ფრანგი მამაკაცი შვილს ინტერნეტით ყიდის
როდესაც შეიტყო, რომ ბავშვის მამა არ არის, მოტყუებულმა ფრანგმა მამაკაცმა 6 წლის შვილი ინტერნეტში გასაყიდად "გამოიტანა".
ბავშვის გაყიდვის შესახებ განცხადება საიტ Le Bon Coin-ზე განთავსდა, სადაც ნახმარ ნივთებს ყიდიან. "ეს ბავშვი ჩემი შვილი არ არის, - წერს შეურაცხყოფილი მეუღლე ავეჯისა და ინტერიერის განყოფილებაში, - ჩვენ სხვადასხვა ფერის კანი გვაქვს.
ახლახან ბავშვის ნამდვილი მამის ვინაობაც შევიტყვე - მან ჩემი ცოლის ტელეფონზე დარეკა და ვაჟის ჯანმრთელობის მდგომარეობით დაინტერესდა".
ინტერნეტში განთავსებული განცხადების ბოლოს მამაკაცმა ასეთი მინაწერი გააკეთა: "დარეკეთ, თუ დაინტერესდით. შესაძლებელია ვაჭრობა". თუმცა განმცხადებელმა "ლოტის" ღირებულება არ მიუთითა.
განცხადება საიტზე რამდენიმე საათის განმავლობაში იყო გამოქვეყნებული. მოგვიანებით ერთ-ერთმა ინტერნეტმომხმარებელმა განცხადების შესახებ საიტის ადმინისტრაციასა და ბავშვთა დაცვის ასოციაციას შეატყობინა.
საქმესთან დაკავშირებით საფრანგეთის პოლიციამ მოკვლევა დაიწყო. მამაკაცს სისხლის სამართლის დანაშაულისთვის სასჯელი ემუქრება.
