მაკა ძაგანია: "რატომ დავმალე გათხოვება"

მსახიობი მაკა ძაგანია 34 წლის ასაკში მეორედ ხდება დედა. რამდენიმე თვის წინ ქორწინების უღელიც მეორედ დაიდგა – ცოლად გაჰყვა მსახიობ გიგა ცერცვაძეს. წყვილი "ილიაუნის" თეატრში მუშაობს. ჯვარი 15 ივნისს დაიწერეს და თავიანთი ურთიერთობაც მხოლოდ ამის შემდეგ გაასაჯაროვეს. ქორწინებამდე მათი ამბავი უახლოესმა მეგობრებმაც არ იცოდნენ.
ცვლილებაა მოსალოდნელი პოპულარულ სერიალში მის გმირთან დაკავშირებითაც. ასე რომ, განვლილ ზაფხულსა და ცხოვრებაში მომხდარ სიახლეებზე მაკა ძაგანიას საკმაოდ ბევრი მოსაყოლი დაუგროვდა და პირველად ამ ყველაფერზე "სარკესთან" საუბრობს.
– მაკა, თქვენი ფეხმძიმობისა და გათხოვების ამბავი სრული მოულოდნელობა იყო ყველასთვის. რატომ მალავდით ამ სასიხარულო მოვლენას?
– გათხოვება იმიტომ დავმალე, რომ ჟურნალისტების თავდასხმა არ მინდოდა. ჩვენი ამბავი გარშემომყოფებმაც კი არ იცოდნენ. მე და გიგა გასული წლის სექტემბრიდან ერთად ვართ და ეს პერიოდი ვცდილობდით, არავის არაფერი გაეგო. ჩვენს ნაჭუჭში ვიყავით მოქცეული და თავს კარგად ვგრძნობდით. ალბათ ჩემი გათხოვებით ხელი არავის შეეშლებოდა და ამის დამალვითაც არავის არაფერი მოუვიდოდა, მაგრამ მაინც ასე ვამჯობინეთ.
რაც შეეხება ფეხმძიმობის დამალვას, 3 თვემდე არ ვიცოდი, შევინარჩუნდებდი თუ არა ნაყოფს. კარგად არ ვიყავი და ამის გამო არ ვამხელდი.
– ახლა, როცა უკვე ყველაფერი გაცხადდა, ალბათ შეიძლება ღიად ისაუბროთ თქვენს სიყვარულზე.
– ჩემი მეუღლე 26 წლის მსახიობი, გიგა ცერცვაძეა. ერთ თეატრში ვმუშაობთ. კარგა ხნის წინ ერთად ვითამაშეთ სპექტაკლში "ჯვალოს თოჯინა". მას მერე სცენაზე აღარ შევხვედრივართ ერთმანეთს. 8 წელია ერთმანეთს ვიცნობთ, ვმეგობრობდით. ის ყოველთვის განსაკუთრებულად მიყვარდა. მერე უცებ ეს მეგობრობა გრძნობაში გადაიზარდა.
ამ ერთ წელიწადში, მას შემდეგ, რაც ერთად ვართ, ბევრი ეტაპი გავიარეთ. ვაპირებდით, კიდევ ცოტა ხანი დაგვემალა ჩვენი სიყვარული, მაგრამ აღარ გამოგვივიდა. სხვათა შორის, ჩემმა უახლოესმა მეგობრებმაც კი ძალიან გვიან გაიგეს ეს ამბავი. ამის გამო მისაყვედურეს კიდეც.
– შეყვარებულმა ქალმა როგორ შეძელით გრძნობების დამალვა?
– ერთმანეთში ვახრჩობდით ამ ემოციებსა და დიდ სიყვარულს, გარეთ გამოტანაზე არ გვიფიქრია. არ მქონია ის მომენტი, რომ ვინმესთან დავმჯდარიყავი და ჩემი გრძნობები გამენდო.
– ქორწინება ოფიციალურად გააფორმეთ?
