გიორგი კეკელიძეს სიყვარული დისკომფორტს უქმნის

ყველაზე სასიამოვნო მოვლენა...

ჩემი დაბადება ყველაზე სასიამოვნო მოვლენა იყო ჩემს ცხოვრებაში. თუმცა, სამწუხაროდ, თავად არ მახსოვს და სხვები მიყვებიან მის შესახებ. გავჩნდი ხუთის ათ წუთზე.

ბავშვობა 90-იან წლებში...

''როცა წვიმდა, დედაჩემი ქოლგით მიშვებდა სკოლაში და ეგ მიიჩნეოდა ყველაზე სამარცხვინო ამბად. მაგის იქით მხოლოდ რეიტუზები და კედელი იდგა. ჰოდა, როგორც კი მოსახვევს გავცდებოდი, ვკეცავდი ამ ქოლგას და ერთი მიტოვებული სახლის წინ, ძველი ფოსტა-გაზეთების ყუთი რომ იყო, იმის უკან ვჩურთავდი და მივდიოდი სკოლაში, ვითარცა გმირი.''
90-იანი წლების საქართველოს ისტორია ყველამ კარგად იცის. ეს მდგომარეობა, რა თქმა უნდა, ბავშვებზე აისახა. მათ შორის ჩემზეც. როცა ასაკით პატარა ხარ, უბედურებებს მარტივად უმკლავდები. აუცილებლად უნდა ითქვას, რომ ყოველი მოვლენა ჩვენს არსებაში ილექება და ზრდასრულობისას სხვადასხვა ფორმით იჩენს თავს.

ოჯახი და მისი როლი ჩემს ცხოვრებაში

16 წლის ასაკში წამოვედი სახლიდან, მას მერე ოჯახის წევრებთან გაიშვიათებული ურთიერთობა მაქვს, რადგან ისინი ოზურგეთში ცხოვრობენ. ჩემს პროფესიულ არჩევანზე გავლენა სწორედ მათ მოახდინეს. ოჯახში მაძალებდნენ წიგნების კითხვას. ამისთვის მადლიერი ვარ.

საყვარელი წიგნები

ნაწარმოები ღირებულია, თუ მას წერს ნიჭიერი მწერალი, ამას მოსდევს, რამდენად განათლებულია ავტორი და აქტუალურია თუ არა არჩეული თემა.
ბოლოს ხელმეორედ წავიკითხე მიშელ უელბეკის ''ბრძოლის ველის გავრცობა."
საყვარელი წიგნებია: ''ვეფხისტყაოსანი," ''მობი დიკი" ''ჰეკლბერი ფინის თავგადასავალი."

როგორი მინდა ვიყო...

ადამიანები გარკვეულწილად შეგუებული ვართ იმას, როგორ გამოვიყურებით და ინტელექტუალურად განვითარების რამხელა პოტენციალი გვაქვს. მე დიდად უკმაყოფილო არ ვარ.

ტკბილ-მწარე სტუდენტობა

ღირებული სტუდენტობა მქონდა. ბევრი მეგობარი შევიძინე, არაერთ ადამიანს დავაკვირდი და მრავალფეროვანი ინფორმაცია შევითვისე.

მორალი და საზოგადოებრივი აზრი

საზოგადოებრივ აზრს ნებისმიერი ჩვენგანი ითვალისწინებს, რადგან თავად ვართ სოციუმის წევრები. რაც შეეხება მორალს, ძალიან რთული და ამოუცნობი ფენომენია. არავინ იცის, საიდან დაიბადა ეს ცნება და რატომ იჩენს თავს სინდისის ქენჯნა მაშინაც კი, თუ ჩვენი დანაშაული არავისთვის არ არის ცნობილი.

სიყვარული და სექსი

სექსი მარტივია და სიამოვნებასთან ასოცირდება. სიყვარული კი უფრო რთულია, წინააღმდეგობებს უკავშირდება და ადამიანს დისკომფორტს უქმნის.

აღიარება...

