კრის ბოტი თბილისში ჩამოდის

ცნობილი ამერიკელი კომპოზიტორი და მესაყვირე კრის ბოტი თბილისში ჩამოდის. ეს მისი მეორე ვიზიტია საქართველოში. ამის შესახებ ქართველ საზოგადოებას დიდ საკონცერტო დარბაზში ცნობილმა ქართველმა საოპერო ბანმა პაატა ბურჭულაძემ მორის ბეჟარის დასის კონცერტის შემდეგ განუცხადა.

თბილისში დაგეგმილი კონცერტის შესახებ ინფორმაცია კრის ბოტის ფეისბუქზეც გავრცელდა: ”კრისი მოუთმენლად ელოდება თბილისში, საქართველოში დაბრუნებას 13 ოქტომბერს და სცენაზე საქართველოს სახელმწიფო სიმფონიურ ორკესტრთან ერთად დგომას ფონდ `იავნანას~ საქველმოქმედო კონცერტის მხარდასაჭერად.”

კრის ბოტი საქართველოში პირველად ბრიტანელ მუსიკოს სტინგთან ერთად იმყოფებოდა. მათ ერთობლივი კონცერტი 2011 წლის 3 ივლისს ბათუმის პიაცაზე გამართეს.

თბილისში ჩამოსული კრის ბოტი ორ ღონისძიებას დაესწრება. 12 ოქტომბერს სახელოვნებო ინდუსტრია ”არტპალასის” გახსნის ოფიციალური ცერემონია გაიმართება, რომელსაც კრის ბოტიც დაესწრება. იგი კომპანიის პრეზიდენტ გია ანდღულაძესთან, პაატა ბურჭულაძესა და ნიკოლოზ რაჭველთან ერთად საზეიმოდ გახსნის ,,არტპალასის” შენობას. 13 ოქტომბერს კი დიდ საკონცერტო დარბაზში კრის ბოტი გამართავს საქველმოქმედო კონცერტს ფონდ ”იავნანას” მხარდასაჭერად. მასთან ერთად კონცერტში მონაწილეობას მიიღებს საქართველოს სახელმწიფო სიმფონიური ორკესტრი და ნიკოლოზ რაჭველი. კონცერტზე დასასწრები ბილეთის ფასი 15-დან 100 ლარამდეა.
ეკა ირემაშვილი, გაზეთი ”ახალი თაობა”