ძუძუს წოვება 10 წლამდე ბავშვისთვის- დედები ახალ მოდას ამკვიდრებენ

ავსტრალიელი მოცეკვავე, 51 წლის ალ-მუსა დღემდე ძუძუს აწოვებს თავის 5 წლის ქალიშვილს. თან არანაირად არ ერიდება საზოგადოების, ნებისმიერ ადგილას აწოვებს, სადაც კი ბავშვი მოსთხოვს და იმდენად მომხრეა გრძელვადიანი ბუნებრივი კვების, 10 წლამდეც აპირებს ბავშვის ამგვარად კვებას, თუ ის კიდევ მოსთხოვს.
"მიმაჩნია, რომ ეს მის იმუნურ სისტემას ამაღლებს. ამინა თითქმის ხუთი წლისაა და ამ წლებში ძალიან იშვიათად უავადმყოფია. გარდა ამისა, ის გაცილებით მშვიდია, ვიდრე სხვა ბავშვები", - ამბობს ალ-მუსა, რომლისთვისაც ეს გოგონა მესამე შვილია. ორ უფროს შვილს ორ წლამდე აწოვა ძუძუ.

ალ-მუსა შვილთან ერთად

ალ-მუსამ ამგვარი ნაბიჯი მას მერე გადადგა, რაც შეიტყო სახელგანთქმული ჯეიმი ლინ გრუმეტის ამბავი. ამ 26 წლის ამერიკელმა ქალბატონმა თავის დროზე საზოგადოება გააოგნა, როცა ჟურნალ "თაიმის" გარეკანზე დაბეჭდეს თავისი ოთხი წლის ვაჟით, რომელსაც ძუძუს აწოვებდა. მაშინ ჯეიმი აცხადებდა, რომ 5 წლამდე აპირებდა ბავშვის ძუძუთი კვებას, თუმცა საბოლოოდ 6 წლამდე აწოვა. ჯეიმი შარშან ამერიკულ შოუშიც გამოვიდა და საზოგადოებას უმტკიცებდა, რამდენად ამყარებს ჯანმრთელობას გრძელვადიანი ბუნებრივი კვება და როგორ ამშვიდებს ბავშვს. ისიც აღნიშნა, რომ თავადაც 6 წლამდე უწოვია ძუძუ. "მახსოვს, რომ ეს ძალიან მამშვიდებდა. გრძნობ, როგორ გამშვიდებენ, გზრდიან და ძალიან, ძალიან უყვარხარ. და ეს დიდ თავდაჯერებას გმატებს", - თქვა ჯეიმიმ თავისი ბავშვობის გახსენებისას.

ჯეიმის ბევრი მიმდევარი გამოუჩნდა და ქალები მისი მიბაძვით დიდ შვილებთან ფოტოებსაც იღებდნენ ძუძუს წოვების დროს.
თუმცა ექიმები ამ მოდას არ იწონებენ და შეგიძლიათ იხილოთ სტატია, თუ რამდენად მავნებელია ძუძუთი კვება ორი წლის შემდეგ.