რუსა ჩაჩუა და დიმა ნაფეტვარიძე დაქორწილდნენ

მოდელი და წამყვანი რუსა ჩაჩუა გათხოვდა. მან ოჯახი მეორედ შექმნა. მისი რჩეული დიმა ნაფეტვარიძეა. ის კომპანია "კაპიტალ ვოსტოკის" დამფუძნებელი და გენერალური დირექტორია.

წყვილმა ჯვარი სამების ტაძარში დაიწერა. ჯვრისწერის ამსახველი ფოტოები რუსამ სოციალურ ქსელში განათავსა, სადაც უამრავი მილოცვა და თბილი კომენტარი დაიმსახურა.

რუსა ჩაჩუა ფართო საზოგადოებამ პროექტ "ბრავოდან" გაიცნო, სადაც ის ვანიკო თარხნიშვილთან ერთად გადაცემის წამყვანი იყო. "ბრავოს" დასრულების შემდეგ მოდელი ეკრანზე აღარ გამოჩენილა.

ამჯერად რუსა ჩაჩუა კვლავ გახდა აქტიური პერსონა, რადგან მის პირად ცხოვრებაში მნიშვნელოვანი სიახლეა. რამდენიმეხნიანი შეყვარებულობის პერიოდი რუსასა და დიმას ცხოვრებაში დასრულდა და ურთიერთობა ოჯახის შექმნით დაგვირგვინდა.

მოდელი კარგა ხანია თავის პირველ მეუღლე არჩილ სახვაძეს დაშორდა. მასთან რუსას ორი შვილი, თაზი და ნასტია ჰყავს. რუსა და დიმა დიდი ხნის განმავლობაში იყვნენ შეყვარებულები. მათი ურთიერთობა ერთი პერიოდი დაიძაბა კიდეც, მაგრამ ყველაფერი უკეთესობისკენ შეიცვალა და საბოლოოდ ორი შვილის დედამ მეორედ დაოჯახების გადაწყვეტილება მიიღო.

წყვილს გაბედნიერება მიულოცა მომღერალმა ჯაბა ქარსელაძემ და ისინი თავისთან პარიზშიც დაპატიჟა: "რუსა ძაან გული დამწყდა რომ მანდ არ ვიყავი და ვერ დავესწარი ეგეთ სასიამოვნო და ნანატრ ცერემონიალს მარა ჩვენ აქ, პარიზში, გავაკეთებთ მინი ქორწილს. ერთი ისეთი ადგილი ვიცი, დარწმუნებული ვარ ნამყოფი არ ხართ, ასე რომ მე გელით და იმედია დიდხანს ლოდინი არ მომიწევს! მინდა რომ სულ ესეთი ბედნიერები და გახარებული მენახეთ მთელი ცხოვრება!"

ეკა ირემაშვილი, გაზეთი ”ახალი თაობა”