ნინო ჩხეიძის მოდური რჩევები – ექსკლუზიური ნიღბის რეცეპტი მომღერლისგან

''მარაო რუსთავი 2''- ზე, მოგეხსენებათ, მოდის დიდ მოყვარულ ნინა წკრიალაშვილს მიჰყავს გადაცემა, რომლის საშუალებითაც მაყურებელს ცნობილი ადამიანების გარდერობებში ახედებს. ნინას გადაცემები ერთ-ერთი ყველაზე რეზონანსული აღმოჩნდა, ჯერ შორენა ბეგაშვილის გარ-დერობის ამბებმა მოიარა მთელი ინტერნეტსივრცე, შემდეგ კი ნინო ჩხეიძის მდიდრული კარადაც ''გამოვაღეთ'' ნინასთან ერთად და იქ უამრავი ცნობილი ბრენდი ვიხილეთ. ნინოს ამ გადაცემაზეც ვესაუბრეთ და მისგან რჩევებიც მოვისმინეთ, თუ როგორ უნდა ვიგრძნოთ თავი კომფორტულად და როგორ შევარჩიოთ სამოსი. თუმცა მანამდე ექსკლუზიურად გაგვიმხილა, რომ სულ მცირე ხანში მისი საახალწლო ალბომი გამოვა, სადაც, არც მეტი, არც ნაკლები, 25 სიმღერა შევა, 15 ძველი და ათიც ახალი.