– ჯვარი 15 ივნისს დავიწერეთ, მეჯვარეები და რამდენიმე მეგობარი გვახლდნენ. ჩემს მეგობარს მცხეთაში მიწის ნაკვეთი აქვს და ღია ცის ქვეშ გავაკეთეთ პატარა სუფრა. ძალიან ლამაზი დღე, მშვიდი გარემო იყო. ფანტასტიკური დრო ვატარეთ, ყველას ყველა უყვარდა და ძალიან ბედნიერები ვიყავით.
– "ჩემი ცოლის დაქალების" მსახიობები ვერ მოხვდნენ თქვენს ჯვრისწერაზე?
– როგორც გითხარით, მხოლოდ რამდენიმე ადამიანმა იცოდა ჩვენი ჯვრისწერის შესახებ. ჯვარი ისე დავიწერეთ, სერიალიდან არავინ არაფერი იცოდა.
– როგორ გრძნობთ თავს ამ მდგომარეობაში, როგორია ემოციები?
– როცა შენში ახალი სიცოცხლეა, ძალიან ბევრი რამ იცვლება. ვფიქრობ, ყველა ქალისთვის ეს არის ყველაზე დიდი რამ, რაც კი თავისი არსებობის პერიოდში შეუძლია გააკეთოს. არც პროფესია და არც სხვა რამ შეედრება იმას, რასაც შვილის გაჩენა ჰქვია.
– რა ასაკში იყავით, როცა პირველად გახდით დედა?
– 19 წლის ვიყავი, როცა ნუცა მოევლინა ქვეყანას. მაშინ კარგად ვერ აღვიქვი, თუ რა მოხდა ჩემს თავს. ახლა გამძაფრებული შეგრძნებები მაქვს. შვილის დაბადებას მოუთმენლად ველოდები. აბსოლუტურად სხვა განცდებია, როცა ჩემს ასაკში შვილს აჩენ.
– ბავშვის სქესი უკვე იცით?
– ბიჭს ველოდებით. ექოსკოპიის მიხედვით, ნოემბრის 20–21 რიცხვში უნდა გავაჩინო. მინდა, ფიზიოლოგიურად ვიმშობიარო, თუ ჩემი მდგომარეობა ამის საშუალებას მომცემს.
– როგორი ორსულობა გაქვთ?
– ტოქსიკოზიც კი არ მქონია. პირველ ორსულობაზე სამი კვირა გულისრევის შეგრძნებები მქონდა. ამჯერად ამ ყველაფრისთვის არ მეცალა, აღარაფერს ვამბობ პრეტენზიებზე. კარგი მადა მაქვს, ყველაფერს ვჭამ, მაგრამ განსაკუთრებულად არაფერი მინდება. ემოციური გავხდი. თანაც რთული ეტაპები გავიარე, უამრავ ექიმთან ვიყავი. იმ პერიოდში იმდენჯერ ვიტირე, რომ ახლა ვცდილობ, სულ გავიღიმო, ბედნიერი ვიყო და ჩემი მდგომარეობით დავტკბე.
– თქვენმა თინეიჯერმა ქალიშვილმა როგორ აღიქვა დედის გათხოვება, ორსულობა? მასთან ურთიერთობა ხომ არ გაგირთულდათ?
– ნუცა 14 წლისაა და საკმაოდ რთულ ასაკშია. ამ დროს ბევრი პროტესტი უჩნდებათ ხოლმე ბავშვებს. ეს ის პერიოდია, როცა არც სწავლა უნდათ, არც კითხვა, ინტერესები ნულდება, მხოლოდ ის უნდათ, "ფეისბუქში" ისხდნენ. სოციალური ქსელი ახალგაზრდობის ტრაგედიაა. არ კონტაქტობენ ერთმანეთთან, გვერდიგვერდ სხედან და "ფეისბუქით" სწერენ ერთმანეთს. ამან გადამრია!
