რა მოუტანა საუდის არაბეთის მოსახლეობას, მსოფლიოში ერთ-ერთი ყველაზე მდიდარი მეფე აბდულას მმართველობამ

საუდის არაბეთის მეფე აბდულა ბინ აბდულაზიზი გარდაიცვალა. შეგახსენებთ, რომ 90 წელს მიტანებული მეფე ფილტვების ანთების გამო კლინიკაში იწვა. აბდულა ბინ აბდულაზიზი საუდის არაბეთის სამეფო ტახტზე 2005 წელს ავიდა. მალევე მან სტიპენდიების სახელმწიფო პროგრამის რეალიზაცია განახორციელა, რომელიც ახალგაზრდა ადამიანებისთვის დასავლეთის უნივერსიტეტებში განათლების მიღებას ითვალისწინებდა. პროგრამის მიხედვით, სტუდენტებს ოთხი წლის განმავლობაში შეეძლოთ პრესტიჟულ უნივერსიტეტებში სწავლა. სახელმწიფო პროგრამის განმავლობაში 70 000-ზე მეტმა ადამიანმა მიიღო განათლება, მსოფლიოს 25-ზე მეტ ქვეყანაში.

2011 წელს მეფე აბდულამ 37 მილიარდი დოლარი სოციალური სფეროს განვითარების საქმეში ჩადო, რომელიც უმუშევრობის, განათლების,

საცხოვრებელი სუბსიდიების პრობლემების მოგვარებასაც ითვალისწინებდა. 2011 წლის თებერვალში, მეფემ ქალებს უფლება მისცა 2015 წლის არჩევნებში მიეღოთ მონაწილეობა. მან ასევე განაცხადა, რომ ქალები მიიღებენ უფლებას, ჩაერთონ მეჯლისის საქმიანობაში. მოგვიანებით, ანტისამთავრობო არეულობების შიშით, აბდულამ კიდევ 36 მილიარდი დოლარი გამოყო, საუდის არაბეთის მოსახლეობის ცხოვრების დონის ამაღლების მიზნით.

როგორც ცნობილია, საუდის არაბეთის მეფის ძირითადი შემოსავლის წყაროს ნავთობი წარმოადგენდა, რომლის გაყიდვასაც სახელმწიფოსთვის დღეში 1 მილიარდი დოლარი მოჰქონდა. მისი ქონება 63,2 მილიარდი დოლარი იყო. ამასთან, მეფე აბდულა ბინ აბდულაზიზი უდიდეს თავლას ფლობდა, სადაც საუკეთესო არაბულ ცხენებს ამრავლებდა. მეფის ერთ-ერთი ჰობი ექსკლუზიური და ანტიკვარული ავტომობილების შეგროვება იყო.

"ბიბისის" ცნობით, ქვეყნის ახალი მეფე აბდულა ბინ აბდულაზიზის ძმა, 79 წლის სალმანი გახდება.