დღეს "ამირანში" CinéDOC–Tbilisi–ის დახურვის ცერემონიალი გაიმართება

18 ოქტომბერს კინოთეატრ "ამირანში" 20:00 საათზე CinéDOC–Tbilisi–ის დახურვის ცერემონიალი გაიმართება. ფესტივივალის ორი სექციის, - საერთაშორისო საკონკურსო პროგრამისა და Focus Caucasus-ის ჟიური გამარჯვებულ რეჟისორებს გამოავლენს და დააჯილდოვებს. CineDOC Young-ის სექციაში გამარჯვებულ ავტორს ბავშვები და მოზარდები დაასახელებენ და პრიზსაც თავად გადასცემენ. ასევე დაჯილდოვდება მაყურებლის რჩეული რეჟისორიც.

წლევანდელი ფესტივალის ჟიურის წევრები არიან საქართველოს კინემატოგრაფიის ეროვნული ცენტრის დირექტორი ნანა ჯანელიძე, ევროპაში ერთ-ერთი ყველაზე მნიშვნელოვანი დოკუმენტური კინოფესტივალის "Vision du Reel" –ის დირექტორი ლუჩიანო ბარისონე შვეიცარიიდან, სიმონე ბაუმანი გერმანიიდან, გოეთეს

ინსტიტუტის დირექტორი დოქტორი შტეფან ვაკვიცი, უკრაინის დოკუმენტური ფილმების ფესტივალის ორგანიზატორი დარია ბასელი და IDFA Bertha Fund-ის წარმომადგენელი მელანი დე ვოხტი.

შეგახსენებთ, CinéDOC–Tbilisi–ი პირველი საერთაშორისო დოკუმენტური კინოფესტივალია კავკასიაში, რომლის ფოკუსშია შემოქმედებითი დოკუმენტური ფილმები. ფესტივალის მეორე გამოშვება ჩატარდა თბილისში, 2014 წლის 14-19 ოქტომბერს. 5 დღის მანძილზე მაყურებელს საშუალება ჰქონდა გაცნობოდა ხვადასხვა ჟანრის დოკუმენტურ ფილმებს, რომლებიც ქართული რეალობისთვის აქტუალურ თემებს შეეხებოდა.