რეპერი, რომელმაც მერსის აგინა და ბერა უნიჭოდ მიაჩნია

გასულ კვირას სოციალურ ქსელში უცნაური ვიდეო გავრცელდა. ახალგაზრდა რეპერი, ვინმე ბაბსკი, მერსი სულხანიშვილის გაშიშვლებულ მკერდზე ამღერდა და ტელესახე საჯაროდ უცენზურო სიტყვებით შეამკო. ავტორს სახე არ დაუმალავს და როგორც 23 წლის ლუკა, იგივე ბაბსკი ამბობს, მისი პროტესტი სიშიშვლით გამოწვეულ პოპულარობას ეხება. პრეტენზია აქვს პოპულარულ სახეებთან და ქართველ რეპერებთან, რომლებიც, მისი თქმით, სოციალურ პრობლემებზე არ მღერიან.

- მე ვარ ლუკა, იგივე ბაბსკი. 1991 წლის 23 აპრილს თბილისში დავიბადე და გავიზარდე. რაც შეეხება სახელს ბაბსკი - ორი წლის წინ ბათუმში ვისვენებდი, მეგობარ თემო მაისურაძესთან, გვანცა მდინარაძესა და მარიამთან ერთად, რომლის გვარიც არ მახსოვს. სწორედ იქ დამარქვეს ბაბსკი. იმის მერე მომყვება ეს სახელი. ახლა სახელმწიფო სამსახურში, კერძოდ კი, საგადასახადოში ვმუშაობ. ბიზნესისა და მართვის ფაკულტეტი დავამთავრე.
- სიმღერა რა ასაკში დაიწყე?
- როგორც მახსოვს, 16 წლიდან ვმღერი, მაგრამ კლიპის გადაღება და სტუდიაში სიმღერების ჩაწერა ოთხი თვის წინ დავიწყე. მანამდე სახლის პირობებში ვერთობოდი. პირველად ღალატის წინააღმდეგ ვიმღერე, საბოლოოდ კლიპიდან ინტიმური სცენები ამოვჭერით და ძალიან პატარა მონაკვეთი დარჩა.
- რატომ ამოჭერი სცენები?
- გოგონამ, რომელიც ამ სცენაში გადავიღეთ, უარი თქვა ინტერნეტში მის გაშვებაზე. თავიდან დამთანხმდა, პოპულარობა უნდოდა. მერე იფიქრა, მაინც ქართული მენტალიტეტია, ბიძაჩემი ნახავსო. არადა, კლუბის მოცეკვავეა, ძალიან სექსუალურად ცეკვავს.
- რატომ გადაწყვიტე შოუბიზნესში ასე აგრესიულად შემოსვლა?
- რეპი პროტესტად მიმაჩნია, ვერ ვიტან იმ ქართველ რეპერებს, რომლებიც გოგონებზე, მანქანებსა და სხვა გართობებზე მღერიან. მე საზოგადოებრივ პრობლემებზე მაქვს ყველა სიმღერა და სულ ასე იქნება. მაგალითად, `თეთრი საქართველო~ და `უპატრონო ბავშვები~ ორივე ჩემი შექმნილია, ამიტომაც პროტესტით შემოვედი და ბოლომდე ვაპირებ ომს, იქნებ, თვალები აეხილოთ.
- შენს ტექსტებში ძალიან ბევრი აგრესიაა, ამას შენს სამსახურში უკმაყოფილება არ მოჰყვა?
- სამსახურთან რა შეხება აქვს, მოუსმინეს და ყველა დადებითად შეხვდა. მათი აზრით, მერსი ამის ღირსი იყო.
- მაშინ მერსიზე ვილაპარაკოთ. რატომ გაგაღიზიანა მაინცდამაინც მან?
- იმიტომ, რომ თუ კარგი ტიპი ხარ, ეს ხომ შენც იცი და რა საჭიროა ძუძუების გადმოყრა. ეს მის დაბალ დონეზე მეტყველებს, ამით ცდილობდა პოპულარობის მოპოვებას. ასეთი ტიპები ნაგვები და ნულები არიან, რომლებიც დეგრადაციას განიცდიან.
- მერსიზე ადრე ხომ სხვებმაც გამოაჩინეს მკერდი.
- ბაბეტამ ტრაკზეც ატყაპუნებინა ხელები, მაგრამ მერსი ბოლოს იყო და მასზე ნამღერი ყველას ეხება. საერთოდ, მაღიზიანებს მსგავსი საქციელი, ამაზრზენი და ამორალურია. მკერდი და უკანალი ყველამ ვიცით, რა არის და რისთვის არის საჭირო მისი დემონსტრირება ცნობადობის მიზნით!
- შორენა ბეგაშვილზეც გქონდა აგრესია, როგორც მახსოვს.
- შორენაც ვახსენე, რადგან მისი და მერსისნაირი ხალხი ჩემნაირ პიროვნებებს საწყალ და უნიჭო არსებებად მოიხსენიებენ. ყველაზე მეტად ის სიმართლე სწყინთ, რასაც ვამბობ.
