ვანო ჯავახიშვილმა ცოლ–შვილი პარიზში დაასვენა

შოუმენმა ვანო ჯავახიშვილმა წელს განსაკუთრებული შვებულება მოიწყო – თავს უფლება მისცა, ერთი თვე ცოლ–შვილთან ერთად გაეტარებინა. ჯერ საირმეში დაისვენა, შემდეგ კი 6 წლის ნიკოლოზს ოცნება აუსრულა და პარიზის "დისნეი ლენდში" წაიყვანა. ერთადერთი, რასაც უჩივის, წონა გახლავთ. კარგმა დასვენებამ ნაყოფი გამოიღო და ახალ სატელევიზიო სეზონს შოუმენი ზედმეტი კილოგრამებით დაუბრუნდა. ახლა თავის მოგონილ დიეტას იცავს და შედეგითაც კმაყოფილია.

– ვანო, რა შეგრძნებით გააცილეთ ზაფხული, კმაყოფილი ხართ?
– შემიძლია ჩავთვალო, რომ ამ ზაფხულს კარგად დავისვენე. ჩემი შვებულება პირველ აგვისტოს დაიწყო და მთელი თვე გაგრძელდა. პირველი 5 დღე საირმეში გავატარე ცოლ–შვილთან ერთად. სუფთა ჰაერზე მეძინა. როცა მინდოდა, მაშინ ვიძინებდი და ვიღვიძებდი.
მე და ჩემი მეუღლე პარიზში წასვლას მთელი წლის განმავლობაში ვგეგმავდით და ესეც მოვაგვარეთ, თუმცა ვერ გეტყვით, რომ იქ დავისვენე. 8 დღეში ფაქტობრივად მთელი პარიზი ფეხით შემოვიარე, რაც ჩემთვის ძალიან რთული იყო. ნიკოლოზს "დისნეი ლენდი" ინტერნეტში უნახავს და თითი დაადო, აქ წამიყვანეთო. გავრისკეთ და წავიყვანეთ. მე და ჩემს ცოლს ფრენის იმდენად გვეშინია, მოგზაურობას წელიწადში ერთხელ ძლივს ვახერხებთ. ნიკოლოზმა კი უპრობლემოდ იმგზავრა.
– პირველად იყავით საფრანგეთში?
– კი, პირველად გახლდით. როგორ უნდა შევაფასო პარიზი, არ ვიცი. იდიოტი ვიქნები, რომ გითხრათ, არ მომეწონა–მეთქი. ყველა შენობა ლამაზია. პირველივე დღეს გავისეირნეთ, ღამე იყო და რამაც გამაკვირვა, ის იყო, რომ კაციშვილი არ მოძრაობდა. აღმოჩნდა, რომ აგვისტოში პარიზი ხალხისგან იცლება და მარტო მე დავბოდიალობდი ცოლ–შვილთან ერთად.
"დისნეი ლენდი" ძალიან ლამაზია, ერთი მინუსი აქვს – უამრავი ხალხია შიგნით და 40 წამიანი ატრაქციონის რიგში საათი და 10 წუთი ვიდექი. ატრაქციონები ჩემი გატაცება არ არის და შესაბამისად, არც დავმჯდარვარ. შეიძლება ითქვას, რომ ეს ზაფხული ნიკოლოზისთვის ოცნებების ასრულების იყო. მგონი, ის დღეები, რაც ნიკოლოზს დავაკელი, ავინაზღაურეთ. დღესაც "დისნეი ლენდზე" საუბრობს.
– პარიზში იშოპინგეთ?
– არა, საყიდლებზე არ გვივლია. ჩვენი შოპინგის ადგილი ინტერნეტია, ყველაფერს ვიწერთ. უცხო ქვეყნებში მხოლოდ სუვენირებს ვყიდულობთ. ჩემს ცოლს "შანელის" მაღაზიისკენ კი გაექცა თვალი, მაგრამ, როგორც გაექცა, ისე გამოექცა. ჩვენთვის მთავარი ნიკლოზთან ერთად ყოფნა იყო. ის სულ გვაკვირდება. მინდა, ჩემმა შვილმა ჩემგან ისწავლოს რაღაცეები.
– რა შეატყვეთ, რას უსწავლია ბავშვს თქვენგან?
– ჩემი ტერმინოლოგია გადაუღია. სამსახურზე ხშირად ვლაპარაკობთ, თავად აინტერესებს და სულ მეკითხება. ჩემმა შვილმა მთელი სატელევიზიო ბადე საათების მიხედვით იცის. ალბათ ამით მე მგავს. მხიარული ბავშვია. აეროპორტში ვერ მოისვენა, უცხოელ ბავშვებთან მივიდა და ელაპარაკებოდა, ოღონდ რა ენაზე, კაცმა არ იცის. ჩემთან მოვიდა და მკითხა, რუსულად "რა გქვია" როგორ არისო. ვუთხარი და მაშინვე ისევ ბავშვებთან გაემართა.
ნიკოლოზი დედამისივით კომუნიკაბელურია. წელს სკოლაში მიდის და დიდი სამზადისი გვაქვს. წმინდა ნიკოლოზის სკოლაში ივლის.