საკუთარ თავს არ ვუტყდები მარცხსა და სიკოჭლეში. ამასთან დაკავშირებით ბიბლიაში არაჩვეულებრივი იგავი წერია ღმერთსა და იაკობზე. უფალი ამარცხებს იაკობს და აკოჭლებს მას. ამბავი მკვეთრად მიუთითებს, რომ ყველა ჩვენგანი რაღაცით კოჭლია, ანუ თითოეულ ჩვენგანს აქვს გამოუსწორებელი ნაკლი. ვერასდროს მივაღწევთ სრულყოფილებას.

დასვენება და განტვირთვა...

ვისვენებ მეგობარ გოგონასთან ერთად ყოფნისას. ასევე ჩემი განტვირთვის საუკეთესო საშუალებებია მოგზაურობა და მუსიკის მოსმენა.

მე და პოლიტიკა
ყველა ადამიანი პოლიტიზებულია, რადგან ცხოვრება, როგორც ასეთი, გულისხმობს პოლიტიკას. არსებობს ხალხი, რომელიც ყოველდღიურ პოლიტიკურ მოღვაწეობაშია ჩართული, მათ რიგს მივეკუთვნები მეც. თუმცა, იმავდროულად გაცნობიერებული მაქვს, რომ ჩემი თანამდებობა არ გულისხმობს პოლიტიკურ პოზიციას. ჩემი ღია მხარდაჭერა დისკომფორტს არ უნდა უქმნიდეს მოწინააღმდეგე ფრთას.

ჩემი შიში…

ტკივილი და სიკვდილი მაშინებს.

ის, რაც იყო გუშინ...

გუშინდელი დღე მოიცავდა, ერთი მხრივ, საქმიან რუტინას და, მეორე მხრივ, პირად ცხოვრებას, რომელიც ყველაზე მეტად საინტერესოა, ჩვენ მას კლიშეებისა და ჩარჩოების გარეშე ვქმნით. დილა დაიწყო სამსახურით: შეხვედრები საქმიან პარტნიორებთან, ხელმოწერები საბუთებზე; მოგვიანებით ვესტუმრე ერთ-ერთ ტელევიზიას, შემდეგ წავიკითხე საჯარო ლექცია და საბოლოოდ დაიწყო ყოველდღიურობის ის ნაწილი, რომელიც საზოგადოებისთვის ცნობილი არ უნდა იყოს.

საქართველო

ჩვენი ქვეყნის დღევანდელი მდგომარეობა ისეთივე რთულია, როგორიც იყო გუშინ. დიდი იმედი მაქვს, მომავალში ყველაფერი გამოსწორდება. საქართველოს საზოგადოება ახლა ფორმირდება. ეს მოვლენა ახასიათებს ქვეყნებს, რომლებმაც დიდი ხანი არ არის, რაც დამოუკიდებლობა მოიპოვეს. 70 წელი ვიყავით ძალიან მძიმე რეჟიმის პირობებში. ამან უკიდურესად უარყოფითი გავლენა მოახდინა ჩვენს მენტალიტეტზე.

ჩემი შეცდომა...

ნაკლებად ვუსმენ ადამიანებს და ძალიან ჯიუტი ვარ.

რჩევები...

ჩემი ხასიათიდან გამომდინარე, მეგობრებს ჩემზე ხელი აქვთ ჩაქნეული. თავს იკავებენ რჩევების მოცემისგან.

მე განსხვავებული ვარ!

სხვებისგან განვსხვავდები მიზანდასახულობით. ეს თვისება ზოგადად ბევრს აქვს, მაგრამ ჩემში განსაკუთრებით ღრმად არის ფესვგადგმული. მე მაქვს ჩემი პრინციპები, რომელსაც ძალიან რთულად ვთმობ. პრინციპულობისა და მიზანდასახულობის დამსახურებაა ჩემი წარმატება.

ჩემი მომავალი

ძალიან ამბიციური ვარ. ვიქნები მსოფლიო დონის რეჟისორი და ვიმუშავებ ხარისხიან ფილმებზე. ვითანამშრომლებ ინტელექტუალ მსახიობებთან.
წყარო: reitingi.ge