ჯულიანა ბარგ–ნარი: "მე და გიორგი ყიფშიძეს ქორწინებაზე ლაპარაკი არ გვქონია"

სამეჯლისო მოცეკვავე ჯულიანა ბარგ–ნარი კარიერაში სერიოზული ნახტომისთვის ემზადება. ის და მისი მეწყვილე ოთო ფოლადაშვილი საქართველოს ჩემპიონები გახდნენ, ნოემბერში კი მსოფლიო ჩემპიონების ტიტულისთვის იბრძოლებენ. ორივე თავდაუზოგავად მუშაობს, თითოეული დღე და წუთი გაწერილი აქვთ. ამიტომაც ჯულიანამ ბევრი იფიქრა, მიეღო თუ არა მონაწილეობა პროექტში "ცეკვავენ ვარსკვლავები" ახალ სეზონზე. ბოლოს მაინც დათანხმდა და ოქტომბერში კვლავ გამოჩნდება ეკრანზე.
23 წლის პოპულარული და წარმატებული მოცეკვავის პირადი ცხოვრებაც ბოლო დროს დიდი ინტერესის ცენტრში მოექცა სწორედ აღნიშნული პროექტის დამსახურებით. გაზაფხულიდან მოყოლებული საუბარია იმაზე, რომ მას და მსახიობ გიორგი ყიფშიძეს, რომელიც "ცეკვებში" მისი პარტნიორი იყო, რომანი აქვთ და ამ ურთიერთობის გამო მსახიობი ცოლს გაშორდა. წყვილი თითქოსდა დაქორწინებასაც აპირებს...
ამ ყველაფერზე ჯულიანა "სარკესთან" თავად ისაუბრებს.
– ჯულიანა, დავიწყოთ განვლილი ზაფხულით – სად იყავით და როგორ გაატარეთ.
– არაჩვეულებრივად დავისვენე. პროექტის "ცეკვავენ ვარსკვლავების" მეოთხე სეზონის დასრულების შემდეგ მივხვდი, რომ დასვენება ძალიან მჭირდებოდა და რამდენიმე დღეში მე და ოთო ფოლადაშვილი გავემგზავრეთ ბათუმში, სადაც ცეკვებში საერთაშორისო კონკურსი ჩატარდა. ამის შემდეგ ჩვენს მოსწავლეებთან ერთად დაგეგმილი გვქონდა სპორტული შეკრება ქობულეთში, სადაც დასვენებაც და კარგი დროის გატარებაც შევძელი. 11 აგვისტოს კი ჩემს ძმასთან პეტერბურგში გავემგზავრე.
მე იქ დავიბადე. 4 წლის ვიყავი, როცა სანკტ–პეტერბურგიდან საქართველოში ჩამოვედი და მას შემდეგ იქ პირველად ჩავედი. აქაურობა ძალიან მიყვარს, სხვაგან ცხოვრება არასოდეს მიფიქრია. მიუხედავად იმისა, რომ ქართველი არ ვარ, მივხვდი, რომ ჩემი ქვეყნის პატრიოტი გახლავართ. ისე მომენატრა თბილისი, ქართულად ლაპარაკი, რომ თვითონაც მიკვირდა.
ჩემი ძალიან ბევრი ნათესავი პეტერბურგში ცხოვრობს. იქ დადებითი ემოციებით დავიმუხტე. როცა მთელი წლის განმავლობაში შეუსვენებლად ვმუშაობ, გარემოს გამოცვლა მჭირდება. მომეწონა პეტერბურგის ინფრასტრუქტურა, ცხოვრების რიტმი. პრინციპში, ჩემი ცხოვრების რიტმი აქაც ძალიან აქტიურია. იქაურ კლიმატს ვერ შევეგუე, ძალიან ცივა. მე მზე და სითბო მიყვარს.
ჩემი ძმა, ვოვა, სტომატოლოგია, 37 წლისაა. ცოლ–შვილი ჰყავს. ჩვენ სანახავად ყოველ წელს ჩამოდის. ნათესავები საოცრად დამხვდნენ და მიმასპინძლეს.
