• 5 შეცდომა, რომელსაც ახალბედები სამსახურში უშვებენ

    სექტემბერი სწავლასთან, სიახლესთან და ახალ ინტერესებთან ასოცირდება. თუ წელს პირველად იწყებთ მუშაობას, მაშინ ყურადღებით წაიკითხეთ რჩევები, რომლებიც შეცდომების თავიდან აცილებაში დაგეხმარებათ.

    ისწავლეთ სხვის შეცდომებზე! ეს მრავალ უსიამოვნებას აგაცილებთ თავიდან. სამსახურის პირველი დღეები არა მარტო თქვენთვის, არამედ თქვენი მომავალი კოლეგებისთვისაც ძალიან ამაღელვებელია.

    თქვენ ერთი სული გაქვთ, როდის გაითქვიფებით ახალ კოლექტივში, მაგრამ, თავის მხრივ, კოლეგები სულაც არ ჩქარობენ. ყურადღებით და დაძაბულად გაკვირდებიან, რადგან თქვენ შესახებ ძალიან ცოტა რამ იციან და წარმოდგენა არ აქვთ, რას უნდა მოელოდნენ თქვენგან.

    სწორედ ურთიერთობის ამ ეტაპზე უშვებენ ახალბედები ყველაზე მეტ შეცდომას.

    1. გადაწყვიტეთ ყველას თავი მოაწონოთ?

    ცდილობთ ყველას თვალში სიმპათია დაიმსახუროთ, მაგრამ ისინი უნდობლად გიყურებენ.

    რაშია შეცდომა? იმისთვის, რომ კოლეგებთან მეგობრული ურთიერთობა დაამყაროთ, მხოლოდ სურვილი საკმარისი არ არის.

    კოლექტივს სწორად ერგებიან კომუნიკაბელური, იუმორის მქონე, გამჭრიახი ადამიანები. თუ მათ შორის არ ხართ, შეეცადეთ მაინც მათ მიბაძოთ და ადამიანებთან ურთიერთობა ისწავლოთ, თუმცა ფრთხილად იყავით! როგორც კი სიყალბეს შეგამჩნევენ, მათთან დაახლოება მხოლოდ ილუზიად დარჩება.

    როგორ მოვიქცეთ?

    პირველ ეტაპზე კოლეგების მიმართ კეთილგანწყობილი და მეგობრული იყავით.

    2. კოლეგებს სამუშაო პრინციპების შეცვლას ურჩევთ?

    სამსახურის დაწყებიდან ერთი კვირის შემდეგ შეფს სამუშაო პროცესის ოპტიმიზაციის გეგმას სთავაზობთ. იგი მოთმინებით გისმენთ, მაგრამ სახეზე აწერია, რომ არაფრის შეცვლას არ აპირებს.

    რაშია შეცდომა? მოვლენებს წინ უსწრებთ.

    როგორ უნდა მოიქცეთ? მიეცით საკუთარ თავს დრო, კარგად გაერკვიოთ და გააანალიზოთ კონკრეტული საქმე და გარშემომყოფების ქცევები. ალბათ, მილიონი ნიუანსი მაინც იარსებებს, რომლებიც თქვენს იდეას ამ მომენტში განვითარებისა და ხორცშესხმის არანაირ შანსს არ დაუტოვებს. ამას გარკვეული პერიოდის შემდეგ აუცილებლად მიხვდებით და უკეთეს დროს შეარჩევთ აზრის გამოსახატავად.

    3. ადაპტაციის დროს ახანგრძლივებთ

    უკვე მუშაობის მეორე კვირა სრულდება და კვლავ ერთმანეთში გერევათ კოლეგების სახელები. ვერ იმახსოვრებთ, სად დევს ფურცლები პრინტერისთვის, იგვიანებთ და როცა შენიშვნას გაძლევენ, თავს იმართლებთ - ამის შესახებ ჩემთვის არაფერი უთქვამთო.

    რაშია შეცდომა? დარწმუნებული ხართ, რომ ახალბედა ხართ და ყველაფრის კეთება უზადოდ შეგიძლიათ. არადა, ასეთი დამოკიდებულებით არასერიოზულ იმიჯს იქმნით.

    როგორ უნდა მოიქცეთ? რაც შეიძლება მალე ჩამოიშორეთ ახალბედის სტატუსი. პირველ რიგში, კოლეგების სახელები დაიმახსოვრეთ. ვერ ახერხებთ? ფურცელზე ჩამოწერეთ და ძილის წინ გაიმეორეთ. ეცადეთ, ყველა საქმეში აქტიურად მიიღოთ მონაწილეობა - ასე ადვილად ჩაერთვებით სამუშაო პროცესში და აღარც ადაპტაცია გაგიჭირდებათ.

    4. გინდათ ყველასთან კარგი ურთიერთობა დაამყაროთ

    ცდილობთ, დახმარებაზე არავის უთხრათ უარი. გარკვეული პერიოდის შემდეგ კი ამჩნევთ, რომ ყველა ცდილობს, დაკისრებული მოვალეობები თქვენ გადმოგაბაროთ.

    რაშია შეცდომა? შეგიძლიათ უარის თქმა. როგორ მოიქცეთ? როცა კვლავ მოგმართავენ დახმარებისთვის, უთხარით, რომ დაკავებული ხართ და მცირე დახმარება თავად სთხოვეთ. ამის შემდეგ დახმარების მთხოვნელთა რიცხვი საგრძნობლად დაიკლებს.

    5. ოფისში გვიანობამდე რჩებით

    გინდათ ყველაფერი იდეალურად გქონდეთ და ამიტომ ოფისში გვიანობამდე რჩებით. კოლეგები ასეთ საქციელს კრიტიკულად შეაფასებენ და ჩათვლიან, რომ შეფისთვის თავის მოწონება გსურთ. უფროსი კი გადაწყვეტს, რომ დროულად ვერ ართმევთ თავს დაკისრებულ მოვალეობას.

    რაშია შეცდომა? სურვილი გაქვთ საუკეთესოდ მოაჩვენოთ თავი.

    როგორ მოიქცეთ? სწორად განსაზღვრეთ ამოცანები. უნდა შეძლოთ იმის დამტკიცება, რომ კარგი სპეციალისტი ხართ, შეგიძლიათ გუნდურად მუშაობა და დაკისრებულ მოვალეობებს დროულად ასრულებთ.

    გახსოვდეთ:

    იმისთვის, რომ ახალ სამსახურში სიყვარული მოიპოვოთ, საჭიროა:

    • ისაუბრეთ ცოტა და მეტად მოუსმინეთ სხვებს. ყურადღებით დააკვირდით მოვლენებს თქვენ გარშემო.

    • დაანახვეთ კოლეგებს, რომ არ გსურთ მათ კონკურენტად იქცეთ.

    • არ იჩქაროთ და ურთიერთობის პირველ ეტაპზე კოლეგებს თქვენი პირადი ცხოვრების შესახებ არაფერი მოუყვეთ.

    ჟურნალი "და ქალი"
    (სექტემბრის ნომერი)
    1 749 ნახვა
    GOGATV