ქალთა მიმართ ძალადობის წინააღმდეგ რაგბიში ამხანაგური მატჩი გაიმართება

რაგბის საწვრთნელი ბაზა „შევარდენი“, დიპლომატიური კორპუსისა და სახელმწიფო უწყებების წარმომადგენლები, ვეტერანი და მოყვარული მორაგბეები რაგბიში ამხანაგურ მატჩს გამართავენ, რომელიც ქალთა მიმართ ძალადობის წინაღმდეგ ბრძოლას მიეძღვნება. შეხვედრა დღეს, 21:00 საათზე გაიმართება.

ღონისძიების ორგანიზატორი გაეროს ქალთა ორგანიზაციაა და იგი გენდერული ძალადობის წინააღმდეგ 16-დღიანი კამპანიის ფარგლებში გაიმართება. ამ მატჩით მონაწილეები მხარდაჭერას გამოუცხადებენ ქალთა მიმართ ძალადობის წინააღმდეგ ბრძოლას და გაეროს ქალთა ორგანიზაციის სოლიდარობის მოძრაობას გენდერულითანასწორობისთვის.

გაეროს ქალთა ორგანიზაციამ 16-დღიანი კამპანია გენდერული ძალადობის წინააღმდეგ 25 ნოემბერს დაიწყო. კამპანია 10 დეკემბერს, ადამიანის უფლებათა დაცვის საერთაშორისო დღეს სრულდება. სოლიდარობის მოძრაობა გენდერული თანასწორობისთვის He for She გაეროს ქალთა ორგანიზაციის ახალი ინიციატივაა. ეს არის მოძრაობა გენდერული თანასწორობის მხარდასაჭერად და მიზნად ისახავს კაცების მონაწილეობას ქალთა უფლებების დაცვისთვის ბრძოლაში, რათა მათ მხარი დაუჭირონ და სხვებსაც მოუწოდონ გენდერული თანასწორობის დაცვისკენ.მოძრაობა He for She (კაცები ქალთა უფლებებისთვის) ოფიციალურად გაიხსნა 2014 წლის 20 ოქტომბერს გაერთიანებული ერების შტაბბინაში, გაეროს ქალთა ორგანიზაციის კეთილი ნების ელჩის მსახიობი ემა უოტსონის გამოსვლით.

მას შეუერთდნენ აშშ-ს პრეზიდენტი ბარაკ ობამა, გაეროს გენერალური მდივანი ბან კი მუნი, მსახიობები კიფერ საზერლენდი, მეთ დეიმონი და სხვები. საქართველოში მას ხელმოწერით შეუერთდნენ საქართველოს პარლამენტის სპიკერი დავით უსუფაშვილი, საქართველოს სახალხო დამცველი უჩა ნანუაშვილი, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი, საქართველოს რაგბის კავშირის წარმომადგენელი ნოდარ ანდღულაძე, საქართველოს ფეხბურთის ფედერაციის გენერალური მდივანი რევაზ არველაძე და სხვები. მოძრაობაში მონაწილეობა ნებისმიერ ადამიანს შეუძლია კამპანიის ვებგვერდზე www.heforshe.org რეგისტრაციით.


news.ge