- ნინო, ბოლოს ''მარაოზე'' გამოჩნდი, ნინას გადაცემაში, სადაც შენი გარდერობის დათვალიერების უფლება მიეცი. ბევრი აზიარებდა ამ ვიდეოს და თეთრი შურითაც შეგვშურდა ქალებს შენი. რამდენი ხანი აგროვე ამდენი ''შანელი''?
- (იცინის) არ მინდოდა გადაცემაში მონაწილეობა, მაგრამ ნინა ჩემი მეგობარია, ძალიან მთხოვა და დავთანხმდი. ჩაცმა სკოლის პერიოდიდან მიყვარს, ყოველთვის ვცდილობდი, რომ ისეთი რაღაცები შემეძინა, რაც ჩემს განწყობას გამოამჟღავნებდა, მაგალითად, მქონდა მძივებიანი ჩანთა. მოდის ტენდენციები გასაგებია, მაგრამ მე ჩაცმა მიყვარს ხასიათიდან გამომდინარე. სწორედ ამიტომაც ვიცვლი თმის ვარცხნილობასა და ფერს. არ მინდა, სულ ერთნაირად გამოვიყურებოდე, პირველ რიგში, ჩემთვის და შემდეგ მაყურებლისთვის. ამ გარდერობს საკმაოდ დიდი ხანია ვქმნი და ვაგროვებ. მაგალითად, მაქვს ათი წლის წინანდელი სამკაული, რომელსაც დღესაც ვიკეთებ.
- შენი გარდერობი მრავალფეროვანია. ''შანელის'' გარდა, რომელსაც ხშირად ახსენებენ ხოლმე შენთან დაკავშირებით, ბევრი სხვა ბრენდიც გაქვს.
- ალბათ, ''შანელის'' თემა უბრალოდ, გაპიარდა, ისეთი ბრენდია, რომ სხვებთან შედარებით უფრო ჩანს და ყვირის, თორემ მაქვს ერთმანეთისგან რადიკალურად განსხვავებული ბრენდები, მაგალითად, ''ეიჩ ენდემი'', ''ზარა'', ''რიკი ოუენსი'' თუ ''მარჯიელა''. ბრენდების გამო არ ვყიდულობ ტანსაცმელს, შემიკერია და ვიკერავ კიდეც სამოსს. მთავარია, ლამაზი იყოს და მასში თავს კომფორტულად გრძნობდე. როცა ვფიქრობ, რომ გადაცემაში მინდა წითელი კაბის ჩაცმა, უკვე წარმომიდგენია, როგორი უნდა იყოს. თავად რომ მოგწონს შენი ჩაცმულობა, შემდეგ სხვასაც აწონებ თავს. შესაძლოა, გეცვას ძალიან ძვირფასო სამოსი, მაგრამ არ გრძნობდე თავს კარგად. მე კარგი მკერავები მყავს, ბევრ ძვირიან კაბაზე უკეთ მომირგია მათი შეკერილი სამოსი.
- ნინასთან ისიც თქვი, რომ ზოგიერთი რამ ბრენდებიდან პატენტებია.
- არ ვწუწუნებ, მაგრამ არ მაქვს იმის საშუალება, რომ მთელი გარდერობი ორიგინალებით იყოს გავსებული. პატენტების მორგების პრობლემა არ მაქვს. ვთქვათ, ჩანთა, რომელიც ძალიან მინდა, მაგრამ ძვირი ღირს, ვერ ვყიდულობ, ამიტომაც შევიძენ პატენტს 150 ლარად და კმაყოფილი ვიქნები.
- ცნობილებს შორის ვის აქვს, შენი აზრით, ყველაზე კარგი გარდერობი?
- ნინას. მრავალფეროვანი გარდერობი აქვს, ჩემსას მაგონებს და ჩემს გემოვნებასთან ძალიან ახლოს არის. სპორტული სამოსიც აქვს, შავი კაბაც, ცდილობს, მისი ჩაცმულობა იყოს ახალი, კრეატიული და მოდური.
- ყველაზე იაფიანი რა მოიპოვება შენს გარდერობში?
- ყვითელი ქვედაბოლო, ძალიან ლამაზი, რომელშიც მივეცი 25 ევრო. მაქვს საკმაოდ იაფიანი, ე.წ. ''ფუტბოკლა'' მაისურები. ეს ყველაფერი ''ეიჩ ენდ ემში'' ვიყიდე. ანტვერპენში რომ ვიყავი, რაღაცები საკმაოდ იაფად შევიძინე. პარიზში ყოფნისას ორი წლის წინ ვნახე ''მარჯიელას'' კოლექცია სპეციალურად ''ეიჩ ენდ ემისთვის'' და ჰქონდა ძალიან ლამაზი აქსესუარები. ალექსან-დრე ვანგმაც იმუშავა ამ ბრენდთან და სიამოვნებით შევიძენდი ამ კოლექციიდან სამოსს.
- ნინო, რა არის მნიშვნელოვანი დეტალები ჩაცმულობის შერჩევისას?
- პირველ რიგში, გააჩნია იმას, სად მიდიხართ და შემდეგ უნდა დაიწყოთ სამოსის შერჩევა. ასევე მნიშვნელოვანია, რა ხასიათზე გაიღვიძებთ. ვფიქრობ ხოლმე, მინდა მოვახდინო შთაბეჭდილება და კაშკაშა ჩაცმული ვიყო თუ სადა სამოსი მჭირდება. ყოველდღიურად შეგიძლიათ მოირგოთ კარგი ჯინსი და მაისური. აქსესუარებს აქვს დიდი მნიშვნელობა. მაგალითად, მე მიყვარს კაცის საათები. შესაძლოა, ჯინსსა და მაისურზე კაშკაშა, თვალში საცემი აქსესუარი მოირგოთ, საყურე, საათი თუ სხვა რამ და უკვე ორიგინალური შტრიხი იქნება თქვენს ჩაცმულობაში.
- არის ისეთი რამ, რასაც არ იცვამ?
- ამ ეტაპზე ჯინსს არ ვიცვამ, რადგან წონაში მოვიმატე და არ მიხდება. არ მომწონს დახეული ტანსაცმელი, მირჩევნია, მოწესრიგებულად გამოვიყურებოდე. ქალი პიწკინა, ნაზი და ჰაეროვანი უნდა იყოს. დახეულმა სტილმა, სპორტულმა, დაბალქუსლიანმა ფეხსაცმელმა მიჩვევა იცის და ზოგჯერ მეც დამიკარგავს ეს ზღვარი და ქალურობა. ძალიან ბიჭურ სტილში არ უნდა გადავვარდეთ. ორი წლის წინ კედებს ძალიან მივეჩვიე, მერე გამიჭირდა მაღალქუსლიანზე გადასვლა, ქალური კაბის მორგება, რადგან მიჩვეული ვიყავი დახეულ ჯინსს, მარანტებსა და ბიჭურ მაისურს.
რაც შეეხება ფერთა შეხამებას, ხუთი წლის წინ ფერებს კლასიკურად ვახამებდი, მაგრამ შემდეგ გემოვნება შემეცვალა. მაგალითად, რამდენიმე წლის წინ გეტყოდი, რომ ყვითელი და ლურჯი ერთმანეთს არ უხდება, ახლა კი მომწონს. ყველაზე მეტად მიჭირს კრემისფერი ტონალობების ერთმანეთთან შეხამება, კრემისფერი, ყავისფერი, ხაკისფერი, ამ ფერთა შერწყმას ვერ ვხედავ.
- ეს ფერები ალბათ, ქერა და წითურ ქალბატონებს უფრო უხდებათ.
- მქონია ღია ფერის თმაც, მაგრამ მაინც მიჭირს. თუკი კრემისფერ ტონებში მოგევლინეთ ერთ დღესაც, ე.ი. ეს შიში დავძლიე (იცინის).
- ჩაცმულობაზე სხვისი აზრი თუ გაინტერესებს?
- არა, არასდროს. თუკი ვიცი, როგორი მინდა ვიყო, სხვისი აზრი არ მაინტერესებს და პრინციპში, არავის ვეკითხები. არ მიყვარს, როცა აზრს თავზე მახვევენ. რაც უნდა კარგად ჩამაცვა, თავს კარგად ვერ ვიგრძნობ და ვერ მოვიხდენ, ამიტომ სულ თავად ვარჩევ სამოსს.
- თავის მოვლის კუთხით რას აკეთებ?
- წინასაახალწლოდ თავის მოვლა გავაძლიერე. ვცდილობ, ვივარჯიშო და დღეში ორი ლიტრი წყალი მაინც დავლიო. თმის მოვლასაც დიდ ყურადღებას ვაქცევ და მაქვს კარგი რეცეპტი, რომელსაც თქვენც გაგიმხელთ - თმის ნაღაბი მზადდება შემდეგნაირად, ქაცვის ზეთს უნდა შეურიოთ ერთი კვერცხის გული, ორ-ორი წვეთი A და E ვიტამინი და ძალიან ცოტა მარილიც დაუმატეთ. ახლა ჩემი თმის ფერზე გადავდივარ, ბუნებრივად წაბლისფერი მაქვს, ეს ნიღაბი კი ბზინვარებას და თმის ჯანმრთელობას უწყობს ხელს.
- ბოტოქსისთვის თუ მიგიმართავს?
- მიმიმართავს, 29 წლიდან ვიკეთებდი ბოტოქსს, მაგრამ ბოლო ორი წელიწადი აღარ გამიკეთებია. საახალწლოდ ისევ მინდა, გავიკეთებ ალბათ, რატომაც არა. რადგან ნაკლებად აქტიური ვიყავი ბოლო დროს, ამიტომაც მივიჩნიე, რომ არ იყო ამის საჭიროება.

ნინო მურღულია
ჟურნალი ''რეიტინგი''