როგორ ავაცილოთ ბავშვს გაციების გართულებები

ბავშვის ნებისმიერი ავადმყოფობა, გაციება იქნება ეს თუ გრიპი, მშობლებისთვის ნერვიულობის საფუძველია. ასეთ დროს ექიმები გვეუბნებიან, რომ პატარას ავადობას თავისი პლუსები აქვს, მაგალითად, რესპირატორული ინფექცია ერთგვარი ტრენაჟორია იმუნიტეტისთვის, რადგან მას აძლიერებს. ყველაზე მნიშვნელოვანი ისაა, რომ ავადმყოფობის დროს ბავშვის მდგომარეობა არ გართულდეს.
არ არის საიდუმლო, რომ ხშირად უბრალო გაციებას სახლში შინაური მეთოდებით მკურნალობენ. მიუხედავად იმისა, მძიმეა თუ არა ბავშვის მდგომარეობა, მაინც აუცილებელია პედიატრთან კონსულტაცია, რათა დარწმუნებული იყოთ დიაგნოზში. თუ ასე მოიქცევით, გართულებების რისკი ნაკლები იქნება.
გრიპი – გართულებების თვალსაზრისით ვირუსული ინფექციებისგან ყველაზე სახიფათოა გრიპი. გარდა იმისა, რომ ამ დროს პატარას სიცხემ შეიძლება 40 გრადუსამდეც აუწიოს, შესაძლოა თავი იჩინოს ცხვირიდან სისხლდენამ, გართულების შემთხვევაში კი დაფიქსირდეს ჰაიმორიტი, პნევმონია. აქვე ისიც უნდა აღვნიშნოთ, რომ გრიპის შემდეგ ორგანიზმს საკმაო დრო სჭირდება რეაბილიტაციისა და ძალების აღდგენისთვის.
ამ შემთხვევაში ერთ–ერთი საუკეთესო გამოსავალი გრიპის საწინააღმდეგო ვაქცინაციაა.
ბრონქიტი – თუ პატარას უჭირს სუნთქვა, მკერდის არეში ისმის სტვენისმაგვარი ხმა, ხველას ახლავს თავბრუ და თავის ტკივილი, ამ შემთხვევაში ბრონქიტზე უნდა მიიტანოთ ეჭვი. ბრონქებიდან ინფექციამ შესაძლებელია ფილტვებში გადაინაცვლოს და მწვავე პნევმონიის განვითარება გამოიწვიოს.
ბავშვი ბრონქიტით ავადობის შემდეგ ხანგრძლივად ახველებს 2–3 კვირის განმავლობაში? აუცილებელია, პედიატრმა მის ფილტვებს მოუსმინოს. შესაძლოა, საჭიროდ ჩათვალოს დამატებით რენტგენის გადაღებაც, რათა გართულებები გამოირიცხოს.
სათანადო და კვალიფიციური მკურნალობით, ანტიბიოტიკების მიღებით შესაძლებელია მოკლე დროში გამოჯანმრთელება, მაგრამ ეს არ ნიშნავს, რომ პნევმონიას არასერიოზულად უნდა მიუდგეთ. ის სერიოზული დაავადებაა.
თუ პატარას ხველა გაუხანგრძლივდა, აქვს სიცხე, აღენიშნება სისუსტე, კარგი იქნება, თუ რამდენიმე დღე ლოგინში ჩააწვენთ. როგორც წესი, ბავშვების დიდი ნაწილი ამას აპროტესტებს და დაავადება პრაქტიკულად ფეხზე გადააქვთ. თუ პატარა თავად გამოთქვამს საწოლში ჩაწოლის სურვილს, ეს მშობლისთვის სერიოზული სიგნალი უნდა იყოს, მით უფრო, როცა დაავადებას სუნთქვასთან დაკავშირებული პრობლემები ახლავს.
ასთმა – იცით თუ არა, რომ ბრონქული ასთმის პირველი შეტევა ბავშვთა 50%–ს ვირუსული ინფექციის ფონზე უვითარდება? ეს იმის გამო ხდება, რომ გრიპისა და პარაგრიპის გამომწვევები აზიანებენ ზედა სასუნთქი გზების მოციმციმე ეპითელს. ამას კი ასთმურ რეაქციამდე მივყავართ.
გაციებას ყოველთვის ვირუსები როდი იწვევენ. მწვავე რესპირატორული დაავადების ყოველი მესამე–მეხუთე შემთხვევა ბავშვებში არის ბაქტერიული წარმოშობის და ეს მნიშვნელოვნად აზიანებს პატარების ყელს. რამდენადაა ის დაზიანებული, ამას სპეციალური ანალიზი ადგენს, რომლის ჩატარება რეკომენდებულია ყველა იმ ბავშვისთვის, ვისაც ანგინა ან ფარინგიტი აქვს.
რესპირატორული ვირუსული დაავადებების დროს სიცხის უცაბედი აწევის შედეგად (39 გრადუსი და მეტი) არსებობს რისკი, რომ ბავშვის ნერვულმა სისტემამ ამას ფებრალური გულყრით უპასუხოს. მისი განვითარება ხდება ჰიპოქსიის შედეგად. საბედნიეროდ, მაღალი სიცხით გამოწვეული გულყრა ყველაზე მსუბუქია. როგორც წესი, გულყრის პრობლემა 3 წლის ასაკის შემდგომ ქრება, როცა ბავშვის ნერვული სისტემა ჰიპოქსიისადმი მდგრადი ხდება.
ყველაზე მთავარი მაინც პატარების გართულებებისგან დაცვაა. უნდა აკონტროლოთ, რომ ავადმყოფობის პერიოდში ტემპერატურა 38 გრადუსზე მაღლა არ ავიდეს. პატარების დიდ ნაწილში ცხვირიდან ხშირი გამონადენის გამო სისველე შესაძლოა ყურშიც მოხვდეს და თავი იჩინოს ტკივილმა. ამ დროს ბავშვს ცუდად ესმის, ყური დაგუბებული აქვს. ეს უკვე ოტიტის ნიშანია.
ოტიტი რომ თავიდან აიცილოთ, საჭიროა:
ყურადღება მიაქციეთ, გაციებული ბავშვი ყოველთვის ერთ გვერდზე არ იწვევს. პერიოდულად ის ძილში გადაატრიალეთ, რომ ცხვირიდან გამონადენი ყურში არ მოხვდეს.
სასურველია, ცხვირში ჩააწვეთოთ სპეციალური წვეთები, რომელიც, გარდა იმისა, რომ ნორმალურად სუნთქვაში დაეხმარება, თავიდან ააცილებს ოტიტის განვითარებასაც.
არ მისცეთ შვილს ცხვირის ლორწოს უკან შესუნთქვის უფლება, რადგან ამ შემთხვევაში ვირუსები და ბაქტერიები ევსტახის მილში ხვდებიან. ეს კი საშიშია.