ნანუკა ჟორჟოლიანი: "14 კილო დავიკელი, კიდევ 10 დამრჩა"

ტელეწამყვანმა ნანუკა ჟორჟოლიანმა ახალი სატელევიზიო სეზონი სახეცვლილი გუნდით დაიწყო, შემოქმედებითი ჯგუფი ახალი სახეებით შეივსო. მან ცვლილებები საკუთარ გარეგნობაშიც შეიტანა. მკაცრი დიეტით 14 კილო დაიკლო, მაგრამ კიდევ 10 კილოს დაკლება სურს. როცა ძველ წონას დაიბრუნებს, ქმარს, ირაკლი კოდუას – სოდ–ის ყოფილ უფროსს, რომელიც ინტერპოლის მიერ ძებნილად არის გამოცხადებული და უცხოეთში ცხოვრობს, მაშინ ჩააკითხავს. მანამდე კი თავისი ინტერნეტტელევიზია უნდა "დაქოქოს".
– ნანუკა, წელს თქვენი გადაცემა 5 წლის გახდა. გვახსოვს, როგორი ზარ–ზეიმითა და აჟიოტაჟით დაიწყეთ თქვენი შოუს კეთება. რა გზა გამოიარეთ, რას ელოდით და რა მიიღეთ ამ 5 წელიწადში?
– მოდი, ეს პირდაპირ 5 წლის ბავშვს შევადაროთ. ეს ნიშნავს იმას, რომ ჩვენ ნელ–ნელა ვიწყებთ გამართულ საუბარს, ფეხზე კარგად დავდივართ, ყველაფერი გვაინტერესებს. ეს ასევე ნიშნავს იმას, რომ ნანუკა ახალ ეტაპზე გადადის. ამ სეზონზე ჩვენი პირველი გადაცემა ამის დასტური იყო, ოღონდ იმიტომ არა, რომ ქველმოქმედება არავის გაუკეთებია ან ჩვენ არ გაგვიკეთებია, უბრალოდ ეს მაყურებელს სხვანაირად შევთავაზეთ.
სულ პირველად, როცა ამ გადაცემას ვიწყებდით, ტელეპროდიუსერ დავით გოგიჩაიშვილთან მივედით და ვუთხარით, რომ "ნანუკას შოუს" გაკეთება გვინდოდა. ყველა გაკვირვებული სახით მიყურებდა. გოგიჩამ მითხრა, რამდენიმე თვის წინ გნახე იქ, სადაც ბომბები ცვიოდა, ცოტა ხნით ადრე კი კრიმინალურ ჟურნალისტიკას აკეთებდიო. მოკლედ, ჩემს ამ ნაბიჯს ყველა სკეპტიკურად უყურებდა, ამბობდნენ, რომ ეს არ გამოვიდოდა. საქართველოში ხომ თან ჩასაფრება უყვართ.
"ნანუკას შოუში" ძალიან ბევრი შრომა ჩაიდო, როგორც ჩვენი, ასევე "ღამის შოუს" ბიჭების. სტუმრები ჩემი სიმპათიის მიხედვით არასდროს შემირჩევია და დაბლოკილი სტუმრები არ არსებობდნენ. სიტყვა "პირველები" არ მიყვარს, რადგან ამქვეყანაზე პირველი არავინაა, არავინ იცის, რა საიდან დაიწყო, მაგრამ არის რაღაცეები, რისი კეთებაც ჩვენ დავიწყეთ. მახსოვს, როცა ფეხზე გავიხადე და სურათი ბილბორდზე დავკიდე, დედა, რა ქნა ამანო, ამბობდნენ. მერე ეს ჩვეულებრივი ამბავი გახდა. დახეული ჯინსები რომ ჩავიცვი, ეს რა არის, რა "სახლურად" აცვიაო, თქვეს. მერე ესეც ჩვეულებრივი გახდა...
ვცდილობდი, მაყურებელს ისეთი შეგრძნება ჰქონოდა, რომ ეს მისი გადაცემაა, რომ ჩვენ განსხვავებული ადამიანები არ ვართ. შეცდომებს, რასაც ჩაწერის დროს ვუშვებდი, ვტოვებდი. ბევრჯერ მითქვამს, ხომ შემიძლია ამის ამოჭრა–მეთქი, მაგრამ არა, მეც მეშლება. ნუ გვაქვს მოთხოვნა ადამიანების მიმართ, რომ შეუცდომლები უნდა იყონ.
