რის მანიაკს ეძახიან ნანა ნებიერიძეს
ჩვენი რუბრიკის დღევანდელი სტუმარი მოცურავე და ევროპის ჩემპიონი წყალში ხტომაში ნანა ნებიერიძეა. იგი საზოგადოებას სხვადასხვა ამპლუაში ევლინება, სიახლეებს არ უშინდება და ცხოვრებისეულ გამოწვევებს თამამად იღებს.
ნანამ მაყურებლის გული ''ცეკვავენ ვარსკვლავებში'' მოიგო. საზოგადოებამ იგი ''ორ ვარსკვლავშიც'' იხილა.
ქართველი ჩემპიონი ბავშვობიდან მსახიობობაზე ოცნებობდა. ოცნება რეალობად ექცა, როდესაც ''ყინულის დედოფალში'' მთავარი როლი შეასრულა. ამჟამად ''ჩემი ცოლის დაქალების'' შემოქმედებით ჯგუფთან თანამშრომლობს.
- პოპულარულობა მომაბეზრებელია?
- თუ საკითხს ზოგადად მივუდგებით, მსჯელობა რთული იქნება, რადგან ადამიანები ერთმანეთისგან განსხვავებული ინდივიდები ვართ. ჩემი პირადი შეხედულებით, პირიქით, პოპულარულობა სასიამოვნო პასუხისმგებლობას გვაკისრებს. ხალხის მისაბაძი მაგალითები ვართ, ამიტომ გამუდმებით უნდა ვსწავლობდეთ.
- წარმატებისკენ მიმავალ გზაზე ყველაზე მეტად რა გაგიჭირდათ?
- ბავშვური სიცელქისა და სილაღის დათმობა. გული მწყდება, რომ სულ შეჯიბრებებისთვის ვემზადებოდი, ვმოგზაურობდი და ჩვეულებრივი, სტანდარტული ბავშვობისთვის დრო აღარ მრჩებოდა.
- საყვარელმა საქმემ ახალი თვისებები თუ აღმოგაჩენინათ საკუთარ თავში?
- კი. საყვარელ საქმეში მოღვაწეობა საკუთარი თავის შეცნობის საუკეთესო საშუალებაა. აღმოჩნდა, რომ რისკზე წასვლა შემიძლია. ამისი მაგალითებია ''ორ ვარსკვლავში'' მონაწილეობა, ''ჩემი ცოლის დაქალებში'' ნინკას როლის თამაში.
- რა მიგაჩნიათ წარმატების ფორმულად?
- როგორც სიყვარულს არ აქვს ფორმულა, ისევე ვერ მოიძებნება წარმატების ფორმულა. თუმცა წინსვლისთვის ყველა ვარიანტში აუცილებელია შრომა!
- ოდესმე საკუთარი თავით გიამაყიათ?
- კი, მაშინ, როდესაც დედა გავხდი. ქალის უპირველესი მისია დედობაა. ნინა ხელში ავიყვანე თუ არა, გავაცნობიერე, რომ ჩემი დანიშნულების პირველი ნაწილი შევასრულე. მეორე ეტაპი ბავშვის აღზრდაა.
- ერთერთ ინტერვიუში აღნიშნეთ, რომ სწავლა-განათლებასთან დაკავშირებით მამა ძალიან მკაცრი იყო. ამან გავლენა მოახდინა თქვენზე?
- დიახ. ამ კუთხით მეც სიმკაცრე გამოვიჩინე ნინასთან. ძალიან მნიშვნელოვანია, ადამიანი განათლებული იყოს, მით უმეტეს ქალი, რადგან მომავალში მან დედის როლი უნდა შეითავსოს. დღეს ჩემი ქალიშვილიც მშობელია. დარწმუნებული ვარ, რომ თავადაც საუკეთესო თვისებებს ჩაუნერგავს შვილს.
- როგორ გგონიათ, მომავალში გათხოვდებით?
- კი (იცინის), რატომაც არა.
- რას ურჩევდით დამწყებ სპორტსმენებს?
- მიზანდასახულები უნდა იყვნენ, აუცილებელია ესმოდეთ, რისკენ მიისწრაფვიან და რის ფასად. არაადამიანური შრომა მოუწევთ, ამისთვის ფიზიკურადაც და ფსიქოლოგიურადაც მზად უნდა იყვნენ. სპორტში უმნიშვნელოვანესია ნებისყოფა. თუ არ აქვთ, უნდა გამოიმუ
შაონ. მე მჯერა, რომ ფორტუნასაც ლომის წილი აქვს ადამიანის წარმატებაში.
- კარიერა რამეში ხელს გიშლით?
