ნუკი კოშკელიშვილი: "პირადი ცხოვრება გვერდით გადავდე"
1 834 ნახვა
ტელეწამყვანი ნუკი კოშკელიშვილი ქალური ისტორიებით დაინტერესდა და იმედი აქვს, რომ ერთ–ერთ არხზე მისი ახალი გადაცემა ბევრი ქალის ცხოვრებას უკეთესობისკენ შეცვლის. თიკა ფაცაციასთან ერთად ის რესპონდენტებს გულღია საუბრებში გამოიწვევს. თავადაც ხომ ყოველთვის დაუფარავად საუბრობდა პირად გრძნობებზე, არადა ახლა ამ თემას ტაბუ დაადო და ჟურნალისტებსაც სთხოვს, ამ საკითხზე კითხვები აღარ დაუსვან.
– ნუკი, თქვენი ახალი გადაცემით რისი თქმა გინდათ, ახალს რას შესთავაზებთ მაყურებელს?
– ჩვენი გადაცემა ცოტა განსხვავებული იქნება. სტუმრად ჩვეულებრივ ადამიანებს მოვიწვევთ, რომლებიც საინტერესო ისტორიებს მოგვიყვებიან. პირველი რამდენიმე გადაცემა უკვე ჩავწერეთ და საკმაოდ მძიმე, რთულ თემებზე ვისაუბრეთ. ჩვენგან სტუმრები რჩევებს მიიღებენ და, იმედია, შინაგანად შეიცვლებიან. გადაცემასაც ასე ჰქვია – "შეიცვალე". ეს ძირითადი მესიჯია. სამწუხაროდ, ჯერჯერობით გადაცემა ეთერში არ გადის, რადგან ველოდებით სტუდიას, რომელიც შენდება.
– ადრე სხვა არხზე "ყოფილი ცოლების კლუბი" მიგყავდათ, რომელიც ასევე ქალურ თემებს, მათ პრობლემებს ეხებოდა. იმავე არხზე არსებობდა გადაცემაც "ჩემი მშვენიერი ლედი", სადაც ქალებს გარეგნობისა და სტილის უკეთესობისკენ შეცვლაში ეხმარებოდნენ. "შეიცვალე" ამ ორი გადაცემის ნაზავი იქნება?
– არა, ეს გადაცემა ცოტა განსხვავდება. ჩვენ ქალების ისტორიები გვაინტერესებს. სამწუხაროდ, საქართველოში ქალი ხშირად არის ძალადობის მსხვერპლი და ჩვენ ასეთებიც გვეყოლებიან სტუმრად. ვფიქრობ, მე და თიკამ საპასუხისმგებლო მისია ავიღეთ. თუნდაც რესპონდენტის ვიზუალური ცვლილება ძალიან რთულია და ამაში დიზაინერი ზალიკო ბერგერი გვეხმარება. ამ ქალებმა მთლიანად ტრანსფორმაცია უნდა განიცადონ, რომ მაყურებელმა ცვლილება დაინახოს.
– ესე იგი ამ გადაცემით გარკვეულწილად უერთდებით კამპანიას ქალთა ძალადობის წინააღმდეგ.
– რა თქმა უნდა. ეს პრობლემა საქართველოში ალბათ ყოველთვის იყო, მაგრამ ამ ბოლო დროს ამოტივტივდა ზედაპირზე. ეს არის მამაკაცების გაუნათლებლობისა და არაკაცობის შედეგი. ყველა ის სადღეგრძელო, რაც ისმება ქართულ სუფრაზე, არის ფუჭი! ვინც ამ ინტერვიუს წაიკითხავს და არის მამაკაცი, რომელიც ძალადობს თავის დედაზე, დაზე, ცოლზე ან შვილზე, ჩემგან მიიღონ პასუხად – თქვენ არაკაცები ხართ!
