თამუნა ერგემლიძემ არჩევანი გააკეთა შვილებსა და კარიერას შორის

თამუნა ერგემლიძე სერიალ''ჩემი ცოლის დაქალების'' მაყურებელს თეა კოტრიკაძის როლში მოევლინა. ეთიკისა და ესთეტიკის სამინისტროს ხელმძღვანელი მეშვიდე, ახალ სეზონში კვლავ დაგეგმავს ამა თუ იმ ღონისძიებას და სამინისტროს თანამშრომელთა საქმიანობას გააკონტრო-ლებს. ამჟამად თამუნა ერთ-ერთი უწყების საზოგადოებასთან ურთიერთობის დეპარტამენტში მუშაობს. თამუნას საქმიანობასთან ერთად, ოჯახზეც ვესაუბრეთ...

- თამუნა, არც ერთი თეატრის სცენაზე არ მინახავხართ, პროფესიით მსახიობი ხართ?
- დიახ, შოთა რუსთაველის სახელობის თეატრალური უნივერსიტეტის კინოსა და დრამის ფაკულტეტი მაქვს დამთავრებული, მაგრამ თეატრში არასოდეს მიმუშავია. ლილი იოსელიანის ჯგუფში ვსწავლობდი. ეს იყო ადამიანი, რომელიც პირველი დღიდანვე ზრუნავდა, ვყოფილიყავით იმაზე უკეთესი, ვიდრე ვიყავით.
მესამე კურსზე გავთხოვდი. ორსულად ვიყავი, როცა ჩვენს სადიპლომო სპექტაკლზე:''დრო და ქონვეები'' დავიწყეთ მუშაობა, ყველაზე გამორჩეული, ლამაზი გოგონას როლი მქონდა, რომელიც არცთუ სახარბიელოდ გათხოვდა. მითხრა, შვილებზე რომ შეგეკითხებიან და შენ მათზე ლაპარაკს დაიწყებ, თვალებში უნდა ჩანდეს სხივი, რომ შენთვის უძვირფასეს ადამიანებზე ლაპარაკობო. მიუხედავად იმისა, რომ ორსულად ვიყავი, ვერ მივხვდი, ეს როგორ გამეკეთებინა და ქალბატონმა ლილიმ მაჩვენა ეს სახე... ქალს, რომელიც ცხოვრებაში გათხოვილი არ ყოფილა და შვილი არ ჰყავდა, თვალში ისეთი სხივი ჩაუდგა, გავოცდი და დღემდე მახსოვს მისი გამომეტყველება.

- ამ წლების განმავლობაში სცენაზე დგომის სურვილი არ გაგჩენიათ?
- თეატრალურის დამთავრების შემდეგ, როცა ჩემი ჯგუფელები სხვადასხვა თეატრში მუშაობდნენ და თავიანთ სპექტაკლებზე მეპატიჟებოდნენ, არ მახსოვს, ცრემლის გარეშე მედევნებინოს თვალი რომელიმე სპექტაკლისათვის. სიმართლე გითხრათ, ეს ჩემთვის ძალიან რთული იყო,
მაგრამ ზუსტად ვიცოდი ჩემი პრიორიტეტი, მინდოდა, შვილებთან 24 საათი ვყოფილიყავი. არაჩვეულებრივი შვილები მყავს. თავი მათ და ოჯახს მივუძღვენი. ტყუპი ბიჭია - გიორგი და თორნიკე, რომლებსაც სექტემბერში 22 წელი შეუსრულდებათ.

- ალბათ, ბევრს გაუჩნდება კითხვა, პროფესიაზე უარის თქმა, მხოლოდ თქვენ გადაწყვეტილება იყო თუ მეუღლის თხოვნაც?
- (იღიმის) სიმართლე გითხრათ, ჩემი მეუღლე ძალიან გახარებული იყო ჩემი არჩევანით.

- მეუღლე რა პროფესიისაა და შვილებმა რა გზა აირჩიეს?
- მეუღლე ეკონომისტია, ხოლო შვილები ბიზნესადმინისტრირების ფაკულტეტზე სწავლობენ. აბსოლუტურად დამოუკიდებლები არიან.

- ტყუპ ძმას შორის არის განსხვავება ხასიათით, გარეგნობით?
- ფიზიკურად ერთმანეთს ძალიან ჰგვანან. ხასიათით კი ორივე თბილია და პასუხისმგებლობის გრძნობა აქვთ. ერთი უფრო დინჯი და მშვიდია, ვიდრე მეორე. ერთსა და იმავე სიტუაციაში შეიძლება, განსხვავებულად მოიქცნენ. ჩვენ ძალიან ვმეგობრობთ და როცა ვსხდებით და ვსაუბრობთ, მათ შორის არსებული აზრთა სხვადასხვაობა ყოველთვის მახარებს.

-''ჩემი ცოლის დაქალებში'' სანამ მიგიწვევდნენ, საკმაოდ დიდი პაუზა გქონდათ.
- კასტინგის მენეჯერ ეკა მჟავანაძეს დიდი ხანია ვიცნობ და სულ მთხოვდა, ამა თუ იმ კასტინგზე გამოვცხადებულიყავი. ვერასოდეს გავახარე და ვერც ის შევძელი, რომ ჩემი ცხოვრება ამ მხრივ რაღაცნაირად გამეხალისებინა. მივიჩნევ, რომ ახლა სწორედ ის დრო იყო, როცა ამ როლზე უარი არ უნდა მეთქვა. ვფიქრობ, საჭირო დროს შემომთავაზეს არაჩვეულებრივ სერიალში მონაწილეობა და მეც უარი არ მითქვამს.

