უტაქტო შეკითხვა ცნობილებს - არ ქორწინდები?

შინაბერა ხანშიშესულ ქალწულს ჰქვია

სად გადის ზღვარი გასათხოვარსა და გაუთხოვარს შორის?


”არ თხოვდები?” ცოლი არ მოგყავს?” - მსგავსი შეკითხვები რატომღაც, ბევრს დასაოჯახებელი ადამიანის მოკითხვის აუცილებელ ფორმად მიაჩნია. გადავწყვიტე, პირად ცხოვრებასთან დაკავშირებული უტაქტო შეკითხვები ცნობილი ადამიანებისთვის დამესვა...

პირველ რესპონდენტად მშვენიერი ეკო ფანგანი შევარჩიე,

- ეკო, არ თხოვდები?
- სხვის ცხოვრებაში არასოდეს ვიქექები და არც ის მომწონს, როცა სხვები იქექებიან. შესაბამისად, ჩემს პირად ცხოვრებასთან დაკავშირებული შეკითხვები გამაღიზიანებელია.
- როგორ ფიქრობ, გულწრფელად განიცდიან, როცა ”ასეთი კარგი” გოგო თუ ბიჭი ”ჯერ კიდევ” დასაოჯახებელია თუ ირონიით კითხულობენ - რატომ არ თხოვდები? ცოლი რატომ არ მოგყავსო?
- თუ ასეთი კარგი გოგო ჯერ გათხოვილი არ არის, ცუდია? მე პირიქით მიმაჩნია. ალბათ, ყველა ადამიანის პრიორიტეტი მაინც დაოჯახება უნდა იყოს, მაგრამ ყველაფერს თავისი დრო აქვს. ვისი მიზანიც მხოლოდ დაოჯახებაა, ალბათ შეუმდგარი ადამიანია. ვინ რას ამბობს, არ მაღელვებს - ეს მათი პრობლემაა... ისე, არა მგონია, დამცინავად კითხულობდნენ. მგონი, დასაცინები თავად არიან - სკოლის ასაკში გათხოვილები, 20-20-ჯერ გათხოვილები და ა. შ. (იცინის). ეს ჩემი საქმე არ არის, მაგრამ ”რატომ არ თხოვდები?” აბსურდულ შეკითხვად მიმაჩნია.
- შენი აზრით, შინაბერად და ბერბიჭად რა ასაკის ადამიანი მიიჩნევა?
- ”შინაბერა” პირდაპირი მნიშვნელობით ”გაუთხოვარს” არ ნიშნავს. შეიძლება, ადამიანი გათხოვილი არ იყოს, მაგრამ მრავალფეროვანი პირადი ცხოვრება ჰქონდეს. მას ”შინაბერას” ვერ ვუწოდებთ. საქართველოში ”გაუთხოვარი” ქალწულობასთან ასოცირდებოდა. ჰოდა, შეიძლება, ამ კუთხით ვიფიქროთ და ვთქვათ, რომ შინაბერა ხანშიშესულ ქალწულს ჰქვია.

”შინაბერებისა” და ”ბერბიჭების” სიას ხელახლა გადავხედე და მსახიობ ნინო მუმლაძეს დავურეკე: არ დაგიმალავთ - ვიფიქრე, მუდამ ხალისიანი ნინო უტაქტო შეკითხვის გამო გასალანძღავად არ გამიმეტებდა, თორემ ჩემ მიერ შედგენილ სიაში ბევრად უფრო ”ვადაგასული” ცნობილებიც იყვნენ...