ახლა ჩემს ცხოვრებაში ყველაზე საინტერესო ეტაპი იწყება. ჯერ ერთი, იმიტომ რომ 5 წლის გავხდით, მეორეც, საერთოდ ახალი სტაფით დავიწყე მუშაობა.
– თქვენი პროდიუსერი, მაია სტეფნაძე, კონკურენტ არხზე, "იმედზე" გადავიდა. ამას ერთი ამბები მოჰყვა ინტერნეტსივრცეში, ამბობდნენ, რომ თქვენ შორის კონფლიქტი მოხდა.
– ძალიან ბევრი შეეცადა, რომ ამისგან სკანდალი შეექმნა. მაია ასათიანსა და ეკა ხოფერიასაც არაერთხელ შეუცვლიათ პროდიუსერი, მაგრამ ჩემთან დაკავშირებით ყველაფრის სკანდალურად წარმოჩენა უნდათ.
ნანუკა ჟორჟოლიანი პროდიუსერმა მიატოვაო, დაწერეს. ეს რას ნიშნავს? მიტოვება ვიცი, როცა კაცი ქალს მიატოვებს. მაია სტეფნაძეს უკეთესი შემოთავაზება ჰქონდა, მას იმ ხელფასს ვერ მივცემდი, რაც "იმედზე" ექნება. მასთან ერთად მანონი ოქრუაშვილიც წავიდა გია ჯაჯანიძის გადაცემაში. მათ გულწრფელად ვუსურვებ წარმატებებს და ისინი ნებისმიერ შემთხვევაში ჩემს მეგობრებად დარჩებიან.
ექსპერიმენტი ჩავატარე და ჩემს გადაცემაზე სამუშაოდ ისეთი კადრები მოვიყვანე, რომლებიც ტელევიზიას არ უკავშირდებიან. 5 წლის შემდეგ ყველაფერს ისევ თავიდან ვიწყებ, ოღონდ – ახლებურად. ეს ძალიან მომწონს.
– ამას წინათ "ფეისბუქზე" გქონდათ თქვენი ფოტოების კოლაჟი გამოქვეყნებული, სადაც სხვადასხვა ფორმაში, სხვადასხვა ვარცხნილობით იყავით. ცვლილებები გიყვართ თუ უბრალოდ ეს ეკრანს უხდება და ამიტომ აკეთებთ?
– სიახლეები მიყვარს. გრძელი თმა მქონდა, რომელიც ძლივს, წვალებით გავიზარდე. ძალიან დიდი ხანი ვამბობდი, რომ გრძელი თმა ნერვებს მიშლიდა, ცუდ ენერგიას ატარებდა და კარგი იქნებოდა, თუ მოკლე თმა მექნებოდა და ასე აგიხდეთ ყველაფერი თქვენც და თქვენს მკითხველსაც. ასე რომ, სიახლეები მიყვარს და გადაწყვეტილებებსაც უცებ ვიღებ. ის ადამიანი არ ვარ, რომელიც ძალიან დიდხანს ფიქრობს.
– არასოდეს გინანიათ ნაუცბათევი გადაწყვეტილება?
– როგორ არა, ცხოვრებაში ძალიან ბევრი რამ მინანია. ხშირად ჩემი ნაუცბათევი კომენტარებიც მინანია იმიტომ, რომ ძალიან ემოციური ვარ. როცა ადამიანს პირში რაღაცას მივახლი, მერე ვდარდობ, ვფიქრობ, იქნებ ჩემი აზრი სულაც არ აინტერესებდა. როგორ შეიძლება 35 წლის ადამიანმა არაფერი ინანოს?! თუმცა მაინც ვფიქრობ, რომ მთავარი გადაწყვეტილებები არ მინანია, მათ შორის – "ნანუკას შოუს" შექმნა. არადა ბევრი ფიქრობდა, რომ ჯობდა, პოლიტიკური ტოქ შოუს კუთხით წავსულიყავი, რადგან ჩემში ეს ენერგეტიკა უფრო მეტია. დარწმუნებული ვარ, ეს რომ გამეკეთებინა, ვინანებდი.
მიყვარს რადიკალური ცვლილებები და უკიდურესობები. შუაში სიარული არ შემიძლია. არც პირადში შემიძლია რაღაცნაირი სიყვარული, მე ამ სიყვარულს უნდა ვგრძნობდე. თუ არ ვგრძნობ და ეს იმიტომ არის, რომ უბრალოდ უნდა იყოს, არ მინდა! "შუაშისტები" არ მიყვარს. მგონია, რომ ასეთები ყველაზე უპრინციპოები არიან და ქვეყანასაც ყველაზე მეტად ისინი ვნებენ. შეიძლება შენი პოზიცია სწორი არ იყოს, მაგრამ მაინც უნდა გქონდეს.
