დათუნა მგელაძე რუსულ ''ვოისში'' დიმა ბილანის ფავორიტი გახდა

დათუნა მგელაძე ყველას კარგად გვახსოვს ''ჯეოსტარიდან'' და ამ კონკურსის შემდგომ პერიოდშიც საქართველოში საკმაო პოპულარობა მოიპოვა. განსაკუთრებულად თავისი ხმითა და გარეგნობით ქალთა სქესი დაიპყრო.

ორიოდ წლის წინ კი ბედის საძიებლად მოსკოვს მიაშურა. იქ კლუბებსა და კორპორატიულ საღამოებზე გამოდიოდა და ჟურნალისტებს ხშირად გვიკითხავს მისთვის, აპირებდა თუ არა მუსიკალურ კონკურს ''ვოისში'' მონაწილეობას, რომელიც რუსეთში, ისევე, როგორც სხვა ქვეყნებში ძალიან პოპულარულია.

თანაც, ისიც უნდა გავითვალისწინოთ, რომ წინა სეზონებზე ქართველები, აჩი ფურცელაძე, გელა გურალია, ნოდარ რევია, ეთერ ბერიაშვილი და სხვა ქართველებიც მონაწილეობდნენ და ჟიურის აღფრთოვანებასაც იმსახურებდნენ.

მათ შორის გელა გურალიამ ყველაზე დიდ წარმატებას მიაღწია, როცა ფინალში აღმოჩნდა. თუმცა დამარცხდა, თავისი გამოსვლებით უამრავ ადამიანს დაამასხოვრა თავი.
ახლა კი, დათუნას შესახებ გიამბობთ. მას რუსმა პროდიუსერებმა ჯორჯ ბენსონის ცნობილი სიმღერა შეურჩიეს, Nothing’s Gonna Change My Love For You.

არ ვიცი, გაგაკვირვებთ ეს თუ არა, მაგრამ თავად დათუნას ძალიან არ უნდოდა ამ სიმღერის შესრულება. როგორც ჩვენთან საუბარში აღნიშნა, იმან ''გადაარჩინა'', რომ თავისებურად ჰქონდა გაკეთებული.

მოკლედ, ბევრი რომ აღარ გავაგრძელოთ, აღმოჩნდა, რომ ჟიურის არც ერთ წევრს არ უყვარს ეს სიმღერა, მეტიც, სძულთ, ისევე, როგორც დათუნას, თუმცა მომღერლის ვოკალმა თავისი გააკეთა და მას დიმა ბილანი შემოუბრუნდა.

გადაცემა ეთერში მოკლე ხანში გავა და ქართველი მაყურებელი დათუნას გამოსვლას პირადად ნახავს.

ახლა მომღერალი აქტიურად ემზადება რინგისთვის და დარწმუნებული ვართ, ამ ეტაპს თავს კარგად გაართმევს. წარმატებებს ვუსურვებთ ქართველ მომღერალს.

ნინო მურღულია