''ჩემს მეუღლეს აღარ უნდოდა, რომ პოპულარული ვყოფილიყავი''

დათო ფორჩხიძემ პოპულარობას გემო ახალგაზრდობის წლებიდან და ბოლომდე გაუგო. მის ცხოვრებაში იყო ''თავში ავარდნაც'' და ''კისრის წატეხვაც'', დღეს კი ახალგაზრდა თაობას ურჩევს, პოპულარობის ამ გვერდით ეფექტს მაქსიმალურად აარიდონ თავი.

- ჩემ გარშემო არ არიან ისეთი ადამიანები, რომლებსაც პოპულარობაზე არ უოცნებიათ. ისეთ პროფესიას მივყავი ხელი, არასწორი იქნებოდა, რომ ამაზე არ მეოცნება. რაც პოპულარული და უფრო ცნობილი ხარ, შენს საქმეშიც წარმატებული ხარ.
პირველად სკოლაში ვიმღერე, მერე - უნივერსიტეტში. ასმა კაცმა რომ დამიკრა ტაში, ჩემთვის უკვე დიდ რამეს ნიშნავდა. ''კავეენზე'' გამოსვლების შემდეგ ვგრძნობდი, რომ სრულიად უცნობი ადამიანები მცნობდნენ და ლაპარაკობდნენ ჩემზე. ''სახის'' პერიოდი რომ გავიხსენოთ, ერთხელ შალვა რამიშვილმა გვითხრა, ფანებს თქვენთან შეხვედრა უნდათო. მივედით დიდ დარბაზში და ჩვენთვის მოულოდნელად უამრავი თაყვანისმცემელი დაგვხვდა. ამას მოჰყვა პირველი კონცერტი ფილარმონიაში, როდესაც მართლა ანგრევდნენ კარებს. იმ დროს მივხვდი, რომ ეს იყო არა უბრალოდ პოპულარობა, არამედ სუპერპოპულარობა. მინდოდა, ამისთვის ბევრი რამ გამეკეთებინა და გავფრთხილებოდი ისე, როგორც საკუთარ თავს და ჩემთვის ძვირფას ადამიანებს, ისეთ სასიცოცხლოდ მნიშვნელოვან რამედ ჩავთვალე პოპულარობა.

- სხვათა შორის, გია სურამელაშვილსაც უმტვრევდნენ კარს ფილარმონიაში.
- გია სურამელაშვილის საწინააღმდეგო არაფერი მაქვს, მეგობრები არ ვართ და ერთმანეთისგან ყველაფრით ძალიან განვსხვავდებით, მაგრამ შეხვედრისას ერთმანეთს კარგ გამარჯობას ვეუბნებით. იმ დროს მე მყავდა ბევრი კერპი, მათ შორის არ იყო გია სურამელაშვილი და იყო ირაკლი ჩარკვიანი. პოპულარობის კუთხით ის იყო ჩემი შთაგონების წყარო. ამას რომ ვამბობ, ზოგი ფიქრობს, ვღადაობ, არადა, სავსებით სერიოზულად ვამბობ. ის, რომ გია სურამელაშვილიც პოპულარული იყო, ლექს-სენი, მერაბ სეფაშვილი, ლელა წურწუმია და მეც პოპულარული ვიყავი, ეს მე არც მაკნინებს, არც მამაღლებს.
ამას წინათ ერთ-ერთმა ბანკმა გამართა საღამო, რომელზეც მე და დათო ხუჯაძეს დაგვიძახა, გოგა არ ყოფილა, რადგან ის სხვა ამბებშია, თუმცა ჩვენ ვმეგობრობთ. არაერთხელ უთქვამთ ჩემთვის, ''სახეს'' დიჯეები უკრავენ და ახალგაზრდებს მოსწონთო. ეს გამიგია, მაგრამ პირისპირ არ შევჯახებივარ. დათო ძალიან სკეპტიკურად იყო განწყობილი. კონცერტს 2500 ადამიანი დაესწრო, შევასრულეთ ''სახის'' სიმღერები, ჩვენ შემდეგ გამოდიოდა ''სუპერმენ ლავერსი'', რომლებსაც მხოლოდ 20 კაცი დავუტოვეთ, ისე დავღალეთ ხალხი (იცინის)
რასაკვირველია, ეს ხალხი ამ 15 წლის განმავლობაში ყოველდღე ჩემზე არ ფიქრობდა, მაგრამ ''თოვლი მოსულას'' პირველი ფრაზაც არ დაგვამთავრებინეს, ''შენ რა სექსი ხარ'' ზეპირად იცოდნენ და ჩვენი სხვა ჰიტებიც. დათოს გავხედე, როგორ მოგწონს-მეთქი. დათოს გაუჩნდა სურვილი, რომ ერთად გავაკეთოთ დიდი კონცერტი.