ყოველთვის ვამაყობდი ჩემს უცხოელ მეგობრებთან, რომ საქართველოში ვაჟკაცები არიან და თურმე... იმედი მაქვს, რომ ის მამაკაცები, რომლებიც ჯანსაღად აზროვნებენ, ყველა კაცს მიუთითებენ ამ ამაზრზენი საქციელის შესახებ. ბერნარდ შოუს კარგად აქვს ნათქვამი – თუ ჩემი მეზობელი ყოველდღე სცემს თავის ცოლს და მე – არასდროს, მაშინ სტატისტიკურად გამოდის, რომ მე და ჩემი მეზობელი დღეგამოშვებით ვცემთ ცოლებს. ანუ თვალის დახუჭვა არანაკლები დანაშაულია. როცა რაღაც ხდება, ჩვენ აუცილებლად უნდა ვამხილოთ ის ადამიანები, მოძალადეებს ყველა ერთად უნდა აღვუდგეთ წინ.
– თქვენს პირადში ყველაფერი კარგადაა?
– პირადი ცხოვრება გვერდით გადავდე და მასზე აღარ ვსაუბრობ. გადავწყვიტე, რომ პირადი პირადია და საჯარო არ უნდა გავხადო. ახლა ასე ვფიქრობ და ჟურნალისტები მკაცრად ნუ განმსჯით. ალბათ ხვალ–ზეგ გადავიფიქრებ და ყველაფერს მოვყვები. ახლა მხოლოდ კარიერაზე ვარ გადართული და ცხოვრების დინებას მივყვები. მე უკვე წლებით აღარ ვყოფ ცხოვრებას, სეზონების მიხედვით ვაფასებ. ამჟამად ძალიან საქმიანი პერიოდი მაქვს.
– ბოლო დროს ბევრჯერ ითქვა, რომ საავადმყოფოში მოხვდით. უხერხული კითხვაა, მაგრამ მართლა გქონდათ ჯანმრთელობის პრობლემები?
– რატომღაც აქტიურად მიგონებენ ამგვარ რაღაცეებს. კარგად ვარ, ჯანმრთელობის არანაირი პრობლემა არ მაქვს. რაც ინტერნეტში ვრცელდება, რომ ხან მანქანამ გამიტანა, ხან რა მომივიდა და ხან რა, არის ტყუილი. "კომედი არხზე" "ქალთა სახეების" გადაღებისას, რომელსაც სერიალის ფორმატი აქვს, რამდენჯერმე საავადმყოფოს ეპიზოდიც იყო და ეს აურზაური ალბათ ამან გამოიწვია. მიკვირს, როცა პოლიციელის ფორმაში ვარ, მაშინ რატომ არ უჩნდებათ კითხვა, შინაგან საქმეთა სამინისტროში ხომ არ დავიწყე მუშაობა.
მანანა ნოდია, ჟურნალი სარკე
– ნუკი, თქვენი ახალი გადაცემით რისი თქმა გინდათ, ახალს რას შესთავაზებთ მაყურებელს?
– ჩვენი გადაცემა ცოტა განსხვავებული იქნება. სტუმრად ჩვეულებრივ ადამიანებს მოვიწვევთ, რომლებიც საინტერესო ისტორიებს მოგვიყვებიან. პირველი რამდენიმე გადაცემა უკვე ჩავწერეთ და საკმაოდ მძიმე, რთულ თემებზე ვისაუბრეთ. ჩვენგან სტუმრები რჩევებს მიიღებენ და, იმედია, შინაგანად შეიცვლებიან. გადაცემასაც ასე ჰქვია – "შეიცვალე". ეს ძირითადი მესიჯია. სამწუხაროდ, ჯერჯერობით გადაცემა ეთერში არ გადის, რადგან ველოდებით სტუდიას, რომელიც შენდება.
– ადრე სხვა არხზე "ყოფილი ცოლების კლუბი" მიგყავდათ, რომელიც ასევე ქალურ თემებს, მათ პრობლემებს ეხებოდა. იმავე არხზე არსებობდა გადაცემაც "ჩემი მშვენიერი ლედი", სადაც ქალებს გარეგნობისა და სტილის უკეთესობისკენ შეცვლაში ეხმარებოდნენ. "შეიცვალე" ამ ორი გადაცემის ნაზავი იქნება?
