ლევან ვასაძის სიმამრის გულახდილი ინტერვიუ - როგორ სთხოვა სასიძომ ქალიშვილის ხელი

ბიზნესმენ ლევან ვასაძის სიმამრი - რამაზ დურგლიშვილი პროფესიით არქიტექტორია. სწორედ მისი დაპროექტებულია კიკეთში წმინდა ექვთიმე ღვთისკაცის სახელობის ტაძარი, პატრიარქის საზაფხულო რეზიდენცია, იაკობ გოგებაშვილის სახელობის სასწავლებელი...

- კიკეთში ბავშვობაში, ოჯახთან ერთად ვისვენებდი, მერე სახლი შევიძინე. იმ ადგილზე, სადაც ახლა ეკლესიაა, კომუნისტების მმართველობის პერიოდში აბანო იყო, რომელიც იმ ადგილს სასტიკად არ უხდებოდა. რამდენჯერაც კი შევჩერდებოდი, ვფიქრობდი: აქაურობას ყველაზე მეტად ტაძარი დაამშვენებს-მეთქი. ერთ დღეს ლევანმა რომ მითხრა, ტაძრის აშენებას ვაპირებო, გამიხარდა.
- ადგილი თქვენ ურჩიეთ?
- წინა პერიოდის საუბრებში თუ მქონდა ნათქვამი, არ მახსოვს, მაგრამ იმ წუთში არ მითქვამს, - აუცილებლად ამ ადგილზე ავაშენოთ-მეთქი. ტაძარი ბუნებასთან ისეა შერწყმული, რომ მნახველზე დიდ შთაბეჭდილებას ტოვებს.

- თქვენ ხართ კიკეთში პატრიარქის რეზიდენციის მთავარი არქიტექტორი.
- დიახ, სამშენებლო კომპანია "კარკასთან" ერთად ვიმუშავე. ლევანის იდეა იყო, კიკეთში პატრიარქისთვის საზაფხულო რეზიდენცია დამეპროექტებინა.

- როცა მისი უწმინდესობა კიკეთშია, სტუმრობთ ხოლმე?
- დაგვიძახებს ხოლმე და შევდივართ. ეს საკმაოდ ხშირად ხდება. ძალიან დიდი ადამიანია, ურთიერთობაში უშუალოა, იუმორის საოცარი გრძნობა აქვს; რომ გელაპარაკება, ხვდები, მის ყოველ სიტყვაში დიდი სიბრძნეა და დაფიქრება სჭირდება.

- იქნებ რომელიმე კონკრეტული ამბავი გაიხსენოთ...
- ერთხელ დამიძახა, გავედი და სამაჯური მაჩუქა. მასთან ანსამბლ "ბასიანის" სოლისტი იმყოფებოდა, პატრიარქის საგალობელი ნოტებზე გადაჰქონდათ. ცოტა ხანს ვილაპარაკეთ. როგორც არქიტექტორი, შემაქო: კარგი ნამუშევარი გამოგივიდაო. თან, იქვე დასძინა, სახლში რომ შევდივარ, ყველაფერს ჩემი გემოვნების მიხედვით ვაწყობ, აქ კი არაფერი გადამიადგილებიაო. ჩემთვის ამ სიტყვების მოსმენა დიდი პატივია. იმ პერიოდში სნოში ვახტანგ გორგასლის ძეგლი უნდა დაედგათ. ღონისძიების დეტალებზე სალაპარაკოდ მის უწმინდესობასთან რეჟისორი ავთო ვარსიმაშვილი მოვიდა. მსჯელობდნენ. მათ დატოვებას ვაპირებდი, მაგრამ უწმინდესმა მთხოვა, ნუ წახვალო. როცა სნოში პატრიარქი ჩადის, მთელი მთა იქ იყრის თავს. ამ ამბავს თავად შევესწარი; მის ეზოში იმდენი ხალხია, ნემსი არ ჩავარდება. ბავშვები მოჰყავთ და ლოცავს. ბუნებრივია, ძეგლის გახსნასაც ბევრი ადამიანი დაესწრებოდა. ისინი ლაპარაკობდნენ, რომ უმხედრო ცხენს უნდა გაევლო, წრე დაერტყა და ისევ თავის ადგილზე დაბრუნებულიყო. იდეაში, ეს გორგასლის ცხენი იყო. მერე თავისი სახლიდან პატრიარქი უნდა გამობრძანებულიყო... ჩემთვის ჩავილაპარაკე, - ცხენი გაწვრთნილია-მეთქი? პატრიარქს გაეცინა. მერე ვიკითხე: პრეზიდენტი სააკაშვილი იქნება-მეთქი? - ღონისძიებას დაესწრებაო, - დამიდასტურეს. - ცხენზე არ ამხედრდეს, არ გააჭენოს, თორემ დარიალის ხეობისკენ თუ გაიტაცა, რუსეთში წაიყვანს-მეთქი...