- ოჯახში კონსულტაცია გაიარეთ, სანამ დათანხმდებოდით?
- არა, ოჯახს პირდაპირ გადაწყვეტილება მოვახსენე (იღიმის).

- ამ სერიალის მაყურებელი იყავით? საერთოდ, როგორი დამოკიდებულება გაქვთ ტელევიზორთან, ბოლო ხანს მას ბევრი''არ ცნობს''...
- ტელევიზორი ან გიყვარს, ან - არა. მე ბავშვობიდან მიყვარს ტელევიზორი, მაგრამ ბოლო ორი წელია, ვუყურებ მხოლოდ იმას, რაც, ასე ვთქვათ, მჭირდება. მაგალითად, ჩემს შვილებს, რომლებიც პროექტ''ერთი ერთში'' ცეკვავენ. პროფესიონალები არიან და უახლოეს მომავალში ჰიპ-ჰოპის სტუდიას გახსნიან. ამ პროექტისათვის ორგანიზატორებს ყოველ წელს ფრანგული დასი ჩამოჰყავთ და მათ შორის ორი ქართველი ცეკვავს - ჩემი შვილები. აუცილებლად დავდივარ''ერთი ერთში''''ლაივებზე'', მაგრამ თუ ვერ ვესწრები, მაშინ ტელევიზიით ვადევნებ თვალს. ასევე ვუყურებ''ჩემი ცოლის დაქალებს''. ადრე თვალს ვადევნებდი პოლიტიკურ და მსგავს შოუებს, მაგრამ დღეს ასე აღარ ვიქცევი.

- ადრეულ ასაკში შექმნილი ოჯახი ხშირ შემთხვევაში ვერ უძლებს წლებს. თქვენ როგორ შეძელით ურთიერთობის დღემდე მოტანა?
- ჩემს თავზე თქმა მერიდება, მაგრამ ნებისმიერი ხანგრძლივი ურთიერთობა გმირობაა. ალბათ, მთავარია, კაცსა და ქალს ერთად ყოფნის ძალიან დიდი სურვილი ჰქონდეთ. ურთიერთობაში მაშინ არის დათმობაც და ნდობაც. თუ ერთი უკვე''სხვაგან'' არის, მკითხველი მიხვდება, რასაც ვგულისხმობ, მაშინ ძალიან რთულია, კენტად დარჩენილმა ჯადოქრობა ჩაატაროს. ეს შეუძლე-ბელია. პალიტრა ქალს უჭირავს, რომ ყოველი დღე გააფერადოს და მრავალფეროვანი გახადოს, მაგრამ ამას მარტო ვერ შეძლებს, აუცილებელია, ორივე იყოს ამ პროცესში ჩართული.

- სერიალზე გკითხავთ, როცა ეკრანზე საკუთარ თავს უყურებთ, გაქვთ შენიშვნები?
- რასაკვირველია (იღიმის). პირველ რიგში, ძალიან გამიჭირდა ჩემი აღქმა, რადგან მივიჩნევ, რომ თავს არ ვგავარ. შემდეგ შედარებით ნაკლებ ყურადღებას ვაქცევდი გარეგნულ მხარეს, პრიორიტეტად დავსახე, დამაჯერებელი ვყოფილიყავი და დღემდე ამას ვცდილობ.

- თქვენს გმირს ასაკით გაცილებით პატარა პარტნიორი ჰყავს, ასეთი არაერთი შემთხვევაა ცნობილი. თქვენი აზრით, რა არის ამის მიზეზი?
- იმავეს ვიტყოდი კაცებზეც. მათთანაც დგება ის ასაკი, როცა ეწყებათ ლტოლვა გოგონებისადმი. მამაკაცისა და ქალის შემთხვევაშიც, შეიძლება, ეს იყოს ნორჩი ენერგეტიკა, რომელიც გადამდებია. ამხიარულებს, აბედნიერებს, პრობლემებს ავიწყებს, კარიერაზე ფიქრს დროებით წყვეტს. ქალს მოსწონს, ბიჭისთვის რომ გურუა, როცა ის თვალებში უყურებს და მის ყველა სიტყვას იმახსოვრებს. ჩემს გმირს კი ვატო სიყვარულის გამო კი არა, იმიტომ შესციცინებს თვალებში, რომ იცის, თეა ჭკვიანი ქალია და უკეთეს პირობებში ყოფნისათვის რაღაცების გათვალისწინებაა საჭირო. საერთოდ, ადამიანები ხომ ყოველთვის რაღაცის გამო არიან ერთად. ზოგჯერ ეს ნამდვილი გრძნობაა და ზოგჯერ ბევრი სხვა ფაქტორი. ეს მხოლოდ ორმა ადამიანმა იცის, უხილავია და გარშემო მყოფები ვერ მივხვდებით.

- თქვენი აზრით, რატომ''გაუძლო'' სერიალმა ამდენ სეზონს?
- სერიალში ყოფითი პრობლემები, მანკიერება, ინტრიგები და სრული რეალობა დევს, რაც ყოველდღიურად ხდება ჩვენ გარშემო. სულ ნაცნობი ამბებია, რასაც ძალიან კარგად მიაგნო ქეთი დევდარიანმა. სწორედ ეს ხდის მას საინტერესოს. სერიალი სავსეა მოულოდნელობებით, რაც მაყურებლისათვის ერთგვარი ადრენალინია და ყოველი მომდევნო სერიის ყურებისას აღვივებს ინტერესს: კიდევ რა იქნება, რა იქნება შემდგომ?!

ანა კალანდაძე