წონაში კლების მეთოდი თაკო ვადაჭკორიასგან

ომღერალი თაკო ვადაჭკორია ცდილობს, გადალახოს ის წინააღმდეგობები, რაც ჯანსაღად ცხოვრებაში უშლის ხელს.
თუმცა, არის რაღაცები, რასაც ვერ შეცვლის - მისი სამუშაო დღე ღამის 10 საათზე იწყება და საკმაოდ გვიან სრულდება. ამის გამო ძილის რეჟიმი დარღვეული აქვს, მაგრამ დანაკლისის ანაზღაურებას სხვა საშუალებებით ახერხებს. "გზის" მკითხველებს თაკო საკუთარ ცოდნა-გამოცდილებას უზიარებს და რამდენიმე პრაქტიკულ, ადვილად შესასრულებელ რჩევასაც აძლევს...
- ჯანსაღი ცხოვრების წესი სწორ კვებას, გეგმიურ ძილს, სპორტ-დარბაზებში სიარულს მოიცავს. ჩემი აზრით, სილამაზისა და სასურველ ფორმაში ყოფნისთვის დიეტა საუკეთესო გამოსავალი არ არის. პირადად მე, წონის პრობლემა ორსულობის შემდეგ პერიოდში გამიჩნდა, თუმცა 15 კილო თავისთავად "დავკარგე", 6 - ჩემი ძალისხმევით, დანარჩენი 4 კილოს დაკლება კი ძალიან გამიჭირდა და დიეტის დაცვა მომიხდა. მალე მივხვდი, რომ თავს ვიტყუებდი. მერე დავრწმუნდი, რომ წონის დაკლებისას ფსიქოლოგიური ფაქტორი ძალიან ბევრს ნიშნავს. გადავწყვიტე, ცომეულის გარდა არაფერზე მეთქვა უარი და საკუთარი თავიც დავარწმუნე, რომ ამ მეთოდით დავიკლებდი და კარგი შედეგიც მივიღე. სამუშაო რეჟიმიდან გამომდინარე, ჭამა გვიან ღამითაც მიწევს.

- ტკბილეულის ჭამას თავს არიდებ?
- მხოლოდ შოკოლადს მივირთმევ. ეს ერთადერთი რამ არის, რაზეც უარს ვერასდროს ვამბობ. არ ვეთანხმები იმ ადამიანებს, რომლებსაც ჰგონიათ, რომ შოკოლადი ასუქებს. პირადად მე, ბევრ შოკოლადს ვჭამ, არა მხოლოდ შავს, არამედ ყველანაირს, ოღონდ - დოზირებულად და გრამსაც არ ვიმატებ. ვითვალისწინებ იმასაც, რომ დღის განმავლობაში ბევრი წყალი უნდა მივიღო. რა ვქნა, მომწონს, როცა კარგ ფორმაში ვარ, თან - საქმეც ისეთი მაქვს, რომ ამაზე უნებურად ვფიქრობ. არ შეიძლება, სცენაზე მოუვლელი დადგე და თუ ტელეეკრანზე გამოჩენა ხშირად გიწევს, საკუთარ წონაზე არ დაფიქრდე. ბოლოს და ბოლოს, ეკრანი სულ მცირე, 8-10 კილოს "გმატებს".

- ყოფილა თუ არა შემთხვევა, როცა დიეტოლოგთან მოგიხდა მისვლა?
- 13 წლის ასაკში დავიწყე წონაში მატება. პედიატრთან ერთ-ერთი ვიზიტისას გაირკვა, რომ თურმე, დისბაქტერიოზი მქონდა. დიეტა დამინიშნეს და თვე-ნახევარში 15 კილო დავიკელი. ყველაფერს მოხარშულს ვჭამდი, თან - წოლითი რეჟიმი მქონდა. მას შემდეგ წონის პრობლემა არ მქონია მანამ, ვიდრე არ გავთხოვდი (იცინის). სანდრო 2 კვირის გაჩენილი მყავდა, როცა სამსახურში დავბრუნდი. მიუხედავად იმისა, რომ ორსულობის შემდგომ პერიოდს პირადი დეპრესიაც ახლდა, მაინც ვახერხებდი, საკუთარ გარეგნობაზე მეფიქრა. ფორმაში ჩადგომის მცდელობა როგორც სხეულის ფორმების აღდგენაში, ისე სულიერად გაძლიერებაში დამეხმარა.