ნუცა 14 წელი მარტო იყო და მეშინოდა, როგორ მიიღებდა იმას, რომ მალე და ან ძმა ეყოლებოდა, მაგრამ, უფლის წყალობით, ძალიან გაუხარდა ჩემი გათხოვება, ორსულობა და ერთი სული აქვს, როდის დაიბადება პატარა. უკვე მპირდება, რომ მოუვლის. განსაკუთრებულად ელოდება ძამიკოს დაბადებას. მე კი პირიქით მეგონა, რომ ამ სიახლეს კარგად ვერ მიიღებდა.
– რას დაარქმევთ პატარას?
– ნოემბრის მეორე ნახევარში ველოდებით და გიორგობას თუ დაიბადა, გიორგის დავარქმევთ. თუ სხვა დღეს გაჩნდა, არ ვიცით, რა სახელს შევურჩევთ, ჯერ არ ჩამოვყალიბებულვართ.
– თქვენ და თქვენი მეუღლე – ორი მსახიობი ერთ ჭერქვეშ. რა პლუსები და მინუსები აქვს ასეთ ქორწინებას?
– დიდი ხანი არ გასულა მას შემდეგ, რაც ერთ ჭერქვეშ ვცხოვრობთ, ამიტომ ვერაფერს გეტყვით. ალბათ კარგია. ის თავისას მეტყვის, მე – ჩემსას. ერთი ინტერესი გვაქვს, აზრებს ხშირად გავუცვლით ერთმანეთს და კონსულტაციას გაგვივლით ერთიმეორესთან, როგორ და რა ჯობია.
– თქვენი ქმარი ტრადიციების მოყვარულია?
– შეიძლება ითქვას, რომ ტრადიციული ოჯახი გვაქვს. ჩემს ქმარს ძალიან უყვარს სიმღერა, გიტარაზე უკრავს. ქართული სუფრა, რომელიც მე ძალიან მხიბლავს, ვიღაცეებს ძალიან აღიზიანებთ, მაგრამ, მგონი, არაფერი ჯობია თავისი კარგი სადღეგრძელოებით და ქართული სიმღერით. მე ვერ ვმღერი, გიგა კი ცდილობს, ამამღეროს და ხან გამომდის, ხან – არა. მეგობრებთან დავდივართ, მეგობრებიც მოდიან ჩვენთან.
დასვენების პერიოდი ძალიან კარგად გამოვიყენეთ. 15 დღით ბათუმში ვიყავით, დილით ადრე ვდგებოდით და დილის 10 საათზე უკვე სახლში ვბრუნდებოდით.
– გიგას ალბათ არ მოეწონებოდა თქვენი პერსონაჟის, თინას მსგავსი ქალი.
– ბოლოს სერიალში თინა ისეთი აღრენილი იყო და ისე ყეფდა, რომ მე თვითონაც მაღიზიანებდა და აღარ ვეთანხმებოდი. თავიდან ბევრ რამეში ვამართლებდი, მაგრამ მერე სასტიკად იქცეოდა. კი, თინა ქალების სათქმელს ამბობდა, მაგრამ კაცების უმრავლესობას მისი სიხისტე არ მოსწონდა. პეტრესთან ურთიერთობაში ძალიან ცუდად მოიქცა.
რაც შეეხება გიგას პოზიციას, ეს სერიალი ნანახი აქვს, ერთადაც გვიყურებია, გაგვირჩევია. ამ გმირის რაღაცეები მოსწონდა, რაღაცეები – არა. საერთო ჯამში, ჩემი შექმნილი თინა ძალიან მოსწონს იმიტომ, რომ ჩემგან რადიკალურად განსხვავებულია და ვინც კარგად მიცნობს, ხვდება, რომ ბევრი რამ მაქვს ჩადებული ამ პერსონაჟში.
– "ჩემი ცოლის დაქალები" როგორ გაგრძელდება, თქვენს გმირთან ერთად თუ მის გარეშე? პრესაში დაიწერა, რომ სერიალში თინა აღარ იქნება.
