ყველაფერი მხოლოდ შენთვის, დედა! - ელვის პრესლის ერთადერთი საყვარელი ქალი დედამისი იყო

18 წლის მძღოლის ისტორია, რომელმაც დედის დაბადების დღის მისალოცი სიმღერის ჩასაწერად სტუდია Sun-ს მიაკითხა, თითქმის მთელმა მსოფლიომ იცის. სამაგიეროდ, ელვის პრესლის თაყვანისმცემლებიდან შეიძლება ბევრმა არ იცოდეს მისი განსაკუთრებული დამოკიდებულება დედისადმი, რომელსაც თითქმის მთელი ცხოვრება მიუძღვნა და საბოლოოდ შეეწირა კიდეც.

სწორედ დედის დამსახურება იყო, რომ მემფისელი მოკრძალებული ყმაწვილი მოგვიანებით ნამდვილ ლეგენდად იქცა.
გლედის პრესლი სულს არ იშურებდა შვილისთვის. ოდესღაც 8 დოლარად გიტარა უყიდა (ოჯახს იმდენად უჭირდა, რომ ეს ნამდვილი მეფური საჩუქარი იყო) და უთხრა: "მჯერა, რომ დიდი მუსიკოსი გახდები, შვილო". ელვისს სტუდიის შერჩევაშიც გაუმართლა. მისი მფლობელი სემ ფილიპსი დიდი ხნის განმავლობაში ეძებდა თეთრკანიან ბიჭს, რომელიც შავკანიანივით იმღერებდა. ელვისი სწორედ ასეთი იყო. როგორც კი მისმა შესრულებულმა სიმღერამ That's all right, mama-მ (ყველაფერი კარგადაა, დედა!) ადგილობრივ რადიოპროგრამაში გაიჟღერა, სტუდიაში 40-მა ადამიანმა დარეკა და სიმღერის გამეორება ითხოვა. ფილიპსმა ელვისისგან ტენესის შტატის ვარსკვლავი შექმნა. სტუდია RCA Records-ის მენეჯერმა ტომ პარკერმა კი ბიჭს მთელ ამერიკაში მოუტანა უდიდესი აღიარება. მან სემ ფილიპსს ელვისში 40 000 დოლარი შესთავაზა, სემმაც ვერ გაუძლო ცდუნებას...
ელვისი პირველი მომღერალი იყო, რომელმაც სიმღერის გაყიდვის მილიონიან ტირაჟს მიაღწია. თუმცა თავბრუდამხვევი წარმატების მიუხედავად, მუსიკოსი დედას გვერდიდან არ შორდებოდა და ნაირ-ნაირი სიურპრიზებით ახარებდა.


ჯერ ვარდისფერი "კადილაკი" იყიდა და აჩუქა. შემდეგ თავისი პირველი მილიონი იშოვა, მემფისში 23-ოთახიანი ვილა შეიძინა და მას "გრეისლენდი" უწოდა. იქ მშობლები და ბებია გადაიყვანა საცხოვრებლად.
მალე ელვისით ჰოლივუდი დაინტერესდა. ფილმმა "გიყვარდე ნაზად" თავბრუდამხვევი წარმატება მოუტანა. ეს მელოდრამა აშშ-ის სამოქალაქო ომის პერიოდზე იყო, სადაც ფინალში პრესლის გმირი იღუპებოდა. ამ ფილმის პირველ ჩვენებას ელვისის დედამ ცრემლებით სავსემ უყურა. ახლად გამომცხვარი მსახიობის დედა ყოველ პრემიერაზე დარბაზში იჯდა და არასოდეს ტოვებდა მის არც ერთ ფილმს. კინოკარიერის განმავლობაში ელვისმა სულ 33 ფილმში ითამაშა.
სამსახიობო მოღვაწეობა ჯარში გაწვემამ შეაწყვეტინა. იქაც განსაკუთრებული პრივილეგიებით სარგებლობდა. ცალკე საცხოვრებელი ჰქონდა და მომსახურების მთელი შტატი ჰყავდა. პირად მძღოლს ნაწილში შავი მერსედესით მიჰყავდა. საღამოს ქალაქში სპორტულ BMV-ს დაქროლებდა. უქმეებს კი პარიზში ატარებდა.

