რუსთაველის თეატრში ანიტა რაჭველიშვილისა და დავით ალადაშვილის კონცერტი გაიმართება

შოთა რუსთაველის აკადემიური თეატრის მცირე დარბაზის სცენაზე 5 აპრილს, ხელოვანთა კავშირი "კონცეპტ-არტის" ორგანიზებით, ანიტა რაჭველიშვილისა და დავით ალადაშვილის კონცერტი გაიმართება.

საზოგადოებისთვის ცნობილ და საყვარელ ნაწარმოებებს შეასრულებენ მსოფლიოში აღიარებული მეცო-სოპრანო ანიტა რაჭველიშვილი და ნიუ-იორკში მოღვაწე ქართველი პიანისტი დავით ალადაშვილი.
5 აპრილს, ბზობის დღესასწაულზე
საღამოს გახსნის სამების საპატრიარქო გუნდი სვიმონ ჯანგულაშვილის ხელმძღვანელობით. აგრეთვე, მონაწილეობას მიიღებენ ახალგაზრდა საოპერო მომღერლები: მარიამ როინიშვილი და ნატალია ქუთათელაძე.

"პროექტის მიზანია, აღადგინოს სალონური საღამოები, ეს ფორმატი მნიშვნელოვან ისტორიას ინახავს. ბევრი დიდი ხელოვანის დებიუტი საქართველოსა თუ უცხოეთში, სწორედ სალონურ ატმოსფეროში შედგა. კამერული საღამოები და აუდიტორიასთან უშუალო კონტაქტი ასევე ხელს შეუწყობს კლასიკური მუსიკის პოპულარიზაციას", - აცხადებენ ორგანიზატორები.

პროექტის წარმომდგენია ფარმაცევტული კომპანია "ავერსი", ორგანიზატორი: ხელოვანთა კავშირი "კონცეპტ-არტი", საინფორმაციო მხარდაჭერა: რადიო "ფორტუნა", "მედიაპალიტრა", "რუსთავი 2", ჟურნალი "სითი", საინფორმაციო ცენტრი 11808.

წყარო: ambebi.ge