რა შეგინარჩუნებთ ახალგაზრდულ სახის კანს

სილამაზისა და ახალგაზრდობის შესანარჩუნებლად ქალბატონები ათასგვარ კოსმეტიკურ საშუალებას მიმართავენ. რა თქმა უნდა, ისინი ანელებენ კანის დაბერების პროცესს, მაგრამ გარეგანი მოვლის გარდა, ახალგაზრდობის შესანარჩუნებლად ძალზე მნიშვნელოვანია ორგანიზმის შინაგანი მოვლა.

სპეციალისტებმა დაასახელეს პროდუქტები, რომლებიც ხელს უწყობენ კანის ელასტიკურობისა და ახალგაზრდობის შენარჩუნებას.

თხილეული

სპეციალისტებმა თხილეულს მარადიული ახალგაზრდობის პროდუქტი უწოდეს, რადგან ისინი შეიცავენ ვიტამინ E-სა და კოენზიმ Q10-ს, რომლებიც აჩქარებენ კანის რეგენერაციისა და უჯრედების კვების პროცესს. მიუხედავად იმისა, რომ კოენზიმ Q10-ს ორგანიზმი დამოუკიდებლად გამოიმუშავებს, 30 წლის შემდეგ ის ნელ-ნელა თმობს პოზიციებს.

ვიტამინი E კი ძლიერი ანტიოქსიდანტია. ის კანის უჯრედებს ტოქსინებისა და მზის მავნე ზემოქმედებისგან იცავს. თუმცა გაითვალისწინეთ, თხილეული ძალზე კალორიული პროდუქტია და მეტისმეტად ნუ გაგიტაცებთ. სახის კანისთვის სრულიად საკმარისი იქნება კვირაში სამჯერ 50 გრამი ნუში, ფუნდუკი ან ნიგოზი

ნარინჯისფერი და წითელი ბოსტნეული

სახის კანის ლამაზი ფერისთვის კარგია ნარინჯისფერი და წითელი ხილისა და ბოსტნეულის მირთმევა: სტაფილო, წიწაკა, პომიდორი, გოგრა, გარგარი. მათში უხვადაა ბეტაკაროტინი -ანტიოქსიდანტები, რომლებიც ხელს უწყობენ კანის უჯრედების განახლებას. სხვათა შორის, ბევრ კოსმეტიკურ საშუალებაში შემავალი რეტინოლი იგივე A ვიტამინია, რომელიც ორგანიზმში კაროტინისგან წარმოიქმნება.

მომჟავო ხილი და კენკროვანები

ფორთოხალი, კივი, გრეიპფრუტი, შავი მოცხარი და მარწყვი დიდი რაოდენობით შეიცავენ C ვიტამინს. ის ამაგრებს სისხლძარღვებს და ხელს უწყობს კოლაგენის წარმოქმნას, რომელიც, თავის მხრივ, ანელებს დაბერების პროცესს.

ცხიმიანი თევზი

ნაოჭებისგან ზღვის ისეთი პროდუქტები დაგიცავთ, როგორებიცაა: ორაგული, სარდინი, ქაშაყი, სკუმბრია. საერთოდ, ზღვის თევზი A და D ვიტამინების წყაროა. ამასთან, ის შეიცავს ცხიმმჟავა ომეგა-3-ს, რომელიც აქრობს ანთებით პროცესებს. აღნიშნული ნივთიერებები აუმჯობესებენ სისხლის მიმოქცევის პროცესს, რის შედეგადაც კანი უფრო ელასტიკური და ლამაზი ხდება.

ბროწეული

ბროწეულში შემავალი ნივთიერებები აქტიურად ებრძვიან კანის მოდუნების პროცესს. ისინი ხელს უწყობენ კოლაგენისა და ელასტინის წარმოქმნას, რომლებიც კანს ელასტიკურობას უნარჩუნებენ. სწორედ მათი ნაკლებობის ბრალია, კანი სიმკვრივეს რომ კარგავს და შესაბამისად, ნაოჭები წარმოიქმნება. სხვათა შორის, ბროწეული შეიცავს ნივთიერებებს, რომლებიც ხელს უწყობენ ჭრილობების შეხორცებას.

ხაჭო

ხაჭოს კომპონენტი სელენი, ასევე A ვიტამინი, ძლიერი ანტიოქსიდანტებია, რომლებიც სახის კანის ნაადრევ დაბერებას აფერხებენ. გარდა ამისა, ხაჭო შეიცავს კალციუმს, რომელიც აუცილებელია მაგარი კბილებისა და ზოგადად, მტკიცე ძვლოვანი სტრუქტურის შესანარჩუნებლად.

ზეითუნის ზეთი

როგორც ცნობილია, ყველაზე ადრე მშრალი კანი ბერდება. კანის სიმშრალის წინააღმდეგ საბრძოლველად ცივი გამოხდის ზეითუნის ზეთი გამოგადგებათ. მასში შემავალი ცხიმმჟავები აადვილებს A, B, E ვიტამინების ათვისებას. ისინი კი ხელს უწყობენ ცხიმების წვისა და კანის უჯრედების აღდგენის პროცესს. სხვათა შორის, ზეითუნის ზეთში გაცილებით მეტი ცხიმმჟავა და B და E ვიტამინებია, ვიდრე ნებისმიერ სხვა ზეთში.

ჟურნალი "რეიტინგი"