გიორგი ყიფშიძე ”ნიჭიერს” წაიყვანს

კინომსახიობთა თეატრის მსახიობი გიორგი ყიფშიძე სახალხო პროექტ ”ნიჭიერის” წამყვანი გახდა. მან პროექტში თიკა ფაცაცია შეცვალა და შოუს ვანიკო თარხნიშვილთან ერთად წაიყვანს.

შესაბამისად, გიორგი პროექტს ”ცეკვავენ ვარსკვლავები” გამოეთიშა, სადაც მესამე სეზონში ჯერ კონკურსანტად მოევლინა მაყურებელს და ჯულიანა ბარგ-ნართან ერთად იცეკვა, მეოთხე სეზონში კი ანუკა ქორქიასთან ერთად თანაწამყვანი იყო და შოუს მონაწილეებს ამხნევებდა.

სახალხო პროექტი ”ნიჭიერი” რუსთავი 2-ის ეთერში 27 ოქტომბრიდან გავა. მისმა პროდიუსერებმა მაყურებლისთვის სიახლეების შეთავაზება გადაწყვიტეს და შოუში საზღვარგარეთ მცხოვრები კონკურსანტებიც ჩააბეს. რაც შეეხება ”ნიჭიერის” ჟიურის, ამ ეტაპზე ცნობილია, რომ კონკურსანტებს შეაფასებენ ია ფარულავა და ნიკა გვარამია. რაც შეეხება ჟიურის დანარჩენ წევრებს, მათი ვინაობა ჯერჯერობით უცნობია, რადგან გადაწყვეტილი არ არის, ვინ მოისურვებს ჟიურიში ყოფნას. ცნობილია ისიც, რომ ჟიურიში არ იქნება მისი უცვლელი წევრი გეგა ფალავანდიშვილი, რადგან მან სულ სხვა მიმართულებით მოისურვა წასვლა.

პროექტის პროდიუსერები საზოგადოებას ჰპირდებიან, რომ როგორც კი ჟიურის დანარჩენ წევრებზე შეთანხმდებიან, მათ ვინაობას მაყურებელი მაშინვე გაიგებს.

ეკა ირემაშვილი, გაზეთი ”ახალი თაობა”