როგორ ცხოვრობენ არაბი პრინცესები

დინა აბდულაზიზ ალ საუდი, საუდის არაბეთის პრინცესაა. მისი დიდგვაროვანი წარმოშობა ყველასთვის ცნობილია, გარდა ამისა, დინას განუმეორებელი შარმითა და უზადო სტილითაც იცნობენ. დინა ელიტური და მოდური ქალია, საუდის არაბეთის დედაქალქში არაერთ მოდურ ბუტიკს ფლობს და აქტიურად მონაწილეობს მის მენეჯმენტში. ისე ნუ წარმოიდგენთ, თითქოს მხოლოდ საკუთარი თავისა და გატაცებებისთვის იცლის - პირველ ყოვლისა დინა ბედნიერი ცოლი და 3 შვილის დედაა.
მოდი გადავავლოთ თვალი თანამედროვე პრინცესისა და დიდგვაროვანი მემკვიდრეების დედის ცხოვრებას.
დინა მოდის სამყაროში ცნობილი სახეა არამარტო წარმომავლობით, არამედ დახვეწილი სტილითაც. ის ყოველთვის ცნობილი ბრენდების ძალიან ძვირფას სამოსსა და აქსესუარებს ყიდულობს. დინას ბუტიკში კლიენტები მხოლოდ მისი პირადი მიწვევით ხვდებიან.  ამ ბუტიკისთვის დინა პირადად არჩევს სამოსს. მის რჩეულებში ხვდებიან როგორც უკვე აღიარებული დიზაინერები, ასევე დამწყებნიც. ამით დინა ნიჭიერ ახალგაზრდებს მოდის ინდუსტრიაში თავის დასამკვიდრებლად ეხმარება.

აღმოსავლელი პრონცესა სამოსს მხოლოდ პირადი გემოვნებით როდი ირჩევს. ტანსაცმელი აღმოსავლელი ქალის კულტურულ და მენტალურ შეხედულებებსაც უნდა მიესადაგებოდეს.
მაგალითად, Diane Von Furstenberg-ის კაბა ოდნავ შეცვალეს, რათა ბუტიკის ასორტიმენტში შესულიყო. მუხლამდე სიგრძის მაგივრად, კოჭებამდე დააგრძელეს.

დინა არ აკლდება ჩვენებებს, პრეზენტაციებს, ახალი ბუტიკების გახსნას. ბევრ დიზაინერს მიაჩნია თავი მის ფავორიტად. მაგალითად, მისი საქორწილო კაბა ნიჭიერმა დიზაინერმა Azzedine Alaia-მ შექმნა. კრისტიან ლაბუტენმა თავის ერთ-ერთ ფეხსაცმელს დინას სახელი უწოდა. მოდის ფოტოგრაფებს კი დინა თავისი კაშკაშა სტილითა და იმიჯის ხშირი ცვლის გამო მოსწონთ.
დინა საოცრად მოხდენილად უხამებს აღმოსავლურ და დასავლურ სტილს. მოკლე ვარცხნილობები, მოკლე კაბები, რომლებიც ქალურ აღნაგობას უსვამენ ხაზს.

დინა საუდის პრინცის აბდულაზიზ ბინ ნასირ აბდულაზიზ ალ საუდის მეუღლეა. წყვილს ქალიშვილი და ტყუპი ვაჟი ჰყავს. მისი მოხდენილი სხეულის შემხედვარე ძნელად იფიქრებთ, რომ სამი შვილი ჰყავს გაჩენილი. დიდი ხნის განმავლობაში დინა ქმართან ერთად ნიუ-იორკში ცხოვრობდა. საუდის არაბედში კი ცოტა ხნის წინ დაბრუნდა. დღეს ქალაქ ელ-რიადში ცხოვრობს. მისთვის ქვეყნის დატოვება და უცხოურ ჩვენებებზე ან წვეულებებზე დასწრება პრობლემას არ წარმოადგენს.

თავადაც ხედავთ, რომ მისი სტილი მკაცრი აღმოსავლეთისგან შორს დგას. ასე ჩაცმული ქალები მის სამშობლოში საზოგადოებაში გამოჩენას იშვიათად ბედავენ. დინა, შესაძლოა საიმიჯო სახეა საკუთარი ქვეყნისა და თავისი იმიჯით ამტკიცებს: მის ქვეყანაში ქალების უფლებები დაცულია. თუმცა, კანონი ყველა საუდელისთვის როდი იწერება.