სწორედ ჯარში შეიტყო საშინელი ამბავი - დედის გარდაცვალება. მიზეზი დეპრესია აღმოჩნდა - მიუხედავად იმისა, რომ ელვისი ჯარში თავს შესანიშნავად გრძნობდა, დედამისმა ვერ გაუძლო საყვარელ შვილთან ხანგრძლივ განშორებას. გლედისი დეპრესიის დასაძლევად სხვადასხვა აბს იღებდა, ალკოჰოლს ეტანებოდა... ერთ დღესაც შინ მოსულ მეუღლეს ის გარდაცვლილი დახვდა. ამ დროს გლედისი მხოლო 42 წლის იყო.

პანაშვიდებზე ელვისის ნუგეშისცემა შეუძლებელი იყო. გამუდმებით კუბოზე იყო დამხობილი. თვითმხილველები მისი გლოვით შეძრწუნებულები იყვნენ.

ერთ თვეში ელვისის სამხედრო ნაწილი ქალაქ ბისბადენში გადაიტანეს. მამა და ბებიაც გაჰყვნენ და იმავე ქალაქში დასახლდნენ. ერთხელ ელვისმა აივნიდან გოგონას მოჰკრა თვალი. "აი, დედა, მხოლოდ თმა აქვს სხვა ფერის", - ჩაილაპარაკა ამ საოცარი მსგავსებით გაოცებულმა. ეს გოგონა პრისცილა ბულიე იყო, ამერიკელი ოფიცრის ქალიშვილი, რომელიც ჯერ მხოლოდ 14 წლის გახლდათ. ელვისმა ის გაიცნო და დემობილიზაციის შემდეგ დაარწმუნა გოგონას მშობლები, მასთან ერთად გაეშვათ მემფისში. ელვისი დაჰპირდათ, რომ გოგონას კათოლიკურ განათლებას მისცემდა და შემდეგ მოიყვანდა ცოლად.

დანაპირები შეასრულა - როცა პრისცილა 21 წლის გახდა, 1967 წლის 1 მაისს გრანდიოზული ქორწილი გადაიხადეს. საქმრომ პატარძალს 13-კარატიანი ბრილიანტი უსახსოვდა და... გრეისლენდში გამოკეტა. ზუსტად 9 თვის შემდეგ ქვეყანას ლაიზა-მარია მოევლინა (მოგვიანებით ის პრესლის ქონების მემკვიდრე გახდა და ცოტა ხნით მაიკლ ჯეკსონის ცოლიც იყო). მეუღლის სიყვარული ელვისს ხელს არ უშლიდა ჰოლივუდელ ლამაზმანებთან ხანმოკლე რომანების გაბმაში. ცოლთან განშორების შემდეგ ფოტომოდელ ლინდა ტომპსონთან გააბა რომანი. ლინდა ცდილობდა, საყვარლობის პარალელურად მისთვის დედის შემცვლელიც გამხდარიყო, მაგრამ, როგორც ჩანს, გრეისის შეცვლა შეუძლებელი გახლდათ. დედის სიკვდილის შემდეგ ელვისს ფობიები ტანჯავდა. დროდადრო დამამშვიდებლების დიდ დოზას იღებდა. შესაძლოა, ამ წამლებმაც შეუწყვეს ხელი და ელვისი ბულემიით დაავადდა. ეს ფსიქიკური აშლილობაა, რომლის დროსაც ადამიანი უზომო რაოდენობით საკვებს იღებს... მალე მომხიბვლელი ყმაწვილის ნაცვლად ელვისი 130-კილოიან, გაურკვეველი ასაკის ადამიანად იქცა, რომელსაც მაყურებლის წინაშე გამოსვლის სურვილიც აღარ ჰქონდა.
აიკვიატა, რომ ვიღაცას მისი მოკვლა სურდა. იარაღიც შეიძინა და ტანსაცმლის შიგნით ჯავშანჟილეტს ატარებდა.

1977 წლის აგვისტოს დასაწყისში სიკვდილის შიში თანდათან გაუძლიერდა... ერთ დღესაც ის გრეისლენდში აბაზანაში იპოვეს მკვდარი. იქვე მისი მემუარების ხელნაწერიც მოჩანდა... ბიოგრაფები ირწმუნებიან, რომ ამ მემუარებმა საბოლოდ მოუღო ბოლო მის ფსიქიკას. ისიც ზუსტად 42 წლის იყო, როგორც დედამისი...
p.s. დედისთვის ნაყიდ ვარდისფერ კადილაკს მისი სიკვდილის შემდეგ ელვისი მართავდა და სიკვდილამდე არც უფიქრია ამ მანქანის შეცვლა.