– ამ თემასთან დაკავშირებით სერიალის შემქმნელებთან არ მილაპარაკია. ჯერ ჩვენი შეხვედრა არ შემდგარა. ასე რომ, სერიალიდან არ წამოვსულვარ, არც მათ გამოვუშვივარ, არავის უთქვამს, აღარ ითამაშებო. ამიტომაც ამ თემაზე კომენტარს ვერ გავაკეთებ, პასუხი არ მაქვს.
– იქნებ თქვენმა ამჟამინდელმა მდგომარეობამ გააჩინა კითხვები. ორსულობა ხომ არ შეგიშლით ხელს თამაშში?
– ჩვეულებრივად შემიძლია მუშაობა. ამ ზაფხულს თეატრიდან გასტროლზეც ვიყავი ბათუმში. ისე არ ვარ, რომ ვერ ვიმოძრაო და საქმე ვერ გავაკეთო. ეს ყველაფერი სერიალის შემქმნელებზეა დამოკიდებული, როგორ განავითარებენ თინას პერსონაჟს.
– ასე რომ იყოს, გული ძალიან დაგწყდებათ? თქვენ ხომ საინტერესო გმირი შექმენით, რომელიც პოპულარული გახდა.
– ეს ისეთი თემაა, რომელზეც ვრცლად უნდა ილაპარაკო. მგონია, რომ ყველაფერი თანამშრომლობაზეა დამოკიდებული, იმაზე, თუ რა აწყობს სერიალს. ვერავის მოსთხოვ, რადგან ამდენი ხანი ვიყავი სერიალში, კიდევ უნდა ვითამაშოო. როგორც პროექტისთვის იქნება საჭირო, სერიალის სცენარსაც ისე დაწერენ.
მიუხედავად იმისა, ფეხმძიმედ ვიქნებოდი თუ არა, მეექვსე სეზონში შეიძლებოდა ჩემი გმირი მაინც აღარ ყოფილიყო საჭირო. შეიძლება თინამ საკუთარი თავი ამოწურა და სერიალისთვის ახალი გმირი უფრო საინტერესო იყოს...
– როგორ გახსენდებათ განვლილი 5 სეზონი?
– როგორც მსახიობი, ძალიან გავიზარდე, კამერასთან მუშაობა ვისწავლე. თავიდან ტექსტის დამახსოვრება ძალიან მიჭირდა. სცენაზე მუშაობა სხვა რამეა, ვერც ხვდები, ტექსტს ისე იმახსოვრებ, სერიალის გადაღებისას კი სულ სხვა სპეციფიკაა – რეპეტიციას ორჯერ გაივლი და ჩაწერა იწყება. ხანდახან ძალიან რთული ტექსტი მქონია, მაგრამ დრო და გამოცდილება ყველა სირთულის გადალახვაში გეხმარება. ამ სერიალმა პოპულარობა რომ მომიტანა, ამაში ორი აზრი არ არსებობს. ძალიან კარგი შეგრძნებაა, როცა იცი, რომ ხალხს უყვარხარ.
– დაბოლოს, მას შემდეგ, რაც თქვენს ცხოვრებაში დიდი ცვლილებები მოხდა, როგორ შეაფასებდით ახლანდელ პერიოდს, რა გაქვთ და რას ელით?
– შეყვარებული ვარ, შვილს ველოდები და ჩემთვის ეს არის ყველაზე მთავარი. თუ იქნება სიყვარული და ურთიერთგაგება, ყველა გაჭირვებას გადავიტან, ყველაფერი კარგად იქნება. ეს მდგომარეობა ძალიან მაბედნიერებს და ყველას ვუსურვებ, რომ ისეთივე ბედნიერები იყვნენ, როგორიც ახლა მე ვარ. შეიძლება დავკარგო ის როლი, რომელსაც ამდენი წელი ვაკეთებდი, მაგრამ რატომღაც მგონია, რომ რასაც ახლა ვაკეთებ, იმაზე ძვირფასს მაინც ვერაფერს გავაკეთებ.
ლანა კიკნაძე, ჟურნალი სარკე