- ვიდრე ლევან ვასაძე თქვენი სიძე გახდებოდა, მის ოჯახთან მეგობრობდით, არა?
- ვერ ვიტყვი, რომ ვმეგობრობდით, მაგრამ მის ოჯახს კარგად ვიცნობდი. კიკეთელები არიან. მახსოვს, ლევანი უმაღლეს სასწავლებელში რომ აბარებდა, მათემატიკაში ჩემი მეგობარი - კოტე მიქანაძე ამეცადინებდა. კოტე ამბობდა: რა ნიჭიერი ბიჭია, ასეთ ბავშვთან მეცადინეობა ერთი სიამოვნებაა, ყველაფერს ახსნისთანავე ხვდებაო. მოგვიანებით, როცა მასთან მოსამზადებლად ჩემი ქალიშვილი მივიყვანე, მითხრა, - მათემატიკას თავი დაანებეთ, არ იცისო.

- მათი სიყვარულის ამბავი როგორ დაიწყო?
- სიმართლე გითხრათ, ეს არ შემიმჩნევია. პატარა გოგო და ბიჭი ერთმანეთს ეპრანჭებიან, რა ვიცი, როგორც იწყება ხოლმე. ლევანი წესიერი ყმაწვილი იყო, ძალიან კარგი მეგობრები ჰყავდა და დღესაც ასეა.

- მომავალმა სასიძომ ქალიშვილის ხელი გთხოვათ?
- როცა ოჯახის შექმნა გადაწყვიტეს, რა თქმა უნდა, მოვიდა. რა უფლება მქონდა, დამეშალა ან რატომ უნდა დამეშალა? ლევანმა ამერიკაში ისწავლა, იქიდან რომ დაბრუნდა, მერე სამსახური მოსკოვში დაიწყო. სანამ მოსკოვში გაემგზავრებოდა, მოვიდა და კაცურად დამელაპარაკა.

- ღელავდა?
- არა, ღელვა არ შემიმჩნევია. მისი წინადადება უცხო არც ჩემთვის იყო. დავსხედით და დავილაპარაკეთ.

- ნინოსა და ლევანს ქორწილი ჰქონდათ?
- ჩემთან შეხვედრის შემდეგ, ლევანი მოსკოვში წავიდა, ნინომ მოგვიანებით ჩააკითხა. ქორწილი გვიან ჰქონდათ ანუ მაშინ, როცა უკვე შვილი ჰყავდათ; ჯვარიც მაშინ დაიწერეს. არ მეგონა, ნინო მრავალშვილიანი დედა თუ გახდებოდა.

- საქართველოში ერთ-ერთი გამორჩეული ოჯახია...
- ტრაბახში ნუ ჩამომართმევთ და ასეა! ძალიან კარგად აღზრდილი შვილიშვილები მყავს. უფროსი ბიჭი უკვე 16 წლის არის. ბავშვი, რომელიც სიკეთეში იზრდება, ცუდს არ ხედავს, გარშემო ყველასგან პატივისცემას, დიდ სიყვარულს გრძნობს, რწმენაში იზრდება, თავადაც უფროსებს ემსგავსება. ბევრი ბავშვი ვერ იტყვის, - ჩვენთან სტუმრად პატრიარქი მობრძანდაო. ჩემი ბავშვობიდან მეხსიერებას ერთი ეპიზოდი განსაკუთრებულად შემორჩა: კათოლიკოს მელქისედეკ III-ს დიდუბის ეკლესიასთან რეზიდენცია ჰქონდა (მაშინ მეც იქვე ვცხოვრობდი). რეზიდენციაში მისი ნათესავი, რუსი მონაზონი ქალბატონი ცხოვრობდა. ერთ დღეს კათოლიკოსი ფარდებიანი "ზიმით" მოვიდა. ვიდექი და ვუყურებდი. ეტყობა, გაკვირვება შემამჩნია და მძღოლს უთხრა, ბავშვი მანქანაში ჩავსვათ და გავასეირნოთო. ის წუთები მთელი ცხოვრება მემახსოვრება.

- კიკეთში იაკობ გოგებაშვილის სახელობის სკოლის საქმიანობაშიც ხომ არ ხართ ჩაბმული?
- არა, მე მხოლოდ შენობა დავაპროექტე. ლევანს ამ სკოლის გახსნაში გიორგი მარგველაშვილი დაეხმარა.

- პრეზიდენტთან თქვენც მეგობრობთ?
- ამ ბოლო დროს ერთმანეთს ისე ხშირად, ლევანი და გიორგიც ვეღარ ნახულობენ.

- ბატონო რამაზ, ამჟამად რაზე მუშაობთ?
- მოსკოვში არსებობს "სტრატეგიული განვითარების ინსტიტუტი" და მისი მთავარი არქიტექტორი ვარ. იქ რამდენიმე სახლი და ობიექტი ჩემი პროექტის მიხედვით აშენდა, მათ შორის - ლევანისა და ჩემი ქალიშვილის სახლიც. დავაპროექტე დსთ-ის ქვეყნების ახალგაზრდა მოღვაწეთა ქალაქი, რომელიც 30 ჰექტარზე უნდა გაშენდეს. პრეზენტაცია ერევანში გვქონდა. თუმცა პროექტი დროებით გაჩერებულია.

