე.

სამი ნივთი, რომლის გარეშეც ვერ გაძლებ...

ტელეფონი, საფულე და სათვალე.

საოცნებო ვახშამი ვარსკვლავთან:

ჯეისონ სტეტჰემი მომწონს ძალიან და მას დავპატიჟებდი სადმე რომანტიკულ სანაპიროზე.

რამდენჯერ ყოფილხარ შეყვარებული?

წრფელი გრძნობით ჯერ არ მყვარებია და მინდა, ეს გრძნობა მალე გამოვცადო.

გადაცემა, რომელშიც დიდი სიამოვნებით მიიღებდი მონაწილეობას:

კარგი იქნებოდა ''ემ თი ვის'' ნებისმიერ გადაცემაში მონაწილეობა.

როგორ წარმოგიდგენია საკუთარი თავი 30 წლის შემდეგ?

აუ, სიბერის ძალიან მეშინია, იმედია, 30 წლის შემდეგ მაინც თანამედროვე ვიქნები, გული არ ბერდება, ხომ იცი?! გავიკეთებ ბევრ ბოტოქსს და ვიქნები გადაჭიმული (იცინის).

რჩევა და ერთი კითხვა თიკასგან ალექსანდრე ჭიკაიძეს:

ვეტყოდი, რომ მინდა, ისეთ უსაფრთხო ქვეყანაში ვცხოვრობდე, გარეთ გასვლა, კლუბში შესვლა არ მეშინოდეს. ვისურვებდი, აღარ მოხდეს ისეთი საშინელებები, რაც დაჩი დარჩიას შეემთხვა, მგონი, არ დარჩენილა ადამიანი, ვისაც გული არ დასწყვიტა. მინდა, ცოტა გამოფხიზლდეს პოლიცია. რაც შეეხება კითხვას, მაინტერესებს, მისი საყვარელი პროფესიაა ეს, რაზეც ახლა მუშაობს, თუ შესთავაზეს და მხოლოდ ამიტომ დათანხმდა, აინტერესებს თუ არა ის საქმე, რასაც ემსახურება.

ციცი ომანიძე
ჟურნალი ''რეიტინგი''