ასევე ვიყავი როსტოვში დეიდასთან. 28 აგვისტოს ჩამოვედი რუსეთიდან. თვითმფრინავიდან თბილისი რომ დავინახე, გულმა სხვანაირად დამიწყო ცემა. მაშინ მივხვდი, ქართველ ემიგრანტებს როგორ ენატრებათ სამშობლო.
– დასვენების შემდეგ რა გეგმები გაქვთ?
– მე და ოთო ნოემბრის შუა რიცხვებში მსოფლიო ჩემპიონატზე მივემგზავრებით ვენაში. ჩვენი წყვილი გახდა საქართველოს ჩემპიონი ევროპულ პროგრამაში და ასევე 10 ცეკვაში. ნოემბერში კი მსოფლიო ჩემპიონატზე ვიბრძოლებთ გამარჯვებისთვის. 10 ცეკვა მიგვაქვს. ჯერ პროგნოზებს ვერ გავაკეთებ, თუმცა ვეცდებით, კარგი შედეგით დავბრუნდეთ. სანამ იქ გავემგზავრებით, ერთ–ერთ საერთაშორისო კონკურსზე გამოვალთ თურქეთში. ოქტომბერში იწყება "ცეკვავენ ვარსკვლავები". სიმართლე გითხრათ, აღარ ვაპირებდი ამ კონკურსში მონაწილეობას, მაგრამ სიტუაცია შეიცვალა და გადავწყვიტე, პროექტში ისევ გამოვიდე.
– რატომ აღარ აპირებდით მონაწილეობას, მიზეზი რა იყო?
– მეოთხე სეზონმა ისე გადამღალა, ვიფიქრე, ვეღარ შევძლებდი, მაგრამ კარგი დასვენება დამეხმარა ენერგიის აღდგენაში, ცეკვა მომენატრა და მინდა, იგივე რიტმში ვიცხოვრო. ეს რამდენადაც რთულია, იმდენად ნარკოტიკივითაა. წინასწარ ვერაფერს გაგიმხელთ, მაგრამ გეტყვით, რომ ძალიან კარგი მეწყვილე მეყოლება. წინ ძალიან აქტიური და დატვირთული დღეები მელოდება – ჩემპიონატი, პროექტი, მოსწავლეები. იმედი მაქვს, ყველაფერს მოვასწრებ. მე და ოთო დავსხედით და ჩვენი სამუშაო გრაფიკი შევადგინეთ. დაიჯერებთ, რომ ერთი თავისუფალი დღეც არ გვაქვს?
– თქვენ და ოთო ყველაფერში კარგად უგებთ ერთმანეთს? ამას ხომ მოცეკვავე წყვილისთვის დიდი მნიშვნელობა აქვს.
– რა თქმა უნდა. მე და ოთო 3 წელია წყვილში ვცეკვავთ. ის პოზიტიური ადამიანია. თავისი საქმე ძალიან უყვარს, რაც მასთან მუშაობას მიადვილებს. ერთმანეთს კარგად ვუგებთ. მასთან თავს კარგად ვგრძნობ, კიდევაც ვჩხუბობთ, მაგრამ ჩვენი წყვილი შედგა და მთავარი ეს არის.
– მოცეკვავე პარტნიორებს შორის ხშირია სასიყვარულო ურთიერთობაც. თქვენ გამოგიცდიათ მეწყვილისადმი გრძნობა?
– არ არსებობს, რომ მეწყვილის მიმართ რაღაც მიზიდულობის ძალა არ გქონდეს, მაგრამ საკუთარი თავი თავიდან ბოლომდე უნდა აკონტროლო. თუ იმ ადამიანთან ყოფნა გსიამოვნებს და ბოლომდე მოეშვები, მაშინ შეიყვარებ. თუ თვლი, რომ საჭირო არ არის და ეს მიზიდულობა უბრალოდ ვნებაა, არა – გრძნობა, ურთიერთობა არ განვითარდება, სიყვარულში არ გადაიზრდება. სიყვარულზე არ ვლაპარაკობ, მაგრამ გრძნობა, რა თქმა უნდა, მქონია ჩემი ერთ–ერთი მეწყვილის მიმართ.