- საერთოდ არაფერში. კარიერა რომ არა, ვერ ვიქნებოდი ბედნიერი. ჩემთვის დამღლელია უსაქმურობა. სიახლე მჭირდება. ცხოვრების საინტერესოდ გატარებას ვცდილობ.
- რა არის აუცილებელი წინააღმდეგობების დასაძლევად?
- ჯანსაღი იუმორი.
- ყველაზე კომფორტულად რომელ სფეროში გრძნობთ თავს?
- კინოინდუსტრიაში საკუთარი თავი ვიპოვე.
- თუ პრინციპები და პროფესიონალიზმი ერთმანეთს უპირისპირდება, როგორ უნდა მოიქცეს ადამიანი?
- თუ სხვა ადამიანს არაფერს უშავებს, სამსახურებრივი აუცილებლობიდან გამომდინარე შეიძლება კომპრომისზე წასვლა.
- როგორ უნდა შეინარჩუნონ ადამიანებმა წარმატება?
- არ უნდა იფიქრონ, რომ საკმარის ცოდნას ფლობენ. მუდმივად ძიების პროცესში უნდა იყვნენ და პროფესიული კუთხით დაიხვეწონ.
ხალხისთვის მომაბეზრებელია ერთი და იმავე ადამიანის ტელევიზორში ყურება. არც ''აორთქლება'' არის მიზანშეწონილი. ოქროს შუალედი საუკეთესო გამოსავალია, ამ დროს მაყურებელს არც ვწყინდებით და არც ვენატრებით.
- წარმატებისთვის ბრძოლისას ყველაზე დიდ მხარდაჭერას ვისგან გრძნობდით?
- რა თქმა უნდა, ოჯახის წევრებისგან. ძალიან მინდოდა მათი იმედების გამართლება.
- როდის მიხვდით, რომ თქვენი კარიერა სპორტში დასასრულს მიუახლოვდა?
- 2000 წლის ოლიმპიადის შემდეგ, როდესაც სიდნეიდან დავბრუნდი. დეპრესიაში ჩავვარდი. მოგვიანებით აღმოვაჩინე, რომ ცხოვრება ერთი სფეროს ირგვლივ არ უნდა ტრიალებდეს. ჩვენ წინაშე მრავალი საინტერესო კარია, რომელიც შეგვიძლია გამოვაღოთ, თუ ფორტუნა მათ გასაღებს მოგვაწვდის.
- რა არის თქვენთვის განტვირთვის საუკეთესო საშუალება?
- ჩემს შვილსა და შვილიშვილთან ერთად ყოფნა.
- რას შეცვლიდით ქართული სპორტის სფეროში?
- მეტ თანხას გამოვუყოფდი სპორტსა და სპორტსმენებს. დიდი ხნის ამბავია, მაგრამ ეს პრობლემა ახლაც აქტუალურია, ამიტომ მაგალითს მოგიყვანთ. ჩემი მწვრთნელი, უნიჭიერესი პიროვნება, უცხოეთში წავიდა, რადგან საქართველოში თავს ვერ ირჩენდა. დაბალი ანაზღაურებისა და დაუფასებლობის გამო საქართველოდან პროფესიონალები დღესაც გარბიან.
- ადამიანებს ადვილად ენდობით?
- არა. ინტუიცია მაქვს, რომელიც მკარნახობს, ვის უნდა მივენდო და ვის - არა.
- რა იყო თქვენს ცხოვრებაში ყველაზე დაუვიწყარი მოვლენა?
- მთელ ჩემს ცხოვრებას ერთ დიდ, დაუვიწყარ და საოცარ მოვლენად აღვიქვამ.
- რთულ მომენტებში როგორ ანუგეშებთ საკუთარ თავს?
- რეალისტი ვარ. მჯერა, რომ შეცდომის დაშვების უფლება ყველას გვაქვს. ამ სიტყვებს ვუმეორებ თავს და ვარწმუნებ, რომ მომავალში ყველაფერი კარგად იქნება.
- თქვენ იყავით ჟურნალისტი, მსახიობი, მოცეკვავე, მომღერალი... კიდევ რა ამპლუაში მოგვევლინებით?
- რაიმე ახალი შესაძლებლობა თუ გამოჩნდება, აუცილებლად დავთანხმდები. ყოველთვის მივესალმები ახალ, საინტერესო გამოწვევებს, ალბათ ამიტომ მეძახიან პროექტების ''მანიაკს'' (იცინის).
- მიმტევებელი ხართ?
- პატიებისთვის ზუსტად 5 წუთი მჭირდება. ჩხუბის შემდეგ მალე მილბება გული და ვდარდობ, რატომ ავყევი ემოციებს-მეთქი.
წყარო: reitingi.ge