– არა, ეს გადაცემა ცოტა განსხვავდება. ჩვენ ქალების ისტორიები გვაინტერესებს. სამწუხაროდ, საქართველოში ქალი ხშირად არის ძალადობის მსხვერპლი და ჩვენ ასეთებიც გვეყოლებიან სტუმრად. ვფიქრობ, მე და თიკამ საპასუხისმგებლო მისია ავიღეთ. თუნდაც რესპონდენტის ვიზუალური ცვლილება ძალიან რთულია და ამაში დიზაინერი ზალიკო ბერგერი გვეხმარება. ამ ქალებმა მთლიანად ტრანსფორმაცია უნდა განიცადონ, რომ მაყურებელმა ცვლილება დაინახოს.
– ესე იგი ამ გადაცემით გარკვეულწილად უერთდებით კამპანიას ქალთა ძალადობის წინააღმდეგ.
– რა თქმა უნდა. ეს პრობლემა საქართველოში ალბათ ყოველთვის იყო, მაგრამ ამ ბოლო დროს ამოტივტივდა ზედაპირზე. ეს არის მამაკაცების გაუნათლებლობისა და არაკაცობის შედეგი. ყველა ის სადღეგრძელო, რაც ისმება ქართულ სუფრაზე, არის ფუჭი! ვინც ამ ინტერვიუს წაიკითხავს და არის მამაკაცი, რომელიც ძალადობს თავის დედაზე, დაზე, ცოლზე ან შვილზე, ჩემგან მიიღონ პასუხად – თქვენ არაკაცები ხართ!
ყოველთვის ვამაყობდი ჩემს უცხოელ მეგობრებთან, რომ საქართველოში ვაჟკაცები არიან და თურმე... იმედი მაქვს, რომ ის მამაკაცები, რომლებიც ჯანსაღად აზროვნებენ, ყველა კაცს მიუთითებენ ამ ამაზრზენი საქციელის შესახებ. ბერნარდ შოუს კარგად აქვს ნათქვამი – თუ ჩემი მეზობელი ყოველდღე სცემს თავის ცოლს და მე – არასდროს, მაშინ სტატისტიკურად გამოდის, რომ მე და ჩემი მეზობელი დღეგამოშვებით ვცემთ ცოლებს. ანუ თვალის დახუჭვა არანაკლები დანაშაულია. როცა რაღაც ხდება, ჩვენ აუცილებლად უნდა ვამხილოთ ის ადამიანები, მოძალადეებს ყველა ერთად უნდა აღვუდგეთ წინ.
– თქვენს პირადში ყველაფერი კარგადაა?
– პირადი ცხოვრება გვერდით გადავდე და მასზე აღარ ვსაუბრობ. გადავწყვიტე, რომ პირადი პირადია და საჯარო არ უნდა გავხადო. ახლა ასე ვფიქრობ და ჟურნალისტები მკაცრად ნუ განმსჯით. ალბათ ხვალ–ზეგ გადავიფიქრებ და ყველაფერს მოვყვები. ახლა მხოლოდ კარიერაზე ვარ გადართული და ცხოვრების დინებას მივყვები. მე უკვე წლებით აღარ ვყოფ ცხოვრებას, სეზონების მიხედვით ვაფასებ. ამჟამად ძალიან საქმიანი პერიოდი მაქვს.
– ბოლო დროს ბევრჯერ ითქვა, რომ საავადმყოფოში მოხვდით. უხერხული კითხვაა, მაგრამ მართლა გქონდათ ჯანმრთელობის პრობლემები?
– რატომღაც აქტიურად მიგონებენ ამგვარ რაღაცეებს. კარგად ვარ, ჯანმრთელობის არანაირი პრობლემა არ მაქვს. რაც ინტერნეტში ვრცელდება, რომ ხან მანქანამ გამიტანა, ხან რა მომივიდა და ხან რა, არის ტყუილი. "კომედი არხზე" "ქალთა სახეების" გადაღებისას, რომელსაც სერიალის ფორმატი აქვს, რამდენჯერმე საავადმყოფოს ეპიზოდიც იყო და ეს აურზაური ალბათ ამან გამოიწვია. მიკვირს, როცა პოლიციელის ფორმაში ვარ, მაშინ რატომ არ უჩნდებათ კითხვა, შინაგან საქმეთა სამინისტროში ხომ არ დავიწყე მუშაობა.
მანანა ნოდია, ჟურნალი სარკე