- არ ფიქრობ, რომ ხალხიც ძალიან გაღიზიანდა ამ ტექსტით?
- არ მაინტერესებს, ჩვენ ათასობით ვართ. უამრავმა ადამიანმა მომწერა, რომ ღირსები არიან. ხუთი წუთის დადებული ვიდეო 2000-მა კაცმა ნახა.
- შორენამ ან მერსიმ თუ მოგწერეს?
- მერსისთან ვისაუბრე. მლანძღა და მითხრა, გიჩივლებო. წარმატება ვუსურვე და დავბლოკე. ილანძღებოდა, ეგონა, ავყვებოდი.
- ხომ აქვს ჩივილის უფლება?
- წარმატებები უკვე ვუსურვე. იჩივლოს და სიტყვიერ შეურაცხყოფაზე დიდი სიხარულით გადავიხდი ჯარიმას.
- როგორ ფიქრობ, ლანძღვით რა შეიცვლება, ისინი აღარ გაიხდიან?
- ლანძღვით არა, სიმართლით კი ის შეიცვლება, რომ ვიღაც მაინც იტყვის ამას საჯაროდ და არ შეეშინდება.
- საჯაროდ გაშიშვლების წინააღმდეგი ხარ, თუმცა, როგორც მითხარი, შენს კლიპშიც გაშიშვლდა გოგონა.
- არ გაგიშვლებულა. სექსის სცენა ისე იყო გადაღებული, რომ არ გაშიშვლებულა.
- იმ სცენით რისი თქმა გინდოდა?
- ეს კლიპი და სიმღერა ჩემს ყოფილ ცოლს ეძღვნებოდა.
- მეუღლეც გყავდა?
- დიახ და შვილიც მყავს, 5 წლის გოგონა. 18 წლის დავოჯახდი, რატომ გავშორდი? - ეს პირადულია.
- როგორც ვხვდები, სწორედ ამ დაშორებაზე იღებდი კლიპს, სადაც სექსუალური სცენა უნდა ყოფილიყო.
- დიახ, ასე იყო, თუმცა სწორი წარმოდგენა რომ შეგექმნათ, ეს საუბარი საკმარისი არ იქნება და ამიტომ ჯობს თავი შევიკავო. ყოფილ ცოლთან მეგობრული ურთიერთობა მაქვს.
- მერსის გინებით გინდა, რომ მარტივად გახდე პოპულარული?
- საერთოდ არ მინდა პოპულარობა. სხვა თემებზეც მაქვს სიმღერები და იქ არ ვიგინები, უკეთესი იქნება, ამით დაინტერესდეთ.
- ლუკა, ბერას თუ უსმენ, მოგწონს მისი სიმღერები?
- ბერა რეპში არის ნული, ყველა მისი სიმღერა უაზროა. მარტო ჩემი ერთი სიმღერა, რომელიც უპატრონო ბავშვებს ეძღვნება, მის ათას სიმღერა სჯობს. სმენა არ აქვს, სწორად ვერ მეტყველებს, უაზრო სიმღერები აქვს და ჰიპ-ჰოპი და რეპი ერთმანეთშია არეული.
- ბედინა, ძვალი, შავი პრინცი, მასტერი - მათზე რას იტყვი?
- მასტერი ჩემი მეგობარია და არაფერს არ გეტყვით. თუ რამე არ მომეწონება, პირადად ვეტყვი. რაც შეეხება დანარჩენებს, ძველი სკოლაა და იმას ვეტყოდი, რომ საზოგადო პრობლემებზე იმღერონ და არა მარიხუანასა და მსგავს სისულელეებზე.
- გვანცა ბაგრატიონის გარეპილი თუ მოგწონს?
- ღადაობ? მარაზმია, თვითონ პიროვნებაც მარაზმია. არ ვიცნობ და ამის სურვილი არც მაქვს.
- რას ელოდები მომავლისგან, როგორ ფიქრობ, განვითარდება შენი კარიერა?
- საერთოდ არ მაინტერესებს, კარიერას გავაგრძელებ თუ არა, მე ჩემს გულისტკივილს გამოვხატავ.
- რას ეტყოდი იმ ადამიანებს, რომლებიც შენი სიმღერით გააბრაზე?
- უშუალოდ მერსის ეხება, ხომ?
- შორენასაც... ახლაც შენს ინტერვიუზე ბევრი გაბრაზდება.
- ვინც ჩემს ინტერვიუზე გაბრაზდება, მათ ვეტყოდი, რომ შორენასა და მერსის არაფერი ეშველებათ და მუდამ ასეთი საშინელი და არამართლმადიდებლური ცხოვრებით იცხოვრებენ. რაც შეეხება სხვა რეპერებს, 700-800 ლარს რომ ხარჯავენ კლიპებში და სიგარეტს ან სოციალურ ქსელს უმღერიან, რამე ღირებული გააკეთონ ისევ ხალხის დასახმარებლად.

ნინო გიგიშვილი
ჟურნალი ''რეიტინგი''