ვერიკო კალანდია ''თავისი შვილის მამას'' ეძებს - ნინა პოლიტიკური მოვლენების გადაფარვას აპირებს l

სერიალ ''ჩემი ცოლის დაქალებში'' მომღერალი ნინა წკრიალაშვილი და მსახიობი ვერიკო კალანდია განუყრელი მეგობრები არიან, ერთად აგვარებენ ყველა პრობლემას და ნებისმიერ საკითხში ერთმანეთს გვერდში უდგანან. იმის გარკვევა გადავწყვიტეთ, რეალურ ცხოვრებაშიც ასე შეხმატკბილებულები არიან თუ არა და მათთან ინტერვიუ ჩავწერეთ.

- თქვენი ნაცნობმეგობრობა სერიალს უკავშირდება თუ მანამდეც იცნობდით ერთმანეთს?
ნინა:
- ''ჩემი ცოლის დაქალებიდან'' რომ დამირეკეს, როლზე უნდა მოგსინჯოთო, ისე გავქანდი, არც მიკითხავს, რა როლი უნდა შემესრულებინა. რადგან მანამდე სერიალში არ მქონდა ნათამაშები, თავიდან ძალიან დავიძაბე და შემეშინდა, მაგრამ იქ მისულს დამხვდა მოღიმარი ვერიკო, ისე იცინოდა, რომ ყველა კბილი უჩანდა. მის მიმართ თავიდანვე დადებითად განვეწყვე.
ვერიკო:
- ნინამდე საზოგადოებისთვის ცნობილი რამდენიმე ადამიანი მოიყვანეს ამ როლისთვის, ამ დროს ნინა მოვიდა საოცარ ფორმაში, შლაპით. შემოვიდა თუ არა, მისგან პოზიტივი წამოვიდა. მოგვცეს დრო, რომ წაგვემეცადინა, ახალგაცნობილები კარგი ნაცნობებივით ჩავუჯექით, გავიარეთ ტექსტი და სულ ორი დუბლი ჩავწერეთ, შედეგით კი ყველა კმაყოფილი დავრჩით.
ნინა:
- ჩემი და ვერიკოს გმირები გადაბმული მეგობრები არიან, რეალურად ჩვენ შორის არსებული ასაკობრივი სხვაობა შეიძლებოდა, პრობლემა გამხდარიყო, მაგრამ მგონი, ისე ვიცვამ და ისე ვაკეთებ ყველაფერს, რომ დიდი სხვაობა არ ჩანს. მოკლედ, ამ მცირე სინჯის შემდეგ მითხრეს, წადი და ათ წუთში მოდი გადაღებაზეო, ისე ვინერვიულე, დავიშოკე…. ვიფიქრე, ამ ტექსტს წავიღებ, ერთი 4-5 დღე ვიმეცადინებ და ისე მივალ გადაღებაზე-მეთქი. შორტი ჩაიცვი და მოდიო – მაშინვე რომ მითხრეს, გული გამისკდა.
ვერიკო:
- მოკლედ, პირველივე დღეს დავმეგობრდით და ეს ურთიერთობა დღემდე გრძელდება.
ნინა:
- ვერიკო ძალიან კეთილი, მეგობრული, მოწესრიგებული ადამიანია, სულ იღიმის, რაც მართლა დასაფასებელია, რადგან ქართველებს ღიმილი გვიჭირს, მიხარია, რომ მისი სახით მეგობარი შევიძინე.
ვერიკო:
- ისე კარგად დამახასიათე, მე რაღა ვთქვა შენზე, არ ვიცი. ნინა ძალიან უშუალო და ყურადღებიანია.
ნინა:
- ვერიკოს ტოლი გოგონები ასჯერ დაბერებულები და დაპატარავებულები არიან, ეს კიდევ ისეთი გულუბრყვილოა, ისეთ შეკითხვებს მისვამს, რომ სიცილით ვკვდები, ხან მგონია, მეღადავება.
- ნინა ჭორების საკითხში გამობრძმედილია, მაგრამ ვერიკო, შენ შესახებ თუ გსმენია რაიმე განსაკუთრებული და როგორ რეაგირებ?
ვერიკო:
- ძირითადად, ვიზუალს უსვამენ ხაზს, ამბობენ, რომ ტუჩები დაბერილი მაქვს, თვალები აწეული, ცხვირი გაკეთებული, თურმე გათხოვილი ვარ და შვილი მყავს, ოღონდ მამა ვინაა, არ ვიცი, თუ მაპოვნინებენ, კარგია. მახსოვს, პირველად ყველაზე მეტად რა მეწყინა. სერიალში რომ გამოვჩნდი, თავიდან კომენტარებს ვკითხულობდი და ერთ-ერთმა დაწერა, ფუ, ეს გოგო ''ნუ პაგადის'' მგელს ჰგავსო, თავიდან ცოტა გავბრაზდი, მაგრამ ახლა მეცინება (იცინის).
