"მირჩევნია "დაფარული" ფოტოებით გავითქვა სახელი, ვიდრე გავიხადო"

მიუხედავად იმისა, რომ საქართველოში შოუბიზნესის მსგავსად, სამოდელო ბიზნესიც ფაქტობრივად, გაყინულია და სათანადოდ ვერ ვითარდება, თინეიჯერები ამ სფეროთი მაინც ინტერესდებიან... "ჩემი ბავშვობის ოცნება იყო, ვყოფილიყავი წარმატებული მოდელი, რადგანაც ეს ჩემი საყვარელი სფეროა", - ამბობს დამწყები მოდელი თეო კიკნაველიძე, რომელმაც შარშან, აგვისტოში სამოდელო სააგენტო "ირაკლეონთან" კონტრაქტი გააფორმა.
თეო 16 წლის არის და ჯერ კიდევ სკოლაში სწავლობს. 77-ე საჯარო სკოლის მეთერთმეტეკლასელია. წარსულში მოცეკვავე ყოფილა, მაგრამ ახლა სამოდელო საქმიანობით სერიოზულად დაკავდა. თუმცა, სამომავლოდ სწავლის გაგრძელება ბიზნესმენეჯმენტის ფაკულტეტზე უნდა, ოღონდ, უნივერსიტეტი ჯერ არ აურჩევია.

- ფიქრობ, რომ სწავლაში მოდელობა ხელს არ შეგიშლის?
- არა მგონია, რომ ხელი შემიშალოს.

- რა პარამეტრები გაქვს?
- სიმაღლეში მეტრი და 79 სმ ვარ, წელის ზომა 60-ია, თეძოს შემოწერილობა - 87 სმ, მკერდი - 78 სმ, წონა - 48 კილოგრამი.

- მგონი, მშვენიერი მონაცემებია...
- (იღიმება)...

- ნახევარი წელიწადია, რაც მოდელი ვარო, - ამბობ. მანამდე პოდიუმზე არ გამოსულხარ?
- არასდროს. შეიძლება ითქვას, რომ კედების გარდა სხვა ფეხსაცმელი არც ჩამიცვამს, უფრო მაღალქუსლიანს ვგულისხმობ. თავისუფალი სტილი მაქვს. სააგენტოში რომ მივედი, პირველი, რაც ვისწავლე, პოდიუმზე სიარული და ფოტოპოზირება იყო. მგონი, უკვე კარგ ფოტოებს ვიღებ და ვიხვეწები. ეს ყველაფერი თუ არ ისწავლე, ამ საქმეში წინ ვერ წახვალ, თან, მკაცრად მოგეთხოვება.

- ოჯახი თანახმაა, რომ იყო მოდელი და პოდიუმზე გამოხვიდე?
- ისინი პატივს სცემენ ჩემს გადაწყვეტილებას და აზრს. მაგრამ ყველაფერი ზომის ფარგლებში უნდა იყოს.

- "ყველაფერი ზომის ფარგლებში" იმას ნიშნავს, რომ მამა გეუბნება, - პოდიუმზე საცურაო კოსტიუმით არ გახვიდეო?
- მთლად ასე არ უთქვამს, მაგრამ სურვილი არ აქვს, რომ თამამი სურათები გადავიღო...

- გასაგებია, მაგრამ მოდელი ამას ხომ მაინც ვერ ასცდება?
- როგორ არა, სხვათა შორის, ჩემზეა დამოკიდებული, გადავიღებ თუ არა თამამ ფოტოებს.

- მერე ასეთი აკრძალვების გამო მოდელი ფასს არ კარგავს?..
- რატომ? შემიძლია ვთქვა, - რა შემიძლია და რა - არა და საერთოდ, არ მაინტერესებს, ვინ რას იფიქრებს და იტყვის. არ მაქვს სურვილი, ჩემი "გახდილი" სურათები ვინმემ ნახოს. როგორსაც ვიღებ, მაკმაყოფილებს.

- როგორს იღებ?
- მთავარია ადამიანი ისეთი გარეგნობის იყო, რომ ნებისმიერ სამოსში კარგად გამოვიდეს და კარგი ფოტოები გადაიღოს და არ აქვს მნიშვნელობა, გაიხდის თუ არა...

- თქვენი სააგენტოს ერთი მოდელი - თამო ვაშალომიძე (ყოფილი მედავითნე) ცნობილი ხმაურით გახდა. როგორ აპირებ, რომ საზოგადოებას გაეცნო?
- თქვენ ფიქრობთ, საზოგადოებას მინდა, რომ თავი გავაცნო?

- მოდელი პოდიუმზე რომ ადის, ეს უკვე მისი პრეტენზიაა, საზოგადოებას გაეცნოს და წარუდგეს... საერთოდ, თუ მოგწონს, როცა ადამიანები საზოგადოებას ხმაურიანად ეცნობიან?
- გახდილი სურათები რომ გადავიღო, პრობლემა ოჯახშიც შემექმნება და მეც არ მომწონს. მირჩევნია, ჩემი "დაფარული" ფოტოებით გავითქვა სახელი, ვიდრე გავიხადო და მთელმა თბილისმა ჩემზე ილაპარაკოს. ამ ქვეყანაში ჯერ კიდევ არ იქნება კარგა ხანს ასეთი სითამამე მოწონებული.

- მოკლედ, საზოგადოებას ანგარიშს უწევ.
- კი, რა თქმა უნდა. მით უმეტეს,

16 წლის ვარ და არ ვფიქრობ იმაზე, რომ გავიხადო და ასე გამიცნონ.

- შეყვარებული არ ხარ?
- არა.

- არც თაყვანისმცემლები გყავს?
- თაყვანისმცემლები მყავს (სიცილით ამბობს).

- როგორ იცილებ აბეზრებს?
- არ მაქვს მათთან ისეთი დამოკიდებულება, რომ ვინმე დავამცირო და შევურაცხვყო... მათ როგორც მეგობრებს, ისე ვუყურებ...

- საერთოდ, როგორი ბიჭები მოგწონს?
- პირველ რიგში, ადამიანი უნდა იყოს. მან გოგოს ნდობა უნდა დაიმსახუროს. ვაფასებ ნასწავლ და განვითარებულ ადამიანებს. გარეგნულად გეტყვით, რომ დაბალი ბიჭები არ მომწონს, რადგანაც მოგეხსენებათ, 179 სმ ვარ... არც გამხდარი, არც ლამაზი და ცისფერთვალები მომწონს... მთავარია, სიმპათიური იყოს და მერე იმაზეა ყველაფერი დამოკიდებული, ერთმანეთს როგორ გავუგებთ...

ლალი ფაცია