'რომ მითხრეს, თინა მახარაძე იქნება შენი თანაწამყვანიო, შევიცხადე...'

3 ოქტომბერს ''რუსთავი 2''-ზე დაიწყო გადაცემა, ძველი სახელწოდებით ''ბრავო'', ახალი წამყვანებით, განახლებული ფორმატითა და საინტერესო მონაწილეებით. 16 მონაწილე და მათი 16 ლობისტი თქვენ უკვე ნახეთ პირველ გადაცემაში. შემდეგ ლაივკონცერტებზე ორ-ორი მომღერალი შეეჯიბრება ერთმანეთს, მათი ლობისტები კი მომღერლების დასახმარებლად შოუს წარმოგვიდგენენ. ამ ორიდან მაყურებელი ესემესების საშუალებით შეარჩევს ერთს, რომელიც ნახევარფინალში მაყურებლის დანარჩენ ფავორიტებთან ერთად გააგრძელებს ბრძოლას გამარჯვებისთვის.
გადაცემის წამყვანები მუსიკოსი სტეფანე მღებრიშვილი და მსახიობი თინა მახარაძე გახლავან. ამ ამპლუაში ისინი პირველად არიან.

- როგორ მოხვდით ამ პროექტში, კასტინგი ჩატარდა თუ პირდაპირ შემოგთავაზეს ახალი გამოწვევა?
თინა:
- დამირეკეს, მითხრეს, რომ ამ პროექტის წამყვანად მოვიაზრებოდი. პირველივე სინჯი რომ ჩავწერეთ მე და სტეფანემ, გამოვიდა. ეს იყო და ეს.
სტეფანე:
- დამირეკეს და მითხრეს, თინა მახარაძე რომ იყოს შენი თანაწამყვანი, რას იტყვიო. მე შევიცხადე (იცინის). ასე რომ, პირველს მე დამირეკეს.
თინა:
- მასე მეც მითხრეს, სტეფანეს ვირჩევთ შენს მეწყვილედო. ასე რომ, ვერ ვიტყვით, რომელს რომელი მოგვარგეს.
- როგორ მიიღეთ ახალი გამოწვევა?
- ნამდვილად საინტერესო შემოთავაზება იყო. ძალიან ბევრი სხვა არხისგან, საკმაოდ ცნობილი შოუპროგრამებისგან მქონია შემოთავაზება და უარი მითქვამს. ამ ტელევიზიას ყველა კომპონენტში ვენდობი. ვიცი, რომ შექმნის ისეთ პროდუქტს, რომელსაც მაყურებლის პოზიციი-დანაც ადევნებ თვალყურს, ჩართულიც რომ არ იყო.
- სტეფანე, მაყურებელი გიცნობს როგორც მომღერალს, მუსიკოსს, ჟიურის წევრს, მაგრამ არა როგორც ტელეწამყვანს. როგორ ფიქრობ, არის ეს გარკვეულწილად რისკი შენი მხრიდან?
- ცხოვრება რისკია, სუნთქვაც კი რისკია (იღიმება). მიუხედავად იმისა, რომ მაყურებელმა პირველი გადაცემა უკვე ნახა, წინასწარ პროგნოზების გაკეთება არ მიყვარს. სხვა მიმართულე-ბებით მაქვს გამოცდილება, რის გამოც ამ ახალი გამოწვევის არ მეშინია. სხვათა შორის, მეც მქონია შემოთავაზება სხვა პროექტებიდან, ტელევიზიებიდან, მაგრამ სწორედ ''რუსთავი 2''-ის ფაქტორმა გადამაწყვეტინა, მიმეღო ახალი გამოწვევა. ამ გადაცემის პროდიუსერი ''X ფაქტორში'' გავიცანი, ვენდობი და მჯერა, კარგ პროდუქტს დადებს.
- პირველივე გადაცემაში ძალიან თავისუფლად გრძნობდით თავს ერთმანეთის გვერდით, მანამდე იცნობდით ერთმანეთს?
