ელენესთვის ევროპა რთული აღმოჩნდა

ფიგურულ სრიალში სტოკჰოლმში მიმდინარე კონტინენტის პირველობა ამავე ასპარეზობათა ორგზის ბრინჯაოს პრიზიორ ელენე გედევანიშვილისთვის წარუმატებელი გამოდგა. დღევანდელი გადასახედიდან მედალოსანთა შორის მისი ხილვა მეტად არარეალური იქნებოდა, მაგრამ ათეულისთვის კი „გვემეტებოდა“. ქართული ფიგურული სრიალის სკოლის ყველაზე შემკულმა მოციგურავემ მოკლე, იგივე სავალდებულო პროგრამაში მეცხრამეტე ადგილით თავისუფალში ასპარეზობის უფლება მოიპოვა, მაგრამ აშკარა იყო, იქვე დაგროვილი 49.20 ქულის (ქალთა ერთეულთა თანრიგში თავისუფალში ასპარეზობის უფლებისთვის საუკეთესო 24 მოციგურავეს შორის მოხვედრა იყო საჭირო) ფინალურ ანუ თავისუფალ პროგრამაში სასურველ რაოდენობამდე გაზრდას ვერ შეძლებდა. ელენემ დასკვნით პროგრამაში 24 მონაწილეს შორის ბოლოს წინა - 23 საფეხურისთვის საკმარის - 73.68 ქულას მოუყარა თავი. იგივე ადგილი ერგო ასევე ორივე პროგრამის ჯამშიც (122.88). ის, რომ ბოლო ადგილით არ დაასრულა ასპარეზობა, ამაში უმთავრესი როლი ფინელმა კიირა კორპიმ ითამაშა, რომელმაც ჯანმრთელობასთან შექმნილი პრობლემის გამო, ჩემპიონატის დასკვნით სეგმენტში ასპარეზობაზე უარი თქვა. არადა რომ არა ავადმყოფობა, ფინელ მოციგურავეს საპრიზო ადგილის დაკავების რეალური შანსი ჰქონდა. ამის თქმის საბაბს კი ორი დღის წინათ მოკლე პროგრამაში 60.60 ქულით დაკავებული მეოთხე ადგილი იძლეოდა. აქვე აღვნიშნოთ, რომ ელენეს სეზონის საუკეთესო შედეგი მოკლე და თავისუფალი პროგრამების ჯამში 158.10 ქულაა. კარიერის საუკეთესო შედეგი კი 2012 წელს ჰქონდა, როდესაც 165.93 ქულით ევროპის ჩემპიონატების მეორე ბრინჯაო დაისაკუთრა. ზოგადად კი თავისუფალი პროგრამა, ისევე როგორც მოკლე რუსეთის ნაკრების წარმომადგენელთა კარნახით წარიმართა. ელიზავეტა ტუკტამიშევამ, ელენე როდიონოვამ და ანა პოგორილაიამ თავისუფალში და ორივე პროგრამის ჯამში შესაბამისად ოქრო, ვერცხლი და ბრინჯაო დაისაკუთრეს. ევროპის ჩემპიონატი ფიგურული სრიალში 1. ელიზავეტა ტუკტამიშევა (რუსეთი) 210.40 2. ელენე როდიონოვა (რუსეთი) 209.54 3. ანა პოგორილაია (რუსეთი) 191.81 23. ელენე გედევანიშვილი (საქართველო) 122.88