რატომ ეხუტება ორსული ქეთა თოფურია მსახიობს?

მას მერე, რაც რუსეთში წავიდა კარიერის გასაგრძელებლად და მართლაც სერიოზული წინსვლა აქვს, ლამის დღე არ გავა, ქეთაზე მორიგი ახალი ამბავი არ გავიგოთ. ეს არის ვარსკვლავი, დაუდგრომელი შემოქმედებითად თუ ცხოვრების წესით, რომელიც თავის მხიარულ და, როგორც ბევრი ამბობს, გიჟმაჟურ ხასიათს სხვებსაც სდებს და ჟურნალისტებისა და პაპარაცების საყვარელი ''ლუკმაა''.

რაც გათხოვდა, სულ ვრცელდებოდა ჭორები მისი ორსულობის შესახებ. ქეთა ამ ჭორებს აქტიურად უარყოფდა და ამბობდა, მინდა ბავშვი, მაგრამ ორსულად არ ვარო. ახლა კი დადასტურდა, რომ ''ა-სტუდიოს'' ქართველი სოლისტი მართლაც ფეხმძიმედაა და 2015 წლის გაზაფხულის ბოლოს შვილი ეყოლება.

ეს ამბავი ჟურნალისტებთან ქეთას ქართველმა მეგობარმა, რუსეთში მოღვაწე ბიზნესმენმა ალეკო არჩვაძემ დაადასტურა: ''ქეთა მართლა ორსულადაა, მე თვე-ნახევრის წინ გავიგე ამის შესახებ. ყველა ბედნიერია, განსაკუთრებით, რა თქმა უნდა, წყვილი - ქეთი და ლევი. ღმერთმა ჯანმრთელი შვილი მისცეთ''.

ქეთასთვის ეს პირველი შვილი იქნება, მისი ქმრისთვის კი - მეორე. მომღერალთან ქორწინებამდე ბიზნესმენს ცოლიც ჰყავდა და ქალიშვილი სონიაც, რომელიც, სხვათა შორის, ცნობილ დედინაცვალთან ძალიან მეგობრობს.

ერთ-ერთ ბოლო ინტერვიუში ქეთამ თქვა: ''იდეალურ სიტუაციაში სამი შვილი მინდა, თუმცა ჯერ ერთი უნდა გავაჩინო. მთელი ცხოვრება ვოცნებობდი გოგონაზე, მაგრამ ქმარმა იმდენი რამ მითხრა იმაზე, თუ რა მაგარია ბიჭის ყოლა, თავადაც მომინდა ბიჭი. მგონია, ბიჭს გოგოზე უკეთ გავზრდი. მე ცოტა ბიჭური ხასიათი მაქვს, ხისტი ვარ''.

მეორე სიურპრიზი კი ამისგან სრულიად განსხვავებულია. წლის ბოლოსკენ გავრცელდა რუსი მსახიობის გოშა კუცენკოს კლიპი - მსახიობი ამღერდა და სკანდალური კლიპიც გადაიღო. სიმღერას ''შიშველი'' ჰქვია და კლიპის მიმდინარეობისას გოშა კუცენკო მზერით აშიშვლებს ყველა ქალს, საოცნებო ქალის ძიებაში.

ეს საოცნებო ქალი ბოლოს ქეთა აღმოჩნდება, რომელიც თვითონ კაბაშია გამოწყობილი, სამაგიეროდ, გოშას აშიშვლებს მზერით და საბოლოოდ შიშველ მსახიობს ეხუტება. კლიპს გულახდილი სცენებისა და ქეთას რამდენიმე ეროტიკული მიმიკის გამო, ბევრ მაყურებელთან ერთად, ბევრი კრიტიკოსიც გამოუჩნდა. თუმცა უმეტესობამ აღიარა, რომ ვიდეორგოლი უდავოდ საინტერესო გამოვიდა და ქეთაც შესანიშნავად ასრულებს თავის როლს.
მოკლედ, ქართველმა მომღერალმა წელი, რომელიც მისთვის მართლაც კიდევ ერთ წარმატებულ წლად შეიძლება ჩაითვალოს, შემოქმედებითი და ცხოვრებისეული სიახლეებით დაასრულა. ვისაც არ ახსოვს, შევახსენებთ, რომ წლის განმავლობაში ჰქონდა ბევრი ეფექტური და წარმატებული გამოსვლა პრესტიჟულ კონცერტებსა და ღონისძიებებზე, მათ შორის ისეთებიც, რომლებსაც ქართველი საზოგადოების არაორაზროვანი შეფასებები მოჰყვა; მისი სტილი კვლავაც ერთ-ერთი საუკეთესოა რუსულ ბომონდში და ქეთა ისევ რჩება ერთ-ერთ ყველაზე გემოვნებიან ვარსკვლავად რუსულ ესტრადაზე;

მშვენიერი მკერდის გამოჩენითაც ახარებდა შიგადაშიგ მაყურებელს და მერე ეს ფოტოები ინტერნეტში განხილვის საგანი ხდებოდა; მცირე ხნის წინ დიზაინერობასაც მოჰკიდა ხელი, საკუთარი ბრენდი Keti One-ი შექმნა და სადებიუტო კოლექციაც წარმოადგინა; ჟურნალმა ''მაქსიმმა'' ყველაზე სექსუალური რუსი ქალების რეიტინგში კვლავაც დაასახელა; რაც მთავარია, ისევ ისეთი მოთხოვნადი მომღერალი იყო. ახლაც გამუდმებით იმეორებს, რომ ქმართან თავს ბედნიერად გრძნობს და რომ მისმა არჩევანმა, რუსეთში წასულიყო კარიერის გასაგრძელებლად, ნამდვილად გაამართლა:

''17 წლის ვიყავი, როცა რუსეთში ჩამოვედი. მახსოვს, როგორ კარგად ვგრძნობდი იმ დროს თავს. მყავდა მეგობრები, მქონდა კარიერა. არსად წასვლა არ მსურდა, არ მსურდა არაფერი ახალი. საკუთარ თავს ვუთხარი: ''ქეთი, შენ ეს უნდა გააკეთო! პირველი ორი წელი ძალიან რთული იქნება, მაგრამ უნდა შეეგუო ამასაც''. ვოცნებობდი ზუსტად იმაზე, რაც ახლა მაქვს და ვფიქრობ, რომ ოცნებები ამისრულდა. ახლა ნამდვილად ბედნიერი ვარ''.

ჟურნალი ''რეიტინგი''