თინა:
- მე და სტეფანემ აქ გავიცანით ერთმანეთი. როგორც მომესალმა, პირველი წინადადება რა ინტონაციითა და რა დამოკიდებულებითაც თქვა, ურთიერთობაც ისე გავაგრძელეთ. როგორც ვდგავართ სცენაზე, ისევე ვართ სცენის მიღმაც. პროდიუსერებმა პირველივე რეპეტიციაზე თქვეს, რომ ჩვენ შორის ქიმია შედგა. სტეფანე უზომოდ კომფორტული პარტნიორია. მგონია, რომ ჩვენი სახით გამორჩეული წყვილი შედგა. არ ვტიპობთ, ძალიან ბევრი ფაზა გვაქვს, ვართ ისინი, ვინც რეალურად ვართ და თან, კარგ როლებსაც ვირგებთ.
- კარგ როლებს თუ ირგებთ, გამოდის, რომ მაინც ტიპობთ.
სტეფანე:
- მე მართლა არ ვტიპობ. იმიტომ ამარჩიეს, რომ ის ვყოფილიყავი, ვინც მართლა ვარ.
თინა:
- არც მე ვტიპობ, ვარ ჩვეულებრივი თინა მახარაძე, მაგრამ როლის თვალსაზრისით, ეს ჩემთვის საინტერესო როლია. გარემო ემოციურია და შენც თავისთავად ემოციური, აჟიტირებული ხდები. ავანტიურაა, ყველაფერი სპონტანურად ხდება. გადიხარ სცენაზე და რა მოხდება, არ იცი.
სტეფანე:
- ყველა ცნობილი და უკვე კარგად გამოცდილი წამყვანი ლობისტებშია, მაია ასათიანიდან დაწყებული, აჩიკო სოლოღაშვილითა და ვანიკო თარხნიშვილით დამთავრებული. წინა რიგში ამდენი ცნობილი ტელეწამყვანი რომ გიზის და შენ პირველად უნდა გაუძღვე გადაცემას, დიდი პასუხისმგებლობაა, მაგრამ გეფიცებით, მართლა არ ვნერვიულობდი. ეს დაგვეტყო კიდეც პირველ გადაცემაში.
თინა:
- ყველაზე დიდი კაიფი იცით რა არის, მასპინძელი ხარ. მე ვარ დიასახლისი, სტეფანე - მამასახლისი. ეს დიდი მოტივაციაა იმისთვის, რომ იკაიფო, ამიტომაც გამოვიდა გადაცემა კარგი.
სტეფანე:
- პირველი გადაცემა, არ მოვიტყუები, ჩვენთვის ნაკლებად საინტერესო იყო, იმის გათვალისწინებით, რომ უკვე ვიცოდით წესები, რომლებიც მაყურებლისთვის უნდა აგვეხსნა. შესაბამისად, ეს მომენტი ჩვენთვის ცოტა უინტერესო გახლდათ. შემდეგი გადაცემები ბევრად საინტერესო, შოუებით დატვირთული და სიურპრიზებით სავსე იქნება მაყურებლისთვისაც და გარკვეულწილად ჩვენთვისაც. მთავარი ახლა იწყება.
- რეპეტიციებზე ''ჩეპე'' არ გქონიათ?
სტეფანე:
- რეპეტიციები, ფაქტობრივად, არ გვქონია. ყველა აღნიშნავდა, ''ყურთან'' რა კარგად მუშაობთო. ბევრმა ალბათ არ იცის, რომ გადაცემის მსვლელობის დროს შესაძლოა, ყურში სულ ახალი ინფორმაცია მოგაწოდონ. საერთოდ არ ''გაგვიჭედია''.
- იმას როგორ აკონტროლებთ, ერთმანეთს სიტყვა რომ უნდა დაუთმოთ?
