''ჩემზე მსმენია, რომ მასონი ვარ...''

ანინა ტეფნაძე მოთხრობებს 17 წლიდან წერს. უკვე საკმაოდ ბევრი იცნობს მის მოთხრობებს და ალბათ, უფრო მეტი მკითხველი ჰყავს ანინას ბლოგებს, რომელშიც აქტიურობს.
2010 წელს ''ერთი მოთხრობის კონკურსში'' პირველი ადგილი მოიპოვა და მას შემდეგ მისი მოთხრობები შევიდა რამდენიმე კრებულში, სადაც საუკეთესოთა შორის საუკეთესოთა ნამუშევრებს ათავსებენ. ''ჩემი შეყვარებულის შეყვარებული'' ამ ავტორის პირველი კრებულია, რომელშიც ოცი მოთხრობაა შესული. შეკითხვაზე, თუ რას წერს ახლა, ასე უპასუხა: ''რაღაც დიდს, ვნახოთ, რა გამოვა, დაველოდოთ''...

სახელი გვარი, დაბადების თარიღი, პროფესია, სამუშაო გამოცდილება...
ანინა ტეფნაძე, 18.07.1991. პროფესიით ლიტერატურათმცოდნე ვარ, მაგრამ სულ სხვა სფეროში, ციფრულ მარკეტინგში ვმუშაობ.

ადგილი და ოჯახი, სადაც დავიბადე და გავიზარდე...

თბილისში დავიბადე, ავლაბარში და კარგა ხანს თბილისის კორპუსებიანი, ურბანული ნაწილის შესახებ არაფერი ვიცოდი. მეგონა, თბილისი მხოლოდ ძველი ეკლესიები, ნანგრევები და კლდეები იყო, იტალიური ეზოებითა და აივნებიანი სახლებით.
რაც შეეხება ოჯახს, ჩემი მშობლები მასწავლებლები არიან და ყველაფერი გააკეთეს იმისთვის, რომ კარგი განათლება მიმეღო.

ბავშვობაში მინდოდა გამოვსულიყავი...
კოსმონავტი.

წერა დავიწყე, როცა...
საკითხავი შემომელია.

ანინას ბლოგი...
არის ადგილი, სადაც ვიპარები ხოლმე და ვცდილობ, უცხო თვალით წავიკითხო ჩემი ნაწერები.

ჩემი მოტივაცია...
ყოველთვის არის ჩემი განვითარება.

რამდენად ჩანს მწერალი თავის ნაწერში...
რთული კითხვაა. მე თითქმის მთლიანად ვჩანვარ, სხვა მწერლებზე რთული სათქმელია.

ჩემზე მსმენია, რომ...
ვარ მასონი. ყველაზე სასაცილო, რაც მსმენია, ეგ იყო.

სინამდვილეში ვარ...
ჩვეულებრივი 23 წლის გოგო, რომელიც რატომღაც წერს.

ვიყავი...
ბევრად უფრო დაბნეული და საკუთარ თავში გაურკვეველი, ვიდრე ახლა ვარ.
რა მომწონს და რა არ მომწონს ჩემს თაობაში...
მომწონს ავტორიტეტებისადმი უპატივცემულობა. არ მომწონს ცნობისმოყვარეობის ნაკლებობა.

საკუთარ თავში ვებრძვი...
სიზარმაცეს.

მჯერა...
რომ ყველა წარმატებული იდეა ერთ დროს, უბრალოდ, გიჟური იდეა იყო.

არ მჯერა...
გამართლების.

ყველაზე ხშირად მავიწყდება...
სად დავდე მობილური ტელეფონი.

არასოდეს მავიწყდება...
გაღიმება...

ყველაზე მეტად მეშინია...
არ ჩამითრიოს რუტინამ.

ჩემი ყველაზე დიდი გულისტკივილი...
არის ის, რომ ძალიან ცუდ დროს დავიბადე.

დღეს ვწერ...
რაღაც დიდს.

ის, რაც აქამდე არასდროს მითქვამს...
არის ის, რომ არ მიყვარს ინტერვიუები.

ანა კალანდაძე
ჟურნალი ''რეიტინგი''