თბილისის გოგონათა გუნდის წარმატებული ნაბიჯები ქართულ საგუნდო მუსიკაში

საგუნდო მუსიკა ქართული კულტურული მემკვიდრეობის უმნიშვნელოვანესი ნაწილია. თანამედროვე ქართული ხელოვნების განვითარებას კი დიდ ძალისხმევასთან ერთად ხელშეწყობაც სჭირდება. დღეს საქართველოში მრავალი საგუნდო კოლექტივი მოღვაწეობს. 2013 წლის შემოდგომაზე კი მათ რიცხვს კიდევ ერთი - თბილისის გოგონათა გუნდი შეემატა. გუნდის დაბადება ფართო საზოგადოებას ამცნო თბილისის IV საგუნდო ფესტივალმა, რომლის ფარგლებშიც შედგა მისი წარმატებული პრემიერა. გუნდის ხელმძღვანელია ვ. სარაჯიშვილის სახელობის თბილისის სახელმწიფო კონსერვატორიის საგუნდო-სადირიჟორო ფაკულტეტის სამაგისტრო პროგრამის სტუდენტი - ომარ ბურდული. თბილისის გოგონათა გუნდი ახალგაზრდა დირიჟორთან ერთად დიდი პასუხისმგებლობით ეკიდება საქმეს. აქტიურად მონაწილეობს კლასიკური მუსიკის პოპულარიზაციისთვის გამართულ კულტურულ ღონისძიებებში, საქველმოქმედო კონცერტებსა და შემოქმედებით საღამოებში. გუნდის რეპერტუარს ძირითადად ქართველ კომპოზიტორთა - ი. კეჭაყმაძის, ჯ. ბეგლარიშვილის, ზ. ბოლქვაძის შესანიშნავი ქმნილებები შეადგენს, თუმცა გუნდი ასევე წარმატებით ასრულებს მსოფლიო საგუნდო მუსიკის შედევრებს.ქართველი მსმენელის წინაშე არაერთი წარმატებული გამოსვლის შემდეგ, თბილისის გოგონათა გუნდის ისტორიაში მნიშვნელოვანია კიდევ ერთი სერიოზული წარმატება.

2015 წლის 15-30 მარტს ჩატარდა საქართველოს ბავშვთა და ახალგაზრდული საგუნდო კოლექტივების პირველი ეროვნული კონკურსი, რომლის ორგანიზატორები გახლდნენ: საქართველოს საგუნდო საზოგადოება, თბილისის ვ. სარაჯიშვილის სახელობის სახელმწიფო კონსერვატორია, საქართველოს ფოლკლორის სახელმწიფო ცენტრი, ევ. მიქელაძის სახელობის თბილისის ცენტრალური სამუსიკო სასწავლებელი. კონკურსი ჩატარდა საქართველოს განათლებისა და მეცნიერების სამინისტროს ხელშეწყობით. მხარდამჭერები გახლდნენ: საქართველოს კულტურისა და ძეგლთა დაცვის სამინისტრო, თბილისის მერია, ახალგაზრდობის სულიერი და ინტელექტუალური განვითარების ცენტრი, საქართველოს მასწავლებელთა პროფესიული განვითარების ეროვნული ცენტრი. კონკურსი ჩატარდა ორ ტურად: 15-20 მარტი - რეგიონული და 28-30 მარტი - ფინალური. ეს იყო პირველი ეროვნული კონკურსი, რომელშიც არაერთმა საგუნდო კოლექტივმა მიიღო მონაწილეობა სრულიად საქართველოს მასშტაბით. კონკურსი სამ კატეგორიას მოიცავდა: აკადემიური სიმღერა, ქართული ხალხური სიმღერა და ქართული გალობა. თბილისის გოგონათა გუნდმა კი მიიღო გრან-პრი კატეგორიაში "აკადემიური სიმღერა". ეს გუნდისთვის უდიდესი წარმატებაა ასეთი მასშტაბის მქონე კონკურსის ფარგლებში. ამასთან, ეს არის პასუხისმგებლობა, ნდობა ქართული საგუნდო მუსიკალური სამყაროსგან. გუნდი უდიდეს მადლობას უხდის ეროვნული კონკურსის ორგანიზატორებს, ჟიურის წევრებს და გულშემატკივარს ნდობისა და სიყვარულისთვის.
თბილისის გოგონათა გუნდს აქვს იმის პოტენციალი, რომ შემოქმედებითი საქმიანობა საზღვრებს გარეთაც გაიტანოს საქართველოს სახელით სხვადასხვა კონკურსებსა და ფესტივალებზე. ამას, რა თქმა უნდა, სჭირდება დიდი ხელშეწყობა, დაფინანსება და მხარდაჭერა. ეს ახალგაზრდული კოლექტივი მრავალგზის გაახარებს ქართველ მსმენელს ეროვნული და მსოფლიო საგუნდო მუსიკის გენიალური ქმნილებებით.

წარმატებას ვუსურვებთ თბილისის გოგონათა გუნდს!