ჯულიანა ბარ-გნარი სექსში კრეატიული არ არის
ცხოვრებამ მოასწრო ჩემი გამოძერწვა. უფრო ძლიერი და პრინციპული გავხდი. პრინციპულობა კი ცუდ თვისებად არ მიმაჩნია.
სხვანაირი ჯულიანა...
არ ვიცი, ხალხს რამდენად შეუმჩნევია, მაგრამ უზომოდ რომანტიკოსი ვარ. ამასთან ერთად, ძლიერი ადამიანი ვარ და ყველა განსაცდელისგან რაღაცას ვსწავლობ.
ჩემი პრიორიტეტები
ოჯახი და პრინციპები ჩემთვის ყველაზე მნიშვნელოვანია.
ადვილად შესამჩნევი ნაკლოვანება.
ეჭვიანი ვარ, თუმცა- არა უმიზეზოდ. თუ მამაკაცი საბაბს არ მომცემს, ჩემი ეჭვიანობით არ შევაწუხებ.
ჩემი ხასიათის განუყოფელი ნაწილია ფეთქებადობა. შემიძლია, დიდხანს ვითმინო და ბოლოს ვულკანივით ამოვიფრქვე. ხშირ შემთხვევაში ამას ვნანობ კიდეც, მაგრამ თავს ვერ ვერევი.
ფლირტი
ჩემთვის ფლირტი ზედაპირული ურთიერთობის სახეობაა. ამ დროს იცი, რომ არაფერი გამოვა, მაგრამ მაინც იპრანჭები. ფაქტობრივად, არასდროს ვფლირტაობ.
სექსში...
პირადი ცხოვრების განხილვა მიზანშეწონილად არ მიმაჩნია, მირჩევნია, ჩემთვის დავიტოვო. ინტიმთან დაკავშირებულ კითხვებს ყოველთვის თავიდან ვირიდებ. მაქსიმუმი, რაც შემიძლია ვთქვა, არის ის, რომ სექსში კრეატიული არ ვარ.
ცხოვრებისეული გაკვეთილები
ასაკით არც თუ ისე დიდი ვარ მაგრამ ცხოვრებამ მოასწრო ჩემი გამოძერწვა. უფრო ძლიერი და პრინციპული გავხდი. პრინციპულობა კი ცუდ თვისებად არ მიმაჩნია.
ადამიანების ისტორიებით ვინტერესდები, ყურადღებით ვუსმენ მონათხრობს და მათ შეცდომებზე ვსწავლობ. შევამჩნიე, როდესაც რაიმე კითხვა მაქვს, ღმერთი მაძლევს შანსს, პასუხი მივიღო.
''ცეკვავენ ვარსკვლავებში" გამოჩენის შემდეგ...
,,ცეკვავენ ვარსკვლავებში" მონაწილეობის შემდეგ ჩემი ცხოვრება ძალიან შეიცვალა, არა იმიტომ, რომ პოპულარული გავხდი, არამედ იმიტომ, რომ ახალი პიროვნული თვისებები შევიძინე: კომუნიკაბელურობა და თავდაჯერებულობა. ასევე, ბევრი საინტერესო
ადამიანი გავიცანი.
ამაღელვებელი რომანი
ადამიანები ხშირად ამბობენ, რომ ყოფილი შეყვარებული არ უყვარდათ... ასეთ ხალხს პატივს არ ვცემ. რეალობა არის ის, რომ უწინდელმა გრძნობამ უბრალოდ გაიარა და იგი სხვამ, ახალმა შეცვალა. მე ჩემს ყველა განვლილ სიყვარულს მოწიწებით ვეკიდები. იმ მომენტში, როდესაც შეყვარებული ვარ, ჩემს ცხოვრებაში ყველაზე რომანტიკული პერიოდი დგას, შესაბამისად, ყველა რომანი განსაკუთრებული და ამაღელვებელია.
''ბიჭების ყურადღების ცენტრში ყოფნა მომწონდა...''
ბავშვობაში პანიკურად არ მინდოდა გაზრდა. როცა მივხვდი, რომ ქალური ფორმები მიყალიბდებოდა, ყველაფერი გავაკეთე იმისთვის, რომ დიდხანს შემენარჩუნებინა ბავშვური ვიზუალი. ბიჭებთან ვმეგობრობდი. Aახლა რომ ვუფიქრდები, შეიძლება, ვაჟებთან იმიტომ ვატარებდი დიდ დროს, რომ მათი ყურადღების ცენტრში ყოფნა მომწონდა.
ამბავი, რომელზეც მეღიმება
რამდენიმე საუკეთესო მეგობარი მყავს. ერთ-ერთი მათგანია ელა. ერთხელ ელაკომ სკოლაში კინაღამ ცეცხლი გააჩინა. მაშინ ბუხრები იდგა საკლასო ოთახებში. იქიდან ცეცხლმოკიდებული შეშა გამოიღო და პარკეტის ცარიელ ადგილას ჩადო. ამ ამბის გახსენებისას სულ მეღიმება. ელა ბავშვობიდან ჩემთან ერთად იზრდება. ვფიქრობ, დიდი მნიშვნელობა აქვს იმას, რომ ურთიერთობა გრძელვადიანია.