- ახალი თაობა რატომ ვერ ინარჩუნებს პოპულარობას?
- დღეს ბევრი ნიჭიერი ახალგაზრდა ხდება პოპულარული, მერე კი ზოგი კისერს იმტვრევს. საქართველოში დაუოკებელი ლტოლვაა სიახლეებისკენ, ყველას ჰგონია, რომ ახალი კაფე უფრო კარგია, ვიდრე ძველი, არადა, ძველმა უფრო კარგად იცის, როგორ მოემსახუროს კლიენტს. ახალ მომღერლებს უცებ აიტაცებენ ხოლმე, მით უმეტეს, ტელეპროექტებში. მაგალითად, მთელი ერი ორი კვირა მსჯელობდა, ამალია ჯიბლაძემ ფონოგრამით იმღერა თუ არა. დღეს კი არავის აღარ ახსოვს, მას ვეღარ დააჯერებ, რომ ნიჭიერი არ არის და ალბათ უსამართლოდ მიაჩნია, რომ აღარ ჩანს. ყველა სფეროში იერარქიაა, პირდაპირ გენერალი ხომ ვერ გახდები?!. არც სალომე ქათამაძისთვის და არც სხვა კონკურსანტისთვის არასდროს მითქვამს, ჩემზე მაგრები ხართ-მეთქი. უბრალოდ, ვიცოდი მათი პოტენციალი. ვეუბნებოდი, თუ ბევრს იშრომებთ, ჩემზე მაგრები გახდებით-მეთქი. მე არ მყავდა მრჩეველი და ბევრჯერ წავიმტვრიე კისერი. თუკი ვინმე ტაშს დაგიკრავს, უნდა ჩაეხუტო და მადლობა უთხრა. პოპულარობაში გამართლებაც უდიდეს როლს თამაშობს.

- როცა პოპულარობამ გარკვეული ხნით ზურგი გაქცია, არ გქონია დეპრესია?
- მინიმუმ, ათი წელი არავის ვახსოვდი. როცა ვიღაცები მეკითხებოდნენ, ჯიუტად ვამბობდი, რომ ჩემთან პოპულარობა თვითონ მოვიდოდა და ასეც მოხდა. როცა მოვიდა, მე მას კარგად დავხვდი. იმ ჩავარდნის დროითაც ვამაყობ. რასაკვირველია, დღესაც დავუშვებ შეცდომას და შესაძლოა, ამ ინტერვიუთიც ვინმე გავაღიზიანო, მაგრამ ბევრის გულის მოგებაც მინდა. არა მგონია, ცუდი რამ მინდოდეს.



- უარყოფითი რა აქვს პოპულარობას?
- საქართველოში პაპარაცები არც ერთ ცნობილ ადამიანს არ დასდევენ, ასეთ დონეზე არავის აღიარებენ. იმითაც უნდა დაკმაყოფილდე, როცა გეუბნებიან, მევასები და კაი ტიპი ხარო. თუკი საქართველოს კათოლიკოს-პატრიარქს არ ჩავთვლით, სუპერავტორიტეტი ქვეყანაში არ გვყავს. სოციალურმა ქსელებმა კი სააშკარაოზე გამოიტანა ადამიანების ერთმანეთისადმი დამოკიდებულება. მე მხოლოდ იმაზე ვნერვიულობ, რომ ჩემზე გაკეთებული კომენტარი ჩემი ოჯახის წევრებმა არ ნახონ. თავად ეს კომენტარები მე ნაკლებად მანერვიულებს, სოციალურ ქსელში ჩემი გვერდიც არ მაქვს.