- ნინო, არ თხოვდები?
- (იცინის) რა ვი, ჯერჯერობით - არა.
- ასეთ შეკითხვებს ხშირად გისვამენ?
- დიახ და ეს ძალიან გამაღიზიანებელია, რადგან საერთოდ, მიმაჩნია, რომ სხვის პირად ცხოვრებაში ჩარევა არაკორექტულია. რატომღაც, ასეთი შეკითხვები ნორმალურად მიაჩნიათ. ამიტომ ყველას ტაქტისკენ მოვუწოდებ. ვინც არ იცის, გაითვალისწინოს, რომ ”არ თხოვდები” და მსგავსი შეკითხვები ისეთივე მიუღებელია, როგორც ის, რომ ადამიანს ჰკითხო, - ხელფასი რამდენი აქვს...
- ”არ თხოვდები?” - ასეთ შეკითხვებს ყოველთვის ღიმილით პასუხობ, თუ შეკითხვის ავტორისთვის უხეშადაც გითქვამს რამე?
- არა, უხეშად არ ვპასუხობ, რადგან მაშინ ნახევარ საქართველოს უნდა გავუბრაზდე. ვცდილობ, შეკითხვის ავტორი ლამაზად ”მოვიშორო”, ღიმილით დავემშვიდობო და ვაგრძნობინო, რომ ამ თემაზე საუბარს აღარ ვაგრძელებ.
- ამ თემათან დაკავშირებით, კურიოზულ სიტუაციაში აღმოჩენილხარ?
- კავთისხევი დედაჩემის პაპის სოფელია, სადაც სახლი გვაქვს და წელიწადში ერთხელ ვსტუმრობთ. მოგეხსენებათ, დაოჯახების თემას სოფლებში უფრო განიცდიან: რატომღაც მიაჩნიათ, რომ თუკი გოგო 20 წლის ”ზემოთ” არ გათხოვდა, ტრაგედიაა! მახსოვს, სულ რაღაც 25-26 წლის ვიყავი, როცა შევიტყვე, რომ ჩემ შესახებ უთქვამთ, - არადა, რა კარგი გოგოა და როგორ ”დარჩაო” (იცინის). უკვე 30 წლისას შესაბამისი ადამიანი თუ შემხვდება, ალბათ ამ ნაბიჯს გადავდგამ - გავთხოვდები, მაგრამ მაშინ ამ თემაზე არც კი ვფიქრობდი...
- შენი აზრით, გასათხოვარსა და გაუთხოვარს შორის ასაკობრივი ზღვარი რომელია?
- ვფიქრობ, რომ ასეთი ზღვარი არ არსებობს. შეიძლება, ადამიანმა მეორე ნახევარი ნებისმიერ ასაკში იპოვოს და ოჯახი შექმნას, თუკი ამის სურვილი აქვს. დღესდღეობით, როცა ქალი საზოგადოების სრულფასოვანი წევრია, გათხოვება ისეთ აუცილებლობას არ წარმოადგენს, როგორც - 2 საუკუნის წინ, როცა ქალი დასაქმებული არ გახლდათ და მისი რეალიზების ერთადერთი საშუალება ოჯახის შექმნა იყო. დღეს ქალი სხვაგვარადაც რეალიზებულია. მამაკაცის მსგავსად, შეიძლება, ოჯახის შექმნა მასაც არ უნდოდეს. ამიტომ არ მიმაჩნია, რომ თუ ქალმა ოჯახი არ შექმნა, მისმა ცხოვრებამ ფუჭად ჩაიარა.
- რომელი სქესის წარმომადგენლებისგან უფრო გამაღიზიაებელია შეკეითხვა - ”არ თხოვდები”?
- როგორც წესი, ამას გათხოვილი ქალები ან ასაკოვანი მამაკაცები გეკითხებიან, რომლებიც შენს ამბავს განიცდიან და თავისი ჭკუით, რაღაც კარგს გეუბნებიან… ახალგაზრდა ბიჭი ასეთ რამეს არ გკითხავს, ყოველ შემთხვევაში - მათგან მსგავსი შეკითხვა მე არ მსმენია. ახალგაზრდებიUუფრო სხვაგვარ შეკითხვებს სვამენ (იცინის).

