მსოფლიო ჩემპიონი, რომელმაც 20 ქართველ ქალბატონს სიმსივნე დაამარცხებინა

მსოფლიოს ორგზის ჩემპიონმა კიკბოქსსა და კარატეში, გიგა ჭიკაძემ, რომელიც ჰოლანდიაში მოღვაწე წარმატებული ქართველია, გასულ წელს საქართველოში ფონდი - "დაამარცხე სიმსივნე" დააარსა. ამ ქველმოქმედების სურვილი დედის, ნინო ჭიკაძის გარდაცვალების შემდეგ გაუჩნდა...

ფონდის სახელით ჩატარებული პირველი ღონისძიება 2014 წლის 3 ივლისს შედგა, - საქართველოში პირველად, სპორტის სასახლეში გაიმართა კიკბოქსის საერთაშორისო ღონისძიება, სადაც მსოფლიოს სხვადასხვა ქვეყნიდან მოწვეულები იყვნენ ცნობილი სპორტსმენები. ღონისძიების დასკვნითი ნაწილი იყო ბრძოლა - გიგა ჭიკაძესა და იაპონელ მებრძოლ, ნაოკი სამუკავას შორის მსოფლიო ქამარზე. ღონისძიებიდან შემოსული თანხა სრულად გადაირიცხა ფონდში - "დაამარცხე სიმსივნე". ფონდი დღემდე 20-მდე სიმსივნით დაავადებულ ქალბატონს დაეხმარა.

გიგა ჭიკაძე:
- 2 წლის წინ დედაჩემს, ნინოს სიმსივნე აღმოაჩნდა და მიუხედავად ბევრი მცდელობისა, ვერ მოვახერხეთ იშვიათი სახის სიმსივნის დამარცხება...
ამიტომ კარგად მესმის მკურნალობის პროცესი რამდენ ძალისხმევას მოითხოვს როგორც პაციენტისგან, ასევე მისი ოჯახის წევრებისგან. დღეს, როდესაც ქიმიოთერაპიის ძირითადი ან მთლიანი ნაწილი ფინანსდება, პაციენტს დამატებით სჭირდება ფინანსური მხარდაჭერა. დედის მკურნალობის დროს უამრავ ადამიანს შევხვდი, რომელთაც ქიმიოთერაპიის, ანალიზის გაკეთების ან წამლების ყიდვის საშუალება არ ჰქონდა. დედის გარდაცვალების შემდეგ სურვილი გამიჩნდა, დამეარსებინა ფონდი - Knock out cancer და შეძლებისდაგვარად დავხმარებოდი სიმსივნით დაავადებულ ადამიანებს. ფონდი მე და ჩემმა 20 წლის დამ დავაფუძნეთ და მის საქმიანობას ძირითადად ახლა ის წარმართავს...

- რა შეძლო ამ ხნის განმავლობაში ცენტრმა?
- 2014 წლის 3 ივლისს, სპორტის სასახლეში, საქართველოში პირველად, ჩემი ინიციატივით და ორგანიზებით ჩატარდა კიკბოქსის საერთაშორისო ღონისძიება. გაყიდული ბილეთებიდან შემოსული თანხა სრულად გადაირიცხა ფონდში და დღემდე 20-მდე ქალბატონს გაეწია დახმარება. ძალიან გამიხარდება, თუ სხვა ადამიანებიც გამოხატავენ სურვილს და საკუთარ წვლილს, თუნდაც ძალიან მცირედს, სიმსივნით დაავადებული ადამიანების განკურნებაში შეიტანენ.

- შევიტყვე, რომ რამდენიმე დღის წინ იმ განკურნებულმა ქალბატონებმა სტუმრად მიგიწვიეს?
- 31

იანვარს "გამარჯვებული ქალთა კლუბის" წევრებმა სკრინინგ ცენტრში მიმიწვიეს და მადლობის ნიშნად, თანადგომისა და ქველმოქმედებისთვის სიგელი გადმომცეს. სიტყვებით ვერ აღვწერ, რამდენად ბედნიერი ვარ მათი გამოჯანმრთელებით. ძალიან დიდი მადლობა მინდა გადავუხადო ასეთი თანადგომისა და თბილი სიტყვებისთვის. ეს ემოციები ცხოვრების ბოლომდე გამყვება.

ლალი ფაცია