ნინა:
- მე მომიხსენიებენ, როგორც აწყობილს, არადა, ცხვირი და ტუჩი მაქვს მხოლოდ გაკეთებული, მაგრამ თუ კიდევ რამე დამჭირდება, აუცილებლად გავიკეთებ. ჩემზე წერენ, ჯექსონს ჰგავსო, ზოგი ზვერევს მადარებს. ახლა უკვე აღარ ვკითხულობ კომენტარებს, მაგრამ ყველაზე მეტად მახინჯოს ის გეძახის, ვისაც თავად აქვს პრობლემა ამ მხრივ. შეიძლება, ადამიანის ნამღერი, შესრულებული როლი არ მოგეწონოს, მაგრამ გარეგნობაზე როგორ შეიძლება დაცინვა, უბრალოდ, არ მესმის.
- სერიალს მიღმა თუ ხვდებით ერთმანეთს?
- ორივე ძალიან დაკავებული ვართ, მაგრამ როდესაც გადაღებები არ გვაქვს, სერიალიდან ვისვენებთ, ვურეკავთ და მაინც ვნახულობთ ერთმანეთს. ვჭორაობთ, ვყვებით ელემენტარულ რაღაცებს, ასეთი პალტო მინდა, ისეთი რაღაც და ა.შ. პირად ცხოვრებაზე ძირითადად მე ვუყვები და ეს მისმენს, რადგან არაფერი აქვს მოსაყოლი. ვეუბნები, გოგო, რამე ქენი-მეთქი. ისე, ერთხელ ძლივს თქვა, ერთი ბიჭი მომწონსო, ძალიან ვგულშემატკივრობდი, მაგრამ კრახით დასრულდა.
- რატომ დასრულდა კრახით?
- თვითონაც არ იცის, მოსწონდა და მერე რაღაცამ გააღიზიანა. ვერიკო, ასე თუ გააგრძელე, სულ მე მოგიყვები ამბებს (იცინის)
- ვერიკო, ძალიან მერყევი ხარ ამ საკითხში?
- მერყევი არა, მაგრამ არის რაღაცები, რასაც განსაკუთრებულ ყურადღებას ვაქცევ.
ნინა:
- 26 წლისაა და აქამდე არ ჰყოლია არც ქმარი, არც სერიოზული რომანი ჰქონია, ახლა კი ძალიან ფრთხილობს და შეცდომის დაშვება არ სურს, ზუსტად იცის, რა უნდა, რა - არა და ჩემგან განსხვავებით, სისულელეებს არ გააკეთებს. მე კი სულ მგონია, რომ გამოსწორდება, შეიცვლება, მე შევცვლი, მაგრამ ასე არაა, ეს არ ხდება.
- ვერიკოს გმირისთვის ყველაზე რთულ პერიოდში მის გვერდით იყავი, ვგულისხმობ ცოტნიკოს ანკასთან რომ ''შეუსწარით''. რეალურად რომელიმე მსგავს სიტუაციაში თუ აღმოჩენილხართ?
- მე მოვხვედრილვარ, ძალიან რთულია, ძალიან მძიმეა, მაგრამ ასეთ დროს ისტერიკას აზრი არ აქვს, საკუთარი თავი ღირსეულად უნდა წარმოაჩინო. თუ ადამიანს აღარ უნდიხარ და სხვა უნდა, იქ მთავრდება ყველაფერი, ყველანაირი ქმედება აზრს კარგავს. მტკივნეულია, მაგრამ ესეც ხდება.
ვერიკო:
- ასეთ სიტუაციაში არასდროს მოვხვედრილვარ. ზოგადად, ძალიან ემოციური ვარ, მაგრამ მიუხედავად ამისა, ალბათ, ისე არ მოვიქცეოდი, როგორც ჩემი გმირი.
ნინა:
- პრინციპში, თიკას თავი დიდად არ გაუგიჟებია, უბრალოდ, მერე დოდოშკა გააგიჟებს, ქმრის შენარჩუნების ხერხებს სთავაზობს. დოდოშკა ხომ მაგარი მაიმუნი გოგოა, მაგრამ ჰგონია, რომ ყველაზე ჭკვიანია, სინამდვილეში ძალიან სულელია. თიკა განიცდის ქმართან დაშორებას, უნდა დაეხმაროს და ამიტომ მიმართავს ყველა გამართლებულ თუ გაუმართლებელ ხერხს. რეალურად კი სიტუაციას უფრო გაურთულებს. წინ ძალიან სასაცილო სერიები გელოდებათ. ბევრი ქართველი ქალი ამოიცნობს საკუთარ თავს, განსაკუთრებით ისინი, დილით რომ ეკლესიაში დადიან და საღამოს ''სხვაგან''.