- ფული მოაქვს პოპულარობას?
- ჩვენს ქვეყანაში პოპულარული და ფულიანი ყოფილი პრემიერ-მინისტრი ბიძინა ივანიშვილია. ალბათ, იმის კითხვა გინდოდა, სიმღერას თუ მოაქვს ფული. გიპასუხებ, რომ საარსებო ფული მოაქვს. იმას, ვინც წუწუნებს და დოტაციას ითხოვს, ყოველთვის ვეუბნები - დაანებეთ თავი სიმღერას და გადადით ბიზნესსექტორში. ვიღაც თუ უნიჭო დაიბადა, მისი პრობლემაა. მსმენელის პრობლემა არ არის, რომ კლიპის გადასაღებად მომღერალმა დაფინანსება ვერ იშოვა. პენსიონერები ხომ არ არიან, მათზე სახელმწიფომ რომ იზრუნოს.



- პირად ცხოვრებას პოპულარობა უშლის ხელს?
- არა, არანაირად. ჩემი ოჯახის წევრებს უხარიათ, ისინი ჩემი ცხოვრებითაც ცხოვრობენ. მამაჩემი მეუბნება ხოლმე, რომ არ გიცნობდე, მთლად ისეთი კარგი მეგონებოდი, რასაც შენზე ლაპარაკობენო. ''ვოისში'' ხალხმა ძალიან შემიყვარა.

თავიდან ჩემს მეუღლეს უნდოდა, პოპულარული აღარ ვყოფილიყავი, რადგან ძალიან ბევრი თაყვანისმცემელი მყავდა და ეს მართლაც იყო მისი პრობლემა. მე ისე მიყვარდა, მიყვარს და მეყვარება, რომ მართლაც დავჯექი სახლში და ამას არ ვამადლი. მაგრამ ახლა ყველანაირად ხელს მიწყობს და ძალიან სიამოვნებს ჩემი პოპულარობა. ჩემში არა მხოლოდ იმიტომ არის დარწმუნებული, რომ არ ვუღალატებ, არამედ იმითაც, რომ სისულელეს არ ვიტყვი და ადამიანებს თავს არ ვაგინებინებ, როგორც ბევრი აკეთებს დღეს. ზოგი ითვლის, რამდენმა შეაგინა და ჰგონიათ, რომ ამით ძალიან წინ არიან და აქტუალურები ხდებიან, მე კი ამაზე მეცინება.



პოპულარობა სხვაა, ცნობადობა - სხვა. მე მგონია, რომ ხალხის სიყვარული, ანუ პოპულარობა მე მაქვს. ამას ვგრძნობ და ვენაცვალე მათ, მე ხალხისთვის ვმღერი. ჩემზე ამბობენ, დღე სადღაც ''სვეცკ'' პონტში გავჩითავთ, საღამოს კი დაცვასთან ერთად სვამსო. ეს მართლაც ასეა და სასაცილოა ამ ქვეყანაში ''სვეტსკობაზე'' საუბარი (იღიმის). ესენი ხალხს ეძახიან გოიმებს, ხალხი კი ამათ ეძახის გოიმებს, ვერ შეხვდნენ ერთმანეთს. საქართველოს დასცინიან და ეღადავებიან. ჩვენს ტელევიზიასა და შოუბიზნესს ლანძღავენ, ჩადით პოსტსაბჭოთა ქვეყნებში და ნახეთ, რა ხდება ამ სფეროებში. უნდა დავამთავროთ ეს დაცინვა და სხვა ეტაპზე გადავიდეთ.