– პროექტის "ცეკვავენ ვარსკვლავები" დამსახურებით, ოჯახებიც შეიქმნა და ბევრ ოჯახს თუ წყვილს ბზარიც გაუჩნდა. ასეთი დიდი ძალა აქვს ცეკვას?
– ის, რაც უნდა დაინგრეს, უნდა დაინგრეს. ჩემი აზრით, დიდ სიყვარულს მესამე ვერ ანგრევს. სხვისი ოჯახის დანგრევა ჩემი განსასჯელი არ არის. თუ ამ პროექტის ფარგლებში ოჯახები შეიქმნა, ეს ძალიან კარგია, თუმცა ამ ყველაფერს ცეკვას ვერ დავაბრალებ, უბრალოდ ამ დროს მეწყვილესთან დიდ დროს ატარებ, მეტად იხსნები და სხვა თვალით უყურებ, ყველა მისი მინუსი და პლუსი იცი.
– თქვენი მეორე ნახევარი ალბათ აუცილებლად უნდა ცეკვავდეს.
– ძალიან მაინტერესებს, ჩემი მეორე ნახევარი როგორი იქნება. სულაც არ არის საჭირო, რომ ცეკვავდეს. პირველ რიგში, მთავარია მისი ადამიანურობა. ერთმანეთს უნდა ვუგებდეთ, ჩემს საქმეს პატივს სცემდეს, მისი იმედი მქონდეს ყველა საკითხში.
– ქალების რომელ ტიპს მიეკუთვნებით, ვისთვისაც მთავარია ოჯახი თუ კარიერა?
– რა თქმა უნდა, ოჯახი, თუმცა მხოლოდ დიასახლისის როლს ვერ მოვირგებ, ჩემი საქმეც უნდა მქონდეს.
– ბოლო პერიოდში თქვენზე ჭორები ვრცელდება, მაგრამ კომენტარებს ყოველთვის გაურბიხართ. ალბათ გაცნობიერებული გაქვთ, რომ ეს პოპულარობის თანმდევია.
– არასდროს ვყოფილვარ ის ადამიანი, რომელსაც ძალიან სჭირდებოდა პოპულარობა. ყურადღება ძალიან მსიამოვნებს, მაგრამ ეს ჩემთვის მთავარი არ არის. მინდა, გავიზარდო როგორც სპორტსმენი, ვიარო კონკურსებზე და ვაკეთო საქმე. რაც შეეხება ჭორებს, არ აქვს მნიშვნელობა, ცნობილი ხარ თუ არა, ისე უნდა იცხოვრო, რომ შენი გადადგმული ნაბიჯების არ შეგრცხვეს. უკან რომ მოიხედავ, განვლილი გზის გამო არ უნდა გაწითლდე. ასე რომ, ის უფრო მაწუხებს, როცა საკუთარ თავთან არ ვარ მართალი და არა ის, ვინ რას ამბობს ჩემზე. როცა შოუბიზნესში ხარ, შენ ირგვლივ ჭორები მუდმივად იქნება და ამას უკვე შევეჩვიე.
– პირდაპირ გკითხავთ – რა საფუძველი აქვს გავრცელებულ ხმას თქვენსა და მსახიობ გიორგი ყიფშიძეს შორის რომანზე? ამბობენ, რომ დაოჯახებას აპირებთ და ჯვრიწერას გეგმავთ.
– პირად ცხოვრებაზე ლაპარაკს არ დავიწყებ, მაგრამ ერთს კი გეტყვით, რომ სასაცილო იყო ის სტატია, რომელიც ამ საკითხზე დაიწერა. არ მესიამოვნა. ჩემსა და გიორგის შორის ასეთი ლაპარაკი არ ყოფილა, ასეთი რაღაც არ იყო დაგეგმილი.