- ახლა თუ ახერხებ კალორიული, გემრიელი საკვებისგან თავის შეკავებას?
- "ბურგერებსა" და "ფასტფუდს" თითქმის არასდროს ვჭამ, რადგან ყოველი ასეთი საკვების მიღების შემდეგ საშინელ დისკომფორტს ვგრძნობ. ძირითადად სახლში, ნატურალურ საკვებს მივირთმევ.

- კალორიებს ითვლი ხოლმე?
- არა. იყო დრო, როცა ამას ვაკეთებდი, მაგრამ ლამის ნევროზი "ავიკიდე". ვერიდები ზედმეტ ცხიმს. ძალიან მიყვარს ხორცი. ვცდილობ, ქათმის ხორცი ვჭამო, რადგან ნაკლებად კალორიულია. სხვათა შორის, წავიკითხე, რომ "ყბადაღებული" ექვსი საათის შემდეგ შიმშილი სულაც არ არის კარგი. პირიქით, ეს კუჭის პრობლემებს იწვევს. შაქარს, ძირითადად, შოკოლადისგან ვიღებ. ოჯახში მარილსაც მცირე რაოდენობით მოვიხმართ.

- თუ გაქვს "არაჯანსაღი" თვისება, რომლის გამოსწორებასაც ცდილობ?
- ეს ძირითადად, დღის რეჟიმს ეხება, მაგრამ სამწუხაროდ, ვერაფერს შევცვლი. დაძინება ყოველდღიურად ღამის 3 საათზე მიწევს. შესაბამისად, გვიან ვიღვიძებ. დილას ყავით ვიწყებ და სწორედ ეს არის ჩემი "არაჯანსაღი" თვისება. თუმცა, ვიდრე ყავას მივირთმევ, ვცდილობ ერთი ჭიქა წყალი მაინც დავლიო. ჯანსაღ ცხოვრებას შესაბამისი პირობების შექმნა სჭირდება, მხოლოდ სურვილი საკმარისი არ არის. იცით, რას დავაკვირდი? - ნერვიულობა კვების სურვილს მიმძაფრებს. ვფიქრობ, ყველაფერი ტვინიდან იმართება. შეიძლება, ასეთ დროს არაკალორიულს ჭამ, მაგრამ თან ფიქრობ, რომ ეს წონაში მომატებას შეუწყობს ხელს და ასეც ხდება. ჰოდა, საკუთარი თავის კონტროლი ვისწავლე: ახლა ვჭამ მაშინ, როცა მშია და არა - "თავშესაქცევად".

- შვილის კვების რეჟიმს რამდენად აკონტროლებთ?
- ბავშვი 2 წელიწად-ნახევრამდე პედიატრის მიერ დანიშნულ სპეციალურ კვებით რეჟიმზე გვყავდა. არანაირ ტკბილეულს არ ვაძლევდით, რაც მის ჯანმრთელობასა და გარეგნობაზეც აისახება. ახლა უკვე ჩვეულებრივად იკვებება. უყვარს ხილი, ბოსტნეული, წვნიანები. ერთადერთი, შოკოლადზე ვერ ამბობს უარს და ვცდილობ, ისეთი შევურჩიო, რომელშიც მეტი რძე და ნაკლები კაკაოა.

- ვარჯიში, სირბილი, სიარული - ამ ყველაფრისთვის დრო გრჩება?
- სამსახური ამის საშუალებას არ მაძლევს, სამაგიეროდ, ჩემი სამუშაო რეჟიმიდან გამომდინარე, შემიძლია, მთელი დღე შვილთან ერთად გავატარო, არ ვარ "დაკარგული დედა". მაგრამ დარღვეული ძილის რეჟიმის გამო ხშირად, გამოუძინებელი, მოთენთილი ვარ... ახლახან, ფიტნესზე ჩავეწერე და სავარაუდოდ, რამდენიმე დღეში დავიწყებ ვარჯიშს.

- როცა ძალიან დაღლილი ხარ, განტვირთვასა და განწყობის ამაღლებაში რა გეხმარება?
- განტვირთვა ჩემთვის არ ასოცირდება სახლიდან გასვლასა და მეგობრებთან ყოფნასთან. ამისთვის შინ ყოფნა და სიმშვიდე მჭირდება. თუ მოვახერხე, შუადღისას შვილთან ერთად ვიძინებ. ოჯახის წევრები ცდილობენ, მაქსიმალური კომფორტი მქონდეს. და კიდევ, ჩემთვის განწყობილების ამაღლების არაჩვეულებრივი საშუალება შოპინგია.