იცით, რატომ მაპატია ბევრი შეცდომა მაყურებელმა? იმიტომ, რომ არ ვიტყუები, მაყურებელთან გულწრფელი ვარ, თორემ შეცდომაც ბევრი დამიშვია, არასწორი გადაცემაც ბევრი გამიკეთებია.
– ამას წინათ ბიძინა ივანიშვილის მიერ თქვენი მისამართით ნათქვამს გამოეხმაურეთ. ყოფილი პრემიერის თქმით, მისი სავარაუდო ჟურნალისტობის შესახებ ინფორმაცია პირველად თქვენ გაავრცელეთ. ამის შემდეგ სოციალურ ქსელში დაწერეთ: "ან თქვას, რომ იცრუა, ან აღიაროს, რომ შეეშალა გვარი წამყვანის!". რას გულისხმობდით?
– არ მგონია, მას ჩემი გვარი შეშლოდა. როცა ასეთი ნდობით სარგებლობ, როცა ბიძინა გქვია და ივანიშვილი ხარ, როცა ეს რეპუტაცია, ავტორიტეტი გაქვს – შეიძლება მანამდე უფრო მეტი გქონდა და ახლა ნაკლები, მაგრამ ხომ გაქვს, როცა შენს სიტყვას ადამიანები უჯერებენ და შენ კი ამბობ, რომ ნანუკა ჟორჟოლიანმა ეს ინფორმაცია ტელევიზიით გადმოსცა, ყველას ექმნება ასოციაცია, რომ ნანუკამ ეს თავის გადაცემაში თქვა. ყველას კი არ აქვს ჩემი გადაცემა ნანახი. შეიძლება ბევრმა იფიქრა, რომ გადაცემაში დავჯექი და ვილაპარაკე, ბიძინა ივანიშვილი გადაცემის წამყვანი იქნება–მეთქი, მაგრამ არ მისაუბრია!
საერთოდ, მგონია, რომ ბიძინა ივანიშვილთან არასწორი ინფორმაციები შეაქვთ. თუ მისი ცხოვრების გრაფიკს გავითვალისწინებთ, არ მგონია, ის ყველაფერს თვალს ადევნებდეს და არც არის ვალდებული, ჩემს ყველა გადაცემას უყურებდეს. თუმცა დარწმუნებული ვარ, ერთი გადაცემა, როცა მისი შვილი, ბერა ივანიშვილი მყავდა სტუმრად, ნანახი აქვს. მან ამისთვის მადლობაც კი შემომითვალა. ვფიქრობ, რომ ბერა ძალიან კარგი რესპონდენტი იყო და ძალიან სწორად მოვიქეცი, როცა გადაცემაში მოვიყვანე. მაშინ ამ ექსკლუზივზე ყველა წამყვანი ოცნებობდა, შესაბამისად, ძალიან მაგარი გადაცემა გამოვიდა.
– ამას წინათ თბილისის ახალი მერის, დავით ნარმანიას მიერ მერიის ბალანსზე არსებული ავტომანქანისთვის ხმოვანი და ვიზუალური სასიგნალო აპარატურის შეძენას გამოეხმაურეთ. ქუჩაში რომ შემხვდებით, აუცილებლად დაგიპიპინებთო, დაუწერეთ. არ ფიქრობთ, რომ ამით თქვენს მომავალ რესპონდენტებს გაანაწყენებთ?
– არა, მაშინ ეს ძალიან დაბალი დონის მაჩვენებელი იქნება. ჩემს ქმარს ბრალი რომ წაუყენეს, ის ადამიანები სტუდიაში არ მოვიწვიო?! ჩემი პირადი წყენა გადმოვიტანო?! გავიგე, რომ ირაკლის ბრალი წაუყენეს, მაგრამ ამიტომ ესენი რაღაცეების კეთებისთვის არ შევაქო?! არ მითქვამს, რომ რაღაცეები მომწონებია თუ რა?! მე ამ ქვეყნის მოქალაქე ვარ და არჩევნებში ვმონაწილეობ. შესაბამისად, ჩემი მოქალაქეობრივი პოზიცია მაქვს, მაგრამ ეს რესპონდენტებთან არასდროს მეტყობა.