– ახალი სეზონიდან ალბათ იმ სტუმრების მოწვევას ისევ ეცდებით, ვინც გასულ სეზონში თქვენს გადაცემაში არ მოვიდნენ.
– წინა სეზონზე მინდოდა, თბილისის ახალი მერი დავით ნარმანია მომეწვია, რომელიც ერთხელ უკვე მყავდა სტუმრად, როცა ის მერობის კანდიდატად ჯერ კიდევ არ იყო დასახელებული. ბატონმა დავითმა "ვანოს შოუში" მეორედ მოსვლა ვერ მოახერხა, რადგან, როგორც თქვა, მსგავს პროექტებში მონაწილეობისგან ჯერ თავს იკავებს. მასთან მოლაპარაკება მაინც მიდის. ყოფილი პრეზიდენტის მოწვევა მისი პრეზიდენტობის პერიოდში მინდოდა, მაგრამ არ მოვიდა. პრეზიდენტი გიორგი მარგველაშვილი თუ მესტუმრება შოუში, მთლად უკეთესი იქნება.
ყველა სტუმარს პირადად მე ვეკონტაქტები. კოორდინატორებს რომ დავავალო ეს საქმე, არ გამოვა, რადგან საქართველო ისეთი ქვეყანაა, მათ დარეკილზე არავინ მოვა ჩემს გადაცემაში.
– ისეთი სტუმარი თუ გეყოლებათ ახალ სეზონზე, ვისი დანახვაც ეკრანზე მაყურებელს გააკვირვებს?
– ასეთი ლეონარდო დიკაპრიო გახლავთ, თუმცა მარგველაშვილის სტუმრობაც ძალიან გააკვირვებდათ. სააკაშვილსაც სიამოვნებით მოვიწვევდი, მაგრამ ახლა აზრი არ აქვს, ქვეყანაში აღარ უშვებენ. ჩემი გადაცემის გარდა დაახლოებით 6 პროექტი გვაქვს.
"რუსთავი 2" სხვა ტელეკომპანიებისგან იმით განსხვავდება, რომ აქ ყველა სწრაფად დადის, ნელა მოსიარულე ადამიანს ვერ ნახავთ, რაც იმას ნიშნავს, რომ ყველა რაღაცას აკეთებს. ამიტომაც არის, რომ ჩვენი მეტად განვითარების ალბათობა დიდია. ყველა ვივიწყებთ პირადს და საქმეზე ვართ გადართული. სამსახური ჩემთვის ყველაზე მნიშვნელოვანია.
– პირადი ცხოვრება?
– მეუღლე ისევ მყავს, რომელიც ძალიან მიყვარს.
– თუმცა ზაფხულში ვრცელდებოდა ჭორები, რომ ცოლს გაშორდით...
– არ ვიცი, საიდან დაიბადა ეს ჭორი. ასეთი ხმები რომ გავრცელდეს, თაკოსთან რამდენჯერმე ნაჩხუბარი და დაბრუნებული ხომ მაინც უნდა ვიყო? მაგრამ მსგავსი რამ არ ყოფილა. უკვე 8 წელია ერთად ვართ და ჩვენს ურთიერთობას თითქოს ყოველდღიურად ვაახლებთ. ერთმანეთს მობეზრების საშუალებას არ ვაძლევთ. ორივე ვთვლით, რომ ჩვენი ცხოვრება ერთიმეორის გარეშე წარმოუდგენელია. ფსიქოლოგების დასკვნით, წყვილისთვის შეუღლებიდან 7 წელი ძალიან კრიზისულია, თუმცა ჩვენ ეს არ გვიგრძვნია და არც ურთიერთგაგების პრობლემა გვქონია.
– წონაში მოგიმატიათ.
– კი, ამ ზაფხულს კარგმა დასვენებამ რამდენიმე კილოგრამი მომამატებინა. ახლა კი უჭმელობის პერიოდი მაქვს. ეკრანი 5 კილოთი ადიდებს და გასუქებული ვანო არ მომწონს. ჩემს ძველ ვიდეოებს რომ გადახედოთ, ძალიან წიწკვი ბიჭი ვიყავი. იცით, ყველაზე მეტად რისი მეშინია? ჩემზე არავინ თქვას, აი, ის პუტკუნა ბიჭი, შოუ რომ მიჰყავსო ან კიდევ – ვინმემ მითხრას, კარგად ჩაპუტკუნებულხარო. დიეტა რა იყო, არ ვიცოდი და ეს კატასტროფა ყოფილა! საღამოს 9–იდან 12 საათამდე ტანჯვის საათები მაქვს, ისეთი შეგრძნება მიჩნდება, რომ გული უნდა წამივიდეს. დღეში სულ 2–ჯერ ვჭამ – დილით ჩაის ვსვამ პატარა ნაჭერი ხაჭაპურით და საღამოს 5 საათზე ცოტა კარგად ვჭამ, რომ მერე თავი ცუდად არ ვიგრძნო.
რაციონიდან ტკბილი ამოვიღე. ეს ჩემი მოფიქრებული დიეტაა, იქნებ გაამართლოს და ჩემი სახელი დაერქვას. სხვათა შორის, 4 კილოგრამი უკვე დავიკელი.
სოფიო ბოჭორიძე, ჟურნალი სარკე