– ესე იგი ჯვრისწერა არ გქონდათ დაგეგმილი?
– არც ჯვრისწერა და არც ქორწილი. ამაზე ლაპარაკი არ გვქონია, საიდან მოიტანეს, ვერ ვხვდები. ეს ჭორია და არ დაიჯეროთ!
– ისიც ჭორია, რომ თქვენსა და გიორგის შორის რომანი არ არის?
– ამაზე არ ვილაპარაკებ.
– არც ადასტურებთ და არც უარყოფთ იმას, რომ ერთად ხართ?
– პირად ცხოვრებაზე ჩემს ახლო დაქალებთანაც არ ვლაპარაკობ. პირად ცხოვრებას ყოველთვის ჩემთვის ვიტოვებ.
– მსახიობები ჯაბა კილაძე და მიშა მესხიც იყვნენ პროექტში თქვენი მეწყვილეები, მაგრამ მათთან არავის დაუწყვილებიხართ, ასეთი ხმები არ გავრცელებულა. თქვენსა და გიორგიზე რატომ აგორდა ჭორები?
– არ ვიცი.
– ამბობდნენ, რომ კაფე–ბარებში თქვენს წყვილს განმარტოებით ხშირად ხედავდნენ.
– არ მახსოვს, გიორგისთან ერთად სადმე წავსულიყავი. ყოველთვის სხვა კონკურსანტებთან ერთად დავდიოდით. სად გვნახეს ერთად, ასეთი ჭორაობა რომ დაიწყეს?
– ზოგადად რა აზრის ხართ ისეთ საკითხზე, როგორიც ცოლიან კაცთან სასიყვარულო ურთიერთობის დაწყებაა?
– არ მომწონს ასეთი ურთიერთობები, თუმცა, თუ კაცი ცოლს გაშორებულია და მისი მეორე ნახევარი წარსულშია, მას აქვს უფლება, ახალი ურთიერთობა ხელმეორედ წამოიწყოს.
– ამჟამად შეყვარებული ხართ?
– ბედნიერი ვარ, ეს არის და ეს. სხვას არაფერს გეტყვით.
– 23 წლის ასაკში თქვენი დამოკიდებულება სამყაროსადმი როგორია, ვარდისფერი სათვალით უყურებთ ცხოვრებას თუ რეალისტურად?
– პროექტმა ძალიან გამზარდა, კომუნიკაციამ მეტი თავისუფლება მომცა. ადრე თუ შებოჭილი ვიყავი, ახლა ასე აღარ არის. ძალიან საინტერესო წრეში ვტრიალებ. ახლა რეალურად ვაფასებ ყველაფერს, მაქსიმალისტი ვარ, მინდა, დღესვე გავაკეთო ყველაფერი და არ მინდა, დავაგვიანო. ამიტომ ბოლომდე ვიხარჯები, რომ ხვალ უკეთესი ვიყო.
ასეთ პიროვნებად რომ ჩამოვყალიბდი, ამას ჩემი დის მოულოდნელმა გარდაცვალებამაც შეუწყო ხელი. მას შემდეგ 2 წელი გავიდა. 36 წლის და უეცრად გამომეცალა ხელიდან. ამ ტრაგედიის შემდეგ ყოველ წუთს ვაფასებ. მისმა გარდაცვალებამ რადიკალური ცვლილება მოახდინა ჩემში, უფრო ძლიერი გავხდი. ზოგჯერ ისეთ სიტუაცია მქონია, მიფიქრია, რომ ვარდისფერი სათვალით ვეღარასდროს შევხედავდი ცხოვრებას, ვეღარ ვიოცნებებდი... მაგრამ, როცა დავფიქრდი, მივხვდი, რომ არავარდისფერ სამყაროში ვერ ვიცხოვრებდი და გზა მყარად გავაგრძელე. ამიტომ თქვენც გისურვებთ, რაც შეიძლება დიდხანს გეკეთოთ ვარდისფერი სათვალე!
ლანა კიკნაძე, ჟურნალი სარკე