მეკითხებიან, იმ 9 წლის განმავლობაში რატომ არ გქონდა იგივე პოზიციაო. მათაც ვპასუხობ და თქვენი ჟურნალის ფურცლებზეც ვიტყვი, რომ 9 წლის განმავლობაში იმ ადამიანებთან პირადი ურთიერთობები და იმის საშუალება მქონდა, რომ მათთვის პირადად მეთქვა, რა მომწონდა და რა – არა. ადეკვატური ვიქნებოდი გიგი უგულავასთვის "ფეისბუქით" მიმეცა შენიშვნა, როცა მისთვის პირადად შემეძლო ამის თქმა? კაზინო "შანგრილაზე" მე და გიგის ასჯერ გვისაუბრია, მაგრამ ამაზე პოსტი არ უნდა დამეწერა. დღეს "ქართული ოცნებიდან" ვისთანაც მიმიწვდება ხელი, რომ ჩემი მოკრძალებული აზრი გავაგებინო, არ ვწერ, მაგრამ არიან "ღმერთებიც", ვისთანაც ვერ ვკონტაქტობ.
– რა მოგწონთ ამ ხელისუფლების მიერ გაკეთებული?
– ძალიან მომეწონა ფესტივალი, რომელიც ჩაატარეს, კაზანტიპს ვგულისხმობ. ეს ტურიზმის განვითარებისთვის გადადგმული სწორი ნაბიჯი იყო. მე იქ ვიყავი და ეს ვნახე. არც რეიდები გამიკრიტიკებია, მიუხედავად იმისა, რომ 90–იან წლებშიც იყო და ამან ქვეყნას არ უშველა. საქართველოში ისეთი კრიმინოგენული სიტუაცია შეიქმნა, ვთქვი, გეხვეწებით, რეიდები მაინც დაიწყეთ–მეთქი.
ყველაფერზე ჩასაფრება არ შეიძლება. პრეზიდენტ გიორგი მარგველაშვილს მადლობა გადავუხადე, როცა ღიად განაცხადა, რომ აგვისტოს ომი საქართველოს არ დაუწყია. თავდაცვის მინისტრ ირაკლი ალასანიასაც გადავუხადე მადლობა, რომელმაც თქვა, რომ ის ომი საქართველოს არ დაუწყია.
ასევე ძალიან მომეწონა საქველმოქმედო ღონისძიებაში მინისტრების ჩართვა, რომლებმაც თავზე წყალი გადაისხეს. ირაკლი ალასანიას, კახი კალაძის ვიდეოები ჩემს გვერდზე გავაზიარე, ისინი დაკომპლექსებულები არ არიან.
– შეცვლილ გარეგნობაზეც უნდა გკითხოთ. წონაში ძალიან დაიკელით. დიეტაზე ხართ?
– კი, ძალიან მკაცრ დიეტაზე ვარ. 14 კილო მაქვს დაკლებული, კიდევ 10 კილო უნდა დავიკლო და ჩემს ძველ წონას დავუბრუნდები. კარგი დიეტოლოგი მყავს, ნატა გაგუა, რომელიც შიმშილის საშუალებას არ მაძლევს, თუმცა ხანდახან ჩუმად მაინც ვშიმშილობ.
– ქმარი როგორ აფასებს თქვენს მონდომებას?
– დაახლოებით თვენახევარია, რაც ირაკლი არ მინახავს. ის დაჟინებით მოითხოვდა, რომ წონაში დამეკლო. ამბობდა, ბენი ჰილის ცოლივით ხარ, ქორწილში რომ გაუსუქდა. გამხდარი გოგო შემომეპარე და აღმოჩნდა, რომ ძალიან მსუქანი ხარო. ახლა კი ჩემი გახდომით ირაკლი ძალიან ბედნიერია, ფიქრობს, რომ ძველ ნანუკას იბრუნებს.
– "ფეისბუქზე" ძაღლის ფოტო გედოთ და გეწერათ, რომ გინდოდათ, ირაკლის ეჩუქებინა თქვენთვის. სურვილი შეგისრულათ?
– ის ძაღლი დაახლოებით ერთ წელიწადში მეყოლება, ტიბეტური ჯიშისაა. მანამდე კი ჩემმა მაყურებელმა სტუდენტებმა გადაცემის დაბადების დღეს დიდ ყუთში ჩასმული ლაბრადორი მომიყვანეს. ძალიან "შებერტყილი" ლაბრადორია, კისერში ჩამიდო თავი, მლოკა, მეფერა, მერე ჩემს შვილს ეფერა. საბა გაგიჟდა, რომ გაიღვიძა და სახლში ორი ძაღლი დახვდა.
ახლა გადაწყვეტილება მივიღე, საბა მამამისთან რომ წავა, ამ ძაღლს წაიყვანს, ის ირაკლისთან იქნება, ორი ძაღლი გვეყოლება – ერთი აქ და მეორე იქ. ირაკლი რომ ჩამოვა, ისევ ორი ძაღლი გვეყოლება.