- საინტერესოა თქვენი აზრი პროექტთან - "პანორამა თბილისი" დაკავშირებით. ამ პროექტის განხორციელება მართებულად მიგაჩნიათ?
- ამ პროექტს დეტალურად არ გავცნობივარ. არქიტექტურის ხარისხი ცუდი არ იქნება, მაგრამ... თბილისს ის ერთი საბაგიროც არ უხდება, რომელიც უკვე გაკეთებულია. ნარიყალაზე ავტომობილით ასვლაც შეიძლება და ფეხითაც. კალაუბანი ულამაზესია, ეს ადგილი უნდა გაიარო და არა - ზემოდან გადმოხედო. ქალაქზე ზემოდან გადმოხედვა თუ გინდა, მთაწმინდაზე უნდა ახვიდე. ძველ უბანს მოვლა სჭირდება. თავისუფლების მოედნიდან მერიას რომ გასცდები, უკანა მხარეს ყველაფერი მოსავლელია, მისახედია. არაბების პოზიცია არ ვიცი, მაგრამ ჩემთვის ე.წ. "ხრუშჩოვკების პროექტი" უფრო მიმზიდველია. ვიცი, ამას რუსეთში როგორ აკეთებენ: აშენებენ კორპუსს, რომელშიც 3 "ხრუშჩოვკის" კორპუსის ხალხი ეტევა და იქ ასახლებენ. იმ ძველ ნაგებობებს ანგრევენ, რადგან გადაკეთება შეუძლებელია. მათ ადგილზე აშენებენ 2 სახლს, რომელშიც 6 სახლიდან გადაჰყავთ მოსახლეობა და ასე მიჰყვებიან. რა თქმა უნდა, ბინების ნაწილი იყიდება. ამ პროექტის განხორციელება და მხარდაჭერა უფრო ჭკვიანური იქნებოდა, მაგრამ მანამდე ის არის გასარკვევი, არაბებს რა ინტერესი აქვთ. მათ თუ დანარჩენ ბინებში არაბების ჩამოსახლება უნდათ, ეს სხვა საქმეა. როგორ შეიძლება, თბილისის ზღვაზე ჩინელების ქალაქი გაშენდეს?!

- ამაში რა საფრთხეს ხედავთ?
- არავის წინააღმდეგი არ ვარ, ჩინელებს უდიდესი კულტურა აქვთ, მაგრამ სწრაფად რომ მრავლდებიან, ეგეც ხომ ვიცით? ეს ყველაფერი ჩვენისთანა მცირერიცხოვანი ერისთვის საფრთხის შემცველია, მითYუმეტეს, თუ გავითვალისწინებთ იმასაც, რომ ქვეყანაში მძიმე დემოგრაფიული მდგომარეობაა.

- ბატონი ლევანი გამოვიდა წინადადებით, საზღვრისპირა დაცარიელებულ მთიან რაიონებში მსუბუქი დანაშაულისთვის ბრალდებული ადამიანები დაასახლონ. ამ იდეას ემხრობით?
- ეს იდეა ძალიან მომწონს. მსუბუქი დანაშაული ვინც ჩაიდინა, მის ციხეში ჯდომას აზრი აქვს? წავიდეს მთაში, მეცხოველეობას მიჰყოს ხელი, ქვეყანას გამოადგეს. ლევანს დიდი გუნდი ჰყავს, იდეებს განიხილავენ, მსჯელობენ და მერე ბატონ ბიძინა ივანიშვილთან, ხან - ირაკლი ღარიბაშვილთან ერთად განიხილავენ.


- პრეზიდენტთან?
- რა თქმა უნდა, პრეზიდენტთანაც! ადრე გიორგისთან შეხვედრა უფრო ხშირად გვქონდა, მაგრამ მას მერე, რაც პრეზიდენტი გახდა, იმდენი დრო აღარ აქვს. მას ჩემი მეუღლე უფრო ხშირად ნახულობს.
- თქვენი მეუღლე რას საქმიანობს?
- პოლიტიკოსი არ არის, მაგრამ "ქართული ოცნების" აქტიური მხარდამჭერია. თანამოაზრეები ადრე ხშირად იკრიბებოდნენ, პერიოდულად ახლაც რომ შეიკრიბონ, ცუდი არ იქნება. ხომ იცით, ზოგჯერ მთავრობას კონტროლი უნდა.

- ზოგჯერ - არა, მთავრობა ხალხმა სულ უნდა აკონტროლოს...
- გეთანხმებით, ხალხმა მთავრობა უნდა აკონტროლოს, მაგრამ "ნაციონალებს" ხმა არ აქვთ ამოსაღები. ხელისუფლებაში ისეთი ტრიუმფით, როგორც "ნაციონალური მოძრაობა" მოვიდა, სხვა არც ერთი პოლიტიკური ძალა არ მოსულა და ასე სამარცხვინოდ არ უნდა წასულიყვნენ.


თამუნა კვინიკაძე