პირად ცხოვრებასთან დაკავშირებული, მომაბეზრებელი ცნობისმოყვარეების შეკითხვები არც მამაკაცებს სიამოვნებთ. მომღერალ ანრი ჯოხაძეს უტაქტო შეკითხვა ყოველგვარი შესავლის გარეშე დავუსვი:

GzaPress

- ანრი, ცოლი არ მოგყავს?
- ბატონო?!.
შეკითხვა უტიფრად გავუმეორე...
- შენ გაღელვებს ეგ ამბავი?
- უბრალოდ, მაინტერესებდა - მსგავსი შეკითხვები გაღიზიანებს თუ არა?
- ასეთ შეკითხვებს კულტურული ხალხი არ სვამს. ამ ადამიანების უინტელექტობაზე, გონებრივ შესაძლებლობებზე ვდარდობ...
- როგორ ფიქრობ, - სასურველ სასიძოობასა და ბერბიჭობას შორის ასაკობრივი ზღვარი რომელია?
- ვაიმე, ვერ გეტყვი, იცი? ალბათ, ბერბიჭა 50 წლის არის, თუკი უცოლოდ დარჩება. 40 წლამდე კაცი მთლად ბერბიჭად არ მიიჩნევა.
- ქალი შინაბერად როდიდან მიიჩნევა?
- ქალთან სექსი ყოველთვის შეიძლება. მთავარია, კარგ ფორმაში იყოს. საერთოდ, ამ მხრივ პრობლემა გარკვეულ ასაკში მამაკაცებს ექმნებათ ხოლმე (იცინის).


ბორის ბედია რამდენიმე დღის წინ 31 წლის გახდა, ”ბერბიჭების” სიაშიც ”დაუნდობლად” ჩავწერე და დავურეკე...

- ცოლი GzaPressარ მოგყავს?
- ჩემი დაოჯახების თემით ბევრი ინტერესდება: ძმაკაცები, ნათესავები, უცხოები, გოგონები... ზოგი გოგონა ამით თავს მაწონებს, ”მინამიოკებს”, ზოგს - უბრალოდ აინტერესებს, რადგან ჩემი დიდი გულშემატკივარია. არ ვღიზიანდები. უბრალოდ, ხანდახან დღეში 200-ჯერ მეკითხებიან, - ცოლი არ მოგყავსო? ყველას ერთსა და იმავეს ვპასუხობ. ასეთ შემთხვევაში, ნებისმიერი ადამიანი დაიღლება.
- რას პასუხობ ხოლმე?



- ჯერჯერობით, არა-მეთქი, - ასე მოკლედ ვპასუხობ. არავისთვის მითქვამს, - რას გამიჭირეთ საქმე-მეთქი!..
- ძირითადად, შეკითხვას როგორ გისვამენ - ცოლი რატომ არ მოგყავს თუ ცოლი რატომ არ მოიყვანეო?
- ასეც მეუბნებიან და ისეც... კარგი, რა, მოვიყვან, აბა, რა იქნება? ყველაფერს თავისი დრო აქვს. ზოგი მეუბნება, - 30 წლის ხარ, დროა, დაოჯახდეო. დრო კი არის, მაგრამ ”სჯობს გვიან, ვიდრე - არასდროს”. შეიძლება, სიყვარული 10 წლის მერე მეწვიოს, შეიძლება - ხვალ ან თუნდაც - დღეს... ამას წინასწარ ვერ დაგეგმავ.
- ბორის, თქვენთვის გოგონას ”გარიგება” არ უცდიათ?
- ბებიაჩემს სარძლოდ ხან ვინ მოეწონებოდა, ხან - ვინ. ვუთხარი, - ცოლი შენ ხომ არ მოგყავს? მე უნდა მოვიყვანო-მეთქი (იცინის). ამიტომ ამაზე საუბარი კატეგორიულად ავკრძალე. მაგალითად, ვინმე სარძლოდ მოეწონა, მე კი აზრზე არ ვარ, ვინ არის. სადმე რომ შემხვდეს, ვერც ვიცნობ (იცინის).
- ბებიის შერჩეული საპატარძლოთი არ დაინტერესებულხარ? იქნებ, როგორი კარგი გოგოა...
- სიმართლე გითხრათ - არა. ჯერ ერთი, ამისთვის არც მცალია - უამრავი საქმე მაქვს. თან, სიყვარულის დაგეგმვა არ შეიძლება - ეს გრძნობა სპონტანურად რომ გეწვევა, მაშინ აქვს მუღამი!

ეთო ყორღანაშვილი,