საზამთრო და ნესვი უშვილობისგან დაგიცავთ

ამ ბაღჩეულში არსებული ტუტოვანი ნაერთები ადამიანის ორგანიზმში მოხვედრისას ანეიტრალებს ნივთიერებათა ცვლის შედეგად დაგროვილ მჟავე პროდუქტებს.

გარდა ამისა, ნესვი და საზამთრო ძალიან კარგი და აბსოლუტურად ნატურალური შარდმდენი საშუალებებია, რომლებიც თირკმლების გავლით მარილების გამოდევნას უწყობს ხელს. საზამთროსა და ნესვის უჯრედები შესანიშნავად წმენდს ნაწლავებს. 

ყველა ამ სასარგებლო თვისების გამო ბაღჩეული განმტვირთავ დღეებში იდეალური მენიუ გახლავთ. ასეთ განტვირთვას თუ გადაწყვეტთ, გაითვალისწინეთ, რომ თქვენი დღიური რაციონი 1-1,5 კილოგრამი ხილის რბილობით უნდა შემოიფარგლოს. 

ვამდიდრებთ სისხლის შემადგენლობას

რკინისა და ფოლიუმის მჟავას საკმაოდ მაღალი შემცველობის გამო საზამთრო და ნესვი, რეგულარული მოხმარებისას, ჰემოგლობინს მნიშვნელოვნად ამაღლებს და განსაკუთრებით სასარგებლოა სისხლნაკლულობის დროს. 

გარდა ამისა, ფოლიუმის მჟავა ასტიმულირებს სისხლის თეთრი სხეულების (ლიმფოციტების) წარმოქმნას, რომლებიც ორგანიზმის იმუნურ დაცვაში აქტიურად მონაწილეობს. 

ვინარჩუნებთ ორსულობას

საკვებში ნესვისა და საზამთროს გამოყენება ფოლიუმის მჟავას დამატებითი წყაროა მომავალი დედებისა და შვილებისათვის. კვებაში ფოლატების (ფოლიუმის მჟავას ნაერთების) ნაკლებობა შეიძლება ქალის უშვილობის, მუცლის მოშლისა და ნაადრევი მშობიარობის მიზეზი გახდეს. 

ვიუმჯობესებთ მხედველობას

ყვითელი ჯიშის ნესვი მდიდარია ბეტა-კაროტინით, რომელიც ადამიანის ორგანიზმის შიგნით A ვიტამინად გარდაიქმნება და მხედველობის ორგანოებისთვისაა განსაკუთრებით სასარგებლო. რაციონში ამ ვიტამინის დეფიციტი სინათლის მიმართ თვალის ბადურის მგრძნობელობის მნიშვნელოვან დაქვეითებას იწვევს და ღამით ხედვას აუარესებს. 

და კიდევ: A ვიტამინის ნაკლებობა კანისა და თმის მდგომარეობაზე უარყოფითად აისახება. 

ხელს ვუწყობთ ღვიძლის ჯანმრთელობას

ბაღჩეული 12 პროცენტამდე ნახშირწყლებს შეიცავს. საზამთროს ნახშირწყლები სანახევროდ ფრუქტოზისა და გლუკოზისაგან შედგება, ხოლო ნესვში საქაროზა ჭარბობს. ასეთი ნახშირწყლები კარგად კვებავს ღვიძლის უჯრედებს და მათ მიერ ადვილად შეითვისება. ამიტომ საზამთრო და ნესვი სასარგებლოა ჰეპატიტის დროს და ნაღვლის ბუშტის დაავადებებისას. 

შენიშვნა: ნახშირწყლების მაღალი შემცველობის გამო დიაბეტით დაავადებულებმა ამ ნაყოფის მოხმარება უნდა შეზღუდონ.