თინა:
- აი, მანდ რამდენიმე მომენტში ისე გავხურდი და იმდენი ვილაპარაკე, სტეფანე დამავიწყდა, ამიტომაც არის სტეფანე კარგი პარტნიორი, ისე დელიკატურად განიშნებს, ისე შეიყვანს ლაპარაკს, არანაირი დაძაბულობა არ შეიმჩნევა.
სტეფანე:
- თინა სერიალის მსახიობია, ამაში დიდი გამოცდილება აქვს. გამოცდილება ამ მხრივ მეც მაქვს მიუზიკლებიდან, თეატრიდან.
- რა იყო მთავარი სირთულე?
თინა:
- გადაცემის შექმნისას იმდენად დიდია სიმოვნების ხარისხი, სირთულე ფაქტობრივად არ ყოფილა.
- ერთმანეთი აქ გაიცანით, მანამდე როგორ წარმოგედგინათ?
- იცი, რა, საერთოდ არ წარმომედგინა (იცინიან). აბსოლუტურად სხვა სამეგობრო წრე მყავს, ჩემი სამეგობრო წრე არ შედგება არც ერთი ცნობილი ადამიანისგან, თუ არ ჩავთვლი ''ფორმულა კრეატივის'' ჯგუფს, რომელთან ერთადაც ვმუშაობ. სელებრითებს ყოველთვის ვემიჯნებოდი. თან დიდი ხანი საქართველოში არ ვცხოვრობდი, ტელევიზორსაც არ ვუყურებ, დრო არ მაქვს. ასე რომ, არ მიფიქრია, როგორი იქნებოდა სტეფანე, მაგრამ დღეს ვეუბნებოდი სასადილოში, შენ ის იშვიათი გამონაკლისი ხარ, ვისზეც ხელებს ვწევ და ვამბობ, რომ კაი ტიპი ხარ-მეთქი. პროფესიონალია, ნიჭიერია, გამოცდილია, კრეატიული და მენტალურადაც ბევრი შეხების წერტილი აღმოგვაჩნდა.
სტეფანე:
- გავწითლდი... მე იმით დავიწყებ, რომ ''ჩემი ცოლის დაქალები'' ერთადერთი სერიალია, რომელსაც ვუყურებ და ძალიან მომწონს. ის სკანდალებიც მოსმენილი და წაკითხული მქონდა თინას შესახებ. ასე რომ, ''ში იზ ქულ''. მართლა ვემთხვევით ჩვენ მენტალობის მხრივაც. ერთადერთი ასაკის გამო გვაქვს ცოტა აზრთა სხვადასხვაობა, პატარაა და სხვა შემართება აქვს. ეს ნორმალურია.
- ფავორიტები გყავთ კონკურსში?
თინა:
- ჩვენი აზრები აქაც ემთხვევა ერთმანეთს. რამდენიმე ფავორიტი გვყავს, რა თქმა უნდა, ვერ დავასახელებთ.
სტეფანე:
- ერთს დავასახელებ, ამის უფლება მაქვს. გიორგი გაბუნია ჩემი უსაყვარლესი ლობისტია, ისე გამიხარდა, ამ პროექტში რომ მონაწილეობს...
- თინა, ''ბრავოს'' გამო მაყურებლის საყვარელ სერიალს ხომ არ მოაკლებ დროს?
- დროის პრობლემა პირდაპირ დამეჯახა, არასდროს არ მაქვს დრო, არასდროს!
სტეფანე:
- მეც ყველგან მეჩქარება, სულ ამას ვწუწუნებ. ტუალეტშიც რომ ვზივარ, ცუდად ვარ, სულ მეჩქარება.
თინა:
- აბაზანაში გელს აღარ ვისვამ, მის მოშორებას დიდი დრო სჭირდება, საპნით ვბანაობ (იცინიან). კანი მაქვს უკვე გამშრალი.

ნინო მჭედლიშვილი
ჟურნალი ''რეიტინგი''