- შვილთან ერთად ხშირად სეირნობ?
- უფრო ხშირად, ზამთარში ვსეირნობთ, რადგან სანდრო სიცხეს ვერ ეგუება.

- ბინა, რომელშიც ცხოვრობთ, ქალაქის ცენტრისგან მოშორებულია. ეს ადგილი გამიზნულად შეარჩიეთ?
- ადრე ძალიან ხმაურიან ქუჩაზე ვცხოვრობდით და ეს ბევრნაირ დისკომფორტს გვიქმნიდა. დიახ, ეს ბინა სწორედ იმიტომ შევარჩიეთ, რომ აქ არ არის ხმაური, ტრანსპორტის გამონაბოლქვი მინიმალურია, ირგვლივ მთებია, ჰაერი სუფთაა...

- დასასვენებელ ადგილს რის მიხედვით ირჩევ?
- მაშინაც კი, სანამ სანდრო დაიბადებოდა, ჯერ მთაში მივდიოდით დასასვენებლად, შემდეგ - ზღვაზე.

- კოსმეტოლოგთან ხშირად დადიხარ?
- საერთოდ, პრობლემური სახის კანი არ მაქვს. სულ ორჯერ ვარ ნამყოფი კოსმეტოლოგთან. მაკიაჟის გაკეთება ყოველ საღამოს მიწევს. ამიტომ ვცდილობ, კარგი ხარისხის კოსმეტიკა შევიძინო, რათა კანი არ გამიღიზიანდეს. სხვათა შორის, მომწონს მჭადის ფქვილით გაწმენდილი სახის კანი. ასევე, არაჩვეულებრივი ნიღაბია კვერცხის ცილა: ის სახეს წმენდს და კანს ჭიმავს.

- სამოსის ან ფეხსაცმლის შერჩევისას რას ანიჭებ უპირატესობას?
- ვერ ვიტყვი, რომ სულ ბრენდები და საოცარი ხარისხის ტანსაცმელი მაცვია. საქართველოში უამრავ თანხას იხდიან ე.წ. ბრენდულ სამოსში. არადა, ნამდვილი ბრენდი ასჯერ მეტი ღირს. პირადად მე, ტანსაცმელს ხშირად, ინტერნეტით ვიწერ, რადგან ხარისხი ბევრად უკეთესია და არც ფასია ძალიან მაღალი. საერთოდ, სამოსი მალე მბეზრდება. ამიტომაც არ ვყიდულობ ძვირად ღირებულ რაღაცებს. მირჩევნია, ნაკლები გადავიხადო და რამდენიმე შევიძინო. რაც შეეხება ჩემი შვილის სამოსს: ჰყავს ნათლია, რომელიც "გარდერობში ცხოვრობს" (იცინის) და სანდროს უამრავ კარგ ტანსაცმელს უგზავნის. დამატებით თუ რაიმე დამჭირდება, სანდროსთვისაც ინტერნეტით ვიწერ.

- სპა-სალონებს ხშირად სტუმრობ?
- მაქსიმალურად ვცდილობ, რაც შეიძლება მეტი დრო გავატარო შვილთან. ასეთ ადგილებში მხოლოდ აუცილებელი პროცედურებისთვის მივდივარ. სანდროს ჩემი ზედმეტი ფუფუნების გამო, დედასთან ყოფნის სიამოვნებას ვერ მოვაკლებ.

- ჯანსაღ ცხოვრებასთან დაკავშირებით, "გზის" მკითხველს რაიმეს ხომ არ ურჩევ?
- მთავარია, არ ვიყოთ "ჩაციკლული" წონაზე, არ ვთვალოთ თითო ლუკმა. პირველ რიგში, ტვინი გავათავისუფლოთ ამაზე ფიქრისგან და მივიღოთ საკუთარი თავი ისეთი, როგორებიც ვართ, მერე კი გარშემო მყოფებსაც აუცილებლად მოვეწონებით. სწორად შევარჩიოთ სამოსიც. დაბოლოს, მერწმუნეთ, ნებისმიერი ფორმების მქონე ქალს შეუძლია, მიმზიდველი იყოს.