ყველაზე მეტად ჩვენს ურთიერთობაში ის მომწონს, რომ არ აქვს მნიშვნელობა, რამდენი კვირა ან თვე თუ ვერ ვნახავ, მაინც არ ვუცხოვდებით. საკუთარ თავს ერთგულ მეგობრად მივიჩნევ, ამიტომ იმავეს მოვითხოვ ჩემთვის ძვირფასი ხალხისგან. მეგობარია ის, ვინც არ გღალატობს. ღალატი არ არის მხოლოდ ერთი ადამიანის მეორეში გაცვლა. ღალატია მისი ინტერესების გაუთვალისწინებლობა და ზურგს უკან ჭორაობა.
პირველად...
ხომ იცით, გოგონები რა მალე იზრდებიან...… პირველად ბიჭი რომ მომეწონა და მისი შეყვარებული გავხდი, ელას ვერ გავუმხილე, მეგონა, ვერ გამიგებდა. მხოლოდ დაშორების შემდეგ გამოვუტყდი. ძალიან ეწყინა, რომ ვუმალავდი. თავად როგორც კი ეწვია სიყვარული, მოვიდა და მითხრა. გამიხარდა, როგორც იქნა, ელაც გაიზარდა-მეთქი.
''ბანკეტისთვის ისე ვემზადებოდი, თითქოს პატარძალი ვიყავი!''
კლასელ ბიჭებში საკმაოდ პოპულარული ვიყავი. ერთხელ ერთ ბავშვს დედამისმა ჰკითხა, ჯული ხომ არ მოგწონსო? მან კი უპასუხა, ადგილი აღარ არის, ყველას უყვარს და რა აზრი აქვსო?
ბანკეტისთვის ისე ვემზადებოდი, თითქოს პატარძალი ვყოფილიყავი, ყველაფერს უდიდესი მნიშვნელობა მივანიჭე და თავად მოვიფიქრე თითოეული დეტალი. ჩემი აზრით, ყველა უნდა წავიდეს გამოსაშვებ საღამოზე!
მამაკაცი, როგორც ფენომენი
ყველას აწუხებს შეკითხვა: ,,რა სურთ ქალებს?", მაგრამ ნაკლებად აქტუალურია ,,რა სურთ მამაკაცებს?" მჯერა, ყველა ჩვენგანს, განურჩევლად სქესისა, სურს ბედნიერება და მეორე ნახევრის პოვნა...
თუ მამრობითი სქესის წარმომადგენელი ჩემდამი განსაკუთრებულ ყურადღებას იჩენს, არ ვფიქრობ, რომ მას მოვწონვარ. ზოგიერთი გოგონასთვის ბიჭისგან მხოლოდ ერთი მზერის დაჭერაც სამარისია, რომ ილუზიები შეიქმნას.
სიყვარული ნაბიჯ-ნაბიჯ მოდის
ერთ ბიჭს ჩავუვარდი გულში, თავად მისადმი არანაირი გრძნობა არ მქონია. გადაწყვიტა, ჩემი მეგობარი გამხდარიყო. ეს ერთგვარი ტაქტიკა იყო, ალბათ. სულ მეკითხებოდა, კონკრეტულ თემასთან დაკავშირებით რა მოსაზრება მქონდა. თავის შეხედულებასაც მიზიარებდა და ერთად მივდიოდით ჭეშმარიტებამდე. გარკვეული დროის მერე ვიგრძენი, რომ მის გარეშე ცხოვრება გამიჭირდებოდა. საბოლოო ჯამში მაინც დავშორდით. ურთულესი პერიოდი გადავიტანე. როგორც უმეტეს შემთხვევაში ხდება ხოლმე, ურთიერთობის დანგრევა ორივე ჩვენგანის ბრალი იყო. ჩვენი წარსულიდან მახსოვს სასიამოვნო მოგონებები. თუ მკითხავენ, რამდენჯერ მოდის სიყვარულიო, ვუპასუხებ, რომ რამდენჯერაც გინდა. თუ გრძნობა ნამდვილია, ის აუცილებლად ცვლის პიროვნებას უკეთესობისკენ. ჩემი აზრით, ქალს აუცილებლად სჭირდება სიყვარული, რომ აყვავდეს.
ერთ დღეს ოჯახს შევქმნი
მუდამ ჩემს ქმარზე შეყვარებული ცოლი ვიქნები. ყველაფერს გავაკეთებ იმისთვის, რომ ჩვენი თანაცხოვრება საინტერესო იყოს. მხოლოდ დიასახლისად ქცეული ქალი მამაკაცისთვის მოსაბეზრებელი ხდება. აუცილებლად მეც და ჩემს ქმარსაც უნდა გვქონდეს ჩვენ-ჩვენი საქმე.
ჯერჯერობით დაოჯახება ვერ წარმომიდგენია. ალბათ იმიტომ, რომ არავინ მყავს გვერდით. გათხოვებისთვის 26 წლის მერე ვიქნები მზად. ახლა განა გართობა მინდა, უბრალოდ, ვცდილობ, მყარად დავგე ფეხზე და საკუთარ სურვილებში გავერკვიო.
მე პატივს ვცემ ჩემი მეუღლის მშობლებს, თუმცა არც დედას დავუძახებ და არც – მამას.
კომფორტულად ვიგრძნობ თავს, თუ მე და ჩემი რჩეული ცალკე ვიცხოვრებთ.
აუცილებლად მოსიყვარულე დედა ვიქნები. სიტკბოსა და სითბოში გავზრდი ქალიშვილს.
რელიგია ჩემს ცნობიერებაში
ღმერთის მწამს, მაგრამ დატვირთული გრაფიკის გამო ეკლესიაში ვერ დავდივარ. მესმის, რომ ეს გასამართლებელი საბუთი არ არის.
წყარო: reitingi.ge