– თქვენი ქმარი ძებნილად არის გამოცხადებული. როგორ გესახებათ საქართველოში მისი ჩამოსვლა?
– მე მესმის, რომ ჩემი ქმარი ბრალდებულია, მაგრამ ამ ქვეყანაში ბრალდებული იყო თამაზ თამაზაშვილიც, დღეს კი ის პრემიერმინისტრის სიმამრია. პატიმრობას ქვეყანაში ხშირად პო–ლიტიკური ამინდი განსაზღვრავს. პო–ლიტიკური ამინდი კი იმაზე ხშირად იცვლება, ვიდრე ჩვენ წარმოგვიდგენია. რამდენჯერ ვუშვებთ იმ შანსს, რომ ეს პოლიტიკური ამინდი ახლა უფრო მალე შეიცვლება?
– მარიამი საქართველოშია?
– კი, სწავლობს, სკოლას ამთავრებს და მერე ამერიკაში წავა. სწავლის გაგრძელება პოლიტიკური ხაზით უნდა. ვწუხვარ! თუმცა ეს მისი არჩევანია, მას ასე უნდა. როცა ვკითხე, ჟურნალისტობა რატომ გადაიფიქრე–მეთქი, მიპასუხა, შენი ჩრდილიდან ვერასდროს გამოვიდოდი, სულ ერთმანეთს შეგვადარებდნენ, იტყოდნენ, ნანუკას შვილიაო, მე კი მინდა, მარიამ გეგუჩაძე ვიყოო. ეს პასუხი მომეწონა.
საბა უკვე საინტერესოა, აქამდე არ იყო ასე, მაგრამ ის მაინც უფრო მამიკოსია. ერთი ინტერესები აქვთ, რა თემებზეც საუბრობენ, ჩემთვის ხშირად გაუგებარია. გაუთავებელი საუბარი მანქანებზე, "მატორებზე", ცხოველებზე – არ მომწონს. მამა–შვილი ერთმანეთს კარგად უგებენ. ირაკლის საბა სიბერეში გაჩენილი შვილივით ჰყავს.
– ცოლ–ქმარს ერთმანეთთან დიდი მანძილი გაშორებთ. ამან თქვენს ურთიერთობაში რა შეცვალა?
– არაფერი შეცვლილა. სხვათა შორის, მასთან ახლა ურთიერთობის ყველაზე დიდი პაუზა მაქვს, ოქტომბერში ინტერნეტტელევიზიას ვხსნი და კარგად რომ დაიქოქება, მერე წავალ ირაკლისთან. მასთან აბსოლუტურად ძველი ნანუკა ჩავალ და ალბათ ხელსაც მთხოვს. ქორწილი არ გვქონია, მე კიდევ თეთრი კაბა მინდა. აუცილებლად ჩავიცვამ თეთრ კაბას და ჩემი ქორწილი აუცილებლად საქართველოში იქნება. მინდა, ეს რომელიღაც წელს დავამთხვიო და იმ წელს ზუსტად ერთად ყოფნის 10 წლის იუბილე გვექნება.
– რომელ წელს?
– ერთ კონკრეტულ წელს. ქართულ და ძალიან ლამაზ ქორწილს გადავიხდი, სადაც ყველა ჩემი მეგობარი იქნება.
– როგორი იქნება თქვენი ინტერნეტტელევიზია, რა შინაარსის გადაცემები გავა?
– ეს უფრო კომერციული პროექტი იქნება, მაგრამ იქნება პოლიტიკაც, ოღონდ არა – ჩვეულებრივი სახით, ყველაფერი სხვანაირად გაკეთდება. ალტერნატიული ამბებიც გვექნება. სტანდარტული არც პოლიტიკური სიუჟეტები იქნება, არც ეკონომიკური და არც კულტურის ამბები. ტელეკომპანიას "ფრეშ ნიუსი" ერქმევა და ის ძალიან ახალგაზრდული იქნება. ძველი სახეებიდან მათე კირვალიძე გვეყოლება, ჟურნალისტურ გამოძიებას ნათია მიქიაშვილი გაუძღვება. ტელევიზიის მთავარი ნაწილი კი სხვადასხვა შოუები იქნება. რაც შეეხება ჟურნალისტებს, ისინი ახალი სახეები არიან, სტუდენტები, რომლებიც შევარდნაძის და მიშას ეტაპგამოვლილები არ არიან.
ეკა ლემონჯავა, ჟურნალი სარკე