- ყველაზე მეტად რომელი სცენის გადაღება გაგიჭირდათ?
ვერიკო:
- მე და დოდოშკა ''სწერვა'' სახეებს რომ მივიღებთ ხოლმე, გვეცინება. გადამღები ჯგუფისგან ხითხითი თუ გვესმის, მერე ჩვენც ვერ ვიკავებთ თავს. რა პრობლემაც უნდა გქონდეს, როგორი დაღლილიც გინდა იყო, პავილიონში რომ შეხვალ, ყველაფერი გავიწყდება, სხვა სამყაროში ხვდები.
ნინა:
- მე ხომ სულ წნევა მაქვს და სულ ცუდად ვარ, ჩანთის ნახევარი წამლებით მაქვს სავსე, მაგრამ არავის სჯერა, რომ ცუდად ვარ, სანამ არ მოვკვდები, არ დაიჯერებენ. აი, გადაღებებზე რომ მივდივარ, მართლა მავიწყდება ყველაფერი. დილასაც ცუდად ვიყავი, 37 მქონდა სიცხე, მაგრამ მოვემზადე წასასვლელად, შემომხედა ჩემმა შვილმა და მეუბნება, რა ვიცი კვდებოდი, ცუ-დად იყავი და კი დადიხარ ახლა ბეწვითა და შლაპითო (იცინის).
ვერიკო:
- მეც თუ რამეზე დავიწუწუნე, ნინა ისე მამხნევებს და ისე შემომიძახებს, რომ უფლებას აღარ მაძლევს, ცუდად ვიყო.
- ეკრანზე ძირითადად ერთად ჩანხართ, ტანსაცმელს, ფერებს წინასწარ ათანხმებთ ერთმანეთთან?
ნინა:
- მე დავდივარ დიდი ჩემოდნით.
ვერიკო:
- მეც, ძირითადად, ჩემს გარდერობს ვიყენებ, მაგრამ გვაქვს საშუალება, ბარტერით ვისარგებლოთ და გამოვიტანოთ ჩვენთვის სასურველი სამოსი. თუ ფორსმაჟორში ვართ, ვერ ვასწრებთ გამოტანას, მაშინ ნინა მშველის და მეუბნება, ჩემი ნივთებიდან აარჩიე, რაც გინდაო.
ნინა:
- კოსტიუმების მხატვარი გვყავს, მაგრამ ვცდილობთ, ერთმანეთზე ავეწყოთ. იმხელა ჩემოდნით დავდივარ, ხალხი მეკითხება, ჩამოხვედიო (იცინის)?!
ვერიკო:
- ნინას მანქანა ცალკე თემაა, ერთი დიდი გარდერობია, იმდენი რამე უდევს, იქ მყოფი არ მოიწყენ, ერთი-ორი დღე დათვალიერებაში გაერთობი.
ნინა:
- სადაც უნდა ვიყო, რომ დამირეკონ, გადაღებაა და მოდიო, შემიძლია, ეგრევე მივიდე, რადგან მანქანაში მართლა ყველაფერი მაქვს, ''პლოიკაც'' კი...
- ნინა, გარდა სერიალისა და ''მარაოსი'', გაქვს რაიმე სიახლე, თუნდაც სასიმღერო კარიერის მხრივ?
- ისეთი არაფერი, ჩემი შვილი აბიტურიენტია და საკმაოდ დაძაბული წელი მაქვს, რომ მირეკავს, არ სჯერათ, რომ მართლა ჩემი შვილია (იღიმის). პირადშიც განსაკუთრებული არაფერი ხდება. სიახლე ისაა, რომ ახალი სიმღერა მაქვს. ''რუსთავი 2''-ის დილის გადაცემამ გადაწყვიტა, რომ მომღერლებს დაეხმაროს და კლიპები გადაუღოს. ხვალ ჩემს კლიპს ვიღებთ, რომელშიც შორენა ბეგაშვილიც მონაწილეობს, სიმღერა თავისუფლებაზეა და იმაზე, რომ რაც გვინდა, ის უნდა ვაკეთოთ. ცოტა სკანდალიც იქნება, რომელსაც ჯერჯერობით არ გავამხელი, ვნახოთ, მონტაჟის დროს რა გამოვა, ვეცდებით, პოლიტიკური მოვლენები გადავფაროთ.

ციცი ომანიძე
ჟურნალი ''რეიტინგი''